•  Kɔɔnɔɔ tɔm 2

•  Ñɩm mbʋ pɩwɛ Ɛsɔtɔm taa yɔ 3-5

  •  Tɔm yɔɔdʋʋ 3

  •  Fezuu taa ñɩm 4

  •  Bibl kalʋʋ 5

•  Falɩsɩ ña-tɩ nɛ ŋsusi tɔm camɩyɛ 6-14

  •  Ɛzɩma ɖɩpɩzɩɣ nɛ ɖɩpaɣzɩ kɛdaɣ yɔ 7

  •  Pɩsɩ ŋna-ɩ 8

  •  Ɛzɩma ɖɩlakɩ kpɛlɩkɩyaa yɔ 9

  •  Ɛzɩma ŋpɩzɩɣ ŋlɩzɩ ñe-tisuu taa yɔ 10

  •  Tɔm yɔɔdʋʋ 11

  •  Tʋma taa tɔm 12

  •  Wɛtʋ 13

  •  Ɛzɩma pɩwɛɛ se palabɩnɩ videowaa nɛ takayɩsɩ tʋmɩyɛ? 14

•  Caɣ wezuu ɛzɩ Krɩstʋ tʋ yɔ 15-16

  •  Ɛgbɛyɛ taa Bibl kpɛlɩkʋʋ 16

•  Kɛdɛzaɣ tɔm 17

•  Samtʋ nɛ lɔŋ tasʋʋ 18

•  Alɩwaatʋ 19

•  Egeetiye yɔɔ cɔnɩyʋ kɔmtʋ 20

•  Egeetiye kigbeɣluu yaa kigbeɣluu sɔsɔʋ kpɩtaʋ 21

•  Yesu sɩm yɔɔ tɔzʋʋ sɔnzɩ kpɩtaʋ 22

•  Ðe-wezuu caɣʋ nɛ ɖɛ-Ɛsɔ sɛtʋ tʋmɩyɛ yɔɔ cɔnɩyʋ 23

•  Kediɣzaɣ yɔɔ cɔnɩyʋ 24

•  Lɔŋ tasɩyʋ sɩnɩyʋ 25

•  Ðamɩŋ lɛɛŋ taa sukulinaa 26

•  Videowaa 27

1. Paɣtʋ ndʋ tɩwɛ takayaɣ kanɛ ka-taa yɔ, tɩkaɣ sɩnʋʋ mba payɩ pɛwɛnɩ tʋmɩyɛ naɖɩyɛ Ðe-wezuu caɣʋ nɛ ɖɛ-Ɛsɔ sɛtʋ tʋmɩyɛ kediɣzaɣ taa yɔ. Pɩwɛɛ se ɛyaa mba, pakalɩ paɣtʋ ndʋ paɖʋ Ðe-wezuu caɣʋ nɛ ɖɛ-Ɛsɔ sɛtʋ tʋmɩyɛ kpɛlɩkʋʋ takayaɣ nɛ ndʋ paɖʋ takayaɣ kanɛ ka-taa yɔ pʋcɔ nɛ papaɣzɩ pa-tʋmɩyɛ ñɔɔzʋʋ. Pɩwɛɛ se peseɣti tɔm susuyaa tɩŋa nɛ paha pa-tɩ nɛ pala sukulibiya tʋma. Ye ɛyaa lalaa mba pɔkɔŋ kediɣzisi yɔ, petisiɣ Bibl paɣtʋ yɔɔ nɛ pɔɖɔŋ tɩ-yɔɔ yɔ, papɩzɩɣ nɛ pama pa-hɩla ɖɔɖɔ. Ye weyi ɛtɩkɛtɩ tɔm susuyu yɔ, ɛyɔɔdaa se ɛsɔɔlaa se pama ɛ-hɩɖɛ nɛ ɛpaɣzɩ sukulibiya tʋma labʋ yɔ, pɩmʋnaa se Ðe-wezuu caɣʋ nɛ ɖɛ-Ɛsɔ sɛtʋ tʋmɩyɛ yɔɔ cɔnɩyʋ ɛyɔɔdɩnɩ-ɩ nɛ ɛna se ɛwɛnɩ wɛtʋ ndʋ tɩmʋnaa yɔ; nɛ pɔyɔɔdʋʋ nɛ pɩtɛ lɛ, pɩwɛɛ se eheyi-i se ɛmʋnaa yaa ɛtɩmʋna. Alɩwaatʋ ndʋ palakɩ kɛdaɣ ŋga yɔ, pɩwɛɛ se weyi ɛ nɛ ɩ pɛkpɛlɩkɩɣ Bibl yɔ, ɛwɛɛ (yaa ɛ-caa yaa e-ɖoo weyi ɛkɛ Krɩstʋ tʋ yɔ ɛwɛɛ). Wɛtʋ ndʋ pɩpɔzʋʋ se tɔm susuyu patɩmɩyɩsɩtɩ-m lɩm ɛwɛɛna yɔ, kʋɖʋm ndʋ pɩpɔzʋʋ se sukulibɩɣa ɛwɛɛna.—od ñʋʋ 8 § 8.

2. Cɛcɛyaɣ kʋɖʋmaɣ. Paa kpɩtaʋ ŋgʋ lɛ, peteɣ kajalaɣ hendu nɛ patɩmɩ nɛ pɩtɛ lɛ, kediɣzaɣ yɔɔ cɔnɩyʋ kaɣ yɔɔdʋʋ tɔm nɛ samaɣ liu tɛɛ kɔtɩnɩ mbʋ pakaɣ labʋ kediɣzaɣ ŋga ka-taa yɔ. Kediɣzaɣ yɔɔ cɔnɩyʋ kaayɔɔdʋʋ ɛ-kɔɔnɔɔ tɔm lɛ, pɩwɛɛ se ɛñɩɣ niye tɔm ndʋ tɩpɩzɩɣ nɛ tɩwazɩ koobiya nɛ pɩkɩlɩ yɔ tɩ-yɔɔ na.

 3. Tɔm yɔɔdʋʋ: Cɛcɛsɩ hiu. Pamaɣ tɔm ñʋʋ nɛ tɔm kɩcɛyɩtʋ naalɛ yaa naadozo Ðe-wezuu caɣʋ nɛ ɖɛ-Ɛsɔ sɛtʋ tʋmɩyɛ kpɛlɩkʋʋ takayaɣ taa. Pɩmʋnaa se paha tʋmɩyɛ ɖɩnɛ ɛgbɛyɛ taa ɛzʋtʋyaa yaa ɛgbɛyɛ taa tʋmlaɖaa mba pɛ-wɛtʋ mʋnaa yɔ. Ye Bibl taa takayaɣ kɩfalaɣ nakɛyɛ papaɣzɩɣ kalʋʋ kpɩtaʋ ŋgʋ yɔ, pakaɣ wɩlʋʋ video nakʋyʋ; nɛ video ŋgʋ kɩkaɣ yɔɔdʋʋ takayaɣ ŋga kɔ-kɔɔnɔɔ tɔm. Tɔm yɔɔdɩyʋ pɩzɩɣ nɛ ɛyɔɔdɩ nɔɔ kʋyʋmaɣ ŋga kɛwɛ video ŋgʋ nɛ tɔm ñʋʋ pɛ-hɛkʋ taa yɔ. Ɛlɛ, pɩpɔzʋʋ se ɛñaɣ pana nɛ ɛyɔɔdɩ lɩmaɣza sɔsɔna wena awɛ kpɛlɩkʋʋ takayaɣ taa yɔ a-tɩŋa a-tɔm. Ye alɩwaatʋ ɛhaɣ-ɩ nʋmɔʋ yɔ, pɩmʋnaa ɖɔɖɔ se ɛlabɩnɩ kɩlɛmɩŋ tʋmɩyɛ camɩyɛ; palabɩ-ɩ se ɩsɩna nɛ panɩɩ tɔm taa camɩyɛ. Ɛpɩzɩɣ ɖɔɖɔ nɛ ɛyɔɔdɩ takayɩsɩ lɛɛsɩ taa tɔm; ye tɩsɩɣna se ɛyɔɔdɩ ɛ-tɔm nɛ panɩɩ tɩ-taa camɩyɛ yɔ.

