Eme họ Jerusalẹm Ọkpokpọ Na?

KPORO

Uyo nọ Ebaibol na ọ kẹ

Eme na “Jerusalẹm Ọkpokpọ” nọ o romavia isiava evaọ Ebaibol na, yọ okpẹwho ẹwoho nọ u dikihẹ kẹ utu ilele Jesu nọ i ti kpohọ odhiwu je lele iei su evaọ Uvie Ọghẹnẹ. (Eviavia 3:12; 21:2) Ebaibol na ọ ta nọ a sai je se utu ahwo nana ọmọtibobo Kristi.

Eware nọ A Sai ro Vuhu Jerusalẹm Ọkpokpọ Na

Obọ odhiwu Jerusalẹm Ọkpokpọ na ọ rrọ. Oke kpobi nọ Ebaibol na ọ tẹ fodẹ Jerusalẹm Ọkpokpọ, o re dhesẹ iẹe nọ o bi no obọ odhiwu ze, oria nọ ikọ-odhiwu i bi jo rou inuẹthẹ okpẹwho na. (Eviavia 3:12; 21:2, 10, 12) U te no ere no, epanọ okpẹwho na o rro te u dhesẹ nọ o sae jọ otọakpọ họ. Okpẹwho na o wo abọ ene nọ e rrọ ẹrẹrẹe, nọ u te “istediọmo idu ikpegbivẹ (12,000) wariẹ họ. a (Eviavia 21:16) Yọ u kpehru te enwenọ ikilomita 560 (emaele 350) te obọ idadeghe na.
Utu ilele Jesu nọ e rrọ ọmọtibobo Kristi na họ Jerusalẹm Ọkpokpọ na. A se Jerusalẹm Ọkpokpọ na “ọmọtibobo na, aye Omogodẹ na.” (Eviavia 21:9, 10) Evaọ edhere ẹwoho nana nọ a ro dhesẹ iẹe na, Jesu Kristi họ Omogodẹ na. (Jọn 1:29; Eviavia 5:12) “Aye Omogodẹ na,” nọ ọ rrọ ọmọtibobo Kristi, o dikihẹ kẹ Ileleikristi nọ i ti lele Jesu su evaọ obọ odhiwu. Ebaibol na o dhesẹ usu nọ Jesu o wo kugbe Ileleikristi nana wọhọ usu ọzae avọ aye. (2 Ahwo Kọrint 11:2; Ahwo Ẹfisọs 5:23-25) Ofariẹ, a kere “edẹ ikpegbivẹ erọ ikọ ikpegbivẹ Omogodẹ na” fihọ itho otọhotọ Jerusalẹm Ọkpokpọ na. (Eviavia 21:14) Ẹme nana o kẹ omai imuẹro oware nọ Jerusalẹm Ọkpokpọ na o dikihẹ kẹ, keme a bọ Ileleikristi nọ i ti kpohọ odhiwu “fihọ otọhotọ ikọ gbe eruẹaro na.”—Ahwo Ẹfisọs 2:20.
Jerusalẹm Ọkpokpọ na yọ egọmeti. Jerusalẹm oke anwae o jọ okpẹwho-esuo Izrẹl, oria nọ Devidi ovie na, Solomọn ọmọzae riẹ, gbe emọ rai a jọ su evaọ “agbara-uvie Jihova.” (1 Iruẹru-Ivie 29:23) A se Jerusalẹm “okpẹwho ọrẹri,” onọ u dhesẹ nọ u dikihẹ kẹ esuo Ọghẹnẹ nọ ahwo uyẹ Devidi a je su. (Nehemaya 11:1) A se Jerusalẹm Ọkpokpọ na “okpẹwho ọrẹri” re, keme ahwo nọ a ti kuomagbe Jesu su evaọ obọ odhiwu họ ahwo nọ a rrọ eva riẹ, yọ “a te jọ ivie nọ i ti su otọakpọ na.”—Eviavia 5:9, 10; 21:2.
Jerusalẹm Ọkpokpọ na ọ te wha eghale se ahwo nọ a rrọ otọakpọ na. A dhesẹ Jerusalẹm Ọkpokpọ na inọ “o bi no obọ odhiwu ze, no obọ Ọghẹnẹ ze,” yọ onana u dhesẹ nọ Ọghẹnẹ ọ be rehọ iẹe ruẹrẹ eware họ evaọ otọakpọ. (Eviavia 21:2) Ẹme nana o dhesẹ nọ Jerusalẹm Ọkpokpọ na o wobọ kugbe Uvie Ọghẹnẹ, onọ Ọghẹnẹ o bi ro ru re oreva riẹ u rugba “evaọ otọakpọ na, wọhọ epanọ o rrọ evaọ obọ odhiwu.” (Matiu 6:10) Eware nọ e rrọ obotọ na e rrọ usu eghale nọ Ọghẹnẹ ọ te rọ Uvie riẹ ru kẹ ahwo-akpọ:
- O ti si uzioraha no. “Ethẹ ame uzuazọ” nọ o bi su no Jerusalẹm Ọkpokpọ na ze, ọye ọ be kẹ “ire uzuazọ” nọ e rrọ rọ “kẹ usiwo erẹwho na” ame. (Eviavia 22:1, 2) Usiwo nana u ti si uzioraha no ahwo-akpọ oma je ru ai wo uzuazọ ogbagba wọhọ epanọ Ọghẹnẹ ọ ma omaa riẹ vẹre.—Ahwo Rom 8:21.
- Ahwo-akpọ a ti wo emamọ usu kugbe Ọghẹnẹ. Uzioraha o hẹriẹ ahwo-akpọ no Ọghẹnẹ no. (Aizaya 59:2) Nọ a te si uzioraha no ahwo-akpọ oma no, eruẹaruẹ Ebaibol nana i ve ti rugba: “Uwou Ọghẹnẹ o rrọ udevie ahwo-akpọ, ọ te rria kugbe ae, yọ a te jọ ahwo riẹ. Ọghẹnẹ omariẹ ọ te jọ kugbe ae.”—Eviavia 21:3.
- Uye-oruẹ gbe uwhu e te gbẹ jariẹ hẹ. Ọghẹnẹ ọ te rọ ẹkwoma Uvie riẹ “ririe irui-oviẹ kpobi no aro rai, uwhu o gbẹ te jọ ofa ha, yọ uweri hayo oviẹ hayo edada e gbẹ te jọ ofa ha.”—Eviavia 21:4.