AḤRIC 17
Acu i xeddmen ineqqaden n tɣalayt?
Tira tiyunaniyin timasiḥiyin bedrent-ed aṭas n tikkal Bar-Naba (Barnabas) akk-d wemceggeε Bulus, yellan d ineqqaden imsebriden i grezzun ɣef tjemmuyaε n lqern amezwaru. Ayɣer i llan xeddmen akka? Axaṭer ţḥebbiṛen seg wul ɣef lfeṛḥ n watmaten-nsen imasiḥiyen. Bulus yenna: “Eyya an-nuɣal s atmaten-nneɣ [...] an-nwali amek i ţţilin.” (Lecɣal 15:36) Yella yewǧed ad iddu acḥal d wacḥal akken ad iṛuḥ a ten-isseǧhed. D annect-a daɣen i d leqsed n ineqqaden imsebriden n lweqt-nneɣ.
Ţţasen-d iwakken a ɣ-sseǧhden. Mkul aneqqad n tɣalayt yesteklef s wazal n εecrin n tjemmuyaε. Sin iberdan i useggas, isεedday d mkul yiwet seg-sent smana. Ayen akk i ssnen d wayen i jeṛṛben, ama d nutni ama ţ-ţulawin-nsen (ma yella zewǧen), iṣleḥ-aɣ mliḥ. Ḥemmlen ad issinen imeẓyanen d imeqranen yerna ḥemmlen ad berrḥen yid-neɣ w’ad ḥedṛen m’ara nɣer Adlis Iqedsen d walbeεḍ. Rezzun nutni d lecyux ɣef kra n watmaten ţ-ţyessetmatin n tejmaεt iwakken a sen-fken lemεawna i sen-iwulmen. Deg inejmuεen akk-d yegrawen, xeddmen-d lxeṭbat i ɣ-isseǧhaden.—Lecɣal 15:35.
Ţḥebbiṛen ɣef mkul yiwen seg-neɣ. Ineqqaden n tɣalayt ţεawanen atmaten ţ-ţyessetmatin di tjemmuyaε bac ad sεun lεalaqat iǧehden d Yahwa. Ţnejmaεen nutni d lecyux akk-d iqeddacen imεawnen akken ad ẓren s anda i telḥeq tejmaεt, akken daɣen a sen-fken lewṣayat bac ad steklfen akken ilaq s lecɣal i sen-iţţunefken. Ţεawanen inaramen a d-awin akteṛ n lfayda deg uberreḥ. Ḥemmlen ad issinen ijdiden yerna ţnadin ad ẓren amek i ţnernin di leḥwayeǧ n ṛṛuḥ. Yal yiwen seg-sen yeţţak seg wul si lǧehd-is yerna “ixeddem yid-[neɣ] ɣef ddemma-[nneɣ].” (2 Ikurintiyen 8:23) Ilaq-aɣ a ten-neţεanad di liman-nsen akk-d lεalaqat i sεan d Ṛebbi.—Iεebṛaniyen 13:7.
-
Ayɣer i rezzun ineqqaden n tɣalayt ɣef tjemmuyaε?
-
Amek i tzemreḍ a d-tesfaydiḍ si tmerziwt-nsen?