 4. Fezuu taa ñɩm: Cɛcɛsɩ hiu. Pɩkɛ tɔm pɔzʋʋ nɛ tɔm cosuu. Koobu weyi ɛlakɩ tʋmɩyɛ ɖɩnɛ yɔ, pɩtɩpɔzɩ se ɛyɔɔdɩ tɔm natʋyʋ pʋcɔ nɛ ɛpaɣzɩ nɛ ɛtɛŋ lɛ, pɩtɩmʋna ɖɔɖɔ se ɛyɔɔdɩ tɔm natʋyʋ. Pɩwɛɛ se paha tʋmɩyɛ ɖɩnɛ ɛgbɛyɛ taa ɛzʋtʋyaa yaa ɛgbɛyɛ taa tʋmlaɖaa mba pɛ-wɛtʋ mʋnaa yɔ. Pɩpɔzʋʋ se tɔm yɔɔdɩyʋ ɛpɔzɩ tɔm welisiyaa tɔm ndʋ pɔpɔzaa yɔ tɩ-naalɛ. Ɛnʋ naɣna se ɛpɔzʋʋ nɛ pakalɩ Bibl masɩ nzɩ pahawa yɔ yaa ɛɛpɔzʋʋ. Mba payaɣ se pocosi tɔm yɔ, pɩwɛɛ se pɔ-tɔm cosuu ɛmaɣnɩ kɛlɛmwaa 30 yaa pɩtaatalɩ mbʋ.

 5. Bibl kalʋʋ: Cɛcɛsɩ naanza. Sukulibɩɣa abalɩñɩŋga pɩwɛɛ se paha tʋmɩyɛ ɖɩnɛ. Alɩwaatʋ ndʋ sukulibɩɣa kalɩɣ hɔɔlʋʋ ŋgʋ paha-kɛ yɔ, pɩtɩpɔzɩ se kɔyɔɔdɩ tɔm natʋyʋ pʋcɔ nɛ kapaɣzɩ kalʋʋ; nɛ kɛtɛŋ kalʋʋ lɛ, pɩtɩmʋna se kɔyɔɔdɩ tɔm natʋyʋ ɖɔɖɔ. Pɩpɔzʋʋ se kediɣzaɣ yɔɔ cɔnɩyʋ ɛñɩnɩ nɛ ɛna se ɛzɩma ɛpɩzɩɣ nɛ ɛsɩnɩ sukulibiya nɛ sɩkalɩ tɔm ndʋ pamawa yɔ ɖeyi ɖeyi, sɩnɩɩ tɔm ndʋ sɩkalɩɣ yɔ tɩ-taa; sɩñɩɣ niye tɔm pee wena amʋnaa yɔ a-yɔɔ; sɩlɛɣzɩɣ nɔɔ camɩyɛ, sɩsɩŋɩɣ ɖenɖe pɩpɔzaa yɔ nɛ sitaaseli. Bibl kalʋʋ hɔɔlɩŋ nɩɩyɩ wɛ tobi nɛ lɛɛŋ ñaɖaɣlɩ; pʋyɔɔ lɛ, pɩpɔzʋʋ se alɩwaatʋ ndʋ Ðe-wezuu caɣʋ nɛ ɖɛ-Ɛsɔ sɛtʋ tʋmɩyɛ yɔɔ cɔnɩyʋ haɣ tʋma yɔ, ɛmaɣzɩ sukulibiya wɛtʋ yɔɔ.

6. Cɛcɛsɩ hiu nɛ kagbanzɩ. Palabɩ kediɣzaɣ hɔɔlʋʋ kʋnɛ se kɩsɩnɩ ɖa-tɩŋa nɛ ɖɩfalɩsɩ ɖa-tɩ nɛ ɖisusi tɔm camɩyɛ nɛ ɖɩwɛɛ niye kɛdɛsɩ labʋ taa, nɛ ɖɩwɛɛ niye ɖɔɖɔ tɔm susuu nɛ tɔm wɩlʋʋ taa nɛ pɩkɩlɩ. Ye pɩpɔzʋʋ yɔ, papɩzɩɣ nɛ paha ɛgbɛyɛ taa ɛzʋtʋyaa sukulibiya tʋma. Pɩwɛɛ se paa sukulibɩɣa ŋga lɛ, kalabɩnɩ Tɔm wɩlʋʋ yaa Sɔɔlɩm eseɣti-ŋ takayɩsɩ taa tɔm wɩlʋʋ niye nɖɩ paha-kɛ yɔ. Pamaɣ tɔm wɩlʋʋ niye nɖɩ ɖɩ-ñʋʋ tʋmɩyɛ nɖɩ ɖɩ-cɔlɔ nuŋgolonzi () taa Ðe-wezuu caɣʋ nɛ ɖɛ-Ɛsɔ sɛtʋ tʋmɩyɛ kpɛlɩkʋʋ takayaɣ taa. Nabʋyʋ taa lɛ, paɖʋʋ paɣtʋ se patazɩ tɔm nakʋyʋ ñʋʋ taa. Ye pɩkɛ mbʋ yɔ, ɛzʋtʋyʋ yaa ɛgbɛyɛ taa tʋmlaɖʋ weyi ɛ-wɛtʋ mʋnaa yɔ pɩwɛɛ se ɛla tʋmɩyɛ nɖɩ.—Kalɩ  tayʋʋ 15 nɛ ŋna ɛzɩma pɩwɛɛ se ŋla tʋma ana yɔ.

 7. Ɛzɩma ɖɩpɩzɩɣ nɛ ɖɩpaɣzɩ kɛdaɣ yɔ: Papɩzɩɣ nɛ paha tʋmɩyɛ ɖɩnɛ sukulibɩɣa halɩñɩŋga yaa abalɩñɩŋga nakɛyɛ. Pɩwɛɛ se ɖɩɣdʋ nɛ sukulibɩɣa pakaa kʋzʋʋ piliŋa yaa pɛkɛ hɔʋ kʋyʋmʋʋ taa mba. Mba palakɩ tʋmɩyɛ ɖɩnɛ yɔ, papɩzɩɣ nɛ pacaɣ yaa pasɩŋ.— Ye ŋñɩnɩɣ se ŋtɩlɩ tʋmɩyɛ ɖɩnɛ ɖɩ-taa tɔm nɛ wɛtʋ ndʋ tɩ-taa papɩzɩɣ nɛ palabɩ-ɖɩ yɔ, kalɩ  tayʋʋ 12 nɛ  13.

