Ong-li yọ Osẹri Jihova jọ nọ ọ be rria Bulgaria. O je wuhrẹ aye jọ nọ a re se Zlatka Ebaibol na, rekọ ọzae Zlatka o je wuhrẹ hẹ. Ong-li ọ ta nọ: “Nọ ma jẹ ta ẹme kpahe uzuazọ uviuwou, mẹ tẹ ta kẹe nọ u wuzou gaga re ma ta kẹ ọzae hayo aye gbe emọ mai inọ ma you rai. Zlatka o te rri omẹ avọ ọkora; ọ ta nọ ọ re vuẹ ọzae riẹ avọ ọmọtẹ riẹ nọ ọ kpako te ikpe izii no inọ o you rai ẹdẹvo ho!”

 Zlatka ọ ta nọ: “Mẹ sai ru oware kpobi kẹ ae, rekọ mẹ sae ta ẹme yena ha.” O fibae nọ, “Oni mẹ o ri rovie unu riẹ ta kẹ omẹ inọ o you omẹ ẹdẹvo ho, yọ oniode mẹ ọ ta kẹ oni mẹ nọ o you rie ẹdẹvo gbe he.” Ong-li o te dhesẹ kẹ Zlatka evaọ Ebaibol na inọ Jihova ọ ta kẹ Jesu nọ o you rie, yọ ọ ta riẹ do via. (Matiu 3:17) Ọ tẹ tuduhọ Zlatka awọ re ọ lẹ se Jihova kpahe ẹme na, jẹ gbaemu inọ ọ rẹ ta kẹ ọzae riẹ avọ ọmọtẹ riẹ inọ o you rai.

 Ong-li ọ ta nọ: “Nọ edẹ ivẹ e vrẹ no, Zlatka ọ tẹ ta kẹ omẹ avọ evawere inọ ọ lẹ se Jihova re o fiobọhọ kẹe. Nọ ọzae riẹ o kpozi, ọ tẹ ta kẹe nọ o wuhrẹ evaọ Ebaibol inọ u wuzou gaga re aye o you ọzae riẹ jẹ rọ adhẹẹ kẹe. Kẹsena nọ o dhizu omojọ no, ọ ta kẹ ọzae riẹ nọ o you rie gaga! Nọ ọmọtẹ riẹ o kpozi, Zlatka ọ tẹ gbalọ iẹe jẹ ta kẹe nọ o you rie! Zlatka ọ ta kẹ omẹ nọ: ‘Udu u te omẹ otọ no. Anwọ ikpe buobu ze na, mẹ be sae ta oware nọ o rrọ omẹ iroro via ha, rekọ avọ obufihọ Jihova, mẹ sae ta kẹ ahwo uviuwou mẹ nọ me you rai.’”

 Ong-li o fibae nọ, “Nọ mẹ ruẹ ọzae Zlatka evaọ oka nọ u lele i rie, o vuẹ omẹ nọ: ‘Ahwo buobu a rẹ ta kẹ omẹ nọ mẹ kẹ aye mẹ uvẹ re wha wuhrẹ iẹe Ebaibol na ha, rekọ mẹ ruẹ vevẹ nọ Ebaibol na nọ o bi wuhrẹ na u bi fiobọhọ kẹ uviuwou mẹ. Orọo mai o ga vi epanọ o jọ no, yọ eva e be were omai gaga.’”