Kọ Ohwo nọ Ọ be Ruẹ Iruo Ra U Muẹme?
BẸZALẸL avọ Oholiab a jọ igbori iruo ebabọ họ. Okenọ a jọ igbo Ijipti a ma ibriki buobu gaga, a tubẹ gwọlọ nọ a rẹ kareghẹhọ unu rai hi. Rekọ oke yena o vrẹ no. Obọnana nọ a kẹ ai iruo nọ a be te rọ kobaro evaọ ebabọ uwou-udhu egagọ Ọghẹnẹ no na, a be te jọ ewena nọ a rẹ ruẹ obọ rai hi. (Ọny. 31:1-11) O make rrọ ere na, umutho ahwo jọ ọvo a ruẹ obọdẹ iruo nana nọ a ru na. Kọ o te kẹ ai uye fikinọ amọfa a muẹrohọ hayo jiri ai kẹ iruo nọ a ru na ha? Kọ u muẹme, sọ amọfa a muẹrohọ hayo a muẹrohọ iruo rai hi? Kọ ohwo nọ ọ be ruẹ iruo ra u muẹme?
IRUO OBỌDẸ NỌ UMUTHO AHWO JỌ ỌVO A RUẸ
Eware jọ nọ a ru fihọ evaọ uwou-udhu egagọ na i wo erru thesiwa. Ejọ rai họ, cherub igoru nọ a ru fihọ ehru etehe ọvọ na. Pọl ukọ na ọ ta kpahe ae nọ “i bi lo.” (Hib. 9:5) Dai roro epanọ cherub ivẹ nọ a rọ oro ru gaga na i wo erru te!—Ọny. 37:7-9.
Otẹrọnọ a sai duku eware nọ Bẹzalẹl avọ Oholiab a ru na nẹnẹ, i ti fo epanọ a re ro fi ai họ iwou eware anwae nọ ahwo buobu a sae jọ ruẹ e rai je muẹrohọ epanọ i woma te. Rekọ okenọ a ro ru ai, bro ahwo a ginẹ ruẹ erru cherub oro ivẹ nana? A fi cherub ivẹ na họ oria Ọrẹri Erẹri nọ o mae fo na, onọ u dhesẹ nọ ozerẹ okpehru na ọvo ọ rẹ ruẹ e rae nọ ọ tẹ rueva oria na ẹsiẹvo ẹgbukpe evaọ Ẹdẹ Omavoro na. (Hib. 9:6, 7) Onana u dhesẹ nọ umutho ahwo jọ ọvo a ruẹ rai.
WO EVEVỌWẸ ABABỌ UJIRO OGBOTU
Kọ o hae jọnọ whẹ họ Bẹzalẹl hayo Oholiab yọ whọ ruẹ uye ru eware iwoma itieye, ẹvẹ o hae te jọ owhẹ oma inọ umutho ahwo jọ ọvo a ruẹ e rai? Nẹnẹ eva e rẹ were ahwo gaga nọ ibe rai a te jiri ai kẹ eware jọ nọ a ru. A re roro nọ enẹ a rẹ rọ riẹ nọ oware nọ a ru na u gine woma. Rekọ idibo Jihova a wo ohẹriẹ. Wọhọ Bẹzalẹl avọ Oholiab, oreva Jihova nọ ma re ru gbe ọjẹrehọ riẹ nọ ma re wo họ oware nọ o rẹ kẹ omai evawere.
