•  Wari unuimiatrattaj nu aujmattsatin 2

•  “Yuusa Chichame penker nekaawartai” 3-5

  •  Emkaka jintinkratuk 3

  •  Yuusa chichame penker nekaamu aujmattsartai 4

  •  Yuusa chichamen aujsatniua nuka 5

•  “Yuusa Chichame penker unuikiartin artai” 6-14

  •  Aujmattsatin juarkitia 7

  •  Aents waketrukim iyuta 8

  •  Kristu aents ajasarat tusam yainta 9

  •  Penker unuikiarturta 10

  •  Yuusa chichame jintinkratma 11

  •  Wariniuna aujmatsamniait 12

  •  Tui pujusa aentsjai aujmatea 13

  •  Papii susatin, video iimtiksatniusha 14

•  “Jehová umirkartai” 15, 16

  •  Yuusa chichame unuimiarartai 16

•  Amuak chichaktin 17

•  Iniakmamsatin ainian itiur jintintiawartiniait 18

•  Tsawant penker iistiniaiti 19

•  Wekas iikratin tatin 20

•  Uunt tuakma akuinkia 21

•  Jesusa jakamuri enentaimtustin akuinkia 22

•  Iruntratniun chichamprin 23

•  Emtikiatin 24

•  Jintinkratainian chicharin 25

•  Chikich tesamunam iniakmamsartin 26

•  Video iistin 27

1. “Jesús najanmiania aitkiasrik najanawartai” tana nu iruntramunam pachintsuk ju papii tana nuna tura Unuimiattai Papii tana nunasha iisar umikiartiniaiti. Ii yachi ii umai etserin ainia mashi iruntramunam iniakmamsarat tusar ikiakarartiniaitji. Chikich aentscha iruntramunam tuke pachiniakka tura Yuus papii tana nuna nekasaiti tusa umireakka iruntramunam iniakmamsarminiaiti. Yaksha etserin ajatsuk iruntramunam pachinkiattsa wakerakka papii Organizados akankamu 8 párrafo 8 tana nuna umiktiniaiti. Nui yaksha etserin ajastasa wakerakka wari itiurkatniuit aujmateawai. Ii yachii iruntratniun chichamprinkia pachinkiatniun jeawash tusa nijiai aujmatas ujaktatui. Nui nin unuiniana nusha nuyanchuka ni apari nukuriksha Testigo de Jehovaitkiunka pujuartiniaiti.

2. Nampet nampesar nuya Yuus sear aminkiamtai emtikiatin ana nuka unuimiatrattajnia nu itiur yainmaktataj nuna aujmatuk 1 minuto chichaktiniaiti.

 3. Emkaka jintinkratuk 10 minutos chichaktiniaiti. Wari enentaik jintinkratatniuit nuka Unuimiattai Papiinium awai, tura nu enentainiak paant jintinkratattsa chikich papiiniumsha eak aujmattsamniaiti. Nuna jintinkratatin ainiaka uunt anaikiamu artiniaiti, nuinchuka yaimin anaikiamu penker unuikiartin ainia nusha arminiaiti. Yuus papiinium papiich yama unuimiat juareakrikia video nuna aujmatu iinkia iruntramunam iimtiksatniuiti. Nu aminkiamtai Unuimiattai Papiinium wari enentaik jintinkratatniuit tana nuna jintinkratuk videonam tana nunasha pachis aujmattsamniaiti. 10 minutos iniankatsuk jintinkratuk Unuimiattai Papiinium nakumkamu irunna nunasha pachis paant aujmattsatniuiti.

 4. Yuusa chichame penker nekaamu aujmattsartai tana nuka 10 minutos atiniaiti. Nuna jintinkratatin ainiaka uunt anaikiamu artiniaiti, nuinchuka yaimin anaikiamu penker unuikiartin ainia nusha arminiaiti. Wariniuksha aujmattsuk nakak juarkitniuiti, tura amuaksha chichaa ajatsuk nakak amuktiniaiti. Yuus papiinium apatkar iistinian aarma tua aujsattaj nuna niinki iistiniaiti. Anintramu irunun mash anintrustiniaiti. Ame titia tutai chichainiak 30 segundos iniankatsuk chichasartiniaiti.

