1-2. (a) Wa a som sitn we wi a go chuu we komiin laik som sitn we di Juu dem did go chuu wen dem did go baka Jeruusilem? (b) Tel wi bout som a di sitn dem we di Juu dem did go chuu. (Luk pan di paat we niem “ Iina Agai, Zakaraiya an Ezra Taim.”)

 UOL iip a difrant tingz a gwaan we a kaaz wi fi wori an fret ya nou. Laik som a wi mait-a luuz wi wok an a wanda ou wi a-go luk afta wi fambili. Miebi faitin a gwaan iina yu ieriya kaaz a palitiks an yu a wanda ef yu an yu fambili a-go aarait. Ar miebi wich paat yu liv, dem a fait gens di Jeuova Witnis dem an di priichin wok we dem a du. Ef non a dem sitn ya a kaaz yu fi wori an fret ya nou, da lesn ya a-go elp yu fi si ou Jeuova did elp di Izrelait dem wen dem did a diil wid som prablem laik dem ya.

² Nof a di Juu piipl dem we did a liv dong a Babilan did a liv big laif, tingz did a gwaan fi dem. So fi dem jos git op an lef aal a dat an go a wan konchri we dem neehn nuo notn bout muo dan so, dem wuda riili afi a chos iina Jeuova fi du dat. An likl afta dem go bak, tingz staat fi get rof wid dem. Piipl staat fi fait gens di wie ou dem worship, an som a di man dem we did av powa iina govament did a fait gens dem tu. So nof a dem fain se it neehn iizi fi kip dem main pan di wok fi mek op bak Gad ous. So roun 520 B.C.E., Jeuova sen tuu a im prafit dem we niem Agai an Zakaraiya fi push di piipl dem fi gwaan tan op chrang. (Agai 1:1; Zak. 1:1) Iina da lesn ya, wi a-go si se wa dem prafit ya did du did riili elp di piipl dem fi tan op chrang. Bot bout 50 ier afta dat, di wok sluo dong agen an di Juu dem neehn a gwaan wid notn muor dan so. Dem taim de yu did av wan man we niem Ezra we did av  di wok fi rait uova Gad Laa. Im did lef Babilan kom a Jeruusilem fi kom push di piipl dem fi gwaan put Jeuova bizniz fos iina dem laif.​—Ezra 7:1, 6.

3. Wa a di kwestiyan dem we wi a-go get di ansa fa iina da lesn ya? (Pravorbz 22:19)

³ Di mesij dem we Agai an Zakaraiya did kya go gi Gad piipl dem fi elp dem kyan elp wi tu so dat wi kyan nuo fi shuor se Jeuova a-go de de fi wi wen wi a go chuu wi prablem dem. (Riid Pravorbz 22:19.) Wi a-go luk pan di mesij we Agai and Zakaraiya did gi Gad piipl, an wi a-go luk pan wa Ezra did du. An wi a-go si ou dis kyan elp wi fi get di ansa fi dem kwestiyan ya: Wa did apm tu di Juu dem wen di prablem dem did kom dong pan dem? An wa mek wen wi a go chuu fi wi prablem dem wi fi kip wi main pan Jeuova bizniz? An wa kyan elp wi fi chos iina Jeuova muor an muor wen wi a go chuu wi prablem dem?

4-5. Wa mait-a did mek di Juu piipl dem no so api fi mek op bak Gad ous?

⁴ Afta di Juu dem go baka Jeruusilem, dem did av nof wok fi du. So kwik kwik dem bil bak Jeuova alta an mek di foundieshan fi Gad ous. (Ezra 3:1-3, 10) Bot afta dat, dem neehn so api fi gwaan mek op bak Gad ous agen. Kaa pan tap a wa dem did av fi du, dem did afi a mek op bak fi dem ous tu, an dem did av dem grong fi plaant op, an dem did afi a du tingz fi mek shuor se dem fambili did av fuud fi nyam. (Ezra 2:68, 70) Plos, dem did av dem enimi dem we a fait gens dem an we did a chrai fi tap dem fram mek op bak Gad ous.​—Ezra 4:1-5.

