Kọ Mẹ Sae Ruẹ Eme nọ E rẹ Sasa Omẹ Oma Evaọ Ebaibol Na?
Uyo nọ Ebaibol na ọ kẹ
Ee. (Ahwo Rom 15:4) Ahwo buobu nọ a bi thihakọ ebẹbẹ gbe enọ e rrọ ọkora a bi wo omosasọ fiki eware nọ a bi se evaọ Ebaibol na. Joma ta kpahe eria Ebaibol nana jọ.
Ma te jọ uzoẹme nana ta kpahe eware nana
Okpẹtu
Olezi 23:4: “Mẹ tẹ make be nya evaọ ukiekpotọ ebi ọlala dede, mẹ rẹ dhozọ enwoma evo ho, keme whọ rrọ kugbe omẹ.”
Oware nọ onana u dhesẹ: Nọ whọ tẹ lẹ se Ọghẹnẹ je fievahọ iẹe re ọ rọ Ẹme riẹ Ebaibol na kpọ owhẹ, who ti wo udu nọ whọ sai ro thihakọ ebẹbẹ ra.
Ahwo Filipai 4:13: “Evaọ eware kpobi, me bi wo ẹgba ẹkwoma ọnọ ọ be kẹ omẹ ogaga.”
Oware nọ onana u dhesẹ: Ọghẹnẹ ọ sae kẹ owhẹ ẹgba nọ who re ro thihakọ oghẹrẹ ẹbẹbẹ kpobi.
Nọ ohwo mai jọ o te whu
Ọtausiuwoma Na 9:10: “Iruo hayo omaa hayo eriariẹ hayo areghẹ ọvuọvo ọ rrọ obọ Uki hi.”
Oware nọ onana u dhesẹ: Ahwo nọ a whu no a be ruẹ uye he, yọ a sae nwa omai oma ha. A riẹ oware ọvuọvo ho.
Iruẹru Ikọ 24:15: “Ẹkparomatha enọ i kiẹrẹe gbe enọ i kiẹrẹe he ọ te jọ.”
Oware nọ onana u dhesẹ: Ọghẹnẹ o wo ogaga nọ ọ sae rọ kpare ahwo mai nọ i whu no zihe ziọ uzuazọ.
Udu nọ u re brukpe ohwo vrẹta
Olezi 86:5: “Keme who woma, O Jihova, a yọ whọ ruẹrẹ oma kpahe re whọ rọvrẹ; whọ vọ avọ uyoyou nọ o rẹ hiẹ hẹ kẹ enọ i bi bo se owhẹ kpobi.”
Oware nọ onana u dhesẹ: Ọghẹnẹ ọ rẹ rọvrẹ ahwo nọ a kurẹriẹ no eva ze jẹ gbaemu nọ a rẹ gbẹ wariẹ ru oware nọ a ru na ha.
Olezi 103:12: “Wọhọ epanọ ovatha-ọre u thabọ no ukiediwo-ọre na, ere o fi izieraha mai họ thabọ no omai te re.”
Oware nọ onana u dhesẹ: Nọ Ọghẹnẹ ọ tẹ rọvrẹ mai no, yọ ọ rọvrẹ omai no. Ọ rẹ gbẹ kareghẹhọ omai oruthọ mai na ha, yọ ọ rẹ gbẹ rọ fiki riẹ kẹ omai uye he.
Ọkora
Olezi 31:7: “Whọ ruẹ oja-oriọ mẹ no; whọ riẹ idhọvẹ egaga mẹ.”
Oware nọ onana u dhesẹ: Ọghẹnẹ ọ riẹ eware kpobi nọ whọ be ruẹ uye rai gbe epanọ e be kẹ owhẹ uye te, makọ eware nọ amọfa a riẹ dede he.
Olezi 34:18: “Jihova ọ kẹle enọ e rrọ ọkora; o re siwi enọ e rrọ uweri.”
Oware nọ onana u dhesẹ: Ọghẹnẹ ọ ya eyaa nọ o ti fiobọhọ kẹ owhẹ nọ whọ tẹ rrọ ọkora. Ọ sae kẹ owhẹ ogaga nọ who re ro thihakọ edada na.
Ẹyao
Olezi 41:3: “Jihova ọ te rẹrotei evaọ ehwa ẹyao riẹ.”
Oware nọ onana u dhesẹ: Nọ whọ tẹ be mọ okpẹyao, Ọghẹnẹ ọ sai fiobọhọ kẹ owhẹ thihakọ, wo udhedhẹ iroro gbe ẹgba, jẹ kẹ owhẹ ereghẹ nọ whọ sae rọ jẹ emamọ iroro.
