Yĩla Kaũ wa Kelĩ wa Nthĩ Yonthe wathelile mwakanĩ wa 1945, isio mbingĩ sya Germany syailye ta syathamiwe. Taoni mbingĩ syaĩ mbanange, sukulu syatiĩtwe syĩ nthei, masivitalĩ mayaĩ matũmĩka, na kwaĩ mbomu kĩla vandũ syeteele o kũtinwa ilivũke. Na kwongela kĩu, lĩu waĩ mũo, na kwoou watesawa vinya mũno. Kwa ngelekany’o, ala matesaa syĩndũ na makendo mathooasya nusu ya kĩlo kya mauta ma ng’ombe na thooa wĩanene na mũsaala wa syumwa thanthatũ!

O nasyo Ngũsĩ sya Yeova mbee wa ngili ilĩ ila syaminĩte myaka mingĩ yela na kambinĩ sya kũthĩnĩsya andũ nũndũ wa mũĩkĩĩo wasyo, nĩsyakwatiwe nĩ mathĩna. Yĩla syathaiw’e mwakanĩ ũsu wa 1945, iyaĩ na kĩndũ eka ngũa sya yela ila syaĩ mwĩĩ. Na ve Ngũsĩ ingĩ syaaĩtye malĩ yasyo. Ngũsĩ imwe syaaĩawa nĩ lĩu vyũ nginya o na ikavalũka nĩ nzaa syĩ maũmbanonĩ ma Kĩklĩsto.

Ngũsĩ sya Yeova kuma nthĩ ingĩ nĩsyatetheeisye na mĩtũkĩ kwa kũnengane lĩu na ngũa. Ana-a-asa ala maĩ ovisinĩ ũla mũnene Amelika nĩmakũlilye ana-a-asa ala maĩ ovisinĩ wa ũvonge wa Bern, Switzerland, matetheesye ana-a-asa ma Germany. Nathan H. Knorr nĩwatũmiwe Europe nĩ ovisi ũla mũnene nĩ kana atetheesye kũvangĩthya na kũkalaata wĩa wa kũnengane ũtethyo.

Ana-a-asa ma Switzerland nĩmanenganie ngũa, lĩu, na mbesa kwa wingĩ. Syĩndũ ila maumya syambaa kũtũmwa Bern nĩ kana ivangwe nesa itanamba kũtũmwa Germany. Ngũsĩ sya nthĩ ingĩ, ta Sweden, Canada, na Amelika, o nasyo nĩsyatetheeisye mũvangonĩ ũsu, na kĩla syaumisye nĩkyatetheeisye ana-a-asa ma Germany na ala angĩ maĩ kũngĩ kwaĩ na kaũ Europe na Asia.

Kwa ĩvinda ya myei mĩnini, ovisi wa Switzerland nĩwatũmĩte kaawa, ĩia, sukalĩ, lĩu wa mbaa ngetha, matunda momĩthye, mboka, na makũyũ na nyama sya mũkeve. O na aingĩ nĩmaumisye mũvothi wa mbesa.

Kĩndũ kĩngĩ Ngũsĩ sya Switzerland syavothie nĩ tani itano sya ngũa, ta tũvuti, ngũa sya aka, na suti sya aũme. Ĩkaseti ya Mũsyaĩĩsya ya 15/01/1946 yaisye: “Etĩkĩli maineenengane kĩla kĩthũku, ĩndĩ mananenganie kĩla kĩseo vyũ. Maneeyumisye na ngoo yonthe matetheesye etĩkĩli ala angĩ ma Germany.”

O na ĩngĩ, Ngũsĩ sya Switzerland nĩsyanenganie vea sya iatũ vakuvĩ 1,000, na itanamba kũtũmwa, nĩsyambie kũsiw’a kana syĩ sawa. Yĩla ana-a-asa na eĩtu-a-asa ala maĩ Wiesbaden, Germany, mekumany’a syĩndũ ila syavika, maseng’aa mũno moona ũndũ syaseũvĩte na syaĩ sya mĩthemba yĩ kĩvathũkany’o. Mwana-a-asa ũmwe aandĩkie: “Nĩnĩsĩ vai nduka nĩthĩa Germany ĩkũthoosya iatũ na ngũa mbingĩ na iseũvĩte ũu.”

Syĩndũ syaendeeie kũtũmwa Germany nginya Mwei wa 8, 1948. Kũvika vau, Ngũsĩ sya Switzerland syatũmĩĩte ana-a-asa moo ma Germany ileti 444 sya syĩndũ sya tani 25. O tondũ twĩĩ tũnaweta, Ngũsĩ sya Switzerland tisyo syĩ syoka syaatetheesya mũvangonĩ ũsu. Ĩndĩ syaĩ nini mũno syaelekanw’a na Ngũsĩ sya nthĩ ingĩ ila syaumisye ũtethyo. Ĩvinda yĩu, Switzerland kwaĩ Ngũsĩ o 1,600!

Yesũ Klĩsto aisye: “Andũ onthe makamanya kana mwĩ amanyĩw’a makwa—ethĩwa mũkeethĩwa na wendo katĩ wenyu.” (Yoana 13:34, 35) Nũndũ andũ ma Yeova nĩmendanĩte, mayaanengane kĩla mate na vata nakyo, ĩndĩ manenganie kĩla kĩseo vyũ matonya kwona. (2 Akolintho 8:1-4) Valũa ũmwe kuma Zurich waĩtye ũũ: “Ve na etĩkĩli aingĩ mate na syĩndũ, ĩndĩ o na vailye ũu, nĩmekwenda kũtethya, na nĩmanengane kaati [syoo] sya kũthooa syĩndũ na mbesa ila me nasyo.”

O na kau athũkũmi ma Yeova ma nthĩ ya Germany nĩmanyamaĩtw’e mũno na nĩmathĩnĩte nũndũ wa kau, nĩmooseeie na mĩtũkĩ. Na kĩndũ kĩmwe kyamatetheeisye nĩ wendo ũla ana-a-asa moo mamonisye kuma ngoonĩ, yĩla mavangĩthisye nesa ũndũ meũmatethya na maumya mĩvothi mingĩ.