“Chi̱ mií vá Ndios ni̱ da̱tóo̱n ña̱xintóni̱ dao ta̱a, dá ni̱ taa ra ndidaá to̱ʼon tándaa noo̱ tuti i̱i ná” (2 Timoteo 3:​16, Tuti yóʼo kúú to̱ʼon Ndios, ta xíʼo ña kuendá saʼa̱ Jesús).

Yóʼo va̱xi ña̱ nandiónéʼe saʼa̱ ndiʼi ña̱ ndakatu̱ʼúnyó miíyó (Proverbios 2:​1-5).

Káʼa̱nña xíʼínyó ndixi keeyó jaá kandoyi va̱ʼayó (Salmo 119:​105).

Káʼa̱nña saʼa̱ ña̱ miía̱ndaa̱ ndísa ndátiyó koo chááka̱ chínuu̱ (Romanos 15:4).

Kuuvá kandísayó, ná kande̱ʼéyó uni̱ ña̱ naʼa̱ ña̱ jaá kían:

• Vií na̱kitáʼan tu̱ʼun káʼa̱nña. Tátu̱ʼun ivi̱ xikoká ta̱a ni̱taa Tu̱ʼun Ndio̱s tein iin mil iñu̱ ciento kuia̱. Va̱árá kuaʼa̱ ta̱yóʼo ko̱ ni̱xini táʼanra, jo ko̱ ni̱naja̱ma ña̱ ni̱taara nuu̱ Tu̱ʼun Ndio̱s vií na̱kitáʼan ña̱ káʼa̱nña saʼa̱ ña̱ kúni̱ Ndio̱s keena.

• Tá nakaniña saʼa̱ iin ña̱ ni̱ya̱ʼa ndinuʼu ña̱ ndaa̱ káʼa̱nña. Na̱ kúú historiador chije̱ʼéna iin ña̱ ko̱va̱ʼa ni̱kee na̱ ñuuna. Jo, ta̱ ni̱taa Tu̱ʼun Ndio̱s ko̱ ni̱chije̱ʼéra ña̱ ko̱va̱ʼa ni̱kee miíra ni ña̱ ko̱va̱ʼa ni̱kee na̱ ñuura (2 Crónicas 36:​15, 16; Salmo 51:​1-4).

• Ndiʼi profecía va̱xi nuu̱ña jaá kuití xino̱ko̱oña. Sa̱ ni̱ka̱ʼa̱nvá Tu̱ʼun Ndio̱s ña̱ naá ñuu Babilonia tá kúmani̱ ivi̱ ciento ká kuia̱ jaá ya̱ʼaña (Isaías 13:​17-​22). Ta o̱ju̱ú sa̱va̱ʼa ni̱ka̱ʼa̱nña ndixi naá ñuu káʼno yóʼo, janí ni̱ka̱ʼa̱nña kivi̱ ta̱ jánaá ñuu yóʼo (Isaías 45:​1-3).

  Janí javaka̱ profecía ni̱ka̱ʼa̱n Tu̱ʼun Ndio̱s koo chínuu̱ ni̱xino̱ko̱o nditáʼa̱n ña̱ ni̱ka̱ʼa̱nña ni iin ña̱ ko̱ ni̱ya̱ʼa oo̱n. Ta viti, ¿á o̱ju̱ú ña̱yóʼo kúú ña̱ kánian kandatiyó tá miía̱ndaa̱ kúúña Tu̱ʼun Ndio̱s? (2 Pedro 1:​21).