 8. Pɩsɩ ŋna-ɩ: Papɩzɩɣ nɛ paha tʋmɩyɛ ɖɩnɛ sukulibɩɣa halɩñɩŋga yaa abalɩñɩŋga nakɛyɛ. Pɩwɛɛ se ɖɩɣdʋ nɛ sukulibɩɣa pakaa kʋzʋʋ piliŋa. (km-F 5/97 h. 2) Mba palakɩ tʋmɩyɛ ɖɩnɛ yɔ, papɩzɩɣ nɛ pacaɣ yaa pasɩŋ. Pɩwɛɛ se sukulibɩɣa ɛwɩlɩ tɔm ndʋ pɩmʋnaa se ɛyʋ ɛyɔɔdɩ alɩwaatʋ ndʋ ɛpɩsɩɣ se ɛna weyi ɛ nɛ ɩ paatɛm labʋ kɛdaɣ yɔ.—Ye ŋñɩnɩɣ se ŋtɩlɩ tʋmɩyɛ ɖɩnɛ ɖɩ-taa tɔm nɛ wɛtʋ ndʋ tɩ-taa papɩzɩɣ nɛ palabɩ-ɖɩ yɔ, kalɩ  tayʋʋ 12 nɛ  13.

 9. Ɛzɩma ɖɩlakɩ kpɛlɩkɩyaa yɔ: Papɩzɩɣ nɛ paha tʋmɩyɛ ɖɩnɛ sukulibɩɣa halɩñɩŋga yaa abalɩñɩŋga nakɛyɛ. Pɩwɛɛ se ɖɩɣdʋ nɛ sukulibɩɣa pakaa kʋzʋʋ piliŋa. (km-F 5/97 h. 2) Mba palakɩ tʋmɩyɛ ɖɩnɛ yɔ, papɩzɩɣ nɛ pacaɣ yaa pasɩŋ. Tʋmɩyɛ ɖɩnɛ, pɩwɛɛ se ɖɩwɩlɩ Bibl kpɛlɩkʋʋ mbʋ pɛtɛm paɣzʋʋ yɔ. Pɩtɩcɛyɩ se sukulibɩɣa ɛyɔɔdɩ kɔɔnɔɔ tɔm natʋyʋ yaa kɛdɛzaɣ tɔm natʋyʋ. Ɛlɛ ye Tɔm wɩlʋʋ yaa Sɔɔlɩm eseɣti-ŋ takayaɣ hɔɔlʋʋ ŋgʋ paha sukulibɩɣa yɔ, kitukuuni kɔɔnɔɔ tɔm yaa kɛdɛzaɣ tɔm yɔ, pɩwɛɛ se sukulibɩɣa ɛlabɩnɩ tʋmɩyɛ lɔŋ weyi patasɩ-kɛ takayɩsɩ nzɩ sɩ-taa yɔ. Pɩtɩcɛyɩ se pakalɩ tayʋʋ mbʋ pahawa yɔ pɩtɩŋa. Ɛlɛ ye sukulibɩɣa ɛnawa se papɩzɩɣ nɛ pakalɩ tayʋʋ tɩŋa nɛ pacaɣ alɩwaatʋ yɔɔ yɔ, kalɩ pi-yeke.

 10. Ɛzɩma ŋpɩzɩɣ ŋlɩzɩ ñe-tisuu taa yɔ: Ye tʋmɩyɛ ɖɩnɛ ɖɩkɛ tɔm yɔɔdʋʋ yɔ, pɩwɛɛ se paha-ɖɩ sukulibɩɣa abalɩñɩŋga nakɛyɛ. Ye ɖɩkɛ la ŋwɩlɩ yɔ, papɩzɩɣ nɛ paha-ɖɩ sukulibɩɣa halɩñɩŋga yaa abalɩñɩŋga nakɛyɛ. Pɩwɛɛ se ɖɩɣdʋ nɛ sukulibɩɣa pakaa kʋzʋʋ piliŋa yaa pɛkɛ hɔʋ kʋyʋmʋʋ taa mba. Pɩwɛɛ se sukulibɩɣa ecosini lɛɣtʋ tɔm ndʋ pɔpɔzɩ tɔm ñʋʋ taa yɔ tɩ-yɔɔ kpayɩ kpayɩ; nɛ pɩmʋnaa se kalabɩnɩ tʋmɩyɛ takayaɣ ŋga pahawa yɔ ka-taa tɔm na. Sukulibɩɣa kpakɩɣnɩ lɩmaɣzɩyɛ se kɔyɔɔdʋʋ takayaɣ ŋga kɔ-tɔm ka-tʋmɩyɛ taa yaa kaayɔɔdʋʋ.

 11. Tɔm yɔɔdʋʋ: Sukulibɩɣa abalɩñɩŋga nakɛyɛ pɩwɛɛ se paha tʋmɩyɛ ɖɩnɛ nɛ kalabɩ-ɖɩ ɛgbɛyɛ ɛsɩndaa. Ye Sɔɔlɩm eseɣti-ŋ tɔm kɩsɔzɩtʋ A taa palɩzɩnɩ tɔm yɔɔdʋʋ ñʋʋ nakʋyʋ yɔ, pɩwɛɛ se Bibl masɩ nzɩ sɩwɛ tɔm ndʋ tɩ-taa yɔ, sukulibɩɣa ɛñɩɣ niye ɛzɩma pɩwɛɛ se palabɩnɩ-sɩ tʋmɩyɛ tɔm susuu taa yɔ, pɩ-yɔɔ. Kapɩzɩɣ nɛ kalɩzɩ mayaɣ ŋga kɔ-tɔbʋʋ, kawɩlɩ ɛzɩmtaa pɩwɛɛ se palabɩnɩ-kɛ tʋmɩyɛ yɔ, nɛ ɛzɩma papɩzɩɣ nɛ pɔcɔlɩ ɛyʋ nɔɔyʋ lɩmaɣza mayaɣ ŋga kɔ-yɔɔ yɔ. Ye Sɔɔlɩm eseɣti-ŋ takayaɣ taa tɔm kɩkpɛlɩkɩtʋ natʋyʋ taa palɩzɩnɩ tɔm yɔɔdʋʋ ñʋʋ yɔ, pɩwɛɛ se sukulibɩɣa ɛwɩlɩ ɛzɩma papɩzɩɣ nɛ pakpaɣ tɔm kɩkpɛlɩkɩtʋ ndʋ tɩ-taa lɔŋ nɛ palabɩnɩ tʋmɩyɛ tɔm susuu taa yɔ. Kapɩzɩɣ nɛ kañɩɣ niye kɩɖaʋ ŋgʋ pɔyɔɔdɩ kɩ-tɔm kajalaɣ lɩmaɣzɩyɛ taa yɔ kɩ-yɔɔ yaa ye pɩwazɩɣ yɔ, kañɩɣ niye Bibl taa masɩ lɛɛsɩ yɔɔ.

   12. Tʋma taa tɔm: Paɣtʋ ndʋ pɔyɔɔdɩ tɩ-tɔm tayʋʋ pʋnɛ nɛ mbʋ pɩkɔŋ yɔ pɩ-taa yɔ, titukuuni «Ɛzɩma ɖɩpɩzɩɣ nɛ ɖɩpaɣzɩ kɛdaɣ yɔ» nɛ «Pɩsɩ ŋna-ɩ» tʋma na. Ye patɩɖʋ paɣtʋ lɛɛtʋ yɔ, pɩmʋnaa se sukulibɩɣa kaɖʋwa ɛkɛna se kañaɣ pana nɛ kawɩlɩ Bibl taa toovenim tɔm natʋyʋ kɛlɛʋ ka nɛ weyi palakɩ kɛdaɣ yɔ, nɛ pɩwɛɛ se tɔm ndʋ tɩkɛdɩnɩ ɛyʋ ɛnʋ. Nɛ pɩpɔzʋʋ ɖɔɖɔ se sukulibɩɣa ɛsɩɩ cee wayɩ kɛdaɣ tigiɖe. Pɩpɔzʋʋ se sukulibɩɣa ɛlabɩnɩ tʋmɩyɛ tɔm ndʋ tɩlʋlʋʋ pee kɩbana nɛ ɛyaa nɩɣzɩɣ tɩ-yɔɔ po-kooka taa yɔ tɩ-taa natʋyʋ. Ye sukulibɩɣa ɛsɔɔlaa yɔ, kapɩzɩɣ nɛ kalabɩnɩ tʋmɩyɛ Tɔm wɩlʋʋ wondu taa takayaɣ nakɛyɛ yaa video nakʋyʋ. Pɩɩwɛɣ ɖeu se sukulibiya ɩkpɛlɩkɩ tɔm nɛ sɩɖɔkɩ-tʋ sɩ-ñʋʋ taa piye piye, ɛlɛ pɩkɩlɩɣ weewee se sɩfalɩsɩ sɩ-tɩ nɛ sɩwɛɛ niye kɛdɛsɩ labʋ taa. Sɩpɩzɩɣ nɛ sɩñaɣ pana nɛ sɩwɩlɩ se sɩmaɣzɩɣ mba sɩ nɛ wɛ palakɩ kɛdaɣ yɔ pɔ-yɔɔ, sɩyɔɔdʋʋ ɛzɩ sɩyɔɔdʋʋ paa evemiye nɖɩ yɔ.

   13. Wɛtʋ: Pɩwɛɛ se sukulibɩɣa ɛla ka-tʋmɩyɛ nɛ pɩmʋnɩ mbʋ pɩlakɩ mi-kooka taa yɔ. Kɩɖaŋ nɩɩyɩ yɔ:

1.  (1) Kpaɣ ɖɩɣa nɛ ŋwolo ɖɩɣa: Wɛtʋ tʋnɛ titukuuni kpaɣ pɔɔyʋʋ nɛ ŋwolo pɔɔyʋʋ tɔm susuu, paa ɖɩsɩ taa maɣmaɣ yaa kaŋgalaafu yaa takayɩsɩ yɔɔ patɩŋɩɣna yɔ. Pɩpɩzɩɣ nɛ pitukuni ɖɔɖɔ alɩwaatʋ ndʋ ɖɩpɩsɩɣ se ɖɩna weyi ɖɩkatɩ kpaɣ ɖɩɣa nɛ ŋwolo ɖɩɣa tɔm susuu taa se ɖɩmɩzɩ lɩm yɔ.

2.  (2) Alɩwaatʋ fanʋʋ aseɣɖe lɩzʋʋ: Wɛtʋ tʋnɛ tɩwɩlɩɣ ɛzɩma ɛyʋ pɩzɩɣ nɛ ɛfanɩ wɛtʋ natʋyʋ nɛ pazɩ pazɩ lɛ ɛlɩzɩ aseɣɖe yɔ. Pɩpɩzɩɣ nɛ pɩkɛnɩ alɩwaatʋ ndʋ eheyiɣ Bibl taa toovenim tɔm natʋyʋ nɔɔyʋ tʋmɩyɛ taa, sukuli taa, ɛ-cɔlɔ tʋ nɔɔyʋ, lɔɔɖɩyɛ taa, yaa alɩwaatʋ ndʋ ɛlakɩ e-evemiye taa tʋma naayɛ yɔ.

3.  (3) Samaɣ taa tɔm susuu: Wɛtʋ tʋnɛ tʋtʋ ñotukuuni tɔm susuu hɔɔlɩŋ ɩnɛ: présentoir waa, habɩyɛ, ɛyaa tʋma taa, ɖenɖe ɛyaa cakɩ nɛ pɛhɛzɩɣ yɔ, lɔɔɖa ɖɩzɩŋɩyɛ nɛ ɖenɖe payɩ papɩzɩɣ nɛ pana ɛyaa yɔ.

 14. Ɛzɩma pɩwɛɛ se palabɩnɩ videowaa nɛ takayɩsɩ tʋmɩyɛ?: Pɩlɩɣnɩ wɛtʋ cɔlɔ, ɛlɛ sukulibɩɣa nakɛyɛ pɩzɩɣ nɛ kakpaɣ lɩmaɣzɩyɛ se kalakɩnɩ video nakʋyʋ yaa takayaɣ nakɛyɛ tʋmɩyɛ. Ye video nakʋyʋ ɛwɛ sukulibɩɣa nakɛyɛ tʋmɩyɛ taa yaa ye sukulibɩɣa nakɛyɛ ɛkpaɣ lɩmaɣzɩyɛ se kalakɩnɩ tʋmɩyɛ video nakʋyʋ ka-tʋmɩyɛ taa yɔ, kɔyɔɔdɩ tɔm natʋyʋ nɛ pɩwɩlɩ se kacaɣ video wɩlʋʋ nɛ patazɩ video taa pʋwayɩ; ɛlɛ kalakɩ ka-tʋmɩyɛ lɛ, pɩtɩmʋna kawɩlɩ video ŋgʋ.

15. Peteɣ hendu nɛ pɛtɛ lɛ, pakaɣ kpaɣʋ cɛcɛsɩ 15 nzɩ sɩtɩŋɩɣ yɔ nɛ palabɩnɩ tʋmɩyɛ kʋyʋmɖɩyɛ yaa tʋma naalɛ wena awɛ hɔɔlʋʋ kʋnɛ kɩ-taa yɔ. Palabɩ hɔɔlʋʋ kʋnɛ se kɩsɩnɩ tɔm welisiyaa nɛ pana ɛzɩma papɩzɩɣ nɛ pɔɖɔ Ɛsɔtɔm yɔɔ yɔ. Ye patɩɖʋ paɣtʋ natʋyʋ yɔ, ɛgbɛyɛ taa ɛzʋtʋyaa nɛ ɛgbɛyɛ taa tʋmlaɖaa mba pɛ-wɛtʋ mʋnaa yɔ, mba pɩwɛɛ se paha tʋmɩyɛ ɖɩnɛ. Ɛlɛ ɛgbɛyɛ taa ɛzʋtʋyaa yeke pɩpɔzʋʋ se pala «Ɛgbɛyɛ taa kɩcɛyɩm» tʋmɩyɛ. Tʋmɩyɛ nɖɩ paha nɔɔyʋ yɔ ye ɖɩkɛ tɔm taa tazʋʋ yɔ, pɩtasɩnɩ tɔm pɔzʋʋ mbʋ pamawa yɔ lɛ, weyi ɛlakɩ tʋmɩyɛ ɖɩnɛ yɔ, ɛpɩzɩɣ nɛ ɛpɔzɩ tɔm lɛɛtʋ. Pɩwɛɛ se ɛ-kɔɔnɔɔ tɔm ɛtaaɖaɣlɩ nɛ pɩha nʋmɔʋ nɛ patazɩ tɔm tɩŋa taa nɛ koobiya cosi tɔm camɩyɛ ɖɔɖɔ. Ye paɖʋwa se pɔpɔzɩ nɔɔyʋ tɔm yɔ, pɩkɩlɩɣ ɖeu se ɛyʋ ɛnʋ ewolo tɔm ɖɩyɔɔdɩyɛ nɛ pɔpɔzɩ-ɩ tɔm peeɖe; ye pɩlakɩ yɔ, ɛtaacaɣ e-lone taa nɛ pɔpɔzɩ-ɩ tɔm peeɖe.

