Kroniiki takayaɣ kajalaɣ ñɩŋga 16:1-43
16 Nɛ pasʋnɩ Ɛsɔ toovenim tʋ Aɖakaɣ nɛ pasɩɩ-kɛ kizinziku ŋgʋ Daviid kaasiɣaa se pasɩɩ-kɛ yɔ kɩ-tɛɛ,+ nɛ palaa kɩlaŋ kɩñaɣzɩŋ nɛ laŋhɛzɩyɛ kɩlaŋ Ɛsɔ toovenim tʋ ɛsɩndaa.+
2 Daviid tɛm kɩlaŋ kɩñaɣzɩŋ+ nɛ laŋhɛzɩyɛ kɩlaŋ laʋ lɛ,+ ɛwazɩ samaɣ Yehowa hɩɖɛ taa.
3 Pɩtasɩ lɛ, ɛtayɩ Izrayɛɛlɩ mba kpeekpe, abalaa nɛ halaa, paa weyi lɛ kpɔnɔ kulukulu ñɩŋgʋ hɔɔlaɣ, daatɩ kakayaɣ, nɛ viiñi pee kɩwɩlɛɛ kakayaɣ.
4 Nɛ ɛlɩzɩ Leevi mba nabɛyɛ se palakɩ tʋmɩyɛ Yehowa Aɖakaɣ ɛsɩndaa,+ paɖʋʋ hɩɖɛ* Izrayɛɛlɩ tɛ Ɛsɔ Yehowa, pɛsɛɣ-ɩ se ɛlabaɣ lɛ, nɛ pasaŋɩ-ɩ.
5 Azaafʋ+ kaakɛnɩ ñʋʋdʋ, nɛ ɛ-wayɩ ñɩnʋ lɛ Zakarii; nɛ Yeyiyɛɛlɩ, Semiramɔɔtɩ, Yehiyɛɛlɩ, Matitiya, Eliyaabɩ, Benayaa, Obɛɛdɩ-Edom nɛ Yeyiyɛɛlɩ,+ pamakaɣ cɩmʋʋ wondu ndʋ tɩ-yɔɔ wɛ nimasɩ yɔ nɛ cɩmɩŋ;+ nɛ Azaafʋ makaɣ ŋgbamɛɛ,+
6 nɛ cɔjɔnaa Benayaa nɛ Yahaziyɛɛlɩ pahʋlaɣ aganda tam Ɛsɔ toovenim tʋ ɛgbɛyɛ ