Babilọn Ologbo na nọ a jọ obe Eviavia dhesẹ na, yọ egagọ erue kpobi nọ e rrọ akpọ na nọ Ọghẹnẹ ọ se. a (Eviavia 14:8; 17:5; 18:21) Dede nọ egagọ nana i wo ohẹriẹ no ohwohwo, aikpobi a be rọ oghẹrẹ sa-sa su ahwo thọ re a siọ Ọghẹnẹ uzẹme na, Jihova, ba ẹgọ.—Iziewariẹ 4:35.

Oghẹrẹ nọ a sai ro vuhu Babilọn Ologbo na

1.   Babilọn Ologbo na o dikihẹ kẹ oware jọ. Ebaibol o dhesẹ rie wọhọ “aye” gbe “ogberẹ ologbo,” nọ o wo “odẹ aghẹruẹ: ‘Babilọn Ologbo na.’” (Eviavia 17:1, 3, 5) Eware nọ a ta kpahe evaọ obe Eviavia na yọ “eka,” fikiere ma sae ta nọ Babilọn Ologbo na o dikihẹ kẹ oware jọ, orọnọ aye jọ dẹe he. (Eviavia 1:1) U te no ere no, ọ “keria ehru ame buobu,” onọ u dikihẹ kẹ “ahwo, ogbotu, erẹwho gbe erọunu.” (Eviavia 17:1, 15) Aye ọvuọvo ọ sai ru oware utioye na ha.

2.   Babilọn Ologbo na u dikihẹ kẹ ukoko akpọ soso. A se rie “okpẹwho ologbo na nọ o bi su ivie otọakpọ na.” (Eviavia 17:18) Fikiere, iruẹru riẹ e vaha ruọ akpọ na soso, je bi kpomahọ ahwo buobu.

3.   Babilọn Ologbo na yọ egagọ, orọnikọ egọmeti hayo ukoko ekiọthuọ jọ họ. Okpẹwho Babilọn oke anwae ọ jọ okpẹwho nọ egagọ e dafia, yọ a jẹ jariẹ ru iruẹru imizi gaga. (Aizaya 47:1, 12, 13; Jerimaya 50:1, 2, 38) Evaọ uzẹme, egagọ erue nọ e rẹ dha Jihova Ọghẹnẹ uzẹme na eva ha họ enọ e jọ Babilọn. (Emuhọ 10:8, 9; 11:2-4, 8) Isu Babilọn a jẹ rọ omorro ru wọhọ ẹsenọ a kpehru vi Jihova, yọ a daezọ nọ a rẹ gọe he. (Aizaya 14:4, 13, 14; Daniẹl 5:2-4, 23) Epọvo na “iruẹru-imizi” e da Babilọn Ologbo na fia nẹnẹ re. Oyena u dhesẹ nọ Babilọn Ologbo na o dikihẹ kẹ egagọ.—Eviavia 18:23.

    Babilọn Ologbo na ọ sae jọ egọmeti vievie he keme “ivie otọakpọ na” a je weri evaọ oke nọ a rọ raha iẹe. (Eviavia 17:1, 2; 18:9) Yọ ọ sae jọ ukoko ekiọthuọ ologbo jọ gbe he, keme a jọ Ebaibol na ta ẹme nọ u dhesẹ nọ o wo ohẹriẹ no “egba-ihreki otọakpọ na.”—Eviavia 18:11, 15.

4.   Babilọn Ologbo na o fo egagọ ọrue dẹẹ. Ukpenọ egagọ ọrue a re wuhrẹ ahwo epanọ a sai ro si kẹle Jihova Ọghẹnẹ uzẹme na, a te bi ru ahwo gọ eghẹnẹ erue. Ebaibol ọ rehọ egagọ itieye na dhesẹ ahwo nọ a bi “bru igberẹ.” (Iruo-Izerẹ 20:6; Ọnyano 34:15, 16) Iwuhrẹ wọhọ Esanerọvo, ẹzi ohwo o re whu hu gbe emema hayo iwoho nọ a rẹ gọ i no obọ Babilọn ze, yọ e vaha ruọ egagọ erue kpobi no. Yọ egagọ itienana a tẹ be jẹ gua uyoyou akpọ na hayo isiuru akpọ na kugbe egagọ rai. Ebaibol o se egagọ nọ i bi ru iruemu nana kpobi ibruẹnwae.—Jemis 4:4.

    Efe gbe oma-udhesẹ egagọ erue e nwani kiehọ epanọ Ebaibol o dhesẹ Babilọn Ologbo na, ọnọ “o ku ewu ekọlọ ogorurẹ gbe ewu ọwawae họ” yọ “ọ rehọ igoru gbe itho eghaghae gbe izuu gẹgọ.” (Eviavia 17:4) Babilọn Ologbo na họ ọnọ ọ rrọ emu “eware etọtọ otọakpọ na,” koyehọ iwuhrẹ gbe iruemu nọ Ọghẹnẹ o mukpahe. (Eviavia 17:5) Enọ e rrọ egagọ erue na họ “ahwo, ogbotu, erẹwho gbe erọunu” nọ e be tha Babilọn Ologbo na uke.—Eviavia 17:15.

 Babilọn Ologbo na họ ọnọ ọ be wha uwhu se “ahwo kpobi nọ a kpe evaọ otọakpọ na.” (Eviavia 18:24) No otọ avọ otọ ze, egagọ erue họ enọ i bi si ẹmo buobu ze jẹ be wha ozighi nọ ọ rrọ akpọ na ze, yọ a bi fiobọhọ kẹ ahwo riẹ oghẹrẹ nọ Jihova Ọghẹnẹ oyoyou na ọ ginẹ rrọ dẹẹ hẹ. (1 Jọn 4:8) Oware nana nọ a bi ru hu na u si uwhu kpe ahwo buobu no. Ohwo kpobi nọ ọ ginẹ gwọlọ ru Ọghẹnẹ eva were o re “no eva riẹ no,” koyehọ o re si omariẹ no egagọ erue riẹriẹriẹ.—Eviavia 18:4; 2 Ahwo Kọrint 6:14-17.