 5. Yuusa chichamen aujsatniua nuka 4 minutos atiniaiti. Nuna aujsatniuka aishman atiniaiti. Aujtan nakak nankaamatniuiti, tura aujsatniua nuna amuk warinkish tichatniuiti. Amukmatai emtikia chichareak itiura timiatrusrik penker aujsatniuit nuna aujmattsatniuiti. Yuus papiinium aujsatniua nu esarmaitkiuinkia yaki nuna penker aujsamniait tusa iruntratniun chichamprinia nuka iinkia iistiniaiti.

6. Nu unuimiatratniuka 15 minutos atiniaiti. Nu unuimiatkur, itiurkaria aentsjai yupichuch aujmatsamniaitiaj, Yuusa chichamesha itiur etserkatniuitiaj tura itiur unuikiarturtiniaitiaj nu nekaatainti. Ii yachi uunt anairamusha nui pachinkiarminiaiti. Unuikiartin papiinium Anenkratin ata papiiniumkesha tu akankamu unuimiatratniuit nuka Unuimiattai Papiinium paréntesis tana nui aarmaiti. Pachintsuk nuna unuimiatratniuiti. Jintinkrateakum anintrusarta takuinkia uunt anaikiamu nuna jintinkratatniuiti, nuichuka yaimin anaikiamu penker unuikiartiniaitkiunka jintinkratamniaiti (Jintinkrateakum anintrusarta takuinkia itiurkatniuitiam nekattasam  párrafo 15 iista).

 7. Aujmattsatin juarkitia tana nui iniakmamainiaka mai aishman mai nuwaksha artiniaiti. Antsu nii shuaraitkiuinkia aishman nuwajaish iniakmamsarminiaiti. Ekemsar wajasarkesh iniakmamsarminiaiti. (Wariniuna aujmatsamniait tura tui pujusa aentsjai aujmatea nu nekattsam  párrafos 12,  13 iista).

 8. Aents waketrukim iyuta tana nui iniakmamainiaka aishman nuwajainkia iniakmamsachartiniaiti (km-S 5/97 2). Mai aishman mai nuwaksha artiniaiti. Ekemsar wajasarkesh iniakmamsarminiaiti. Aents waketrukir waritminiaitiaj nuna iniakmamsatniuiti. (Wariniuna aujmatsamniait tura tui pujusa aentsjai aujmatea nu nekattsam  párrafos 12,  13 iista).

 9. Kristu aents ajasarat tusam yainta tana nui iniakmamainiaka aishman nuwajainkia iniakmamsachartiniaiti (km-S 5/97 2). Mai aishman mai nuwaksha artiniaiti. Ekemsar wajasarkesh iniakmamsarminiaiti. Antujat chichamjai juarkitin tana nu unuimiatratniuitkiuinkia amikmanaiyawar juarkiarminiaiti, turutskesh jintinkrata amuakur itiurkatniuit nu unuimiatratniuitkiuinkia amuiniak nuna iniakmamsarminiaiti. Nuyachuitkuinkia aents unuiniat juarkir unuiniakir weajnia aitkiasar najanawartiniaiti. Párrafo irunun mashikia aujsachartiniaiti, turasha nii wakeruiniakka aujsarminiaiti.

 10. Penker unuikiarturta tana nui Yuusa Chichame jintinkratma takuinkia aishman jintinkratatniuiti. Antsu iniakmamsartiniaitkiunka mai aishman mai nuwaksha artiniaiti. Antsu nii shuaraitkiuinkia aishman nuwajaish iniakmamsarminiaiti. Unuimiattai Papiinium tana nujai yupichuch nekaamnia nujai arantamujai aujmatuk anintramu aimkiatniuiti. Wakerakka tu papijiai aimea nunasha timiniaiti.

