Erọvrẹ yọ epanọ ohwo ọ rẹ rọvrẹ ohwo nọ o ru rie thọ. Evaọ Ebaibol na, otofa ẹme Griki nọ a fa “erọvrẹ” na họ “re a kpairoro vrẹ,” wọhọ epaọ okenọ ohwo ọ tẹ ta nọ o bi ye osa nọ a re riẹ hẹ. Oghẹrẹ ẹme otiọnana Jesu ọ ta okenọ o wuhrẹ ilele riẹ inọ a lẹ nọ: “Rehọ izieraha mai rọvrẹ omai, keme mai omamai ma be rọvrẹ ohwo kpobi nọ ọ reosa mai re.” (Luk 11:4) Ọ ta ẹme otiọnana re evaọ ọtadhesẹ ọrigbo nọ o wo ohrọ-oriọ họ nọ ọ kẹ, ọ rehọ erọvrẹ dhesẹ osa nọ a re ohwo nọ ọ kpairoro vrẹ.—Matiu 18:23-35.

 Nọ ma tẹ rọvrẹ ohwo ma re si ẹgo no eva jẹ kpairoro vrẹ oware kpobi nọ a ru omai thọ nọ ma hae gwọlọ nọ a hwosa fihọ. Ebaibol na o wuhrẹ nọ, uyoyou nọ u wo oriobọ họ o rẹ lẹliẹ ohwo sae ginẹ rọvrẹ, keme uyoyou u “re koko eware edada nọ a ru rie fihọ eva ha.”—1 Ahwo Kọrint 13:4, 5.

Oware nọ erọvrẹ u dhesẹ hẹ

•   Ohwo na o re rri oruthọ na vo. Ebaibol ọ ta nọ o thọ re ohwo ọ ta nọ oware uyoma yọ oware uwoma hayo re o rri rie evevere.—Aizaya 5:20.

•   Ohwo na o re ru wọhọ ẹsenọ oruthọ na o via ha. Ọghẹnẹ ọ rọvrẹ Devidi ovie na okenọ ọ raha izi ilogbo, rekọ ọ kuọ Devidi dhere no iye nọ i no izieraha riẹ ze he. Ọghẹnẹ o tube ru nọ a ro kere izieraha Devidi fihọ Ebaibol na, onọ u ru nọ a be rọ kareghẹhọ ae nẹnẹ na.—2 Samuẹle 12:9-13.

•   Whọ rẹ kẹ amọfa uvẹ re a ru owhẹ yoyoma. Ma rehọ iẹe nọ who momo ugho kẹ ohwo jọ, rekọ o te mu raha ugho na kufiẹ, o tẹ whae zẹ nọ ọ te sae rọ hwa ugho na wọhọ epanọ ọ ya eyaa ha. Fikinọ o da riẹ gaga, o te bi wounu be lẹ owhẹ. Oyena o sae lẹliẹ owhẹ ta nọ whọ be rọvrẹ riẹ, inọ who bi fi ẹgo họ eva ha, yọ who ti gbe violo ẹme na lahwe he, hayo tubẹ ta nọ whọ kpairoro vrẹ osa na no dede. Rekọ, whọ sae jẹ jiroro nọ who gbe ti momo ugho ọfa kẹe he.—Olezi 37:21; Itẹ 14:15; 22:3; Ahwo Galesha 6:7.

•   Whọ rẹ rọvrẹ ohwo na ọ gbẹ maki kurẹriẹ hẹ. Ahwo nọ a kekaro fihọ raha uzi ulogbo nọ a rọwo iruthọ rai hi, nwene idhere rai hi, je wounu kẹ ahwo nọ a ruthọ họ, Ọghẹnẹ ọ rẹ rọvrẹ rai hi. (Itẹ 28:13; Iruẹru Ikọ 26:20; Ahwo Hibru 10:26) Ahwo otiọye nọ a rọwo kurẹriẹ hẹ na yọ ewegrẹ Ọghẹnẹ, yọ ọ rẹ gba omai họ nọ ma rọvrẹ ahwo nọ ọ rọvrẹ hẹ hẹ.—Olezi 139:21, 22.

   Kọ otẹrọnọ whẹ ohwo jọ o ru thọ yoyoma yọ ohwo na ọ gwọlọ wounu hu hayo tubẹ rọwo oware nọ o ru na ha? Ebaibol na ọ kẹ ohrẹ nọ: “Nyasiọ evedha ba re whọ siọ ofu-omuo ba.” (Olezi 37:8) Dede nọ who ti rri oruthọ na vo ho, whọ sae siọ ofu ba emuo. Who ve fievahọ nọ Ọghẹnẹ o ti gu ohwo na ẹdhọ. (Ahwo Hibru 10:30, 31) Whọ vẹ jẹ kareghẹhọ nọ Ọghẹnẹ o ti ru nọ eware nọ e be da omai enẹna e gbẹ te da omai hi evaọ obaro.—Aizaya 65:17; Eviavia 21:4.

•   Omoware kpobi nọ o wọhọ nọ a ru owhẹ thọ whọ rẹ rọvrẹ. Ukpenọ ma rẹ ta nọ omoware kpobi ma rẹ jọ rọvrẹ ohwo nọ ma roro nọ o ru omai thọ, ẹsejọ ma sae tubẹ ruẹ nọ u du gwọlọ nọ ofu o re mu omai evaọ oware na dede he. Ebaibol na ọ ta nọ: “Whọ kaki mu ofu hu, keme ofu-omuo yọ oka ohwo ogheghẹ.”—Ọtausiuwoma Na 7:9, ẹme-obotọ.

Epanọ a rẹ rọvrẹ ohwo

1.   Kareghẹhọ oware nọ u dhesẹ re a rọvrẹ. Orọnikọ who bi rri oruthọ na vo ho hayo ru wọhọ ẹsenọ oware na o via ha ha. Ukpoye, who bi si ẹgo no eva, be kpairoro vrẹ ẹme na.

2.   Riẹ irere nọ i re no erọvrẹ ze. Who te si ofu gbe ẹgo no eva, o sae lẹliẹ oma dhẹ owhẹ, wo omokpokpọ, gbe evawere ziezi. (Itẹ 14:30; Matiu 5:9) Mai tube wuzou na, ma tẹ be rọvrẹ amọfa, ẹsiẹe Ọghẹnẹ ọ rẹ rọ rehọ izieraha mai rọvrẹ omai re.—Matiu 6:14, 15.

3.   Wo ororokẹ. Mai kpobi ma gba ha. (Jemis 3:2) O rẹ were omai nọ a tẹ rọvrẹ omai, fikiere joma rehọ iruthọ amọfa rọvrẹ rai re.—Matiu 7:12.

4.   Who si eware kekeke he. Nọ ohwo jọ o te ru omoware jọ nọ o dha omai eva, ma sai lele ohrẹ Ebaibol nana nọ o ta nọ: “Wha gbẹ hai thihakọ kẹ ohwohwo.”—Ahwo Kọlọsi 3:13.

5.   Rọvrẹ vẹrẹ vẹrẹ. Daoma ru epanọ whọ rẹ rọvrẹ ohwo nọ o ru owhẹ thọ ukpenọ who re kru ofu họ eva.—Ahwo Ẹfisọs 4:26, 27.