⁵ Tingz did rof wid di Juu dem we did a go baka Jeruusilem kaa a di Porjan piipl dem did a ruul uova dem nou. An afta King Sairos ded iina 530 B.C.E., di neks king we niem Kyambaisiiz staat fi ruul an im did waahn fi tek uova Iijip. An wen im a go a waar, im suoja dem wuda tek we di Juu piipl dem fuud an waata, an dem did waahn di Juu piipl dem fi mek dem tan wid dem tu. So dis did mek tingz aad fi di Juu piipl dem. An wen Daraiyos I did dis ton king afta Kyambaisiiz, tingz neehn beta fi dem niida. So dis mek dem did a wori an fret bout ou dem wuda gwaan tek kier a dem fambili. So som a dem staat fi fiil se a neehn di bes taim fi staat mek op bak Gad ous.​—Agai 1:2.

6. Azkaadn tu Zakaraiya 4:6, 7, wa a som ada prablem we di Juu dem did a go chuu, an wa Zakaraiya did mek dem nuo se?

⁶ Riid Zakaraiya 4:6, 7. An pan tap a aal wa dem did av fi diil wid, piipl did a fait gens dem an a du aal kain-a sitn tu dem kaaz a di wok we dem did a du. Iina 522 B.C.E., dem enimi dem put dem wok anda lak dong so dem did afi tap mek op bak Gad ous. Bot Zakaraiya did mek di Juu dem nuo se Jeuova wuda yuuz im uoli spirit fi get rid a aal a wa did a tap dem fram mek op bak Gad ous. Iina 520 B.C.E., King Daraiyos lou dem fi staat mek op bak Gad ous agen. Im aal staat fi bak di wok we dem did a du an gi dem moni an ting.​—Ezra 6:1, 6-10.

7. Wa Jeuova did du fi di Juu dem wen dem did staat fi mek wa im waahn dem fi du bi di big ting iina dem laif?

 ⁷ Jeuova yuuz Agai an Zakaraiya fi mek im piipl dem nuo se ef dem staat fi mek op bak im ous an mek dat bi di big ting iina dem laif, im a-go di de fi dem.  (Agai 1:8, 13, 14; Zak. 1:3, 16) So wa Agai an Zakaraiya se mek di Juu dem fiil gud. So iina 520 B.C.E. dem staat fi mek op Gad ous agen an dem don mek it op bak les dan faiv ier afta dat. Aalduo dem did a go chuu nof prablem, bikaa dem mek wa Gad waahn fi apm bi di big ting iina dem laif, Jeuova gi dem di sitn dem we dem niid fi liv an im elp dem fi gwaan worship im. So dis did mek dem api.​—Ezra 6:14-16, 22.

8. Ou wa Agai 2:4 se a-go apm kyan elp wi fi mek wa Jeuova waahn fi apm bi di big ting iina wi laif? (Luk pan di said paint tu.)

⁸ Az wi get kluosa an kluosa tu di taim wen di wos sofarieshan a-go staat, wi get fi si se di big ting iina wi laif a fi du wa Jeuova se wi fi du an priich. (Maak 13:10) Bot wi mait-a fain it aad fi a du dis ef tingz rof wid wi an wi na’av no moni. Ar ef piipl a fait gens wi kaaz a di priichin wok we wi a du. Bot wa kyan elp wi fi mek wa Jeuova waahn fi apm bi di big ting iina wi laif a ef wi memba se “Jeuova we a liid im aami dem” b di de wid wi. Kaa so langks az wi waahn fi mek wa im waahn fi apm bi di big ting iina wi laif wi a-go aarait. So wi na’afi fret ar wori wori op wiself.​—Riid Agai 2:4.

9-10. Ou Oleg an im waif did si se wa Matyu 6:33 se a chuu?

⁹ Luk pan wa did apm tu Oleg an im waif Irina c we a paiyanier. Afta dem muuv go a wan neda kanggrigieshan fi go elp out, dem en op luuz dem wok kaa tingz did a get aad iina di konchri. An aalduo fi bout wan ier dem neehn a get  no wol iip a wok fi du, dem kuda stil si se Jeuova did de de fi dem, laik wen Jeuova did yuuz di breda an sista dem fi elp dem out. An Oleg we did fiil sad bad se, “Kaa wi aalwiez a priich an a mek dat bi di big ting iina wi laif, a dat did elp wi.” Aalduo im an im waif stil a luk fi wok, dem a du aal we dem kyan du iina di priichin wok.

