Okenọ a yẹ omẹ, yọ ọsẹgboni mẹ a wo udhu ọsese jọ evaọ iwhre Galicia, nọ o jọ ofẹ Spain jọ. Mẹ họ ọmọ avọ ene evaọ usu emọ eree nọ ọsẹgboni mẹ a yẹ. Ma jẹ were eva kugbe ziezi evaọ uviuwou mai. Evaọ oke yena, iviuwou buobu evaọ Spain, o tẹ kawo omọvo jọ o re kpohọ isukulu nọ a re jo wuhrẹ ahwo nọ a te jọ izerẹ ichọche. Rekọ evaọ uviuwou mai, mai imasa soso ma kpohọ isukulu yena.

Nọ mẹ jọ ikpe ikpegbesa, me te kpohọ isukulu na re evaọ okpẹwho Madrid. Oke yena yọ oniọvo-ọmọtẹ mẹ ọ rrọ obei no vẹre. Rekọ evaọ oria nana, ohwo ọvo o wo uvẹ ohwo ho. Whọ rẹ jọ etẹe ruẹ ahwo nọ a be were eva kugbe wọhọ epanọ egbẹnyusu a re ru hu. Iruẹru egagọ, olẹ gbe izi nọ a re koko ọvo ohwo kpobi ọ rẹ tẹrovi. Irioke frifri yọ ma kpama no re ma lẹ je roro didi kpahe eware egagọ mai, rekọ mẹ jẹ hae ruẹ oware ovo roro kpahe he. Uwhremu na, ma vẹ rọ ẹvẹrẹ Latin so ile je ru iruẹru Emase. Uzẹme riẹ họ, me je wo otoriẹ oware ovo nọ a je ru hu, yọ o jọ omẹ oma wọhọ ẹsenọ Ọghẹnẹ o thabọ no omẹ gaga. Fikiere, me je lele ohwo ọvo ta ẹme he. Nọ mẹ avọ oniọvo mẹ ma tẹ nyaku ohwohwo dede, ẹme nọ ma rẹ ta ọvo họ, “Hail purest Mary” (koyehọ, rọ adhẹẹ kẹ Meri nọ ọ mae fo na.) Ma tẹ re emu no, iminiti ọgba ọvo a kẹ omai nọ ma rẹ rọ ta ẹme kugbe. Uzuazọ nana u wo ohẹriẹ gaga no oghẹrẹ uzuazọ nọ ma je yeri evaọ uviuwou mai. Oma o jọ omẹ goli, yọ mẹ jẹ hae viẹ ẹsibuobu.

Dede nọ o jọ omẹ oma nọ Ọghẹnẹ o thabọ no omẹ gaga, evaọ okenọ mẹ jọ ikpe ikpegbihrẹ, mẹ tẹ ya eyaa wọhọ epanọ o gwọlọ je zihe ruọ ozerẹ-aye. Me ru onana fikinọ o gbahọ nọ me re ru ere. Rekọ u kri hi, mẹ tẹ jẹ nọ omamẹ sọ Ọghẹnẹ ọ ginẹ salọ omẹ re mẹ jọ ozerẹ-aye. Izerẹ-eyae na a jẹ hae ta nọ ohwo kpobi nọ o wo iroro itieye o ti kpohọ erae ehẹle. Rekọ avro ọ gbẹ jọ omẹ udu ghele, keme mẹ riẹ nọ Jesu ọ jẹ hai siomano ahwo ho, ukpoye ọ jẹ hai wuhrẹ ahwo je fiobọhọ kẹ ae. (Matiu 4:23-25) Evaọ okenọ mẹ jọ ikpe udhe, ozerẹ-aye nọ mẹ jọ na u gbe je kiehọ omẹ oma ha. Ozerẹ-aye nọ ọ mai wuzou evaọ oria na ọ tẹ vuẹ omẹ nọ mẹ sai kpo otẹrọnọ me gbe wo avro sọ mẹ rẹ jọ ozerẹ-aye, yọ onana u gbe omẹ unu gaga. Ẹsejọhọ ozọ u je mu ei nọ izerẹ-eyae efa a te gwọlọ rọ aro kele omẹ. Fikiere me te gine kpo.

Nọ me zihe kpo, eva e dha ọsẹgboni mẹ hẹ. Rekọ fikinọ iruo e jọ iwhre nọ ma jọ na ha, mẹ tẹ kwa kpobọ Germany, yọ oniọvo-ọmọzae mẹ jọ ọ jẹ rria obei. Oniọvo-ọmọzae mẹ na ọ jọ utu jọ nọ o rẹ họre kẹ ahwo, onọ ahwo Spain nọ a jẹ rria Germany a to họ. Utu nana o rẹ họre kẹ ahwo nọ a bi ru iruo gbe eyae re a rẹrote ae ziezi wọhọ epanọ u fo, yọ mẹ tẹ rrọ kugbe ae, eva e rẹ were omẹ. Fikiere u kri hi me te kuomagbe ae, jẹ tubẹ rọo omọvo rai jọ. Ma jẹ hae kokohọ nya ẹwho wariẹ inọ a gbe ru oware nọ ma gwọlọ kẹ omai hi oja ona, yọ mẹ jẹ hae ghale ebe utu na kẹ ahwo. Me je roro nọ emamọ oware jọ me bi ru na.

