A yẹ omẹ evaọ ẹwho nọ a re se Székesfehérvár, obọ Hungary. Ẹwho nọ a jo yẹ omẹ na, ikpeware buobu e jariẹ via. Yọ eware nọ e tubẹ jariẹ via anwọ ikpe odu ọvo (1,000) nọ i kpemu, a gbe bi gbiku rai rite inẹnẹ. Ahwo buobu a jọ ẹwho na whu evaọ etoke ẹmo akpọ avivẹ, ẹmo na ọ tẹ jẹ raha eware gaga. Whọ rẹ gbẹ ruẹ oghẹrẹ nọ ẹmo na ọ raha eware te evaọ ẹwho na rite inẹnẹ. U yoma kẹhẹ.

Ọsẹ oni mẹ gbe oni oni mẹ ae mẹ rria kugbe evaọ oke nọ mẹ jọ ọmaha. Aimava na a jẹ hae were omẹ kẹhẹ, maero kọ oni ologbo mẹ, Elisabeth. O fiobọhọ kẹ omẹ kẹle Ọghẹnẹ gaga. Oke nọ mẹ jọ umuo ikpe esa vrẹ, kowọwọ kowọwọ mẹ avọ iẹe ma jẹ hae wariẹ olẹ nọ a re se Olẹ Olori na. O make jọ ere na, mẹ kpako joma te ikpe ọgba taure mẹ tẹ te riẹ oware nọ ma jẹ lẹ kpahe na.

Taso tuvo ọsẹgboni mẹ a je ru iruo. Oyejabọ nọ ọsẹgboni ologbo mẹ a jẹ rọ rẹrote omẹ evaọ oke nọ mẹ gbẹ maha na. Ọsẹgboni mẹ a jẹ daoma ru iruo gaga re a koko ugho họ nọ a rẹ rọ dẹ emamọ uwou nọ ma rẹ rria. Rekọ Ẹdẹ-Ọmaha avọ ivẹ kamara kamara mai uviuwou na soso ma re kokohọ re ma jọ oria ovo re emu. O jẹ hae were omẹ kẹhẹ.

Ukpe 1958, oware nọ ọsẹgboni mẹ a be thuẹhọ anwẹdẹ na o te ti te ai obọ. A koko ugho họ ziezi, a tẹ dẹ uwou nọ mai imasa ma rẹ rria. Kẹsena me te mu ọsẹgboni mẹ họ elele rria. Eva nọ e were omẹ, a rẹ ruẹ unu gbiku riẹ hẹ. Rekọ evawere yena i kri hi. Nọ emerae ezeza e vrẹ no, ẹyao ọta o te kpe ọsẹ mẹ.

O da omẹ te ẹzi. Mẹ kareghẹhọ nọ oke yena mẹ jẹ hae lẹ nọ: “Ọghẹnẹ, eme whọ rọ kuvẹ re ọsẹ mẹ o whu? Mẹ lẹ owhẹ inọ who siwi ei. Mẹ gwọlọ nọ ọ nyasiọ omẹ ba ha. Kọ eme who gbe yo olẹ mẹ hẹ?” Mẹ jẹ gwọlọ oghẹrẹ kpobi nọ mẹ rẹ rọ riẹ obonọ ọsẹ mẹ o kpohọ. Mẹ jẹ hae jọ udu mẹ nọ inọ: ‘Kọ obọ odhiwu ọ nya na? Manikọ uzuazọ riẹ u kuhọ no bẹdẹ bẹdẹ?’ Mẹ tẹ ruẹ emọ efa nọ i gbe wo esẹ, mẹ rẹ ta nọ dodokọ omẹ.

Evaọ ikpe buobu, mẹ jẹ hai kpohọ oria nọ a ki ọsẹ mẹ fihọ na enwenọ kẹdẹ kẹdẹ. Me re kigwẹ kẹle uki ọsẹ mẹ na, mẹ vẹ lẹ nọ: “O Ọghẹnẹ, ivie, mẹ gwọlọ riẹ oria nọ ọsẹ mẹ ọ rrọ.” Mẹ tẹ jẹ hae lẹ nọ Ọghẹnẹ o fiobọhọ kẹ omẹ riẹ uzedhe oware nọ ma ziọ akpọ ti ru.

