OKENỌ mẹ kpako te ikpe izii no, mẹ gbẹ jẹ rro ho. Obọ Côte d’Ivoire ma jọ oke yena, enẹna ikpe 34 e ruemu no yọ me theri vrẹ irula esa ha. Nọ u muẹro no inọ mẹ gbẹ be rro vrẹ enẹ hẹ, ọsẹgboni mẹ a tẹ tuduhọ omẹ awọ nọ mẹ hai ru iruo ẹsikpobi re mẹ siọ oma mẹ na ba eroro kpahe vrẹta. U te ru nọ me ro ru oria fihọ aro uwou mai nọ mẹ rẹ jọ zẹ ibi-ire, yọ mẹ jẹ hai ru oria na fo ziezi. Onana o jẹ lẹliẹ ahwo buobu nyaze te dẹ.

Rekọ iruo nọ me je ru ẹsikpobi na i ku ẹbẹbẹ mẹ na họ họ. Mẹ gbẹ jọ kpẹkpẹe ghele, eware esese dede e jẹ bẹ omẹ eru. Wọhọ oriruo, o jọ bẹbẹ re mẹ tọlọ hayo fi oware họ oria nọ o dina kpehru. O tẹ wọhọ nọ ahwo nọ a rọ akuava theri vi omẹ ọvo a ru eware kpobi kẹ. O jẹ kẹ omẹ uye gaga, rekọ onana u nwene nọ me te ikpe 14 no.

Ẹdẹjọ, eyae ivẹ jọ nọ e rrọ Isẹri Jihova a nyaze te dẹ ibi-ire, kẹsena a te mu obe-uwuhrẹ Ebaibol họ kugbe omẹ. U kri hi, me te vuhumu nọ re mẹ riẹ Jihova gbe ẹjiroro riẹ u wuzou vi ugboma mẹ. Onana o lẹliẹ oma sasa omẹ. Olezi 73:28 o te zihe ruọ oria ikere nọ o mai were omẹ. Abọ ọsosuọ ikere yena o ta nọ: “Uwoma kẹ omẹ re me sikẹle Ọghẹnẹ.”

U kri hi, uviuwou mai o tẹ kwa kpobọ Burkina Faso, yọ onana u nwene uzuazọ mẹ gaga. Evaọ obọ Côte d’Ivoire nọ ma kwa no ze na, ahwo buobu a riẹ omẹ evaọ oria nọ mẹ rẹ jọ zẹ ibi-ire na. Rekọ evaọ obonẹ, ahwo buobu a re ruẹ oghẹrẹ ohwo wọhọ omẹ hẹ. Fikiere, a rẹ gwọlọ si ẹro no omẹ hẹ. Onana u ru nọ mẹ gbẹ jẹ sai ro no uwou ze he, ẹsejọ dede evaọ eka jọ soso. Kẹsena mẹ tẹ kareghẹhọ epanọ esikẹle Ọghẹnẹ u woma kẹ omẹ te. Me te kere ileta se uwou ogha Isẹri Jihova nọ o rrọ obonẹ, kẹsena a te vi ohwo jọ nọ o fo ze. Imisiọnare jọ nọ a re se Nani, yọ o wo imotosaikoro ọsese nọ ọ dhẹ ze.

Edhere mai o re gele ahwo kie gaga fiki ẹkpẹ nọ ọ da riẹ fia, yọ evaọ oke iso o re zihe ruọ ọloho. Nani ọ jẹ hai kie unuẹse buobu nọ ọ tẹ be dhẹ imotosaikoro riẹ ze ti wuhrẹ omẹ, rekọ ọ seba ẹnyaze he. Kẹsena ọ tẹ vuẹ omẹ nọ ọ gwọlọ nọ ma gbe kpohọ ewuhrẹ. Mẹ riẹ nọ onana o te gwọlọ nọ me no uwou, je thihakọ uriwo ahwo. Ofariẹ, mẹ tẹ keria emu imotosaikoro ọsese nọ ọ be bẹ Nani ẹkpọ na, kiyọ o te bẹe ẹkpọ viere. Ghele na, mẹ rọwo nọ ma  gbe kpohọ ewuhrẹ. Mẹ kareghẹhọ abọ avivẹ ikere nọ o rẹ were omẹ gaga na, onọ o ta nọ: “Me ru Ọnowo ỌGHẸNẸ mẹ họ adhẹzọ mẹ.”