 11. Yuusa chichame jintinkratma tana nunaka aishman jintinkratatniuiti. Anenkratin ata tana nu papiinium Apéndice A tana nunia jintinkratatniuitkiunka Yuus papiinmaya nui aarmana nujai etserkur itiur jintiamniaitiaj nuna aujmatsatniuiti. Aujsajnia jui warinia ta tusa aujsamniaiti. Nuyasha wari akuiya jujai jintiatniuititaj turutskesh yaksha ninki penker nekat tusa nu aarmajai itiur jintintiamniaitiaj nunasha aujmatsamniaiti. Antsu papiinium akankamunmaya jintinkratniuitkiunka, Yuusa Chichame etserkur itiurkaria juu akankamu tana nu umiktiniaitiaj nuna jintinkratatniuiti. Wakerakka punto 1nam yaunchuk itiuriarmiania nuna aujmatsamniaiti turutskesh nu akankamunam chikich Yuus papiinmaya aarma ana nujai jintinkratamniaiti.

   12. Wariniuna aujmatsamniait. “Aujmattsatin juarkitia” tana nui turutskesh “Aents waketrukim iyuta” tana nuisha iniakmamsatniuitkiurkia ju párrafo tana nu tura párrafo 13 tana nusha umiktiniaitji. Jutikiatarum tama atsakuinkia, iniakmamsatniuka ni aisha Yuusa Chichamen warinia nekattsa wakerimniait nuna paant nekat tusa yupichuch jintintiatniuiti tura chikich tsawantincha nijiai aujmatki wetasa wariniuna aujmasattaj tusa titiniaiti. Iniakmamsatin ni pujana nui aents warinia nekattsar wakeriarminiait nui enentaimias wari enentain aujmattsataj tusa ninki iistiniaiti. Wakerakka etserkattsar papii najanamu tana nuna susamniaiti tura etserkattsar video tana nunasha iimtiksamniaiti. Warintiataj nu unuimiatramun timiatrusank iniakmamsashtiniaiti. Antsu aentsjai yupichuch aujmattiasar itiurkaria ni wakera nuna aujmatsamniaitiaj tura nijiai aujmateakur itiurkaria etserkamniaitiaj nunaka iniakmamsatniuiti.

   13. Tui pujusa aentsjai aujmatea. Iniakmamsatin ni pujana nui itiur etsertain ainis iniakmamsatniuiti. Ju awai:

1.  1) Jeakar jeakar etserkum tana nui. Jeakar jeakar etsereana ainis iniakmamsamniaiti turutskesh telefononmaani papii aarkesh itiura etserkamniaitiaj nuna iniakmamsamniaiti. Nuyasha aents waketrukir iyuttsar itiurkaria nijiai aujmatsamniaitiaj nunasha iniakmamsamniaiti.

2.  2) Tuinsha pujakum tana nui. Tuinsha wekaakur wari warinmansha najaneakrisha yajainsha aujmateakur itiura etserkamniaitiaj nuna iniakmamsamniaiti. Ju aminiaiti: takatnum, unuimiatainmansha, chikichniumkesh pujakrisha turutskesh busnum wekaakrisha itiurkaria Yuus papiinmaya aarma aents aujtusarminiaitiaj nuna iniakmamsamniaiti.

3.  3) Wajasam eterskum tana nui. Aents nukap yujainiamunam wajasar carritojai itiura etserkamniaitiaj, tura surutainiam, jintianmansha, parquenmansha, tura chikich aents irunmanumsha itiur etserkamniaitiaj nuna iniakmamsamniaiti.

 14. Papii najanamun susattajak, videonaksha iimtiksattajak tusa iniakmamsatniuka ninki iistiniaiti. Video iniaktusta takuinkia nuichuka videon iniaktustaj takunka apujtutsuk aya aujmatsatniuiti.

