Yérémia 52:1-34
52 Pas mréntah dadi raja, Zédékia+ umuré 21 taun lan mréntah suwéné 11 taun ing Yérusalèm. Ibuné jenengé Hamutal+ anaké Yérémia saka Libna.
2 Zédékia terus nindakké apa sing jahat nurut pandhangané Yéhuwah, kaya sing ditindakké Yéhoyakim.+
3 Yéhuwah nesu banget marang Yérusalèm lan Yéhuda, nganti wong-wong kuwi disingkirké saka ngarepé.+ Akhiré, Zédékia mbrontak nglawan raja Babilon.+
4 Ing taun kesanga pamréntahané Zédékia, ing dina kesepuluh sasi kesepuluh, Nébukhadnézar* raja Babilon teka bareng karo kabèh pasukané kanggo nyerang Yérusalèm. Wong-wong kuwi kémah ing ngarepé kutha kuwi lan mbangun témbok ing sak ubengé kanggo ngepung kutha kuwi.+
5 Kutha kuwi dikepung nganti taun ke-11 pamréntahané Raja Zédékia.
6 Ing dina kesanga sasi kepapat,+ pas ana kelaparan sing parah ing kutha kuwi lan ora ana panganan kanggo rakyat ing tanah kuwi,+
7 témbok kutha kuwi ditrobos. Benginé, para prajurit padha mlayu saka kutha kuwi liwat gerbang sing ana ing antarané témbok lapis loro ing cedhak taman raja. Wektu kuwi, wong Khaldéa ngepung kutha, terus wong-wong kuwi mlayu menyang arah Araba.+
8 Ning, pasukan Khaldéa ngoyak* Zédékia,+ lan wong-wong kuwi nangkep dhèwèké ing Padhang Gurun Yérikho. Kabèh pasukané Raja padha mencar ninggalké Raja.
9 Bar kuwi, Raja Zédékia ditangkep lan digawa marang raja Babilon ing Ribla ing dhaérah Hamat, terus dihukum.
10 Raja Babilon matèni anak-anaké lanang Zédékia ing ngarepé Zédékia. Dhèwèké ya matèni kabèh pemimpin Yéhuda ing kana, ing Ribla.
11 Terus, Raja Babilon nggawé mripaté Zédékia dadi wuta,+ nalèni sikilé lan tangané nganggo ranté tembaga, lan nggawa dhèwèké menyang Babilon. Zédékia dipenjara ing kono nganti mati.
12 Ing sasi kelima, ing dina kesepuluh sasi kuwi, yaiku taun ke-19 pamréntahané Nébukhadnézar* raja Babilon, Nébuzaradan sing dadi kepala pengawalé raja Babilon teka menyang Yérusalèm.+
13 Dhèwèké ngobong omahé Yéhuwah,+ istanané raja, lan kabèh omah ing Yérusalèm. Dhèwèké ya ngobong kabèh omah gedhé ing kutha kuwi.
14 Témbok-témbok sing ngubengi kutha Yérusalèm dirubuhké karo kabèh pasukan Khaldéa sing ngetutké kepala pengawal kuwi.+
15 Terus, Nébuzaradan kepala pengawal kuwi nawan rakyat biasa lan wong-wong sing isih ana ing kutha Yérusalèm. Dhèwèké ya nggawa wong-wong sing mihak raja Babilon lan para pengrajin sing ahli sing isih urip.+
16 Ning, sebagéan rakyat ing tanah kuwi sing mlarat banget ditinggal Nébuzaradan kepala pengawal kuwi, supaya wong-wong kuwi isa didadèkké pengurus kebon anggur lan dikongkon kerja paksa.+
17 Wong Khaldéa ngremuk cagak-cagak tembaga+ omahé Yéhuwah, grobag-grobag,+ lan Laut Tembaga+ sing ana ing omahé Yéhuwah, terus nggawa kabèh tembagané menyang Babilon.+
18 Wong-wong kuwi ya nggawa wadhah awu, sekop, alat kanggo matèni geni ing sumbu, mangkok,+ cangkir,+ lan kabèh peralatan saka tembaga sing digunakké ing bait.
