Adamu avọ Ivi họ ahwo-akpọ nọ a kake raha uzi. Ọghẹnẹ ọ vuẹ rai nọ a re ubi-ure “eriariẹ ewoma gbe eyoma na” ha. Rekọ a tẹ nyae riẹe. Uzi Ọghẹnẹ yena nọ a thọ na oye ahwo buobu a re se uzioraha ọsosuọ na. a (Emuhọ 2:16, 17; 3:6; Ahwo Rom 5:19) Ubi-ure eriariẹ ewoma gbe eyoma nọ Ọghẹnẹ ọ ta kẹ Adamu avọ Ivi nọ a re he na, u dhesẹ nọ Ọghẹnẹ ọvo o wo udu nọ ọ rẹ rọ vuẹ ohwo-akpọ oware nọ u woma gbe onọ u yoma. Adamu avọ Ivi a lavrẹ usi, nọ a re ubi-ure na. U dhesẹ nọ a gwọlọ nọ Ọghẹnẹ ọ vuẹ ae oware nọ a re ru hu. A gwọlọ ru onọ udu rai o ta kẹ ae.

•  Eme ọ via kẹ Adamu avọ Ivi fiki uzi nọ a raha na?

•  Eme ma be reoja riẹ fiki uzioraha yena?

•  Kọ uye nọ uzioraha na o wha ze u ti no omai uzou?

•  Eware nọ ahwo jọ a re rri thọ kpahe uzioraha na

 Uzi nọ Adamu avọ Ivi a raha na u ru nọ a rọ who, je whu. Nọ a raha uzi no, a gbẹ kẹle Ọghẹnẹ hẹ, yọ a gbẹ sai wo omokpokpọ jẹ rria bẹdẹ bẹdẹ hẹ.​—Emuhọ 3:19.

 Fikinọ Adamu avọ Ivi a raha uzi, emọ rai kpobi a tẹ reuku uzioraha. O nwane wọhọ epanọ a re yẹ ọmọ ze avọ ẹyao nọ ọsẹ hayo oni riẹ o wo. (Ahwo Rom 5:12) Fikiere, “evaọ uzioraha” b a jọ yẹ ohwo-akpọ kpobi. Onana u dhesẹ nọ mai ọvuọvo ọ gba ha, yọ ma re ru thọ ẹsibuobu.​—Olezi 51:5; Ahwo Ẹfisọs 2:3.

 Fiki uzioraha hayo oma nọ o gba ha nọ ma reuku riẹ na, ma rẹ mọ, who, je whu. (Ahwo Rom 6:23) Ma rẹ jiroro thọ ẹsejọ, o vẹ whae ze nọ ma rẹ rọ ruẹ uye. Yọ iruthọ amọfa e rẹ sae jẹ wha uye se omai.​—Ọtausiuwoma Na 8:9; Jemis 3:2.

 Ee. Ebaibol ọ ta nọ Jesu o whu kẹ omai, ọ tẹ rọ ere dhe “idhe omavoro rọkẹ izieraha mai.” (1 Jọn 4:10, ẹme-obotọ) Fiki idhe Jesu na, uzioraha gbe uwhu nọ ma reuku riẹ na u ti no omai uzou, ma ve ti wo uzuazọ ebẹdẹ bẹdẹ gbe omokpokpọ. Ere ebẹbẹ nọ uzioraha Adamu avọ Ivi o wha ze i ti ro no otọ.​—Jọn 3:16. c

 Orithọ: Fiki uzioraha Adamu avọ Ivi na, ma sae gbẹ kẹle Ọghẹnẹ ofa ha.

 Uzẹme ẹme na: Ọghẹnẹ ọ jọ oria ovuovo ta nọ mai ma wha oware nọ Adamu avọ Ivi a ru na ze he. Ọ riẹ nọ ma gba ha, fikiere ma sai ru oware nọ u kiehọ ẹsikpobi hi. (Olezi 103:14) Dede nọ uye o be bẹ omai fiki uzioraha nọ ma reuku riẹ na, ma sai wo usu okpekpe kugbe Ọghẹnẹ. Obọdẹ uvẹ Ọghẹnẹ o rovie kẹ omai na.​—Itẹ 3:32.