Evaọ oke Jesu, isu-egagọ a jẹ hae lẹ elẹ ro dhesẹ oma. Rekọ Jesu o dhesẹ edhere ọfa nọ u fo nọ ma rẹ rọ lẹ: Udu nọ ma rẹ lẹ no ze, gbe ababọ ujiro ahwo nọ who re rẹro riẹ. Eme u re no onana ze? “Ọsẹ ra nọ ọ rẹ ruẹ eware nọ i dhere ọ vẹ te hwosa kẹ owhẹ.” (Mat. 6:5, 6) O rrọ vevẹ inọ orọnọ epanọ amọfa a rri elẹ mai o mai wuzou hu, rekọ epanọ Jihova o rri rai. Eriwo riẹ họ oware nọ u re gine ru elẹ mai wo aghare. Epọvo na o rrọ re evaọ oware ofa kpobi nọ ma ru evaọ egagọ riẹ. Orọnikọ ujiro amọfa u re dhesẹ nọ oware nọ ma ru na u woma ha rekọ nọ o tẹ were Jihova, ọnọ “ọ rẹ ruẹ eware nọ i dhere” na.
Nọ a bọ uwou-udhu egagọ na re no, ẹgho “o te ruru uwou udhu egagọ na, oruaro ỌNOWO na o tẹ vọ uwou-egagọ na.” (Ọny. 40:34) Onana ginọ odhesẹvia inọ Jihova ọ jẹ iruo rai na rehọ. Kọ ẹvẹ who roro nọ oma o jọ Bẹzalẹl avọ Oholiab oke yena? Dede nọ a kere odẹ rai fihọ iruo nọ a ru na ha, eva e were rai gaga nọ a ruẹ nọ Ọghẹnẹ ọ ghale iruo nọ a ru na. (Itẹ 10:22) Ababọ avro, eva e were rai gaga ikpe buobu nọ i lele i rie nọ a ruẹ nọ a jẹ rọ eware nọ a ru na ru iruo noke toke evaọ egagọ Jihova. Avro ọ riẹ hẹ, okenọ a te kpare Bẹzalẹl avọ Oholiab ziọ uzuazọ evaọ akpọ ọkpokpọ na, eva e te were ai thesiwa nọ a tẹ riẹ nọ a rọ uwou-udhu na ru iruo egagọ Jihova te oware wọhọ ikpe egba isoi (500).
O tẹ make rọnọ uvumọ ohwo ọ be ruẹ iruo unevaze ra nọ whọ be rọ omaurokpotọ ru hu, Jihova ọ be ruẹ e rai!
Evaọ ukoko Jihova nẹnẹ, ma riẹ inievo nọ e be hai ru eware sa-sa ha, wọhọ enọ i bi ru ifimu ekatunu mai, enọ e be drọ hayo rehọ iwoho, enọ e be so ile, enọ i bi kere ebe mai, hayo enọ e be fae fihọ evẹrẹ sa-sa. Onana o wọhọ ẹsenọ uvumọ ohwo ọ be “ruẹ” iruo nọ a bi ru hu. Ere ọvona ma rẹ sae ta kpahe iruo buobu nọ inievo sa-sa a bi ru evaọ ikoko nọ i bu vrẹ idu udhusoi gbikpe (110,000) wariẹ akpọ na soso họ. Ono ọ be hae ruẹ odibo igho-ikele evaọ urere amara nọ o te bi kere igho ukoko na fihotọ? Ono ọ be hae ruẹ okere-obe ukoko na okenọ o te bi koko iyẹrẹ iruo usiuwoma ota ukoko na họ? Ono ọ be hae ruẹ oniọvo-ọmọzae hayo oniọvo-ọmọtẹ mai evaọ okenọ ọ rrọ Ọgwa Uvie ruẹrẹ oware jọ nọ o raha?
Evaọ ukuhọ iruo nọ Bẹzalẹl avọ Oholiab a ru na, a kẹ rai okẹ ujiro ovo ho, wọhọ egho igoru, hayo ufiare isiliva rọkẹ obọdẹ iruo nọ a ru na. Rekọ a wo oware ofa nọ o ghare vi enana kpobi, oyehọ ọjẹrehọ Jihova. O rẹ sai mu omai ẹro nọ Jihova o muẹrohọ iruo rai na. Ajọ ma rọ aro kele oriruo omaurokpotọ gbe ẹzi unevaze rai na.