Uyo na họ, Ee! Ọghẹnẹ ọ be daezọ idibo riẹ nọ e be mọ. Ebaibol na ọ ta kpahe emamọ odibo Ọghẹnẹ jọ nọ: “Jihova ọ te rẹrotei evaọ ehwa ẹyao riẹ.” (Olezi 41:3) Otẹrọnọ whọ be mọ okpẹyao, eware esa nana e rẹ sai fiobọhọ kẹ owhẹ thihakọ:

1.   Lẹ se Ọghẹnẹ re o fiobọhọ kẹ owhẹ wo ẹgba thihakọ. Ọ sae kẹ owhẹ ‘udhedhẹ nọ u vi otoriẹ kpobi,’ onọ o sae lẹliẹ awaọruọ ra kpotọ je ru owhẹ wo ẹgba.—Ahwo Filipai 4:6, 7.

2.   Hae daoma wereva. Ebaibol na ọ ta nọ: “Eva e tẹ be hae were owhẹ, o rẹ lẹliẹ owhẹ wo omokpokpọ. Ovao nọ a re muhọ oke kpobi u re kpe ohwo ẹmẹrera.” (Itẹ 17:22, Good News Translation) Hae daoma hwẹ ẹsikpobi, keme orọnikọ o ti ru owhẹ siọ ọkọkora ba ẹjọ ọvo ho, o sai je kru owhẹ oma ga re.

3.   Wo ẹruore nọ eware i ti woma evaọ obaro. Who te wo emamọ ẹruore, o sai fiobọhọ kẹ owhẹ wo oghọghọ ghelọ okpẹyao nọ o be lahiẹ owhẹ. (Ahwo Rom 12:12) Ebaibol na ọ ta nọ oke o be tha nọ ‘ohwo ọvo ọ gbẹ te ta nọ, “Mẹ be mọ họ.”’ (Aizaya 33:24) Evaọ oke yena Ọghẹnẹ o ti si ikpeyao kpobi nọ egba-eriariẹ a be sai ru oware ọvo kpahe he na notọ. Wọhọ oriruo, rri epanọ Ebaibol na ọ ta nọ ahwo nọ a who no a ti zihe kpohọ: “Jọ uwo-oma riẹ o bọbọ vi oke uzoge riẹ; jọ o zihe kpohọ oke ẹgba uzoge riẹ.”—Job 33:25.

 Ọjẹriẹ: Dede nọ Isẹri Jihova a riẹ nọ Ọghẹnẹ ọ rẹ sai fiobọhọ kẹ ae, a re kpobọ ẹsipito re a siwi ae nọ a tẹ be mọ okpẹyao. (Mak 2:17) O make rrọ ere na, ma rẹ fodẹ ugogo edhere usiwo-imu jọ inọ oye o mai woma ha; ohwo kpobi ọ rẹ jiroro na kẹ omobọ riẹ evaọ oghẹrẹ usiwo nọ a re ro siwi ei.