  16. Ɛgbɛyɛ taa Bibl kpɛlɩkʋʋ: Cɛcɛsɩ niidozo. Ɛgbɛyɛ taa ɛzʋtʋyaa mba pɛ-wɛtʋ mʋnaa yɔ mba pɩpɔzʋʋ se paha tʋmɩyɛ ɖɩnɛ. (Agbaa wena a-taa ɛzʋtʋyaa tɩɖɔɔ yɔ, papɩzɩɣ nɛ paha tʋmɩyɛ ɖɩnɛ ɛgbɛyɛ taa tʋmlaɖaa mba pɛ-wɛtʋ mʋnaa yɔ.) Ɛgbɛyɛ taa ɛzʋtʋyaa pɩwɛɛ se palɩzɩ mba pamʋnaa se pala ɛgbɛyɛ taa Bibl kpɛlɩkʋʋ tʋmɩyɛ yɔ. Mba palɩzɩɣ se pala tʋmɩyɛ ɖɩnɛ yɔ, pɩpɔzʋʋ se pɔcɔnɩ kpɛlɩkʋʋ mbʋ pɩ-yɔɔ camɩyɛ, pɔɖɔ alɩwaatʋ yɔɔ, pañɩɣ niye masɩ nzɩ sɩ-tɔm cɛyaa yɔ sɩ-yɔɔ. Pɩtasɩ lɛ, pɩcɛyaa se pasɩnɩ koobiya kpeekpe nɛ pana wazaɣ ŋga kpɛlɩkʋʋ mbʋ pɩwɛna yɔ. Ye mba paha-wɛ nʋmɔʋ se pala tʋmɩyɛ ɖɩnɛ yɔ, patasɩ kalʋʋ paɣtʋ ndʋ paɖʋ mba palakɩ tɔm pɔzʋʋ nɛ tɔm cosuu tʋma yɔ, pɩsɩɣnɩ-wɛ siŋŋ. (w23.04 h. 24, aɖakaɣ) Ye patazɩ hɔɔlʋʋ ŋgʋ pahawa se pɛkpɛlɩkɩ-kʋ kpɩtaʋ ŋgʋ yɔ kɩ-taa camɩyɛ nɛ pɩtɛ yɔ, pɩtɩcɛyɩ se pɔsɔzɩ tɔm lɛɛtʋ yem pa-tʋma taa se pɩsa nɛ alɩwaatʋ tɛ. Ðenɖe pɩlakɩ yɔ, pɩwɛɛ se pɛlɛɣzɩɣ ɛgbɛyɛ taa Bibl kpɛlɩkʋʋ yɔɔ cɔnɩyaa nɛ takayaɣ kalɩyaa paa kpɩtaʋ ŋgʋ. Ye kediɣzaɣ yɔɔ cɔnɩyʋ ɛpɔzɩ ɛgbɛyɛ taa Bibl kpɛlɩkʋʋ yɔɔ cɔnɩyʋ se etoboyi ɛ-tʋmɩyɛ yɔ, kpɛlɩkʋʋ yɔɔ cɔnɩyʋ naɣnɩ ɛzɩma ɛpɩzɩɣ ɛla nɛ etoboyi-ɖɩ yɔ. Ɛpɩzɩɣ nɛ eheyi kalɩyʋ se ɛtaakalɩ tayʋʋ nabʋyʋ.

17. Cɛcɛsɩ naadozo. Kediɣzaɣ yɔɔ cɔnɩyʋ kaɣ cuuzuu tɔm ndʋ pɔyɔɔdɩ kediɣzaɣ taa yɔ, tɩ-taa. Ɛñɩkɩɣ niye kediɣzaɣ taa tɔm ndʋ pɔyɔɔdaa nɛ tɩwɛɛ wazaɣ siŋŋ yɔ, tɩ-yɔɔ. Pɩwɛɛ ɖɔɖɔ se ɛyɔɔdɩ mbʋ pakaɣ labʋ cee kpɩtaʋ taa yɔ pɩ-tɔm. Ye alɩwaatʋ ɛkazaa yɔ, ɛpɩzɩɣ nɛ ɛyaa sukulibiya nzɩ sɩkaɣ labʋ tʋmɩyɛ kpɩtaʋ lɛɛkʋ taa yɔ sɩ-hɩla. Ye patɩɖʋ paɣtʋ natʋyʋ yɔ, kɛdɛzaɣ tɔm alɩwaatʋ taa pɩwɛɛ se kediɣzaɣ yɔɔ cɔnɩyʋ ɛkalɩ takayɩsɩ yaa esusi tɔm ndʋ tɩwɛɛ yɔ. Mbʋ palakɩ ɖoŋ ɖoŋ ɛgbɛyɛ taa ɛzɩ tɔm susuu ɖʋtʋ ndʋ palakɩ ɖoŋ ɖoŋ yaa kpaaŋ taa hazʋʋ ɖʋtʋ mbʋ yɔ, pɩtɩmʋna se posusi pɩ-tɔm; ɛlɛ pɩwɛɛ se pakam-tʋ tɔm kususutu kpata yɔɔ. Ye alɩwaatʋ ɛɛtalɩɣ se pakalɩ takayɩsɩ yaa posusi tɔm natʋyʋ yɔ, pɩmʋnaa se kediɣzaɣ yɔɔ cɔnɩyʋ ɛpɔzɩ mba palakɩ Caɣ wezuu ɛzɩ Krɩstʋ tʋ yɔ hɔɔlʋʋ taa tʋma yɔ se papasɩ pa-alɩwaatʋ yɔɔ ɛzɩ pɩpɔzʋʋ yɔ. (Kalɩ  tayʋʋ 16 nɛ  19.) Pakaɣ teu hendu nɛ pala adɩma nɛ pɛtɛzɩnɩ kediɣzaɣ.

