Meri Magdalini yọ olele Jesu Kristi jọ nọ o lele i rie te urere. Ẹsejọhọ ẹwho Magdala (o sae jọ Magadan) nọ ọ kẹle Abade Galili, a rri ro mu odẹ na Magdalini kẹe. O sae jọnọ Meri ọ jẹ rria ẹwho yena evaọ oke jọ.

 Meri Magdalini ọ jọ usu eyae nọ e jẹ hai lele Jesu avọ ilele riẹ kpohọ erẹ, yọ eyae nana e jẹ rọ eyero obọrai fiobọhọ kẹ ae. (Luk 8:1-3) Ọ jọ oria je rri evaọ okenọ a jẹ kare Jesu fihọ ure-oja kpe, yọ ọ jọ usu ahwo nọ a kake ruẹ Jesu okenọ Ọghẹnẹ ọ kpare iẹe no uwhu ze no.—Mak 15:40; Jọn 20:11-18.

•  Kọ ogberẹ Meri Magdalini ọ jọ?

•  Kọ “ukọ rọkẹ ikọ na” Meri Magdalini ọ jọ?

•  Kọ aye Jesu Kristi Meri Magdalini ọ jọ?

•  Bro Meri a jọ Ebaibol na fodẹ?

 Oria ọvuọvo evaọ Ebaibol na o ta nọ Meri Magdalini ọ jọ ogberẹ hẹ. Oware nọ o ta kpahe uzuazọ nọ Meri o yeri taure o te ti zihe ruọ olele Jesu họ, Jesu o le idhivẹri ihrẹ no oma riẹ.—Luk 8:2.

 Kọ fikieme ahwo buobu a rọ rọwo nọ ọ jọ ogberẹ vẹre? Nọ Meri Magdalini o whu vrẹ ikpe buobu no, ahwo jọ a tẹ ta nọ Meri Magdalini họ aye nọ a se odẹ riẹ hẹ (o sae jọnọ ogberẹ) nọ o je su irui-oviẹ riẹ fihọ awọ Jesu ọ tẹ rehọ eto uzou riẹ ririe ai na. (Luk 7:36-38) Rekọ ẹjiroro ọvuọvo ọ rrọ Ebaibol na nọ ma sae rọ rọwo ẹme yena ha.

 Ijo. A rẹ jọ ichọche Kathọlik se Meri “St. Meri Magdalini” gbe “ukọ ọrọ ikọ na” fikinọ ọye họ ohwo ọsosuọ nọ ọ nyae vuẹ ikọ na nọ a kpare Jesu no uwhu ze no. (Jọn 20:18) Rekọ oyena u ru rie fihọ ukọ họ. Yọ a jọ oria ọvuọvo evaọ Ebaibol na sei ukọ dede he.—Luk 6:12-16.

 A kere Ebaibol na soso re evaọ ubrobọ ekuhọ ikpe-udhusoi ọsosuọ. Rekọ nọ ikpe buobu e vrẹ no, evaọ ugbobọ oware wọhọ ikpe-udhusoi avọ ezeza isu ichọche a rọ rehọ udu obọrai kẹ Meri Magdalini ọkwa okpehru na, nọ a bi ro sei ukọ gbe ọrezi. U wo ebe jọ nọ ahwo a kere evaọ ikpe-udhusoi avọ ivẹ gbe orọ avọ esa nọ a jọ ta nọ ikọ jọ a jẹ re Meri Magdalini ihri, rekọ ebe nana e rrọ usu ebe Ebaibol na ha. Iku yena yọ iku erue gheghe, iku itieye e rrọ Ebaibol na vievie he.

 Ijo. Ebaibol na o dhesẹ vevẹ nọ Jesu o wo aye vievie he. a