Yanmei yọ omọvo Isẹri Jihova jọ nọ ọ be rria unuakpọ Asia. Ẹdẹ jọ, o te fiobọhọ kẹ aye jọ nọ o tuaro nọ a re se Mingjie fa edhere vrẹ. a Mingjie o te yere Yanmei nọ: “Whẹ kobiruo. Ọghẹnẹ ọ ghale owhẹ!” Kẹsena Yanmei ọ tẹ nọ Mingjie sọ o te were iẹe re aimava a gbe wuhrẹ Ebaibol na kugbe. Mingjie ọ ta uwhremu na nọ ọ be hai lẹ se Ọghẹnẹ anwẹdẹ re o fiobọhọ kẹe vuhu ukoko uzẹme Ọghẹnẹ. Fikieme ọ be hae rọ lẹ ere?

 Mingjie ọ ta nọ evaọ ukpe 2008, ogbẹnyusu riẹ jọ nọ o tuaro o zizie i rie kpohọ ichọche jọ nọ a rẹ jọ fiobọhọ kẹ ahwo nọ a ko. Nọ ọ gaviezọ kẹ ovuẹ nọ a kẹ no, ọ tẹ nọ ozerẹ na oria nọ o je se ẹme riẹ na no ze. Ozerẹ na ọ tẹ ta kẹe nọ Ebaibol na, keme oye họ Ẹme Ọghẹnẹ. Mingjie ọ tẹ gwọlọ nọ o re se Ebaibol na. Fikiere ọ tẹ dẹ Ebaibol ẹvẹrẹ Chinese nọ ahwo nọ a tuaro a rẹ sai se, nọ a rẹ jọ Oyibo se braille. Ebaibol na o te ikulu-ebe 32, yọ o se rie re evaọ oware wọhọ emerae ezeza. Nọ Mingjie o bi se Ebaibol na, ọ tẹ te ruẹ vevẹ nọ uwuhrẹ eghẹnẹ esa nọ e rrọ ọvo nọ a be hai wuhrẹ evaọ obọ ichọche nọ ọ be nya na yọ ọrue. O te je vuhumu nọ Ọghẹnẹ o wo odẹ, yọ odẹ na họ Jihova.

 Nọ oke o be nya na, uruemu ahwo ichọche na o gbẹ jẹ were Mingjie he. O muẹrohọ nọ a bi yeri uzuazọ rai lele eware nọ o bi se evaọ Ebaibol na ha. Wọhọ oriruo, a rẹ ghale emu nọ a there obọ kẹ ahwo kpobi, rekọ emu nọ a re kiọkọ a rẹ kẹ ahwo nọ a tuaro. Uruemu okienyẹ nana o kẹ Mingjie uye gaga, fikiere ọ tẹ be gwọlọ ichọche ọfa nọ o re kpohọ evaọ okegbe nọ ọ be rria. Oyejabọ nọ Mingjie ọ jẹ hae rọ lẹ re ọ ruẹ ukoko Ileleikristi uzẹme na.

 Fiki oware nọ Yanmei o ru kẹe na, Mingjie ọ tẹ rọwo nọ a wuhrẹ iẹe Ebaibol na. Nọ u te ẹdẹ jọ, Mingjie o te kpohọ ewuhrẹ Isẹri Jihova evaọ orọ ọsosuọ kpobi. Mingjie ọ ta nọ: “Ewuhrẹ ọsosuọ nọ mẹ nya na ọ rẹ thọrọ omẹ ẹro vievie he. Inievo-emezae gbe erọ emetẹ na kpobi a nabi yere omẹ ziezi. Onana u duobọte omẹ udu gaga. Dede nọ me tuaro na, me muẹrohọ nọ a you ohwo kpobi.”

 Mingjie ọ tẹ te nyaharo ziezi je mu ewuhrẹ họ ẹnya ẹsikpobi. O rẹ were iẹe gaga re ọ so ile ukoko na, rekọ o jọ bẹbẹ kẹe keme a re fa obe-ile na fihọ braille hi. Inievo ukoko na a te fiobọhọ kẹ Mingjie nọ ọ sai ro ru obe-ile obọriẹ. Euwa 22 o rehọ e riẹ nọ o ro ru ile obe-ile ukoko na nọ i bu te udhuhrẹ gbe ikpegbọvo (151) na fihọ braille! Evaọ amara Ane 2018, Mingjie o te mu usi uwoma họ ẹta evaọ ẹgbede. Nọ omoke o vrẹ no, ọ tẹ be hae rọ euwa 30 ta usi uwoma kamara kamara.

 Re Yanmei ọ sai fiobọhọ kẹ Mingjie ruẹrẹ oma kpahe kẹ ame-ọhọ, Yanmei o te rekọdo enọ ọkiẹriwo avọ eria Ebaibol nọ e rrọ obe A Koko Omai Họ re Ma Ru Oreva Jihova na kẹ Mingjie. Evaọ amara Ahrẹ 2018, Mingjie ọ tẹ họ-ame. Ọ ta nọ: “Uyoyou nọ inievo-emezae gbe erọ emetẹ na a dhesẹ kẹ omẹ evaọ okokohọ ubrotọ yena u duobọte omẹ udu gaga. Me muhọ ẹviẹ keme obọnana me kuomagbe ukoko uzẹme Ọghẹnẹ no.” (Jọn 13:34, 35) Fikinọ Mingjie ọ gwọlọ nọ o re dhesẹ ọkpọ uyoyou nọ a dhesẹ kẹe na re, ọ be rọ oke riẹ kpobi ta usi uwoma na enẹna.