18. Paa sukulibɩɣa ŋga kɛtɛŋ ka-tʋmɩyɛ lɛ, pɩwɛɛ se kediɣzaɣ yɔɔ cɔnɩyʋ ɛkpaɣ ɛzɩ cɛcɛyaɣ kʋyʋmaɣ mbʋ yɔ nɛ ɛtɩŋnɩ tɔm wɩlʋʋ niye nɖɩ paha sukulibɩɣa yɔɔ ɖɩ-yɔɔ nɛ ɛsam-kɛ nɛ ɛtasɩ-kɛ lɔŋ. Alɩwaatʋ ndʋ kediɣzaɣ yɔɔ cɔnɩyʋ yaɣ sukulibɩɣa yɔ, pɩtɩmʋna se ɛyaa tɔm wɩlʋʋ niye hɔɔlʋʋ ŋgʋ kɩ-yɔɔ sukulibɩɣa kaɣ tʋmɩyɛ labʋ yɔ. Ɛlɛ sukulibɩɣa tɛŋ ka-tʋmɩyɛ nɛ kediɣzaɣ yɔɔ cɔnɩyʋ sam-kɛ nɛ pɩtɛ lɛ, ɛpɩzɩɣ nɛ ɛyaa tɔm wɩlʋʋ niye hɔɔlʋʋ ŋgʋ kɩ-yɔɔ sukulibɩɣa labɩ tʋmɩyɛ yɔ, nɛ ɛyɔɔdɩ ɖɔɖɔ mbʋ kalabɩ ɖeu hɔɔlʋʋ ŋgʋ kɩ-taa yɔ pɩ-tɔm. Ɛpɩzɩɣ ɖɔɖɔ nɛ ɛyɔɔdɩnɩ nɔɔ kɩbaŋa mbʋ pʋyɔɔ nɛ ɛzɩma pɩpɔzʋʋ se sukulibɩɣa ɛtasɩ pana ñaɣʋ hɔɔlʋʋ ŋgʋ kɩ-taa yɔ pɩ-tɔm. Kediɣzaɣ yɔɔ cɔnɩyʋ pɩzɩɣ ɖɔɖɔ nɛ ɛyɔɔdɩ sukulibɩɣa tʋmɩyɛ hɔɔlɩŋ lɛɛŋ tɔm, ye ɛnawa se pɩpɩzɩɣ nɛ pɩwazɩ sukulibɩɣa yaa koobiya lalaa yɔ. Ye pɩpɔzaa yɔ, kediɣzaɣ tɛŋ yaa alɩwaatʋ natʋyʋ taa lɛ, ɛpɩzɩɣ nɛ ɛtɩŋnɩ Sɔɔlɩm eseɣti-ŋ takayaɣ, Tɔm wɩlʋʋ takayaɣ yaa École du ministère takayaɣ yɔɔ nɛ ɛɖaɣnɩ sukulibɩɣa lɔŋ tasʋʋ ke-yeke. Pɩpɩzɩɣ nɛ pɩkɛ tɔm wɩlʋʋ niye hɔɔlʋʋ ŋgʋ kɩ-yɔɔ kalabɩ tʋmɩyɛ yɔ, yaa ka-tʋmɩyɛ hɔɔlʋʋ nakʋyʋ yɔɔ.—Kalɩ  tayʋʋ 19,  24, nɛ  25 nɛ ŋna tʋma wena pɩwɛɛ se kediɣzaɣ yɔɔ cɔnɩyʋ nɛ lɔŋ tasɩyʋ sɩnɩyʋ pala yɔ nɛ pɩkɩlɩ.

19. Pɩtɩmʋna se nɔɔyʋ tʋmɩyɛ ɛcɛzɩ alɩwaatʋ ndʋ paha-ɩ yɔ tɩ-yɔɔ. Pɩtɩpɔzɩ ɖɔɖɔ se kediɣzaɣ yɔɔ cɔnɩyʋ lɔŋ tasʋʋ ɛcɛzɩ alɩwaatʋ ndʋ paha-ɩ yɔ tɩ-yɔɔ. Ðe-wezuu caɣʋ nɛ ɖɛ-Ɛsɔ sɛtʋ tʋmɩyɛ kpɛlɩkʋʋ takayaɣ yɔɔ lɛ; toovenim se pama alɩwaatʋ ndʋ pɩwɛɛ se palabɩnɩ paa tʋmɩyɛ nɖɩ yɔ; paa mbʋ yɔ, ye pɛtɛm tazʋʋ tʋmɩyɛ nɖɩ ɖɩ-tɔm taa camɩyɛ yɔ, pɩtɩcɛyɩ se koobiya ɩsɔzɩ tɔm lɛɛtʋ yem se pɩsa nɛ alɩwaatʋ ndʋ paha-wɛ yɔ tɩtɛ. Ye koobu nɔɔyʋ ɛcɛzɩ alɩwaatʋ yɔɔ yɔ, pɩwɛɛ se Kediɣzaɣ yɔɔ cɔnɩyʋ yaa Lɔŋ tasɩyʋ sɩnɩyʋ ɛyaa-ɩ e-yeke nɛ ɛtasɩ-ɩ lɔŋ. (Kalɩ  tayʋʋ 24 nɛ  25.) Pɩwɛɛ se kediɣzaɣ tɩŋa ɛkpaɣ ñɩɣyʋʋ kʋyʋmʋʋ nɛ cɛcɛsɩ 45, pɩkpɛndɩnɩ hendu nɛ adɩma.

20. Kpɩtaʋ ŋgʋ kɩ-taa egeetiye yɔɔ cɔnɩyʋ kɔŋ mɩ-ɛgbɛyɛ taa yɔ, pɩmʋnaa se pala kediɣzaɣ ɛzɩ pamaʋ Ðe-wezuu caɣʋ nɛ ɖɛ-Ɛsɔ sɛtʋ tʋmɩyɛ kpɛlɩkʋʋ takayaɣ taa yɔ. Ɛlɛ mbʋ pɩmʋnaa se pɛlɛɣzɩ yɔ mbʋ yɔ: Ɛgbɛyɛ taa Bibl kpɛlɩkʋʋ mbʋ pɩwɛɛ se pala Caɣ wezuu ɛzɩ Krɩstʋ tʋ yɔ hɔɔlʋʋ taa yɔ pi-lone taa lɛ, egeetiye yɔɔ cɔnɩyʋ kaɣ yɔɔdʋʋ tɔm cɛcɛsɩ 30. Kediɣzaɣ yɔɔ cɔnɩyʋ cuuzuu tɔm ndʋ pɔyɔɔdɩ kediɣzaɣ taa yɔ tɩ-taa; ɛyɔɔdɩ mbʋ pakaɣ labʋ cee wayɩ yɔ pɩ-tɔm pazɩ, nɛ esusi tɔm nɛ ɛkalɩ takayɩsɩ nzɩ petiyini ɛgbɛyɛ yɔ, pʋcɔ nɛ ɛyaa egeetiye yɔɔ cɔnɩyʋ se ɛlɛ ɛkɔɔ nɛ ɛyɔɔdɩ ɛ-tɔm. Tɔm yɔɔdʋʋ tɛŋ lɛ, egeetiye yɔɔ cɔnɩyʋ yele nɛ petee hendu ndʋ ɛ-maɣmaɣ ɛlɩzaa yɔ nɛ pɛtɛzɩnɩ kediɣzaɣ. Ɛpɩzɩɣ nɛ ɛyaa koobu nɔɔyʋ se ɛkɔɔ nɛ ɛtɩmɩ. Paa paalakaɣ sukulibiya tʋma ɖamɩŋ lɛɛŋ taa ɛgbɛyɛ kʋnʋŋ taa yɔ, pɩfɛyɩ se pala sukulibiya tʋma ɖamɩŋ ɛnɩ ɩ-taa ŋgee kpɩtaʋ taa. Ɛlɛ ye pɩkɛ ɛgbɛyɛ cikpeɖe naɖɩyɛ yɔ, ɖɩpɩzɩɣ nɛ ɖɩla ɖi-kediɣzisi ŋgee kpɩtaʋ taa. Ɛlɛ alɩwaatʋ talɩɣ se egeetiye yɔɔ cɔnɩyʋ ɛyɔɔdɩ ɛ-tɔm lɛ, pɩwɛɛ se ɛgbɛyɛ cikpeɖe taa koobiya ɩkɔɔ kpaaŋ maɣmaɣ taa nɛ pewelisi egeetiye yɔɔ cɔnɩyʋ tɔm.