¹⁰ Wan die wen dem kom uom fram sorvis, dem si se wan a dem gud fren chravl fi bout 100 mail fi kya tuu bag a gruosri kom gi dem. Oleg se: “Pan da die de, wi si se Jeuova an di breda an sista dem iina di kanggrigieshan riili a tek kier a wi. So wi nuo fi shuor se Jeuova naa go figet di piipl dem we a sorv im no mata ou tingz mait-a luk fi dem.”​—Mat. 6:33.

11. Ef wi a du wa Jeuova waahn wi fi du, wa wi kyan luk out fa fi apm?

¹¹ Jeuova waahn wi fi a du nof iina di priichin wok ya nou. Jos laik wa wi si iina  paragraaf 7, Agai did tel Jeuova piipl dem se dem fi staat du nof sitn fi Jeuova laik wen dem did a mek di foundieshan fi Gad ous. An ef dem du dat, Jeuova pramis dem se im a-go bles dem. (Agai 2:18, 19) Wi kyan nuo fi shuor tu se Jeuova a-go bles wa wi a du ef wi mek shuor se wi a du di wok we im gi wi fi du.

12. Wa mek Ezra an di ada wan dem we go baka Jeruusilem wid im did niid fi chos iina Jeuova nof?

¹² Iina 468 B.C.E., Ezra chravl wid wan neda set a Juu piipl fram Babilan go baka Jeruusilem. Ezra an dem wan ya did afi riili chos iina Jeuova fi du dis, kaa wol iip a bad tingz kuda apm tu dem wen dem a chravl pan da ruod ya. Dem did av wol iip a guol an silva wid dem we piipl did gi dem fi Gad ous, so piipl kuda kom fi kom rab dem. (Ezra 7:12-16; 8:31) An pan tap a dat, Jeruusilem neehn sief niida kaa nof piipl neehn liv de an di waal dem an di giet dem did mash dong. So wa wi kyan lorn fram Ezra wen it kom aan tu ou wi fi chos iina Jeuova?

13. Wa did elp Ezra fi chos iina Jeuova muor an muor? (Luk pan di said paint tu.)

¹³ Ezra did si ou Jeuova did de de fi im piipl dem wen dem did a go chuu som rof taim. Som uol iip a ier bifuo dat iina 484 B.C.E., Ezra mait-a did a liv iina Babilan wen King A’azuyiiros did se dem fi kil aaf di wol a di Juu dem we liv iina di plies dem we im a ruul uova. (Esta 3:7, 13-15) So dem wuda en op kil im tu. An wen di Juu dem ier se dem did a-go kil aaf di wol a di Juu dem we liv iina dem ieriya de, dem staat fi baal an faas an prie tu Jeuova an a beg im fi elp dem. (Esta 4:3) Ezra an di res a di Juu piipl dem mos did fiil gud wen dem did get rid a di wan dem we did a chrai fi kil dem aaf. (Esta 9:1, 2) So aal a dem sitn ya we Ezra did go chuu iina dem taim de elp im fi si se notn naa go apm tu dem we Jeuova kyaahn go siev dem fram. d

14. Wen Anastasia neehn nuo wa fi du an shi si se Jeuova tek kier a ar, wa shi lorn fram dat?

¹⁴ Wen wi si se Jeuova tek kier a wi wen wi no nuo wa fi du, it mek wi chos iina im muor. Laik luk pan wa did apm wid Anastasia we liv iina Iistorn Yuurop. Shi did afi lef ar wok kaa shi neehn de tek said iina palitiks. Shi se: “Dis a di fos taim iina  mi laif we mi en op naa no moni.” Den shi se: “Mi lef tingz wid Jeuova an mi si ou im tek kier a mi. So ef sitn laka dis apm tu mi agen we mi naa no wok, mi naa go a fret an wori wori op miself, kaa ef mi faada Jeuova tek kier a mi tide im a-go tek kier a mi tumaro tu.”

15. Wa did elp Ezra fi gwaan chos iina Jeuova? (Ezra 7:27, 28)

¹⁵ Ezra get fi si se no mata wa a gwaan iina im laif, Jeuova aalwiez de de fi im. Wen im tingk bout aal a dem taim de wen Jeuova did de de fi im, it elp im fi gwaan chos iina Jeuova. So Ezra mek wi nuo se Jeuova aalwiez de de fi im. (Riid Ezra 7:27, 28.) An a siks taim im mek wi nuo dis iina di Baibl buk we niem Ezra.​—Ezra 7:6, 9; 8:18, 22, 31.

