1-2. Wa mek wi mait-a fiil laik Jeuova naa ansa wi wen wi prie tu im?

 “MEK Jeuova bi di wan we mek yu riili api, an di sitn dem we yu wel waahn fram yu aat, im a-go gi yu dem.” (Sa. 37:4) Dis a sitn nais Jeuova pramis wi, no chuu? Bot yu tingk se yu fi ekspek se Jeuova a-go gi yu evriting we yu aks fa siem taim? Dis a wan gud kwestiyan, kaa tingk bout dis: Se wan sista we no marid prie fi go a di School for Kingdom Evangelizers. Bot afta wol iip a ier shi no get fi go a di skuul. Ar wan yong breda we sik mait-a aks Jeuova fi elp im fi get beta so dat im kyan du nof muor wok iina di kanggrigieshan. Bot im stil no get beta. Ar wan mada an faada mait-a aks Jeuova fi elp dem pikni fi tan iina di chuut. Bot dem pikni stil en op tap sorv Jeuova.

² Yu mait-a aks Jeuova fi sitn tu we yu no get. An dis mait-a mek yu fiil se a onggl som piipl prieya Jeuova ansa. Ar yu mait-a fiil laik se yu du sitn rang we mek im naa ansa yu prieya. A so wan sista we niem Janice b did fiil. Shi an ar ozban prie tu Jeuova fi mek dem go a Betel. Shi se: “Mi did fiil laik se iina no taim wi wuda de a Betel.” Bot afta wol iip a ier dem stil no get fi go de. Janice se: “Dis mek mi fiil bad an mek mi a wanda ef mi du sitn rang kaa mi did prie tu Jeuova fi tel mi wa fi du. So wa mek im neehn ansa mi, iihn?”

3. Wa a di kwestiyan dem we wi a-go get di ansa fa iina da lesn ya?

³ Somtaim wi mait-a aal a wanda ef Jeuova a lisn tu wi  wen wi prie. Aal som man we did de bout iina Baibl taim did a wanda ef Jeuova a lisn tu dem wen dem a prie tu. (Juob 30:20; Sa. 22:2; Aba. 1:2) Bot wa kyan mek yu shuor se Jeuova a ier yu wen yu prie? (Sa. 65:2) Bot bifuo wi get di ansa fi da kwestiyan ya, wi niid fi get di ansa fi dem kwestiyan ya fos: (1) Wa wi kyan ekspek Jeuova fi du fi wi? (2) Wa Jeuova ekspek wi fi du? (3) Wa mek som a di taim wi fi aks Jeuova fi sitn difrant fram wa wi did a aks im fa?

4. Azkaadn tu Jerimaiya 29:12, a wa Jeuova se im a-go du?

⁴ Jeuova pramis wi se im a-go lisn tu wi wen wi prie tu im. (Riid Jerimaiya 29:12.) Wi Gad, Jeuova, lov di wan dem we a worship im di rait wie, so im a-go lisn tu dem wen dem prie tu im. (Sa. 10:17; 37:28) Bot dat no miin tu se im a-go gi wi evriting we wi aks fa. Wi mait-a afi wiet pan di nyuu worl fi get som a di ting dem we wi aks fa.

5. Wen wi a prie tu Jeuova, a wa im a luk pan tu? Tel wi wan riizn wa mek yu se so.

⁵ Jeuova luk pan wa di sitn dem we wi a aks fa av fi du wid wa im waahn fi apm. (Aiz. 55:8, 9) Wan a di sitn dem we im waahn fi apm a fi di ort ful op a piipl we im a ruul uova an we api. Bot Sietan kliem se piipl wuda betaraaf ef dem ruul demself. (Jen. 3:1-5) Fi shuo se wa Sietan se a lai, Jeuova lou piipl fi a ruul demself. Bot wi si se dat kaaz wi fi a go chuu di wol iip a prablem dem we wi a go chuu nou. (Iik. 8:9) An wi nuo se Jeuova naa go get rid a aal a dem prablem ya nou. Kaa ef im du dat, som piipl mait-a se wi no niid Gad fi ruul uova wi, wi kyan ruul wiself an get rid a wi prablem dem wiself.