21. Paalakɩ kediɣzisi egeetiye kigbeɣluu yaa kigbeɣluu sɔsɔʋ kpɩtaʋ taa. Pɩwɛɛ se pɔtɔzɩ koobiya se tɔm ndʋ tɩ-taa pɩɩwɛɛ se patazɩ kpɩtaʋ ŋgʋ kɩ-taa yɔ, pɩmʋnaa se paa weyi lɛ, ɛtazɩ tɩ-taa ɛ-tɩ yɔɔ yaa patazɩ tɩ-taa hɔʋ taa Ɛsɔ sɛtʋ alɩwaatʋ taa.

22. Ye Yesu sɩm yɔɔ tɔzʋʋ sɔnzɩ ɛtɔlɩ kpɩtaʋ hɛkʋ taa kɩyakʋ nakʋyʋ yɔɔ yɔ, pɩtɩmʋna se pala Ðe-wezuu caɣʋ nɛ ɖɛ-Ɛsɔ sɛtʋ kediɣzaɣ.

23. Pɩpɔzʋʋ se ɛgbɛyɛ taa ɛzʋtʋyaa ɩlɩzɩ ɛzʋtʋyʋ nɔɔyʋ nɛ ɛkɛ Ðe-wezuu caɣʋ nɛ ɖɛ-Ɛsɔ sɛtʋ tʋmɩyɛ yɔɔ cɔnɩyʋ. Ɛnʋ pɩmʋnaa se ɛcɔna nɛ ɛla pɩtɩŋa nɛ kediɣzaɣ ŋga kɔɖɔ camɩyɛ nɛ ɛñaɣ pana ɖɔɖɔ se pɔɖɔ paɣtʋ ndʋ tɩwɛ takayaɣ kanɛ ka-taa yɔ tɩ-yɔɔ. Pɩwɛɛ se ɛ nɛ lɔŋ tasɩyʋ sɩnɩyʋ panɩɣnɩ ɖama camɩyɛ. Patɩɩlɩzɩɣ Ðe-wezuu caɣʋ nɛ ɖɛ-Ɛsɔ sɛtʋ kpɛlɩkʋʋ takayaɣ nakɛyɛ ca lɛ, pɩwɛɛ se Ðe-wezuu caɣʋ nɛ ɖɛ-Ɛsɔ sɛtʋ tʋmɩyɛ yɔɔ cɔnɩyʋ ɛtayɩ fenasɩ naalɛ nzɩ sɩ-taa tʋma kpaagbaa. Ɛtayɩɣ pɩkpɛndɩnɩ tʋma wena atɩkɛ sukulibiya tʋma yɔ. Ɛnʋ lɩzɩɣnɩ ɖɔɖɔ paa kpɩtaʋ ŋgʋ lɛ, ki-kediɣzaɣ yɔɔ cɔnɩyʋ. Ɛlɛ pɩwɛɛ se pɩkɛ mba ɛzʋtʋyaa lɩzaa se pɔcɔnɩ kpɩtaʋ hɛkʋ taa kediɣzisi yɔɔ yɔ pa-taa nɔɔyʋ. Ɛnʋ tayɩɣnɩ sukulibiya tʋma ɖɔɖɔ. (Kalɩ  tayʋʋ 3-16 nɛ  24.) Alɩwaatʋ ndʋ ɛhaɣ sukulibiya tʋma yɔ, pɩmʋnaa se ɛmaɣzɩ sukulibiya pɩnzɩ nɛ mbʋ pɩtalɩ-sɩ si-wezuu caɣʋ taa yɔ pɩ-yɔɔ. Pɩwɛɛ se ɛmaɣzɩɣ ɖɔɖɔ nɛ ɛna se sukulibɩɣa ŋga paha tʋmɩyɛ nɖɩ yɔ, kapɩzɩɣ nɛ kɔyɔɔdɩ tʋmɩyɛ nɖɩ ɖɩ-taa tɔm nɛ ka-laŋɩyɛ kpayɩ na. Pɩwɛɛ se ɛlabɩnɩ lɩmaɣza kʋɖʋma ana tʋmɩyɛ, alɩwaatʋ ndʋ ɛhaɣ tʋma lɛɛna yɔ. Pɩwɛɛ se pɛcɛlɩ tʋma ana paa pɩtɩɖɔɔ yɔ, kpɩtaŋ naadozo pʋcɔ nɛ tʋmɩyɛ evemiye talɩ. Paahaɣ sukulibiya tʋma lɛ, pɩmʋnaa se palabɩnɩ tʋmɩyɛ takayaɣ ŋga payaɣ se Ðe-wezuu caɣʋ nɛ ɖɛ-Ɛsɔ sɛtʋ tʋmɩyɛ kediɣzaɣ tʋmɩyɛ (S-89) yɔ. Pɩwɛɛ se Ðe-wezuu caɣʋ nɛ ɖɛ-Ɛsɔ sɛtʋ tʋmɩyɛ yɔɔ cɔnɩyʋ ɛñaɣ pana nɛ eyele nɛ paka kpɩtaʋ hɛkʋ taa kediɣzaɣ kpeekpe ɖʋtʋ tɔm kususutu kpata yɔɔ. Ɛzʋtʋyaa pɩzɩɣ nɛ palɩzɩ ɛzʋtʋyʋ nɔɔyʋ yaa tʋmlaɖʋ nɔɔyʋ nɛ ɛsɩnɩ Ðe-wezuu caɣʋ nɛ ɖɛ-Ɛsɔ sɛtʋ tʋmɩyɛ yɔɔ cɔnɩyʋ. Ɛlɛ ɛzʋtʋyaa ɖeke wɛnɩnɩ waɖɛ se papɩzɩɣ nɛ paha tʋma wena atɩkɛ sukulibiya tʋma yɔ.