19 Kepala pengawal kuwi njupuk baskom,+ wadhah bara, mangkok, wadhah awu, wadhah lampu,+ cangkir, lan mangkok-mangkok sing digawé saka emas lan pérak murni.+
20 Tembaga sing digunakké kanggo nggawé cagak loro, Laut Tembaga, 12 patung sapi lanang saka tembaga+ sing nyangga Laut Tembaga, lan grobag-grobag sing digawé Raja Salomo kanggo omahé Yéhuwah jumlahé akèh banget nganti ora isa ditimbang.
21 Saben cagak dhuwuré 18 hasta.* Kelilingé saben cagak kuwi 12 hasta,*+ lan kandelé kira-kira pitung sèntimèter.* Cagak-cagak kuwi kopong.
22 Kepala cagak digawé saka tembaga. Kepala cagak kuwi dhuwuré limang hasta.+ Kabèh jaring lan delima sing ngubengi kepala cagak digawé saka tembaga. Cagak loro kuwi padha persis, termasuk delimané.
23 Ana 96 delima ing sisi-sisiné. Kabèhé ana 100 delima ing sak ubengé jaring kuwi.+
24 Kepala pengawal kuwi nangkep Séraya,+ yaiku imam kepala, Zéfanya,+ yaiku imam sing mbantu imam kepala, lan telu penjaga lawang.+
25 Saka kutha kuwi, dhèwèké nangkep siji pejabat istana sing ngawasi para prajurit, pitu penaséhat pribadi Raja sing ana ing kana, siji sekretaris pemimpin pasukan sing nglumpukké rakyat ing tanah kuwi, lan 60 wong biasa sing ana ing kutha kuwi.
26 Nébuzaradan kepala pengawal kuwi nggawa wong-wong mau marang raja Babilon ing Ribla.
27 Terus, raja Babilon matèni wong-wong mau ing Ribla+ ing dhaérah Hamat. Ya ngono kuwi ceritané Yéhuda ditawan saka tanahé.+
28 Iki wong-wong sing ditawan Nébukhadnézar:* Ing taun kepitu, 3.023 wong Yahudi.+
29 Ing taun ke-18 pamréntahané Nébukhadnézar,*+ 832 wong ditawan saka Yérusalèm.
30 Ing taun ke-23 pamréntahané Nébukhadnézar,* Nébuzaradan kepala pengawal kuwi nawan 745 wong Yahudi.+
Jumlahé ana 4.600 wong sing ditawan.
31 Sakwisé Èwil-mérodakh dadi raja Babilon, dhèwèké ngetokké lan mbébaské* Yéhoyakhin+ raja Yéhuda saka penjara.+ Kuwi kelakon ing dina ke-25 ing sasi ke-12, ing taun ke-37 sakwisé Yéhoyakhin raja Yéhuda ditawan.
32 Dhèwèké apikan marang Yéhoyakhin lan mènèhi Yéhoyakhin kedudukan sing luwih dhuwur timbang raja-raja liyané sing bareng dhèwèké ing Babilon.
33 Yéhoyakhin nyopot klambi penjarané, lan sakjegé uripé dhèwèké mesthi mangan bareng Raja.
34 Sakjegé uripé, dhèwèké mesthi éntuk jatah mangan saben dina saka raja Babilon nganti dhèwèké mati.
Katrangan Tambahan
^ Lit.: ”Nébukhadrézar”, éjaan liya jeneng iki.
^ Utawa ”nguber”.
^ Lit.: ”Nébukhadrézar”, éjaan liya jeneng iki.
^ Lit.: ”Nébukhadrézar”, éjaan liya jeneng iki.
^ Lit.: ”Nébukhadrézar”, éjaan liya jeneng iki.
^ Lit.: ”Nébukhadrézar”, éjaan liya jeneng iki.
^ Lit.: ”ngangkat sirahé”.