6. Wa mek wi fi nuo se Jeuova aalwiez a-go ansa wi iina wan wie we shuo se im fier an se im lov wi?

⁶ Tuu sumadi mait-a aks Jeuova fi di siem ting an im gi dem tuu difrant ansa. Laik yu did av King Ezikaiya we did sik bad an im beg Jeuova fi mek im get beta. An Jeuova mek im get beta. (2 Ki. 20:1-6) An den yu did av di apasl Paal we did sik an fiil laik se im av “maka iina [im] said” an im did beg Jeuova fi mek im get beta tu. Bot Jeuova neehn mek im get beta. (2 Kor. 12:7-9) An luk pan wa did apm tu di apasl Jiemz an Piita tu. King Erad did waahn fi kil di tuu a dem. So di breda an sista dem prie fi Piita, an dem mos did prie fi Jiemz tu. Bot Jeuova wok wan mirikl so das dem no kil Piita, bot Im neehn du notn fi siev Jiemz. (Aks 12:1-11) Di Baibl no tel wi wa mek Jeuova did siev Piita an no siev Jiemz. c Bot wi nuo se Jeuova “no du notn we no fier.” (Dyuu. 32:4) An wi nuo se Jeuova did api wid wa Piita an Jiemz a du. (Rev. 21:14) So som a di taim wi mait-a prie tu Jeuova an im ansa wi iina wan wie we wi neehn a ekspek. Kaa wi nuo se im aalwiez a-go ansa wi prieya iina wan wie we shuo se im fier an im lov wi, wi no wori an fret bout ou im a-go ansa wi.​—Juob 33:13.

7. Wa wi no fi du, an wa mek?

⁷ Wi no fi wach ada piipl. Laik it mait-a luk laik se wi an sumadi mait-a prie tu Jeuova bout di siem sitn an it komiin laik im ansa fi dem prieya bot no ansa fi wi. Bot wi no fi wach dat. It luk laik se a  dis did apm tu wan sista we niem Ana. Fi ar ozban, Matyu, an tuu sista did sik wid kyansa. An shi prie fi ar ozban an di tuu sista dem. Di tuu sista get beta, bot ar ozban ded. Fos shi did a wanda ef a Jeuova did elp di tuu sista dem fi get beta. An ef a Jeuova did elp dem, wa mek im neehn ansa ar prieya an mek ar ozban get beta tu? Ye, wi no nuo wa mek di tuu sista dem did get beta. Bot wa wi nuo a dat Jeuova a-go get rid a evriting we mek wi a sofa nou, an im wel waahn fi mek im fren dem we ded kom bak alaiv.​—Juob 14:15.

8. (a) Azkaadn tu Aizaiya 43:2, wa Jeuova du fi shuo se im di de fi wi? (b) Wen wi a go chuu wi prablem dem an wi prie tu Jeuova, ou im kyan elp wi? (Wach di vidiyo we niem Wen Wi Prie It Elp Wi Fi Diil Wid Wi Prablem Dem.)

⁸ Jeuova a-go aalwiez de de fi wi. Im lov wi, so im no lov fi si wi a sofa. (Aiz. 63:9) Dat no miin tu se im a-go get rid a aal a wi prablem dem we kom dong nof pan wi som a di taim laik riva ar we bon wi laka faiya. (Riid Aizaiya 43:2.) Bot im mek wi nuo se im a-go elp wi fi “go chuu” dem. An im naa go mek di prablem dem we wi a go chuu nou mash wi op fi gud. Im gi wi im uoli spirit fi elp wi fi go chuu dem. (Luuk 11:13; Fil. 4:13) An dat mek wi nuo se wi a-go av wa wi niid fi go chuu wi prablem dem so dat wi kyan get fi du wa Jeuova waahn wi fi du. d

9. Bies pan wa Jiemz 1:6, 7 se, wa mek wi fi biliiv se Jeuova a-go elp wi?

⁹ Jeuova ekspek se wi a-go chos iina im. (Iib. 11:6) Som a di taim wi prablem dem mait-a fiil laik se dem muor dan wa wi kyan manij. An wi mait-a aal staat fi wanda ef Jeuova riili a-go elp wi. Bot di Baibl mek wi nuo se Jeuova a-go gi wi di chrent fi go chuu wi prablem dem no mata ou big dem mait-a luk. (Sa. 18:29) So wi no fi a fret se Jeuova naa go elp wi, wa wi fi du a prie tu im an chos se im a-go ansa wi prieya dem.​—Riid Jiemz 1:6, 7.