24. Paa kpɩtaʋ ŋgʋ lɛ, pakaɣ lɩzʋʋ ɛzʋtʋyʋ nɔɔyʋ se ɛcɔnɩ kpɩtaʋ hɛkʋ taa kediɣzaɣ yɔɔ. (Ðenɖe ɛgbɛyɛ taa ɛzʋtʋyaa tɩɖɔɔ yɔ, papɩzɩɣ nɛ paha tʋmɩyɛ ɖɩnɛ ɛgbɛyɛ taa tʋmlaɖaa mba pɛwɛ niye yɔ, ɛzɩ pɩpɔzʋʋ yɔ.) Ɛnʋ pɩmʋnaa se ɛñɔɔzɩ kɔɔnɔɔ tɔm nɛ kɛdɛzaɣ tɔm. Ɛnʋ yaɣnɩ tɔm yɔɔdɩyaa tɩŋa. Ye ɛzʋtʋyaa ɩtɩɖɔɔ yɔ, papɩzɩɣ nɛ paha-ɩ tʋma lɛɛna kediɣzaɣ ŋga ka-taa, kɔzɩ kɔzɩ tʋma wena a-taa paɖʋ paɣtʋ se pɔcɔnɩ video nakʋyʋ yem nɛ paatazɩɣ kɩ-taa nɛ paayɔɔdʋʋ tɔm natʋyʋ yɔ. Tɔm yɔɔdɩyaa tɛŋ nɛ kediɣzaɣ yɔɔ cɔnɩyʋ kɔŋ nɛ ɛyɔɔdʋʋ tɔm ndʋ yɔ, pɩmʋnaa se tɩwɛɛ tobi kpem. Pɩpɔzʋʋ se ɛzʋtʋyaa ɩcaɣ nɛ pana se pa-taa lɛ, mba pɩzɩɣ nɛ pala kediɣzaɣ yɔɔ cɔnʋʋ tʋmɩyɛ. Pɩwɛɛ se pɛlɛɣzɩɣ kediɣzaɣ yɔɔ cɔnɩyaa paa kpɩtaʋ ŋgʋ. Pɩwɛɣ ɖeu se pahaɣ Ðe-wezuu caɣʋ nɛ ɖɛ-Ɛsɔ sɛtʋ tʋmɩyɛ yɔɔ cɔnɩyʋ tʋmɩyɛ ɖɩnɛ ɖoŋ ɖoŋ nɛ pɩkɩlɩ ɛzʋtʋyaa lalaa. Ɛlɛ, pɩlɩɣnɩ mɩ-ɛgbɛyɛ taa wɛtʋ cɔlɔ. Ye ɛgbɛyɛ taa ɛzʋtʋyʋ nɔɔyʋ ɛmʋnaa se ɛcɔnɩ ɛgbɛyɛ taa Bibl kpɛlɩkʋʋ yɔɔ yɔ, pɩtɩla ɛmʋnaa ɖɔɖɔ se ɛkɛ kediɣzaɣ yɔɔ cɔnɩyʋ. Ɛlɛ, ɩtaasɔɔ se pɩmʋnaa se kediɣzaɣ yɔɔ cɔnɩyʋ ɛtɩlɩ sukulibiya sam nɛ ye pɩpɔzaa yɔ, ɛtasɩ-sɩ lɔŋ nɛ sɔɔlɩm. Kediɣzaɣ yɔɔ cɔnɩyʋ pɩwɛɛ se ɛla nɛ kediɣzaɣ tɛ alɩwaatʋ yɔɔ. (Kalɩ  tayʋʋ 17 nɛ  19.) Ye kediɣzaɣ yɔɔ cɔnɩyʋ ɛsɔɔlaa, nɛ ye lone kɩbanɖɛ naɖɩyɛ ɛwɛ tɔm ɖɩyɔɔdɩyɛ yɔ, papɩzɩɣ nɛ pasɩɩ miikroo naalɛ ñɩŋgʋ nɛ ɛyɔɔdʋʋ kɩ-taa. Piyeki nɛ alɩwaatʋ ndʋ ɛyaɣ koobu nɔɔyʋ yɔ, papɩzɩɣ nɛ pɔñɔɔzɩ ɛlɛ miikroo kpaagbaa. Ye ɛsɔɔlaa ɖɔɖɔ yɔ, ɛpɩzɩɣ nɛ ɛcaɣ tɔm ɖɩyɔɔdɩyɛ taabɩlɩ nakʋyʋ yɔɔ alɩwaatʋ ndʋ palakɩ Bibl kalʋʋ tʋmɩyɛ nɛ Falɩsɩ ña-tɩ nɛ ŋsusi tɔm camɩyɛ hɔɔlʋʋ taa sukulibiya tʋma yɔ. Pɩpɩzɩɣ piyele nɛ pataawɛɛkɩ alɩwaatʋ.

25. Ye pɩlakɩ yɔ, ɛzʋtʋyʋ weyi ɛwɛ niye tɔm yɔɔdʋʋ taa yɔ, ɛnʋ pɩmʋnaa se palɩzɩ nɛ ɛla tʋmɩyɛ ɖɩnɛ. Lɔŋ tasɩyʋ sɩnɩyʋ pɩzɩɣna nɛ ɛyaa ɛgbɛyɛ taa ɛzʋtʋyaa yaa ɛgbɛyɛ taa tʋmlaɖaa mba palakɩ Ðe-wezuu caɣʋ nɛ ɖɛ-Ɛsɔ sɛtʋ kediɣzaɣ taa tʋma yaa pɔyɔɔdʋʋ tɔm samaɣ taa yaa mba pakalɩɣ yaa pɔcɔŋnɩ Feŋuu Tilimiye kediɣzaɣ yaa ɛgbɛyɛ taa Bibl kpɛlɩkʋʋ yɔɔ yɔ nɛ ɛtasɩ-wɛ lɔŋ. (Kalɩ  tayʋʋ 19.) Ye ɛgbɛyɛ taa ɛzʋtʋyaa ɩɖɔwa nɛ pa-tɩŋa pɛwɛɛ niye tɔm wɩlʋʋ taa yɔ, papɩzɩɣ nɛ pɛlɛɣzɩɣ ɖama paa pɩnaɣ ŋga nɛ palakɩ tʋmɩyɛ ɖɩnɛ. Pɩtɩcɛyɩ se lɔŋ tasɩyʋ sɩnɩyʋ ɛtasɩɣ koobiya lɔŋ paa ɛzɩmtaa.

26. Ye sukulibiya ɩɖɔwa yɔ, papɩzɩɣ nɛ pala ɖamɩŋ lɛɛŋ taa sukuli. Sukulibiya tʋma yeke palakɩ ɖamɩŋ ɛnɩ ɩ-taa. Paa ɖaŋ ŋgʋ lɛ, pɩwɛɛ se kɩwɛɛnɩ lɔŋ tasɩyʋ kɩbanʋ. Pɩkɩlɩɣ ɖeu se ɛkɛnɩ ɛgbɛyɛ taa ɛzʋtʋyʋ. Ɛlɛ ye pɩpɔzaa yɔ, papɩzɩɣ nɛ paha tʋmɩyɛ nɖɩ ɛgbɛyɛ taa tʋmlaɖʋ weyi ɛ-wɛtʋ mʋnaa yɔ. Ɛgbɛyɛ taa ɛzʋtʋyaa lɩzɩɣnɩ weyi yaa mba ɛzʋtʋyaa maɣzɩɣ se papɩzɩɣ nɛ pala tʋmɩyɛ nɖɩ yɔ. Ɛzʋtʋyaa ɖɔɖɔ naɣna se pɩwɛɛ se paha tʋmɩyɛ nɖɩ ɛyʋ kʋɖʋm nɔɔyʋ nɛ ɛlakɩ-ɖɩ paa ɛzɩmtaa yaa pɩmʋnaa se palakɩ-ɖɩ nɛ pɛlɛɣzɩɣ ɖama. Paɣtʋ ndʋ pama  tayʋʋ 18 taa yɔ, ndʋ pɩwɛɛ se patɩŋ nɛ patasɩ lɔŋ sukuli ŋgʋ kɩ-taa sukulibiya ɖɔɖɔ. Ye palakɩ sukuli ŋgʋ ɖaŋ lɛɛkʋ taa yɔ, pɛtɛŋ Fezuu taa ñɩm tʋmɩyɛ lɛ, pɔpɔzɩ ɖaŋ ŋgʋ kɩ-taa sukulibiya se siwolo nɛ sɩla sukuli ŋgʋ kɩ-taa tʋma. Nɛ pɛtɛŋ sukulibiya tʋma labʋ lɛ, koobiya kɔɔ nɛ pɛkpɛndɩ koobiya lalaa yɔɔ kpaaŋ maɣmaɣ taa.

27. Pakaɣ wɩlʋʋ videowaa nabɛyɛ kediɣzaɣ kanɛ ka-taa. Pakaɣ ɖʋʋ videowaa mba JW Library® yɔɔ, nɛ papɩzɩɣ patɩŋnɩ wondu ndɩ ndɩ yɔɔ nɛ pakpaɣ-wɛ.

© 2023 Watch Tower Bible and Tract Society of Pennsylvania

S-38-KAB 11/23