15. Chikich nampet nampesar amikiar, ii iwiakmarin itiura Yuusa chichame umiktiniaitiaj nunanu chikichik jimiarkesha jintinkrattainti. Nuka 15 minutos atatui. Nui jintinkratatin ainiaka uunt anaikiamu artiniaiti, nuinchuka yaimin anaikiamu penker unuikiartin ainia nusha arminiaiti. Antsu juna ii yachi uunt anaikiamu jintinkratattawai takuinkia tura “Chicham iiniu antukartai” tana nunaka uunt anaikiamu jintinkratatniuiti. Jintinkrateakum anintrusarta takuinkia, anintramu aarchamuncha anintrusminiaiti. Antsu yama juareak nukap aujmatsashtiniaiti ni yachii ni umaisha paant nekaawarat tura ni ewejen takuiyar chichasarat tusa. Chikichcha aujmattsarat takuinkia eem wajasar aujmatsartiniaiti jeainiakka.

  16. Yuusa chichame unuimiarartai tana nuka 30 minutos atiniaiti. Turasha papiinium unuimiatratniua nu mash unuimiatrar warik aminkiamtainkia antar pujuru ajashtiniaiti. Nui unuikiarturtin ainiaka uunt anaikiamu artiniaiti. Antsu uunt anairamu ishichik ainiakuinkia yaimin anaikiamu penker unuikiartin ainia nusha unuikiarturmin ainiawai. Tuke atsakamutin ii yachi chikich chikich aujainiakka tura chikich chikich unuikiartuiniakka mak ainti. Yaki nui penker unuikiarturminiait nuna iistasar uunt anairamu irunturartiniaiti. Unuikiarturtin ainiaka 30 minutos iniankatsuk paant nekaawarat tusar Yuusa chichamejai penker unuikiarturtinian neka artiniaiti. Nuna turattsar unuikiartuinia anintrak itiurkartiniait aarmana nuna iisartiniaiti (w23.04 24 recuadro). Emtikiak warik amukta tutainkia unuikiarturtinia nuka itiurak warik amukminiait tusa iistiniaiti. Warik amuktai tusa párrafo mashikia aujsashtatji timiniaiti.

17. Iruntramu amuamunam emtikia nu 3 minutos chichaktiniaiti. Unuimiatramu itiur yainmaj nuna awakeasan aujmatas, chikich atsakamutin wari unuimiatrattaj nunasha titiniaiti. Tsawan akuinkia chikich atsakamutin ya iniakmamsartatna nunasha etserkamniaiti. Chikich etsermash akuinkia etserkatniuiti, tura carta aujsatin akuinkia aujsatniuiti. Nuyanchuka chikich jutikiatarum tama akuinkia umiktiniaiti. Nukap etserma akuinkia emtikia nuka “Jehová umirkartai” tana nui jintinkratatin ainian warik amukta tiartatui ( párrafos 16,  19 iistarum). Yuusa chichame etserkattsar iruntratniuka, japimkiatniuksha, tura chikitcha tuke atsakamutin turutaiya nuka iruntramu amuana nui etserkashtiniaiti, antsu tableronam aujsarat tusa anujkatniuiti. Iruntramu amuktasar nampesar Yuus seatainti.

18. Emtikia nuka iniakmamsatin ainian juarkitiarum taku papiinium tu akankamu unuimiatratniuit nunaka tichatniuiti, antsu iniakmamsar amikiarmatai nuna timiniaiti. 1 minuto aintiaku shiir jintiak itiurka nui tana nuna umikia turutskesh itiura nu penker umikminiait nuna unuiniarminiaiti. Tura iniakmamsarainia nunanu chikichniasha unuikiarturtasa warinkish aujmattsamniaiti. Yaksha iniakmamsan nu nukap yaintasa iruntramu amukamtai aujsamniaiti, nuinchuka chikich tsawantin aujsamniaiti. Nuinkia Anenkratin ata papiinium, Unuikiartin papiiniumkesh, Benefíciese papiiniumkesha warinsha yainminia nuna iniaktusarminiaiti. Emtikia nu itiurkatniuit, tura iruntramunam jintinkratainian ya chicharsatniuit nu nekaattsam  párrafos 19,  24,  25 nui iista.

