Ebaibol na ọ ta nọ u fo re who you omobọ ra, yọ onana u wuzou. Nọ who te you omara, whọ rẹ rẹrote omara, rọ adhẹẹ kẹ omobọ ra, yọ who re rri omara nọ who fioka ha ha. (Matiu 10:31) Dede nọ Ebaibol na ọ ta nọ ma re you omobọ mai, o mukpahe oriobọ.

Ono họ ohwo ọsosuọ nọ ma re you?

1.   Ọghẹnẹ họ ohwo ọsosuọ nọ ma re you. Evaọ Ebaibol na, ujaje nọ ọ mae rro họ: “Whọ rẹ rehọ udu ra kpobi . . . you Jihova Ọghẹnẹ ra hrọ.”​—Mak 12:28-30; Iziewariẹ 6:5.

2.   Ujaje avọ ivẹ nọ ọ mae rro họ: “Who re you ọrivẹ ra wọhọ omobọ ra hrọ.”​—Mak 12:31; Iruo-Izerẹ 19:18.

3.   Dede nọ uzi ovo o rrọ Ebaibol na nọ o ta gbae nọ ma re you omobọ mai hi, ujaje na inọ “you ọrivẹ ra wọhọ omobọ ra” na u dhesẹ nọ omamọ oware o rrọ re ma you omobọ mai jẹ rọ adhẹẹ kẹ omobọ mai, keme onana o rẹ kẹ erere.

Ono họ ohwo ọsosuọ nọ Jesu o you?

 Jesu ọ rọ uruemu riẹ dhesẹ epanọ u fo nọ ma re you Ọghẹnẹ te, you ọrivẹ mai te, je you omobọ mai te, yọ o jie uzi kẹ ilele riẹ inọ a raro kele oriruo riẹ.​—Jọn 13:34, 35.

1.   Jihova Ọghẹnẹ họ ohwo ọsosuọ nọ Jesu o you, yọ ọ rehọ uzuazọ riẹ kpobi ru iruo Ọghẹnẹ. Ọ ta nọ: “Re akpọ na ọ riẹ nọ me you Ọsẹ na, me bi ru epanọ Ọsẹ na o jie uzi kẹ omẹ nọ me ru dẹẹ.”​—Jọn 14:31.

2.   Jesu o you erivẹ riẹ, yọ o ru onana ẹkwoma ẹgwọlọ amọfa nọ ọ jẹ rọ karo, te epanọ o ro siobọno uzuazọ riẹ rọkẹ ahwo buobu.​—Matiu 20:28.

3.   Jesu o ru eware buobu ro dhesẹ nọ o you omobọ riẹ. Wọhọ oriruo, ọ jẹ hai serihọ, re emu, jẹ reawere ẹkeriotọ kugbe ilele riẹ gbe amọfa.​—Mak 6:31, 32; Luk 5:29; Jọn 2:1, 2; 12:2.

Nọ ma tẹ be rọ ẹgwọlọ amọfa karo viukpọ orọ obọ mai, kọ u re ru nọ ma gbe ro wo evawere hayo adhẹẹ kẹ omobọ mai hi?

 Ijo, keme uwoho Ọghẹnẹ a rọ ma omai, yọ uyoyou nọ o kare oriobọ họ uruemu riẹ nọ o mae viodẹ. (Emuhọ 1:27; 1 Jọn 4:8) Nọ orọnọ uwoho Ọghẹnẹ a rọ ma omai na, onana u dhesẹ nọ ma re wo uyoyou kẹ amọfa. U fo nọ ma re you omobọ mai, ghele na, ma rẹ mae wo evawere nọ ma te you Ọghẹnẹ vi oware kpobi jẹ be daoma ru ewoma kẹ amọfa. Ebaibol na ọ ta nọ: “Ẹkẹ evawere e mae rrọ vi emio.”​—Iruẹru Ikọ 20:35.

 Nẹnẹ na, ahwo buobu a rẹ ta nọ, nọ whọ tẹ rọ ẹgwọlọ omobọ ra karo ẹsiẹ who re wo evawere. Rọkẹ ahwo nana, ẹme na “you oma ra,” u nwene “you omọfa” no. Rekọ, eware nọ ma rọ ẹro ruẹ no u dhesẹ nọ re ohwo o wo evawere gbe omakpokpọ, o re ru lele ohrẹ Ebaibol nana: “Jọ omomọvo ọ hae daoma ru oware nọ o rẹ kẹ omọfa erere orọnikọ omobọ riẹ hẹ.”​—1 Ahwo Kọrint 10:24.