Nọ mẹ jọ ikpe ikpegbesa, me te mu ẹvẹrẹ German họ ewuhrẹ. Me je roro nọ epanọ a jọ ẹvẹrẹ nana wo oghoghẹrẹ ebe bu te na, ẹsejọhọ mẹ te jọ ebe rai ruẹ uyo enọ nọ e rrọ omẹ udu na. Evaọ 1967, mẹ tẹ jọ ofẹ Germany jọ mu isukulu họ evaọ okpẹwho nọ a re se Jena. Mẹ romatotọ se ebe buobu nọ egba-eriariẹ Germany a kere, maero kọ enọ e ta kpahe uzuazọ ohwo-akpọ. Dede nọ me wuhrẹ eware buobu nọ e were omẹ, ebe nana ọvuọvo ọ kẹ iyo enọ mẹ na ziezi hi. Mẹ tẹ ruabọhọ jẹ lẹ se Ọghẹnẹ re mẹ ruẹ iyo enọ na.

Evaọ 1970, me te zihe kpobọ Hungary. Mẹ tẹ jọ obei nyaku Rose, u kri hi, ma tẹ ruọ orọo. Evaọ oke yena, esuo nọ ọ jọ orẹwho Hungary yọ esuo nọ a jẹ jọ rọ obọ ogaga kru ahwo. Fikiere nọ ma nwane ruọ orọo no, u kri hi, mẹ avọ aye mẹ Rose ma tẹ dhẹ kpobọ Austria nyae rria. Ma gwọlọ rria obọ Austria omojọ re ma tẹ te kwa kpobọ Sydney, evaọ obọ Australia nọ oniọvo oni mẹ ọ rrọ.

Nọ ma te obọ Austria, u kri hi, me te wo iruo. Ẹdẹ jọ, ohwo jọ nọ ma gbẹ jọ iruo ọ tẹ vuẹ omẹ nọ mẹ sae jọ Ebaibol ruẹ iyo enọ nọ me wo na kpobi. Ọ tẹ kẹ omẹ ebe jọ nọ a re ro wuhrẹ Ebaibol. Mẹ raha oke re me te ti se ebe na kpobi re he. Eware nọ me se e were omẹ gaga. Fikiere, me te kere ileta se Isẹri Jihova keme ae a kere ebe na. Mẹ tẹ ta kẹ ae nọ a vi ebe efa se omẹ.

Ẹdẹ nọ ma rọ gba ẹgbukpe evaọ orọo, Osẹri Jihova jọ nọ ọ rrọ ohwo Austria ọ tẹ nyabru omẹ avọ aye mẹ ze. Ọ wha ebe nọ mẹ ta nọ a ro se omẹ na lele oma, ọ tẹ jẹ vuẹ omẹ nọ ọ gwọlọ wuhrẹ Ebaibol kugbe omẹ, mẹ tẹ rọwo. Fiki epanọ ewuhrẹ na ọ jọ omẹ oja te, ma te muhọ ewuhrẹ isiava ẹkpoka. Ma jẹ hai wuhrẹ te euwa ene soso evaọ ẹdẹvo.