 Orithọ: Nọ ohwo ọ tẹ họ-ame no yọ uzioraha nọ ma reuku riẹ na u no rie uzou no. Fikiere u fo nọ a rẹ họ emọboba ame.

 Uzẹme ẹme na: O ginẹ gwọlọ nọ ohwo ọ rẹ họ-ame re Ọghẹnẹ o te ti siwi ei. Rekọ ẹrọwọ nọ ma re fihọ idhe Jesu ọvo u re ru omai fo no uzioraha. (1 Pita 3:21; 1 Jọn 1:7) Re ohwo ọ sai wo ẹrọwọ, ọ rẹ riẹ oware nọ Ọghẹnẹ ọ ta. Fikiere emọboba a sai wo ẹrọwọ họ. Oyejabọ nọ Ebaibol ọ gbẹ jọ oria ovuovo ta nọ a họ emọboba ame he na. Ileleikristi ọsosuọ na a họ emọboba ame he. “Te ezae te eyae” nọ e rọwo ẹme Ọghẹnẹ eye a họ-ame.​—Iruẹru Ikọ 2:41; 8:12.

 Orithọ: Ọghẹnẹ ọ bọwo eyae na ehao keme Ivi ọ kake re ubi-ure nọ Ọghẹnẹ ọ ta nọ a re he na.

 Uzẹme ẹme na: “Araomuomu anwae na, ọnọ a re se Ẹdhọ gbe Setan” ọye Ọghẹnẹ ọ bọwo ehao orọnikọ eyae he. (Eviavia 12:9; Emuhọ 3:14) U te no ere no, Ọghẹnẹ ọ ta nọ fiki Adamu uzioraha o rọ ruọ akpọ na orọnikọ fiki aye riẹ hẹ.​—Ahwo Rom 5:12.

 Kọ fikieme Ọghẹnẹ ọ rọ ta nọ Adamu ọ te rọ obọ ogaga su aye riẹ? (Emuhọ 3:16) Orọnikọ Ọghẹnẹ ọ be ta nọ ere ọ gwọlọ nọ ezae na a ru eyae rai hi. Rekọ ọ kparo ruẹ oware nọ uzioraha o te wha ze. Ọghẹnẹ ọ gwọlọ nọ ọzae o you aye riẹ jẹ rọ ọghọ kẹ eyae kpobi.​—Ahwo Ẹfisọs 5:25; 1 Pita 3:7.

 Orithọ: Uzi nọ Adamu avọ Ivi a raha họ, Adamu o lele Ivi wezẹ.

 Uzẹme ẹme na: Eware nọ ma be te fodẹ na i dhesẹ nọ orọnikọ owezẹ họ uzi nọ a raha ha:

•   Oke nọ Ọghẹnẹ o jie uzi kẹ Adamu inọ ọ re ubi-ure eriariẹ ewoma gbe eyoma na ha, yọ ọ re ma aye kẹe he.​—Emuhọ 2:17, 18.

•   Ọghẹnẹ ọ ta kẹ Adamu avọ Ivi nọ: “Wha vihọ re wha jọ buobu.” (Emuhọ 1:28) Onana u dhesẹ nọ a re yẹ emọ. Kọ Ọghẹnẹ ọ rẹ kẹ ae uye fikinọ a ru oware nọ ọ ta kẹ ae nọ a ru? Ọghẹnẹ ọ rrọ eva gaga ha nọ o re ro ru oware utioye.

•   Oke ovona Adamu avọ Ivi a rọ raha uzi na ha. Ivi ọ kake re ubi-ure na, Adamu ọ tẹ re uwhremu na.​—Emuhọ 3:6.

•   Ebaibol ọ ta nọ ọzae ọ sai lele aye riẹ wezẹ.​—Itẹ 5:18, 19; 1 Ahwo Kọrint 7:3.