Okpẹwho Santiago evaọ Chile mẹ jọ whẹro. Yọ ahwo jọ a jẹ hae jọ oria nọ ma jẹ rria na rehọ imu egaga, thuji, je ru eware iyoma efa. Nọ mẹ jọ ikpe 5, a te kpe ọsẹ mẹ. Oni mẹ ọ tẹ dhẹ lele ọzae jọ nọ ọ geva gaga nọ ọ jẹ hai kpe omai. Mẹ gbẹ be kareghẹhọ eware iyoma yena nọ ọzae na o je ru omai na.

Oyena o tẹ lẹliẹ omẹ wo uruemu ozighi nọ mẹ be rro ze na. Mẹ jẹ hae gaviezọ kẹ ile nọ i re do gaga, da idi thomawa jẹ rehọ imu egaga ẹsejọ. Mẹ avọ ahwo nọ a jẹ zẹ imu egaga na, ma jẹ hae họre ẹsikpobi, yọ ẹsibuobu a jẹ gwọlọ nọ a re kpe omẹ no. Ẹdẹjọ, utu jọ nọ u re ru ozighi re, a tẹ haya ọzae jọ re o kpe omẹ no, rekọ dede nọ ọzae na ọ nwa omẹ oma, mẹ dhẹ vabọ ghele. Evaọ ẹdẹ ọfa, utu jọ nọ o rẹ zẹ imu egaga, a tẹ rọ ugbeke dhe omẹ uzou jẹ gwọlọ nọ a re thuru omẹ veghe.

Evaọ ukpe 1996, mẹ tẹ ruẹ ọmọtẹ jọ nọ a re se Carolina nọ ọ were omẹ gaga, evaọ ukpe 1998, ma tẹ rọo. Nọ ma yẹ ọmọ ọsosuọ omai no, ozọ u te je mu omẹ fiki uruemu ofu me na, inọ ẹsejọhọ mẹ te hai kpe aye gbe emọ mẹ wọhọ epanọ ọzae oni mẹ ọ jẹ hai ru na. Fikiere me te kpohọ oria nọ o wọhọ ẹsipito re a fi obọ họ kẹ omẹ ru ofu mẹ kpotọ. A ginẹ kẹ omẹ imu, rekọ oyena o sai fi obọ họ kẹ omẹ hẹ. Ghele enana kpobi, makọ oware nọ u te ofu hu, o jẹ hae lẹliẹ eva dha omẹ, me ve muhọ edo. Re mẹ siọ ebẹbẹ ba e wha se uviuwou mẹ, mẹ tẹ jiroro nọ me re thuru whu. Me yere Ọghẹnẹ gaga nọ me gbe ro ru oware utioye he.

Vẹre, mẹ rọwo nọ Ọghẹnẹ ọ rrọ họ, rekọ enẹna nọ mẹ rọwo no na, mẹ tẹ gwọlọ nọ me re wuhrẹ kpahe Ọghẹnẹ. Fikiere me te je kpohọ ichọche jọ. Rekọ evaọ oke yena, yọ aye mẹ o bi wuhrẹ Ebaibol na kugbe Isẹri Jihova. Fikinọ me mukpahe Isẹri Jihova, mẹ jẹ hae la ae eka gaga. Me je roro nọ eva e te dha ai rekọ eva e jẹ dha ai hi, fikiere u te je gbe omẹ unu gaga.

Ẹdẹjọ Carolina aye mẹ ọ tẹ ta kẹ omẹ nọ mẹ jọ Ebaibol mẹ se obe Olezi 83:18. Oria Ebaibol yena o ta nọ odẹ Ọghẹnẹ họ Jihova. Akpọ o gbe omẹ unu gaga inọ a re jọ obọ egagọ  mẹ se odẹ na Jihova ẹdọvo ho, rekọ Ọghẹnẹ ọvo a bi sei. Evaọ emuhọ ukpe 2000, me te mu Ebaibol na họ ewuhrẹ kugbe Isẹri Jihova.

Nọ me bi wuhrẹ Ebaibol na haro na, mẹ tẹ te ruẹ nọ Jihova yọ Ọghẹnẹ owowou nọ ọ vọ avọ erọvrẹ. Wọhọ oriruo, obe Ọnyano 34:6, 7, u dhesẹ Jihova wọhọ “Ọghẹnẹ nọ ọ vọ avọ ohrọ gbe aruoriwo, ọ rẹ kaki muofu hu, o wo uyoyou nọ o rẹ rẹriẹ hẹ gbe ọtẹruo, o wo uyoyou nọ o rẹ rẹriẹ hẹ rọkẹ idu ahwo, nọ ọ rẹ rehọ eyoma gbe iruthọ gbe uzioraha rọ vrẹ.”

Rekọ o jọ bẹbẹ kẹ omẹ re me fi eware nọ me je wuhrẹ na họ iruo. Me je roro nọ mẹ te sai siobọno uruemu ofu ọgaga mẹ na ha. Ẹsikpobi nọ mẹ tẹ rọ ọthobọ muofu, Carolina aye mẹ ọ jẹ hai fi obọ họ kẹ omẹ. Ọ jẹ hae kareghẹhọ omẹ inọ Jihova o bi muẹrohọ epanọ mẹ be daoma te re me siobọno uruemu na. Obufihọ riẹ o jẹ lẹliẹ omẹ daoma ẹsikpobi re me ru Jihova eva were, dede nọ me je roro nọ mẹ te sai ru ei hi.

Ẹdẹjọ, Alejandro nọ o je wuhrẹ obe kugbe omẹ ọ tẹ vuẹ omẹ nọ me se obe Ahwo Galesha 5:22, 23. Oria Ebaibol yena o ta nọ ubi ẹzi na họ, “Uyoyou, oghọghọ, udhedhẹ, uye oruẹ krẹkri, oma-onyẹ, ewoma, orọwọ, oma-urokpotọ, oma-oyọrọ.” Alejandro ọ tẹ ta nọ, ababọ obufihọ ẹzi ọfuafo Ọghẹnẹ, mẹ sae rọ ẹgba obọmẹ wo iruemu nana ha. Ẹme ọyena o fi obọ họ kẹ omẹ gaga.

Ẹdẹjọ, me te kpohọ okokohọ Isẹri Jihova jọ. Oghẹrẹ nọ a jọ kpatiẹ, fuafo, gbe eme nọ a ta evaọ okokohọ na, u te ru omẹ vuhumu nọ mẹ ruẹ egagọ uzẹme na no. (Jọn 13:34, 35) Evaọ February 2001, mẹ tẹ họ-ame.

Jihova o fi obọ họ kẹ omẹ nwene no ohwo ozighi kpohọ ohwo odhedhẹ no. O si omẹ no igbo. Ahwo buobu a mukpahe omẹ, yọ mẹ rẹ sae fo ai hi. Enẹna, mẹ avọ aye mẹ gbe emezae ivẹ mai, ma be rọ evawere gọ Jihova kugbe.

Akpọ o gbe imoni gbe egbẹnyusu mẹ unu nọ a ruẹ oghẹrẹ nọ me ro nwene. Onana u ru nọ ibuobu rai a rọ rọwo nọ a wuhrẹ Ebaibol na kugbe ai. Me fi obọ họ kẹ ahwo buobu kurẹriẹ ziọ ukoko Jihova no. Nọ mẹ tẹ ruẹ oghẹrẹ nọ Ebaibol na o bi ro nwene uzuazọ ahwo nana re, o be kẹ omẹ evawere gaga.