Imi nebɣa ad iţţubecceṛ “linǧil”, yeεni lexbaṛ n lxiṛ, i “mkul lǧens, i mkul lεeṛc, i mkul tutlayt, i mkul agdud”, nessufuɣ-​ed tiktabin deg wakteṛ n 750 n lluɣat. (Aweḥḥi 14:6) Amek i nessawaḍ ɣer wayagi? S yiwet n terbaεt n yemyura, i gellan di kra n tmura, akk-​d yiwet n terbaεt n ṭrejmanat i gqeddcen seg wul; akken ma llan d Inagan n Yahwa.

Ayen yeţwaketben di tazwara yeţţuhegga-​d s teglizit. Di lbiru yeţwellihen Inagan n Yahwa n ddunit meṛṛa, Asqamu amwellah ibedd ɣer leqdic n tira. Leqdic-​agi yesdukkul lxedma n yemyura yellan di Bitil n Marikan akk-​d ţ-​ţin n wid yellan di kra n Bitilat nniḍen. Imi imyura-​yagi mwezzaεen di ddunit, ayagi isemmeḥ-​asen a d-​hedṛen di tezmamin-​nneɣ ɣef temsal yemxallafen, i gεeǧben i lɣaci n tmura meṛṛa.

Ayen yeţwaketben iţţuceggeε i wid yesṭerjimen. Mi ṣeggmen ayen akken yeţwaketben yerna iεǧeb-​asen, a t-​ceggεen s ţţawil n luṛdinatur i trebbuyaε n ṭrejmanat-​nneɣ yellan di ddunit meṛṛa. Tirebbuyaε-​agi sṭerjiment, ţwalint ma yella tṣeḥḥa ṭrejma-​nni, umbeεd ţwenniεent-​eţ. Ṭrejmanat-​agi ţnadin “a [d-​inin] ṣṣeḥḥ s imeslayen iwulmen”, yeεni a d-​inin s lluɣa-​nsen ayen yuran swaswa s teglizit.—Amusnaw 12:10.

Luṛdinatur iţεawan-​aɣ a nxeddem s lemɣawla. Luṛdinatur ur yezmir ara ad iṭṭef amkan n win yeţţarun neɣ n win isṭerjimen. Lameεna, imi nessexdam imawalen akk-​d ţţawilat n unadi i gţeddun s luṛdinatur, nxeddem s lemɣawla. Uyerna, Inagan n Yahwa snulfan-​d yiwen n ţţawil yeţţusemman MEPS (Multilanguage Electronic Publishing System). Ţţawil-​agi iţεawan-​iten akken a d-​heggin deg waṭas n lluɣat ayen yeţwaketben, a s-​sdukklen ţţeswiṛat w’a t-​ssewǧden akken a d-​iḍbeε.

Ayɣer i ţwaxdamen wannect-​agi yakk n lmeǧhudat ula ɣef ddemma n lluɣat i heddṛen kan kra n luluf n lεibad? Axaṭer Yahwa yebɣa “ad ţwasellken yemdanen meṛṛa, yerna ad awḍen ad issinen tideţ akken i glaq.”—1 Timutawus 2:3, 4.

• Amek i ţwaketbent tezmamin-​nneɣ?

• Ayɣer i tent-​id-​nesṭerjim deg waṭas n lluɣat?