Ebaibol na ọ ta nọ: “Ahwo nọ a rrọ uzuazọ a riẹ nọ a ti whu, rekọ enọ i whu no a riẹ oware ovuovo ho.” (Ọtausiuwoma Na 9:5; Olezi 146:4) Fikiere nọ ma te whu no, ma re kpohọ oria ovo ho. Ahwo nọ a whu no a rẹ sai roro hayo ru oware ovo ho, yọ oware o rẹ dae he.

“Ẹkpẹ who ti zihe kpohọ”

 Ọghẹnẹ ọ ta oware nọ o rẹ via kẹ omai nọ ma te whu no evaọ ẹme nọ ọ ta kẹ Adamu, ọzae ọsosuọ na. Fikinọ Adamu o yoẹme kẹ Ọghẹnẹ hẹ, ọ ta kẹe nọ: “Whẹ yọ ẹkpẹ yọ ẹkpẹ who ti zihe kpohọ.” (Emuhọ 3:19) Taure Ọghẹnẹ ọ tẹ te ma Adamu “rono ẹkpẹ otọ na ze,” Adamu ọ jọ uzuazọ evaọ oria ovo ho. (Emuhọ 2:7) Epọvo na re, nọ Adamu o whu no, o te zihe kpohọ ẹkpẹ nọ a ma riẹ no ze, ọ gbẹ jọ uzuazọ họ.

 Oware ovona o rẹ via kẹ ahwo nọ a bi whu nẹnẹ re. Ebaibol na ọ ta kpahe ahwo-akpọ gbe erao inọ: “Ẹkpẹ aikpobi a no ze, yọ ẹkpẹ aikpobi a bi zihe kpohọ.”​—Ọtausiuwoma Na 3:19, 20.

Orọnikọ uwhu o nwane rrọ ukuhọ riẹ hẹ

 Ẹsibuobu Ebaibol na ọ rẹ rọ uwhu dhesẹ owezẹ. (Olezi 13:3; Jọn 11:11-14; Iruẹru Ikọ 7:60) Ohwo nọ ọ rrọ owezẹ udidi ọ rẹ riẹ oware nọ o be via ha evaọ oria nọ ọ rrọ. Epọvo na re, ahwo nọ a whu no a riẹ oware ovo ho. Ghele na, Ebaibol na o wuhrẹ nọ Ọghẹnẹ ọ rẹ sae kpare ahwo nọ a whu no ziọ uzuazọ wọhọ epanọ a rẹ rọwo ohwo no owezẹ ze na. (Job 14:13-15) Rọkẹ ahwo nọ Ọghẹnẹ ọ te kpare ze, uwhu o nwane rrọ ekuhọ uzuazọ rai hi.