Ma prat aten a lam hpe tsun dan lu na kun?

1943, Itali mung hta shangai ai. Kahpu kanau marai 6 hte arau, kahtawng langai mi kaw nga kaba wa ai. Awa gaw hkauna mung galaw ai, laksama mung galaw ai. Nu yan wa gaw, Kahtawlik hpung hpe kamsham ai ni byin wa hkra, an nau ni hpe bau maka wa ai.

Hpa majaw Wa Jau byin mayu wa ai kun?

Ngai naw kaji ai aten hta, Wa Jau ni tara hkaw ai hpe grai madat mayu wa ai. Shanhte ni a tara hkaw ai nsen, nawku dawjau ai htunghking ni hpe grai ra sharawng ai. Dai majaw, ngai mung lani mi hta Wa Jau byin hkra galaw na matu dawdan wa ai. Asak 13 ning daram hta, anu gaw ngai hpe, Jau shalat jawng lung na matu jawng ap ya ai.

Dai jawng hta Chyum Laika hkaja wa ai kun?

N hkaja wa ai. Ngai asak 15 ning daram hta Yesu a prat hte Karai a magam gun ai labau ni lawm ai Kabu Gara Shiga Laika langai hpe, Wa Jau langai jaw ai. Ngai dai hpe chyahkring hkring hti ai. Asak 18 ning daram hta Roma de sa nna, Jau ni a woi awn npu hta nga ai jau tai dakkasu hta lung wa ai. Dai hta, Latin, Grik, labau hte seng ai lam, sawn sumru hpaji, myit hte seng ai hpaji, Chyum Laika kaw na chyum daw ni hpe hti ra tim, Laban Ya hta tara hkaw ai lamang ni hta Chyum Laika hti ai hpe na la lu tim, gaja wa nga yang gaw Chyum Laika hpe n hkaja byin wa ai.

Lit shatsam hkrum ai Wa Jau langai byin wa ai shaloi, tinang nan sharin ya ra ai kun?

Ngai gaw uphkang ai lam hte seng nna sha madung galaw ra ai. Raitim, lahkawng ngu na Batikan Kongsi a matsun ni hpe sharin ya wa ai.

Kahtawlik hpung hpe hpa majaw ntsen ai myit nga wa ai kun?

Lam 3 a majaw re. Shanhte gaw, mung masa lam hta shang lawm ai. Nawku dawjau ai lam hta woi awn ai ni, hpung masha ni a akyang lailen htenza ai lam hpe n chye masu su da ai. Bai nna, shanhte a sharin achyin ai lam nkau mi gaw n jaw ai zawn re. Ga shadawn, tsawra myit rawng ai Karai Kasang gaw masha ni si mat yang, ngarai hta htani htana zingri ai ngu ai gaw mai byin na kun? Dai sha n-ga, akyu hpyi ga ni hpe akyu hpyi kachyi (rosary) hti nna kahtap htap akyu hpyi shangun mayu ai ngu ai lam gaw jaw na kun? *

Rai yang hpa galaw wa ai kun?

Ngai hkrap nna lam matsun lu na matu akyu hpyi wa ai. Itali amyu ga hte dip shapraw da ai Kahtawlik Yerusalem Chyum Laika hpe mari nna hti hpang ai. Dai hpang, Laban Ya jahpawt mi hta Poi Daw sha ngut ai hpang, bu hpun palawng galai ngut nna sa lam hkyen ai shaloi, Chyum Jawng wang kaw masha lahkawng du wa ai. Shanhte gaw Yehowa Sakse ni re. Chyum Laika lam hte teng man ai nawku hpung a masat dingsat a lam hkying hkum mi jan, shanhte hte arau bawngban byin wa ai.

Shanhte hte seng nna gara hku shadu ai kun?

Shanhte hkam la da ai lam hte seng nna ra sharawng mat ai. Bai nna, Kahtawlik Chyum Laika kaw na Chyum daw ni hpe aloi sha hpaw dan lu ma ai. Dai hpang, Mariyo ngu ai kaga Sakse Hkam langai mung ngai kaw sa chyai ai. Shi gaw myit galu ai, jan ja, marang htu tim Bat Kru Ya jahpawt hkying 9 nga yang du wa sai.

Kaga Wa Jau ni mung shi sa chyai ai hpe gara hku mu mada ai kun?

Anhte Chyum Laika lam bawngban shagu shanhte hpe shang lawm na matu, saw shaga tim, Chyum Laika hkaja ai hpe kadai mung ahkyak n shatai ma ai. Ngai chyawm gaw ahkyak shatai ai. Karai Kasang gaw n kaja ai lam ni hte yakhkak jamjau lam ni hpe hpa majaw byin na ahkang jaw da ai kun, ngu ai ngai myit shuk nga ai lam ni hpe sharin hkaja la lu ai majaw, myit hta asan nga mat ai.

Chyum Laika hkaja ai hpe kaga Wa Jau ni pat shingdang wa ai kun?

1975 hta, Roma mung de chyahkring hkring sa nna nye a ningmu hpe tsun dan na matu shakut wa ai. Wa Jau ni gaw ngai hpe asawng nna sanglang dan na matu shakut tim, kadai mung Chyum Laika hpe akyu n jashawn ma ai. 1976, January 9 ya hta, ngai gaw Kahtawlik hpung masha n re sai lam shanhte hpang de laika ka dat ai. Lahkawng ya na ai hpang, chyum jawng wang kaw na pru wa ai. Dai hpang, wanleng jawn nna Yehowa Sakse Ni a nawku zuphpawng hpe shawng nnan sa lung ai. Dai zuphpawng gaw Yehowa Sakse hpung ni yawng zup hpawng nna galaw ai zuphpawng kaba langai rai taw ai. Dai shara hta mu ai lam yawng gaw, ngai shawoi galaw taw ai lam yawng hte shai nga ai hpe mu dat ai. Sakse Hkam langai hpra a lata hta Chyum Laika Langai nga ai, mungga htawn ai wa tsun mat ai lam yawng hpe Chyum Laika hpaw nna hkan hti ai hpe mu wa ai.

Nta masha ni gaw gara hku bai htang ai kun?

Law malawng gaw aja awa ninghkap ai. Raitim, dingdung Itali, Lungbadi mare kaw nga ai nye a kanau langai gaw, Yehowa Sakse Ni hte Chyum Laika hkaja nga ai lam hpe chye dat ai. Shi hpang de sa ai shaloi, dai kaw nga ai Yehowa Sakse Ni gaw ngai hpe bungli tam ya ai, nga na matu shara mung tam ya ai. Dai shaning htum wa mahka hta, Yehowa Sakse langai hku nna ngai hkalup hkam la wa ai.

Dai hku galaw wa ai majaw myit malai lu ai kun?

Tsep kawp myit malai n lu ai. Ya she, Karai Kasang hte ngai teng sha hku hkau ai ngu hkamsha ai. Masha a myit mang lam hte nawku htung lailen ni hku n re ai sha, Chyum Laika hku nna Karai Kasang a lam chye wa ai ngu ngai hkamsha ai. Kaga masha ni hpe mung kamsham lam hpring tup hte ding man ai myit hte Chyum Laika lam tsun dan lu sai.