Yérémia 11:1-23
11 Iki omongané Yéhuwah marang Yérémia:
2 ”Hé umat-Ku, rungokna isiné perjanjian iki.
”Sampèkna iki* marang wong Yéhuda lan penduduk Yérusalèm.
3 Ngomonga, ’Yéhuwah Gusti Allahé Israèl, kandha, ”Wong sing ora manut isiné perjanjian iki bakal dikutuk.+
4 Perjanjian iki Tak gawé karo nènèk moyangmu pas Aku nggawa wong-wong kuwi metu saka Mesir,+ saka panggonan kanggo nglebur wesi.*+ Isiné yaiku, ’Manuta omongan-Ku, lan kowé kudu nindakké kabèh sing Tak préntahké marang kowé. Mula kowé bakal dadi umat-Ku, lan Aku bakal dadi Gusti Allahmu.+
5 Dadi, Aku isa nepati sumpah-Ku marang nènèk moyangmu kanggo mènèhi wong-wong kuwi tanah sing akèh susu lan maduné,’+ yaiku tanah sing mbok enggoni nganti saiki.”’”
Terus aku njawab, ”Amin,* Yéhuwah.”
6 Terus Yéhuwah kandha marang aku, ”Umumna kabèh omongan iki ing kutha-kutha Yéhuda lan ing dalan-dalan Yérusalèm, ’Rungokna isiné perjanjian iki, lan tindakna kuwi.
7 Pas nggawa nènèk moyangmu metu saka Mesir, Aku wis ngélikké wong-wong kuwi, ”Manuta omongan-Ku.”+ Aku isih terus* ngélikké wong-wong kuwi nganti saiki.
8 Ning, wong-wong kuwi ora gelem ngrungokké utawa nggatèkké.* Wong-wong kuwi malah ndableg nuruti kepénginan atiné sing jahat.+ Mula, Aku ngukum wong-wong kuwi sesuai karo apa sing ditulis ing perjanjian. Kuwi perjanjian sing wis Tak préntahké bèn ditindakké wong-wong kuwi lan perjanjian sing wis ditolak wong-wong kuwi.’”
9 Terus Yéhuwah kandha marang aku, ”Wong Yéhuda lan penduduk Yérusalèm padha sekongkol.
10 Wong-wong kuwi padha nindakké manèh kesalahané nènèk moyangé mbiyèn, sing ora gelem manut omongan-Ku.+ Wong-wong kuwi ya nyembah lan nglayani allah-allah liya.+ Wong Israèl lan wong Yéhuda wis nglanggar perjanjian sing Tak gawé karo nènèk moyangé.+
11 Kuwi sebabé Yéhuwah kandha, ’Aku bakal nyebabké wong-wong kuwi kena bencana,+ lan ora ana sing isa lolos. Pas wong-wong kuwi njaluk tulung marang Aku, Aku ora bakal ngrungokké.+
12 Terus, penduduk kutha-kutha Yéhuda lan Yérusalèm bakal lunga marang allah-allah sing biasané diwènèhi korban.* Wong-wong kuwi padha njaluk tulung marang allah-allah kuwi,+ ning allah-allah kuwi ora bakal isa nylametké pas wong-wong kuwi kena bencana.
13 Oh Yéhuda, allah-allahmu akèhé padha kaya kutha-kuthamu. Kowé mbangun mézbah lan mènèhké korban marang Baal,+ brahala sing ora ana gunané kuwi. Mézbah-mézbah kuwi jumlahé padha akèhé kaya dalan-dalan Yérusalèm.’
14 ”Kowé Yérémia, aja ndonga kanggo bangsa iki. Aja sambat utawa ndonga kanggo wong-wong kuwi.+ Nèk wong-wong kuwi ngalami bencana lan njaluk tulung marang Aku, mesthi ora bakal Tak rungokké.
15 Ngapa umat sing Tak tresnani kuwi ana ing omah-Ku,Padahal akèh sing wis nindakké rencana jahat?
Apa mbok kira nèk mènèhké korban isa nyegah bèn kowé ora ngalami bencana,Terus bar kuwi kowé* isa seneng-seneng?
16 Yéhuwah tau nyebut kowé wit zaitun sing subur,Sing indah lan buahé apik.
Ning nganggo swara banter, Dhèwèké ngobong wit kuwi,Lan mungsuh-mungsuh nugel cabang-cabangé.
17 ”Yéhuwah pemimpiné pasukan, sing nandur kowé,+ wis kandha nèk kowé bakal ngalami bencana merga kejahatan sing wis ditindakké wong Israèl lan wong Yéhuda. Wong-wong kuwi mènèhké korban marang Baal kanggo nglarani ati-Ku.”+
18 Yéhuwah wis ngandhani aku bèn aku ngerti.
Oh Gusti Allah, wektu kuwi Njenengan nduduhké tumindaké wong-wong kuwi marang aku.
19 Aku kaya anak domba jinak sing digiring arep dibelèh.
Aku ora ngerti nèk wong-wong kuwi nggawé rencana jahat iki marang aku:+
”Ayo ngancurké wit lan buahé.
Ayo matèni dhèwèké, bèn jenengé ora diéling-éling manèh.”
20 Ning, Yéhuwah pemimpiné pasukan ngadili nganggo cara sing adil.
Dhèwèké mriksa ati+ lan pikiran.*
Oh Gusti Allah, tulung ijinké aku ndelok Njenengan mbales wong-wong kuwiMerga kasusku wis tak pasrahké Njenengan.
21 Kuwi sebabé Yéhuwah kandha marang wong-wong Anatot+ sing péngin matèni aku, sing kandha, ”Aja ngramal nganggo jeneng Yéhuwah.+ Nèk nékad, kowé bakal tak patèni.”
22 Iki sing diomongké Yéhuwah pemimpiné pasukan: ”Aku bakal ngukum wong-wong kuwi. Cah-cah lanang bakal dipatèni nganggo pedhang.+ Anak-anaké wong-wong kuwi, sing lanang lan sing wédok, bakal mati merga kelaparan.+
23 Ora ana sing isih tetep urip, merga Aku bakal nggawé wong-wong Anatot+ kena bencana, yaiku ing taun wong-wong kuwi dihukum.”
Katrangan Tambahan
^ Kayané préntah kanggo Yérémia.
^ Iki lambang penindasan sing kejem.
^ Utawa ”Dadia kaya ngono”.
^ Lit.: ”Aku tangi ésuk-ésuk lan”.
^ Lit.: ”utawa ngarahké kupingé”.
^ Utawa ”sing digawèkké asap korban”.
^ Maksudé, Yéhuda.
^ Lit.: ”ginjal”.