10. Tel wi ou wi mait-a afi du sitn bies pan wa wi prie se.

¹⁰ Wen wi prie tu Jeuova bout sitn, im ekspek wi fi du sitn bies pan wa wi aks im fa. Laik se wan breda waahn fi get som taim fram im wok fi go a wan kanvenshan. An im aks Jeuova fi elp im fi get di taim. Wa Jeuova mait-a elp im fi du a briev op imself fi go aks di baas man fi di taim. Bot di breda stil afi go go taak tu di baas man. An im mait-a afi aks im bout it nof taim tu. Im mait-a aal afi go swich op di taim wid sumadi els we im wok wid fi get di taim fi go a di kanvenshan. Ar im mait-a afi go sekl wid fi get di taim fi go bot no get no pie.

11. Wa mek wi no fi tap prie tu Jeuova bout di sitn dem we wi waahn?

¹¹ Jeuova no waahn wi fi tap prie bout di sitn dem we wi waahn im fi du fi wi. (1 Tes. 5:17) Jiizas mek wi nuo se a no evriting we wi aks Jeuova fa Im a-go gi wi siem taim. (Luuk 11:9) So no tap prie! Prie tu Jeuova an mek im nuo wa a gwaan iina yu aat. (Luuk 18:1-7) Yu si wen wi gwaan prie bout sitn, wi shuo Jeuova se wi riili waahn da sitn de. An wi mek im nuo se wi biliiv se im kyan gi wi di sitn dem we wi a aks fa.

12. (a) Wen wi prie an aks Jeuova fi sitn, wa a wan kwestiyan wi fi aks wiself, an wa mek? (b) Ou wi kyan mek shuor se wen wi a prie wi a shuo Jeuova se wi rispek im? (Luk pan di paat we niem “ Di Ting Dem We Mi Aks Jeuova Fa Shuo Se Mi Rispek Im?”)

¹² Ef wi prie tu Jeuova an aks im fi sitn an wi no get it, wi mait-a afi aks wiself dem chrii kwestiyan ya. Di fos wan a, ‘Mi a aks fi di rait ting?’ Nof taim wi tingk se wi nuo wa gud fi wi. Bot somtaim, wa wi mait-a tingk se gud fi wi no riili gud fi wi. Laik wi mait-a a prie tu Jeuova fi du tingz fi wi wan sortn wie bout wan prablem we wi av. Bot Jeuova si se wan beta wie de fi diil wid di prablem dan wa wi did tingk. An somtaim di sitn dem we wi a aks fa a no wa im waahn wi fi aks fa. (1 Jan 5:14) Laik tingk bout di mada an faada we wi did taak bout aredi. Dem aks Jeuova fi mek dem pikni tan iina di chuut. Dat mait-a luk laik sitn we wi fi prie an aks Jeuova fi du. Bot Jeuova naa go fuos nobadi fi tan iina di chuut. Kaa im waahn aal a wi, aal wi pikni dem tu, fi mek op dem uona main fi sorv im. (Dyuu. 10:12, 13; 30:19, 20) So wa di mada an faada dem kyan du a aks Jeuova fi elp dem fi du tingz so dat dem kyan riich di pikni dem aat so dat dem lov Jeuova fi demself an waahn fi bi im fren.​—Pr. 22:6; Ifii. 6:4.

