Ee. Ma jọ uzoẹme nana ta kpahe umutho ehrẹ jọ evaọ Ebaibol na nọ i re fiobọhọ kẹ ohwo wo areghẹ. Yọ i fiobọhọ kẹ ima ahwo buobu no, te ezae te eyae, nọ a ro wo evawere evaọ uviuwou rai.

1.   Ruọ orọo lele uzi. Orọo nọ a ru obe-orọo fihọ hayo nọ a ro lele uzi u re ru nọ ọzae avọ aye na a rẹ rọ gbaemu nọ a rẹ talamu ohwohwo evaọ edẹ uzuazọ rai kpobi. Yọ oyena o rẹ wha evawere ziọ uviuwou.—Matiu 19:4-6.

2.   Dhesẹ uyoyou gbe adhẹẹ. Edhere jọ nọ who re ro ru onana họ, who re yerikugbe ọzae hayo aye ra oghẹrẹ nọ whọ gwọlọ nọ o yerikugbe owhẹ.—Matiu 7:12; Ahwo Ẹfisọs 5:25, 33.

3.   Whaha eme edada. O tẹ make rọnọ ọzae hayo aye ra ọ ta ẹme hayo ru oware nọ o da owhẹ, ta ẹme owowolẹ kẹe. (Ahwo Ẹfisọs 4:31, 32) Wọhọ epanọ Ebaibol ọ ta evaọ obe Itẹ 15:1, “Uyo uwowolẹ u re hrẹ ofu kpotọ, rekọ ẹme ọgaga ọ rẹ kpare ofu.”

4.   Tẹrovi ọzae hayo aye ra ọvo, who wo ekpehre ubiẹro ho. Ọzae hayo aye ra ọvo who re wo isiuru obẹlẹ hayo isiuru owezẹ kẹ. (Matiu 5:28) Ebaibol na ọ ta nọ: “Jọ ahwo kpobi a rọ ọghọ kẹ orọo, jọ a zue ehwa orọo na ha.”—Ahwo Hibru 13:4.

5.   Dhesẹ uyoyou kẹ emọ ra. Who rolobọ kẹ ae hrọ họ, yọ who dhuaro kẹ ae gbe he.—Itẹ 29:15; Ahwo Kọlọsi 3:21.