Eware nọ Isẹri Jihova a wuhrẹ omẹ evaọ Ebaibol na e were omẹ oma. Nọ a dhesẹ odẹ Ọghẹnẹ, Jihova kẹ omẹ evaọ Ebaibol ẹvẹrẹ Hungarian nọ me wo, akpọ o te gbe omẹ unu. Ikpe udhegbihrẹ soso nọ me je kpohọ ichọche na, me ri yo nọ ohwo ọvo ọ fodẹ odẹ Ọghẹnẹ ẹdẹvo ho. Oghẹrẹ nọ Ebaibol na ọ rọ kẹ iyo enọ mẹ o were omẹ gaga. Wọhọ oriruo, a jọ Ebaibol wuhrẹ omẹ nọ ahwo nọ a whu no a riẹ oware ovuovo ho, o wọhọ ẹsenọ a rrọ owezẹ udidi. (Ọtausiuwoma Na 9:5, 10; Jọn 11:11-15) Me te je wuhrẹ nọ Ọghẹnẹ ọ jọ Ebaibol na ya eyaa nọ akpọ ọkpokpọ ọ be tha, yọ “uwhu o gbẹ te jọ ofa ha.” (Eviavia 21:3, 4) Koyehọ, mẹ te wariẹ ruẹ ọsẹ mẹ keme evaọ akpọ ọkpokpọ na, “ẹkparomatha . . . ọ te jọ.”​—Iruẹru Ikọ 24:15.

Aye mẹ o kuomagbe omẹ je wuhrẹ Ebaibol, yọ uwuhrẹ na o jẹ were iẹe oma re. Ma nyaharo gaga evaọ uwuhrẹ na. Emerae ivẹ ọvo ma ro wuhrẹ obe na re! Ma jẹ hai kpohọ iwuhrẹ Isẹri Jihova kpobi evaọ obọ Ọgwa Uvie. Oghẹrẹ nọ Isẹri Jihova a ro dhesẹ uyoyou kẹ omai, je fiobọhọ kẹ omai, gbe okugbe nọ o rrọ udevie rai u duobọte omai gaga.​—Jọn 13:34, 35.

Ukpe 1976, egọmeti Australia ọ tẹ rọwo kẹ omai nọ mẹ avọ aye mẹ ma sae nyaze orẹwho rai te rria. Nọ ma te obei, ma raha oke he, ma tẹ gwọlọ Isẹri Jihova. Isẹri Jihova nọ e rrọ obei a rọ abava dede omai rehọ. Ukpe 1978, mẹ avọ aye mẹ ma te zihe ruọ Isẹri Jihova re.

Obọnana, enọ nọ i bi kpokpo omẹ udu anwẹdẹ na, mẹ ruẹ iyo rai no. U te no ere no, me si kẹle Jihova Ọghẹnẹ ziezi no. Mẹ ruẹ nọ a rẹ ruẹ obọ Ọsẹ nọ ọ rrọ họ. (Jemis 4:8) Nọ mẹ tẹ kareghẹhọ nọ mẹ te wariẹ ruẹ ọsẹ mẹ nọ o whu no na evaọ akpọ ọkpokpọ na, eva ọvo e rẹ were omẹ.​—Jọn 5:28, 29.

Ukpe 1989, mẹ avọ aye mẹ Rose ma te zihe kpobọ Hungary orẹwho mai re ma sae ta usi uwoma kẹ egbẹnyusu gbe ahwo uviuwou mai, gbe amọfa kpobi nọ ma te nyaku. Eva e be were omai gaga inọ ma rọ Ebaibol wuhrẹ ahwo nọ a bu te udhusoi ẹko buobu no. Evaọ usu ahwo nana, ahwo nọ a bu vrẹ udhosa-gbikpe soso ae a kurẹriẹ ziọ ukoko Jihova, nọ ma gbẹ be gọ Jihova obọnana. Oni oyoyou mẹ na ọ rrọ usu ahwo yena.

Ikpe ikpegbihrẹ soso mẹ jẹ lẹ inọ Ọghẹnẹ o fiobọhọ kẹ omẹ ruẹ iyo enọ nọ e jọ omẹ udu. Yọ anwọ ikpe ọgbagbizii soso ze na mẹ gbẹ be lẹ. Rekọ obọnana, mẹ be jọ olẹ mẹ yere Ọghẹnẹ ẹsikpobi inọ, “Who ru kẹhẹ Ọsẹ oyoyou mẹ nọ ọ be rria obọ odhiwu na, keme who fiobọhọ kẹ omẹ ruẹ uyo enọ nọ e rrọ omẹ udu anwọ oke emaha ze.”