Eme Họ Uye Ulogbo Na?

KPORO

Uyo nọ Ebaibol na ọ kẹ

Uye ulogbo na o te wha uye nọ ahwo-akpọ a re ruẹ ẹdẹvo ho ze. Wọhọ epanọ eruẹaruẹ Ebaibol e ta, uye ulogbo na o te via evaọ “edẹ urere na,” nọ a re je se “oke urere na.” (2 Timoti 3:1; Daniẹl 12:4) O te jọ “utionọ o re via ha no anwọ emuhọ emama nọ Ọghẹnẹ ọ ma na ze rite oke yena, yọ o gbẹ te via ofa ha.”—Mak 13:19; Daniẹl 12:1; Matiu 24:21, 22.

Eware nọ e te via evaọ oke uye ulogbo na

A te raha egagọ erue no. A te raha egagọ erue no vẹrẹ vẹrẹ. (Eviavia 17:1, 5; 18:9, 10, 21) Okugbe Erẹwho na (United Nations) nọ u dikihẹ kẹ isu akpọ na o ti ru oware nọ Ọghẹnẹ ọ gwọlọ evaọ ẹme nana.—Eviavia 17:3, 15-18. a
A te họre egagọ uzẹme. Erẹwho nọ i ti kokohọ, nọ eruẹaruẹ Izikiẹl o se “Gọg ọrọ ẹkwotọ Magọg,” a te daoma epanọ a rẹ rọ raha ahwo nọ a rrọ egagọ uzẹme no. Rekọ Ọghẹnẹ ọ te thọ ahwo nọ a be gọe re a siọ ae ba ẹraha no.—Izikiẹl 38:1, 2, 9-12, 18-23.
A ti bruoziẹ ahwo nọ a be rria akpọ na. Jesu o ti gu ahwo-akpọ kpobi Ẹdhọ, ọ vẹ “te hẹriẹ ahwo, nwane wọhọ epanọ othuru-igodẹ ọ rẹ hẹriẹ igodẹ no ewe na.” (Matiu 25:31-33) Okenọ Jesu o ti bruoziẹ na, o ti rri sọ ohwo na o fiobọhọ kẹ “inievo” riẹ nọ i ti lele iei su evaọ obọ odhiwu, hayo o fiobọhọ kẹ ae he.—Matiu 25:34-46.
A ti koko ahwo nọ a ti su evaọ Uvie na họ. Ahwo nọ a salọ inọ a ti lele Kristi su nọ i kru ẹrọwọ rai te urere a ti ku uzuazọ rai họ evaọ otọakpọ, a vẹ kpare ai kpobọ odhiwu.—Matiu 24:31; 1 Ahwo Kọrint 15:50-53; 1 Ahwo Tẹsalonika 4:15-17.
Amagidọn. A jọ Ebaibol na se “ẹmo ẹdẹ ologbo Ọghẹnẹ Erumeru na” “ẹdẹ Jihova” re. (Eviavia 16:14, 16; Aizaya 13:9; 2 Pita 3:12) Ahwo kpobi nọ Kristi o bruoziẹ kpe, a ti kpe ai no. (Zẹfanaya 1:18; 2 Ahwo Tẹsalonika 1:6-10) A te raha isu akpọ na kpobi kugbe re, enọ a rehọ arao ojihẹ nọ o wo izou ihrẹ dhesẹ na.—Eviavia 19:19-21.

Eware nọ e te via nọ uye ulogbo na o tẹ vrẹ no

A kare Setan avọ idhivẹri na fihọ uwou-odi. Ukọ-odhiwu ologbo jọ o ti gbolo Setan avọ idhivẹri na fihọ “ọgọdọ odidi na,” nọ u dhesẹ nọ a te jọ wọhọ ẹsenọ a whu no. (Eviavia 20:1-3) Okenọ Setan ọ te jọ ọgọdọ odidi na, o te jọ wọhọ ẹsenọ ọ rrọ uwou-odi. Ọ te sai ru oware ovo evaọ oria ofa ha.—Eviavia 20:7.
Esuo odu ikpe na o ve muhọ. Uvie Ọghẹnẹ nọ u ti su ikpe odu ọvo (1,000) na u ve ti muhọ. Yọ o te wha eghale buobu se ahwo-akpọ. (Eviavia 5:9, 10; 20:4, 6) “Ogbotu obuobu” nọ a sai kele mu hu a ti “no uye ulogbo na ze.” Yọ ahwo nana a te jariẹ evaọ otọakpọ na okenọ esuo odu ikpe na u ti muhọ.—Eviavia 7:9, 14; Olezi 37:9-11.

a A jọ obe Eviavia se egagọ erue Babilọn Ologbo na, “ogberẹ ologbo na.” (Eviavia 17:1, 5) Arao ojihẹ ọwawae nọ ọ te raha Babilọn Ologbo na yọ oka ukoko nọ a ro mu re o ku erẹwho akpọ na kugbe, o ve je dikihẹ rọkẹ ae. Oke ọsosuọ nọ ọ rọ romavia a je sei Ọvọ Erẹwho (League of Nations), rekọ enẹna a bi sei Okugbe Erẹwho na.