16. Wa mait-a apm iina wi laif we mek wi si se Jeuova de de fi wi? (Luk pan di picha tu.)

¹⁶ Wen yu a go chuu wan rof taim, yu kyan gi Jeuova di chaans fi shuo se im a-go di de fi yu. Laik wen yu waahn di taim fi go a yu miitn dem ar wan kanvenshan, an yu go aks di sumadi we yu a wok fa fi gi yu di taim fi go, dat wi gi Jeuova wan chaans fi shuo se im a-go de de fi yu. Yu mait-a fraitn fi si ou tingz wok out gud fi yu an dat a-go mek yu si se yu kyan riili chos iina Jeuova muor an muor.

17. Wen Ezra did a go chuu wan rof taim, wa im did du fi shuo se im ombl? (Luk pan di picha pan di kova.)

¹⁷ Ezra beg Jeuova fi elp im an dat shuo se im ombl. Evritaim im a du sitn an fiil laik se im kyaahn manij, im prie tu Jeuova. (Ezra 8:21-23; 9:3-5) So kaaz a ou im did stie, it mek di piipl dem we de roun im wok wid wa im a du an chos iina Jeuova laik im tu. (Ezra 10:1-4) So wen wi fiil laik se wi kyaahn manij kaa wi na’av nof moni an ting an wi a fret bout ou wi fi kip wi fambili sief, wi fi prie tu Jeuova an aks im fi elp wi.

18. Wa kyan elp wi fi chos Jeuova muor an muor?

¹⁸ Ef wi ombl wiself an tek di elp we Jeuova an wi breda an sista dem a gi wi, wi a-go chos Jeuova muor an muor. Erika, we av chrii pikni, did chos iina Jeuova wen ar pikni we iina beli an ar ozban ded. Wen shi luk bak pan aal wa did gwaan, shi se: “Yu kyaahn riili nuo ou Jeuova a-go elp yu, bot mi si se wol iip a taim a mi fren dem Jeuova yuuz fi ansa mi prieya dem. Wans mi mek mi fren dem nuo wa a gwaan wid mi dem kyan elp mi.”

19-20. Wa wi lorn fram di Juu dem we kudn go baka Jeruusilem?

¹⁹ Wi kyan aal lorn sitn fram di Juu dem we kudn go baka Jeruusilem. Som a dem mait-a kudn go bak kaa dem did tuu uol ar dem did sik bad ar dem did av fambili a Babilan fi tek kier a. Bot dem did redi fi elp out di wan dem we a go bak wid moni an ting. (Ezra 1:5, 6) It luk laik se 19 ier afta di fos set a Juu dem go baka Jeruusilem, di wan dem we neehn go bak did stil a sen tingz go gi dem.​—Zak. 6:10.

²⁰ Aal ef a no nof sitn wi kyan du fi Jeuova, wi kyan nuo se Jeuova api wid di likl we wi a chrai aad fi du fi im. An wi nuo dat kaa iina di taim wen Zakaraiya did de bout, Jeuova did aks im fi yuuz di guol an di silva we dem did get fram di piipl dem dong iina Babilan fi mek wan kroun. (Zak. 6:11) Da nais kroun ya wuda mek evribadi memba bout aal a di sitn dem we di wan dem we de a Babilan did gi. (Zak. 6:14, ftns.) Wi kyan nuo fi shuor se aal wen tingz aad fi wi Jeuova naa go figet aal a wa wi du fi sorv im.​—Iib. 6:10.

21. Wa a-go elp wi fi no wori an fret bout wa a-go apm iina di fyuucha?

²¹ Iina dem laas diez ya we wi a liv iina, wi a-go av prablem an tingz mait-a iivn get wosa. (2 Tim. 3:1, 13) Bot wi stil na’afi wori an fret op wiself kaa memba se Jeuova did tel Agai se ‘Im a-go de de wid im an im no fi fried.’ (Agai 2:4, 5) So a siem so wi kyan nuo fi shuor se Jeuova a-go de de wid wi az lang az wi chrai wi bes fi du wa im waahn wi fi du. Wen wi du di sitn dem we wi lorn fram Agai an Zakaraiya an Ezra, it a-go elp wi fi gwaan chos iina Jeuova no mata wa a gwaan iina wi laif an no mata wa a-go gwaan iina di fyuucha.