19. Iruntramunam jintinkratainiak iniakmamainiaksha tsawan chichaktinia nuna iniankatsuk amuktin ainiawai. Unuimiatai papii urutma tsawant chichaktiniait nuna tawai. Tumaitkiusha, tsawan amutukchamsha nekaatniua nuna timiatrusan nekamtikiartua amik antar chichaa pujutsuk amuktiniaiti. Emtikia nusha chichaak tsawantan penker iistiniaiti. Iniakmamainiak turutskesh jintinkratainiak tsawantan iniankakiarmatainkia emtikin nuka turutskesh jintinkratainian chicharin ana nuka chikich antuiniachmanum chicharkartiniaiti ( párrafos 24,  25 iista). Iruntramuka nampesar Yuus seajnia nurtiuk 1 hora 45 minutos atiniaiti.

20. Wekas iikratin tamatainkia Unuimiattai Papii tana nu ishichik yapajiasrik umiktiniaitji. “Yuusa chichame unuimiarartai” tana nuka atsuttawai, antsuka emtikia nu amuak wari unuimiaraj nuna aujmatas chikich atsakamutincha wari unuimiatrattaj nunasha aujmattsattawai. Etserma akuinkia etserkatniuiti, tura carta aujsatniush akuinkia aujsatniuiti. Nuna amik, yamaikia wekas iikratin jintinkratattawai titiniaiti. Nuya wekas iikratniuka 30 minutos jintinkrata amik, amuktasar nampet nampesartai titiniaiti. Tu nampeta nampestataj nuna niinki iistiniaiti. Nuya chikichan Yuus seata timiniaiti. Wekas iikratin tamatainkia chikich tesamunmasha iniakmamsartin atsutniuiti, antsu chikich chichamjai nuin nishaa irunainiakka iruntrarminiaiti. Turasha wekas iikratin jintinkratna nunaka niisha antuktin ainiawai.

21. Nu atsakamutin uunt tuakma akuinkia tuke irun wemajnia nuka atsuwiti. Nu atsakamutin iruntramunam unuimiatratniua nuka iik unuimiatratniuitji, nuinchuka ii jeen pujuinia nujai unuimiatratniuitji tu etsernaktiniaiti.

22. Luneskesh, marteskesh, miercoleskesh, jueveskesh, vierneskesh nui Jesusa jakamuri enentaimtustin akuinkia nu tsawantin tuke irun wemajnia nuka atsuttawai.

23. Junaka uunt anairamu anaikiartiniaiti. Nisha uunt anaikiamu atiniaiti. Ju papiinium tana nuna iruntramunam uminkiat tusa penker iistiniaiti. Penker takakmastai tusa iruntramunam jintinkratainian chicharin ana nujaisha tuke aujnaisatniuiti. Unuimiattai Papii yama jinkimtai jimiara nantutin iruntramunam ya emtikiartata, ya jintinkratawartata tura ya iniakmamsartata tusa iis papiinium aar tableronam anujkatniuiti ( párrafos 3-16 tura  24 iista). Ya jintinkratatniuit tura ya iniakmamsartiniait nekattsar junis enentaimsatniuiti. Urutma uwin takakea? Jehovan nukap uwin enentaimtawak turutskesh Jehovan enentaimtutan yama juarkimkia? Juu enentain ni iwaakmarin penker umiawak? Juna jintinkratamtainkia chikicha itiur enentaimsartata? Tu animiastiniaiti. Iniakmamsartinia nuna naarin Jesús najanmiania aitkiasrik najanawartai tana nui pachinkiatin (S-89) tana nu papiichiniam anujratniuiti. Iniakmamsatin tsawan menaintiu atsakamu taasmanum, nu nukap taasmanumkesha nuna najana sukartustiniaiti. Nin yainkiat tusar uunt anairamu chikichniash anaikiarminiaiti. Nuka uunt anaikiamu nuinchuka yaimin anaikiamu aminiaiti turasha uunt anaikiachmaitkiunka ya emtikiartata tura ya jintinkratawartata nunaka tichatniuiti. Emtikiatin ainiana nu, “Yuusa Chichame penker nekaawartai” tana nui tura “Jehová umirkartai” tana nuisha jintinkratawartatna nusha uunt anairamu penker iisma artiniaiti.