Rekọ nọ oke o be nyaharo na, eva e gbẹ jẹ were omẹ tere he. O jọ omẹ oma wọhọ nọ ahwo utu na a je ru lele eware nọ a be ta ha. Oware jọ nọ o tubẹ via evaọ ukpe 1971 o tẹ lẹliẹ eva dha omẹ thesiwa. Izoge emezae gbe erọ emetẹ nọ e jọ utu mai na a mahe uwou nọ ahwo nọ a dikihẹ kẹ egọmeti Spain evaọ Germany a jẹ jọ ru iruo, yọ ẹwho Frankfurt o jọ. A mahe oria na re a dhesẹ kẹ ahwo nọ oghẹrẹ nọ egọmeti Spain o bi ro su o were rai hi. Rekọ me rri rie nọ eva e tẹ be make dha ohwo, enẹ u fo nọ o re ro dhesẹ iẹe via ha.

Evaọ okenọ me yẹ ọmọ ọsosuọ mẹ, mẹ tẹ ta kẹ ọzae mẹ nọ mẹ gbẹ gwọlọ kpohọ ẹgwae utu na ha. Oma o jọ omẹ goli keme ohwo ọvo evaọ usu egbẹnyusu mẹ a nyaze te ruẹ omẹ avọ ọmọ mẹ hẹ. Eware nana kpobi e tẹ jẹ lẹliẹ omẹ nọ omamẹ nọ, ‘Kọ eme ma tubẹ rrọ uzuazọ kẹ dede. Kọ erere jọ o re gine noi ze nọ ohwo ọ tẹ be họre epanọ eware i re ro woma kẹ ahwo?

Evaọ ukpe 1976, ọzae-avọ-aye jọ nọ a rrọ Isẹri Jihova a tẹ nyaze te ta usi uwoma kẹ omai jẹ kẹ omai ebe rai jọ. Nọ a zihe ze ẹdẹfa, mẹ tẹ jẹ nọ ae enọ buobu kpahe uye-oruẹ, okienyẹ, gbe oware nọ akpọ o ro woma kẹ ahwo jọ vi ahwo jọ. U gbe omẹ unu gaga inọ a rehọ Ebaibol kẹ iyo enọ kpobi nọ mẹ nọ rai! Fikiere mẹ tẹ rọwo nọ a wuhrẹ Ebaibol kugbe omẹ.

Oware nọ o mai jọ omẹ oja evaọ oke ọsosuọ họ, epanọ mẹ rẹ rọ riẹ eware jọ nọ mẹ riẹ vẹre he. Rekọ nọ mẹ avọ ọzae mẹ ma mu iwuhrẹ Isẹri Jihova họ ẹnya evaọ obọ Ọgwa Uvie, oghẹrẹ nọ me je rri eware u te muhọ nwene. Emọ ivẹ e jọ omai obọ evaọ oke yena. Isẹri Jihova a jẹ hae nyaze te wọ omai kpohọ ewuhrẹ je fiobọhọ kẹ omai rẹrote emọ mai evaọ obei. Onana u te ru nọ eva Isẹri Jihova e jẹ rọ were omẹ gaga.

Rekọ avro ọ gbẹ jọ omẹ udu kpahe ẹme egagọ. Kẹsena me te weze bru ahwo uviuwou mẹ evaọ obọ Spain. Oniọvo ọsẹ mẹ jọ nọ ọ rrọ ozerẹ ichọche jọ, o te je ru re mẹ siọ Ebaibol na ba ewuhrẹ. Rekọ Isẹri Jihova nọ e jọ ẹwho na a fiobọhọ kẹ omẹ gaga. A rọ Ebaibol na kẹ iyo enọ mẹ wọhọ epanọ Isẹri Jihova nọ e jọ obọ Germany a ru. Fikiere mẹ tẹ gbaemu nọ mẹ rẹ wariẹ mu Ebaibol na họ ewuhrẹ nọ me te zihe kpobọ Germany. Ọzae mẹ ọ gbẹ rọwo nọ o re wuhrẹ Ebaibol na ha, rekọ mẹ wariẹ muhọ ewuhrẹ ghele. Evaọ ukpe 1978, mẹ tẹ họ-ame evaọ ukoko Isẹri Jihova.

Eware nọ mẹ jọ Ebaibol wuhrẹ na i fiobọhọ kẹ omẹ riẹ ẹjiroro uzuazọ gbe oghẹrẹ nọ me re ro yeri emamọ uzuazọ. Wọhọ oriruo, obe 1 Pita 3:​1-4 o ta nọ, jọ eyae a “romakpotọ kẹ ezae rai” je wo “adhẹẹ odidi,” a ve je wo “ẹzi udhedhẹ . . . onọ o rrọ ghaghae gaga evaọ aro Ọghẹnẹ.” Eria ikere itieye na i bi fiobọhọ kẹ omẹ ru oware nọ u re dhesẹ nọ mẹ yọ emamọ aye gbe emamọ oni.

O vrẹ ikpe ọgbagbisoi no nọ mẹ rọ họ-ame na. Yọ eva e be were omẹ gaga nọ mẹ rrọ usu inievo akpọ soso nọ e be gọ Jihova Ọghẹnẹ. Eva e tẹ jẹ be were omẹ nọ emọ ene evaọ usu emọ isoi mẹ a rrọ ukoko na re.