Aizaya 33:24: “Ohwo ọvo nọ ọ be rria ẹkwotọ na nọ ọ te ta nọ, ‘Mẹ be mọ’ ọ te jariẹ hẹ.”
Oware nọ onana u dhesẹ: Ọghẹnẹ ọ ya eyaa nọ kẹle na ohwo kpobi o ti wo omokpokpọ.
Idhọvẹ gbe awaọruọ
Olezi 94:19: “Okenọ awaọruọ ọ da omẹ oma fia, whọ sasa omẹ oma je ru udu te omẹ otọ.”
Oware nọ onana u dhesẹ: Ma tẹ lẹ se Ọghẹnẹ evaọ oke idhọvẹ mai, ọ sai ru udu te omai otọ.
1 Pita 5:7: “Wha gbolo awaọruọ rai kpobi kẹe, keme ọ be daezọ rai.”
Oware nọ onana u dhesẹ: O rẹ were Ọghẹnẹ hẹ nọ ma tẹ be ruẹ uye. Ọ vuẹ omai nọ ma lẹ sei kpahe eware nọ e be kẹ omai uye.
Ẹmo
Olezi 46:9: “O bi ru emo serihọ evaọ otọakpọ na soso.”
Oware nọ onana u dhesẹ: Uvie Ọghẹnẹ u ti si ẹmo no otọ kẹle.
Olezi 37:11, 29: “Enọ e be romakpotọ na e te rọ otọakpọ na reuku, yọ eva e te were ae gaga fiki udhedhẹ nọ o dafia. . . . Ahwo okiẹrẹe na a te rọ otọakpọ na reuku, yọ a te rriae bẹdẹ bẹdẹ.”
Oware nọ onana u dhesẹ: Emamọ ahwo a te rria akpọ na dhedhẹ bẹdẹ bẹdẹ.
Awaọruọ kpahe obaro
Jerimaya 29:11: “‘Keme mẹ riẹ iroro nọ me bi roro kpahe owhai,’ ere Jihova ọ ta, ‘iroro udhedhẹ, orọnikọ okpẹtu hu, re me ru eware woma kẹ owhai evaọ obaro, wha ve je wo ẹruore.’”
Oware nọ onana u dhesẹ: Ọghẹnẹ ọ kẹ idibo riẹ kpobi imuẹro inọ eware i ti woma evaọ obaro.
Eviavia 21:4: “Yọ o ti ririe irui-oviẹ kpobi no aro rai, uwhu o gbẹ te jọ ofa ha, yọ uweri hayo oviẹ hayo edada e gbẹ te jọ ofa ha. Eware anwae na e vrẹ no.”
Oware nọ onana u dhesẹ: Ọghẹnẹ ọ ya eyaa nọ o ti si eware iyoma kpobi nọ e be via nẹnẹ na no otọ.
a Jihova họ odẹ Ọghẹnẹ. (Olezi 83:18) Se uzoẹme nana “Ono Họ Jihova?”
Enana E Sae jẹ Were Owhẹ
UWOU-ERORO NA
Ọghẹnẹ Ọ be Daezọ Ra
Ebaibol na o re fiobọhọ kẹ omai wo ẹrọwọ ọgaga je fievahọ eyaa nọ Ọghẹnẹ ọ yaa kẹ omai kpahe obaro na.
ENỌ NỌ EBAIBOL Ọ KẸ IYO RAI
Ẹvẹ Mẹ Sai ro Wo Ẹruore?
Eyaa Ọghẹnẹ nọ e rrọ Ebaibol na i ru omai riẹ nọ whọ sai wo evawere enẹna, je rẹro nọ eware i ti woma evaọ obaro.
IZOẸME EFA
Oware nọ O rẹ Sasa Ahwo nọ A Rrọ Uweri Oma
Nọ ohwo mai jọ o te whu, ma re roro nọ omọfa ọ sae riẹ epanọ o be da omai te he. Rekọ Ọghẹnẹ ọ rẹ riẹ, yọ ọ sai fiobọhọ kẹ omai.
UWOU-ERORO NA
Nọ O tẹ Wọhọ nọ Akpọ Ọ Bẹ Omai No
Makọ oware nọ o via kpobi kẹhẹ, uzuazọ u fo ẹrria, whọ jọ akpọ ọ bẹ owhẹ no ho.
IWUHRẸ EBAIBOL NỌ I WUZOU
Fikieme Ọghẹnẹ Ọ jẹ Kuvẹ kẹ Uye-Oruẹ?
Ebaibol na ọ ta emamọ eme nọ e rẹ sasa ohwo oma.
USI UWHOWHO OBỌDẸ
Rọwo nọ Ma Wuhrẹ Ebaibol na Kugbe Owhẹ
Ohwo jọ o ti wuhrẹ Ebaibol na kugbe owhẹ ọvọvẹ.