24. Tuke atsakamutin iruntramunam emtikia atatui. Emtikiatin ainiaka uunt anaikiamu artiniaiti. Antsu uunt anairamu ishichik ainiakuinkia yaimin anaikiamusha arminiaiti. Iruntratniun chichamprinia nuka nukap atsakamutin emtikiatin aminiaiti. Yaki penker emtikiawarminiait nuna iistasar uunt anairamu irunturartiniaiti. “Yuusa chichame unuimiarartai” tana nui uunt anaikiamu unuikiartu wearmania nuka penker emtikiawarminiaiti. Shiir ajau artiniaiti, tura iniakmamsarun penker chicharsatniun neka artiniaiti. Iruntramunam emtikiatniuka wari unuimiatrattaj nuna aujmatsattsa tura amuak chichaktasa penker iwiarnartiniaiti. Uunt anairamu ishichik ainiakuinkia emtikiatin ana nuka chikichniumsha jintinkratamniaiti, tura video aya iistin akuinkia nunasha yamaikia iisartai timiniaiti. Chikichsha ya jintinkratatta nuna nukap aujmattsuk warik titiniaiti. Warik ati tusa, chikichan microfonon apujtuiniai emtikiaka ayamach chikich microfonam wajasminiaiti. Tura iniakmamainia nuisha ayamach mesanam pujumniaiti. Emtikiaka iruntramu nekasain amukat tusa tsawantan penker iistiniaiti ( párrafos 17,  19 iista).

25. Jintinkratainian chicharniuka iruntramunam jintinkratatniun penker neka atiniaiti. Uunt anairamu penker jintinkratin nukap irunkuinkia jintinkratainian chicharin anaikiamu chikichik uwin ejemtai chikich anaikiamu aminiaiti. “Jesús najanmiania aitkiasrik najanawartai” tana nu iruntramunam jintinkratainian, sawartin tumintinkisha iruntramunam jintinkratainiancha, tura papii unuimiatmanum aujainiana nunasha yainkiartasa chicharkarminiaiti ( párrafo 19 iista). Tumaitkiush tukeka chicharkachartiniaiti.

26. Nukap aents irunainiakuinkia chikich tesamunmasha iniakmamsarminiaiti. Nuna iistin uunt anaikiamu atiniaiti, tura atsakuinkia yaimin anaikiamu penker unuikiartin aminiaiti. Nusha yaki ati tura urutma tsawantak pujusat tusar uunt anairamu irunturartiniaiti. Chikich tesamunam unuikiartinkia  párrafo 18 tana nuna umiktiniaiti. Nu akuinkia, “Yuusa chichame penker nekaamu aujmattsartai” tana nu amuukamtai, chikich tesamunam iniakmamsartin nui weartiniaiti. Nuya mash iniakmamsar amikiarmatai uunt tesamunam ataksha waketkiartiniaiti.

27. Iruntramunam video iistin iruneawai. Nuka aplicación JW Library^® nui nukap celularjai tabletjai computadorajaisha iisminiaiti.

© 2023 Watch Tower Bible and Tract Society of Pennsylvania

S-38-SHU 11/23