13. Azkaadn tu Iibruu 4:16, a wen Jeuova a-go elp wi? Tel wi wa mek yu se so.

¹³ Di sekan kwestiyan we wi kuda aks wiself a, ‘A nou Jeuova waahn fi gi mi wa mi aks fa?’ Yu mait-a fiil se Jeuova fi gi wi wa wi aks fa siem taim wen wi prie tu im. Bot Jeuova nuo di bes taim fi gi wi wa wi aks fa. (Riid Iibruu 4:16.) Wen im no gi wi  wa wi aks fa siem taim, wi mait-a fiil se im naa go gi wi it. Bot im mait-a nuo se a no di rait taim fi wi get it. Laik tingk bout di breda we did aks Jeuova fi mek im get beta. Ef Jeuova did wok wan mirikl an mek im get beta, Sietan kuda se di breda a gwaan sorv Jeuova kaa Jeuova mek im get beta. (Juob 1:9-11; 2:4) An memba, Jeuova av wan taim set aredi wen im a-go mek evribadi we sik get beta. (Aiz. 33:24; Rev. 21:3, 4) So wi no fi a fiil se Jeuova a-go wok dem kain-a mirikl de rait ya nou. So wa di breda kuda aks Jeuova fa a fi gi im di chrent we im niid, an fi elp im fi av piis iina im aat an main so im kyan gwaan eng an an go chuu, an fi sorv Jeuova wid aal a im aat.​—Sa. 29:11.

14. Wa yu lorn fram wa did apm tu Janice?

¹⁴ Memba Janice we did prie tu Jeuova fi go a Betel go wok? Faiv ier afta dat shi stil no get fi go a Betel. A da taim de shi si ou Jeuova did ansa ar prieya. Shi se: “Jeuova elp mi fi yuuz da taim de fi ton wan beta sumadi. Mi did niid fi chos iina im muor. An mi did niid fi a du mi uona Baibl stodi muor tu. An mi did niid fi lorn ou fi bi api wid miself no mata wich paat mi de an no mata wa a gwaan iina mi laif.” Afta dat, Janice an ar ozban get fi go iina di sorkit wok. An Janice se: “Mi si se Jeuova did a ansa mi prieya dem, bot no iina di wie ou mi tingk im wuda ansa dem. Aalduo fi a wail mi did fiil se Jeuova naa ansa mi prieya, mi afi tangk im fi di wie ou im ansa mi prieya dem we mek mi si se im lov mi an im kain tu mi.”

15. Wa mek wi mait-a afi aks Jeuova fi sitn likl difrant fram wa wi did aks fa? (Luk pan di picha dem tu.)

¹⁵ Di tord kwestiyan wi kyan aks wiself a, ‘Mi shuda a prie fi sitn els?’ Aalduo  it gud fi aks Jeuova fi egzakli wa wi waahn, som a di taim a no egzakli wa wi prie fa Jeuova waahn fi wi. So wi mait-a fain se wi afi staat fi prie fi sitn likl difrant. Tingk bout da sista ya we neehn marid we did a prie fi go a di School for Kingdom Evangelizers. Shi did waahn fi go a di skuul so dat shi kuda elp out wich paat dem niid elp fi du di priichin wok. So, ye, notn no rang fi shi prie fi go a di skuul, bot shi kuda aks Jeuova fi elp ar fi si som ada wie we shi kuda du muor iina di priichin wok. (Aks 16:9, 10) Den shi kuda du sitn bout wa shi prie fa, laik shi kuda aks di sorkit uovasiya ef no kanggrigieshan de nier ar we niid muor paiyanier. Ar shi kuda rait di branch afis an aks dem wich paat dem niid muor elp fi du di priichin wok tu. e

16. A wa wi nuo fi shuor se?

¹⁶ Jos laik wa wi lorn aredi, wi kyan nuo fi shuor se Jeuova a-go ansa wi prieya dem iina wan wie we shuo se im lov wi an se im fier. (Sa. 4:3; Aiz. 30:18) Som a di taim im mait no ansa wi prieya dem iina di wie ou wi tingk im wuda ansa it. Bot wa wi nuo fi shuor a dat im a-go ansa wi kaa im lov wi an im naa go lef wi. (Sa. 9:10) So yu fi gwaan “chos iina im no mata wa a gwaan,” an tel im evriting we a gwaan wid yu.​—Sa. 62:8.