1 Akolintho 12:1-31
12 Yu, ana-a-asa, ndikwenda mwĩkale mũtesĩ ĩũlũ wa mĩthĩnzĩo ya veva.
2 Nĩmwĩsĩ kana yĩla mwaĩ andũ ma mbaĩ ingĩ* mwaĩ asye na mũkaatĩĩa mĩvw’anano ĩtaneenaa, na mwaendaa kũndũ o na kwĩva kũla mwatongoeaw’a.
3 Nĩenda mũmanye kana vaiĩ mũndũ ũtongoew’e nĩ veva wa Ngai ũtonya kwasya: “Yesũ nĩ mũumanĩe!” na vaiĩ mũndũ ũtonya kwasya: “Yesũ nĩ Mwĩaĩi!” atatongoew’e nĩ veva mũtheu.
4 Ve mĩthĩnzĩo yĩ kĩvathũkany’o ĩndĩ veva no ũmwe;
5 na ve mothũkũmi me kĩvathũkany’o, ĩndĩ Mwĩaĩi no ũmwe;
6 na ve mawĩa me kĩvathũkany’o, ĩndĩ no Ngai ũla ũmwe ũmatethasya onthe nthĩnĩ wa kĩla ũmwe.
7 Ĩndĩ veva nũthũkũmaa nthĩnĩ wa kĩla mũndũ nĩ kana onthe matetheke.
8 Nũndũ kwĩsĩla veva, mũndũ ũmwe nũnengawe ndeto sya* ũĩ, na kwĩsĩla veva o ũsu ũngĩ nũnengawe ndeto sya ũmanyi,
9 na ũngĩ nũnengawe mũĩkĩĩo nĩ veva ũsu, na ũngĩ nũnengawe mũthĩnzĩo wa kũvosya no veva ũsu ũmwe,
10 na ũngĩ anengawe ũtonyi wa kwĩka syama, na ũngĩ kwathana, na ũngĩ ũmanyi wa ndeto mbeveee, na ũngĩ kũneena ithyomo syĩ kĩvathũkany’o, na ũngĩ ũtonyi wa kũalyũla ithyomo.
11 Ĩndĩ mawĩa aa onthe matethaw’a no ũla veva ũmwe, naw’o ũnengae kĩla ũmwe kwosana na ũndũ w’o ũkwenda.
12 Nũndũ o tondũ mwĩĩ nĩ ũmwe ĩndĩ wĩ mamutha maingĩ, na mamutha onthe ala me mwĩĩnĩ ũsu, o na kau nĩ maingĩ, onthe nĩ mwĩĩ ũmwe, nake Klĩsto ailye oou.
13 Nũndũ ithyonthe twavatisiwe kwĩsĩla veva ũmwe, na twatw’ĩka mwĩĩ ũmwe, twĩthĩwe twĩ Ayuti kana Akiliki, twĩthĩwe twĩ ngombo kana andũ athasye, na ithyonthe twoosie veva ũmwe.
14 Nũndũ mwĩĩ ndwĩthĩawa na ĩmutha yĩmwe, ĩndĩ wĩthĩawa na mamutha maingĩ.
15 Yu o na kũũ kũkasya, “Nũndũ tinyie kw’oko, ndi kĩlungu kya mwĩĩ,” ũu ndũtuma kwĩthĩwa kũte kĩlungu kya mwĩĩ.
16 Nakw’o kũtũ kũkasya, “Nũndũ tinyie itho, ndi kĩlungu kya mwĩĩ,” ũu ndũtuma kwĩthĩwa kũte kĩlungu kya mwĩĩ.
17 Ta kethĩwa mwĩĩ w’onthe nĩ itho, twĩw’a na kyaũ? Ta kethĩwa mwĩĩ w’onthe nĩ kũtũ, tũnyungĩa na kyaũ?
18 Ĩndĩ Ngai nĩwavangie kĩla ĩmutha ya mwĩĩ kwosana na ũndũ we wendaa.
19 Ta kethĩwa mamutha onthe nĩ ĩmutha yĩmwe, mwĩĩ wĩthĩwa va?
20 Ĩndĩ mamutha nĩ maingĩ ala maseũvĩtye mwĩĩ ũmwe.
21 Itho yĩyĩsa kwĩa kw’oko, “Nyie ndi na vata naku,” na ĩngĩ, mũtwe ndwĩsa kwĩa maaũ, “Ndi na vata nenyu.”
22 Ĩndĩ mamutha ma mwĩĩ ala monekaa me monzu nĩ ma vata,
23 na mamutha ma mwĩĩ ala tũsũanĩaa ta mataĩle kũnengwa ndaĩa nĩtũmanengae ndaĩa mbingĩ, na kwoou mamutha ala monekaa matailye nesa nĩmo manengawe ndaĩa ĩla mbingĩ,
24 kwoou mamutha ala mailye nesa mai kĩndũ mendaa. Ĩndĩ Ngai oombie mwĩĩ ũu, na anenga ndaĩa ilungu ila ite ndaĩa,
25 nĩ kana vaikethĩwe na mũaanĩko mwĩĩnĩ, ĩndĩ nĩ kana mamutha maw’o masũvĩane.
26 Ethĩwa ĩmutha yĩmwe nĩyaũmĩa, ala angĩ nĩmaũmĩaa vamwe nayo; kana ethĩwa ĩmutha yĩmwe nĩyataĩwa, ala angĩ nĩmatanaa vamwe nayo.
27 Kwoou, inyw’ĩ mwĩ mwĩĩ wa Klĩsto, ĩndĩ kĩla ũmwe wenyu nĩ ĩmutha.
28 Ĩndĩ Ngai nĩwiĩte aa kĩkundinĩ: mbee, atũmwa; kelĩ, athani; katatũ, amanyĩsya; na ĩngĩ ala mekaa syama; na ala me na mĩthĩnzĩo ya kũvosya; na ala mekaa maũndũ ma kũtetheesya; ala me na ũtonyi wa kũtongoesya maũndũ; na ala maneenaa na ithyomo syĩ kĩvathũkany’o.
29 Ti onthe methĩawa me atũmwa, kana ti w’o? Ti onthe athani, kana ti w’o? Ti onthe amanyĩsya, kana ti w’o? Ti onthe mekaa syama, kana nĩ onthe?
30 Ti onthe me na mũthĩnzĩo wa kũvosya, kana ti w’o? Ti onthe maneenaa na ithyomo, kana ti w’o? Na ti onthe matonya kũalyũla ithyomo, kana nĩ onthe?
31 Ĩndĩ endeeai kwĩkĩa kĩthito mũkwate mĩthĩnzĩo ĩla mĩnene. Na nĩngũmwony’a kĩndũ kĩla kya vata mũno kũte ila ingĩ.