Ẹsejọ mẹ avọ Nani ma re kie fihọ ọloho na, rekọ onana u te oware ovo ho nọ me te roro te epanọ iwuhrẹ na i woma te. Ovao ohwohwẹ nọ inievo na a rẹ rọ whẹtiẹ omẹ họ oma evaọ obọ Ọgwa Uvie u wo ohẹriẹ gaga no uriwo nọ amọfa a rẹ jọ obọ otafe rri omẹ. Emerae izii nọ i lele i rie, mẹ tẹ họ-ame.

Abọ avọ esa ikere nọ ọ rẹ were omẹ gaga na họ, “re mẹ ta ẹme ezi iruo riẹ.” Mẹ riẹ nọ usiuwoma ota o te mae jọ bẹbẹ kẹ omẹ. Mẹ gbẹ kareghẹhọ ẹdẹ ọsosuọ nọ me ro kpohọ usiuwoma ota no uwou ruọ uwou. Te emaha te ekpako a je rri omẹ ọvo, bi lele omẹ, jẹ be ya ẹnyonya mẹ. A rẹ ruẹ oware nọ o da te enẹ hẹ. Rekọ mẹ jẹ hae kareghẹhọ oma mẹ ẹsikpobi nọ a gwọlọ eghale Aparadase na re wọhọ epanọ mẹ gwọlọ rae na. Fikiere, mẹ seba ha.

Re mẹ sai no oria ruọ oria lọlọhọ, mẹ tẹ dẹ ẹdhighere etẹ esa nọ a rẹ rọ abọ thahe. Ohwo nọ a dhe omẹ avọ iẹe o re tu omẹ nọ ma tẹ be gadiẹ ugbehru, kẹsena ọ vẹ la ruọ ẹdhighere na nọ ma tẹ be whrẹrẹ kpotọ. Usiuwoma ota nọ o jọ use-abọ kẹ omẹ evaọ oke ọsosuọ na, u zihe ruọ oware nọ o jẹ mae kẹ omẹ evawere uwhremu na. U te ru nọ me ro mu iruo ọkobaro oke-kpobi họ evaọ 1998.

Me wo emọ uwuhrẹ Ebaibol buobu, yọ ene evaọ usu rai e họ-ame no. U te no ere no, oniọvo ọmọtẹ mẹ jọ ọ jẹ uzẹme na rehọ. Ọkora ọ tẹ rrọ omẹ oma, ẹsibuobu o jẹ hae kẹ omẹ omosasọ nọ me te yo kpahe ẹnyaharo nọ amọfa a bi wo evaọ uzẹme na. Ileta i no obọ Côte d’Ivoire te omẹ obọ okejọ nọ uliaro o jọ omẹ oma. Evaọ obọ Burkina Faso, u wo ọmọ yunivasiti jọ nọ mẹ jẹ hai wuhrẹ Ebaibol kugbe evaọ unuẹthẹ, rekinọ mẹ rọ kẹ oniọvo-ọmọzae jọ. Uwhremu na ọmọ uwuhrẹ na ọ tẹ kwa kpobọ Côte d’Ivoire. Eva e were omẹ gaga nọ mẹ rọ riẹ nọ o zihe ruọ owhowho-uvie nọ ọ re te họ-ame he no.

Ẹvẹ mẹ be sae rọ rẹrote omamẹ? Ukoko egọmeti jọ nọ u re fiobọhọ kẹ ahwo nọ a ko a ta nọ a re wuhrẹ omẹ epanọ a re ko iwu. Owuhrẹ mẹ jọ o muẹrohọ oghẹrẹ nọ me bi ro ru iruo na, ọ tẹ ta nọ: “Ma wuhrẹ owhẹ epanọ a re ru odha.” A te ru ere. Mẹ rẹ jọ uwou ru oghẹrẹ edha sa-sa. Edha mẹ e rẹ were ahwo, yọ a rẹ vuẹ amọfa kpahe ae. Mẹ ọvo mẹ rẹ rehọ imotosaikoro ọsese mẹ nọ o wo etẹ esa wọ ai se ahwo.

O da omẹ gaga inọ evaọ ukpe 2004, edada nọ mẹ be hai wo fiki onwa uke mẹ nọ o liọ họ u ru nọ mẹ rọ siọ iruo ọkobaro na ba. Dede na, me gbe bi wobọ ziezi evaọ iruo usiuwoma ota na.

Ahwo a rẹ ta nọ, mẹ rẹ hwẹ gaga. U wo ẹjiroro buobu nọ mẹ rẹ rọ wereva keme, u woma kẹ omẹ inọ me sikẹle ọghẹnẹ.—Ikuigbe ọ Sarah Maiga.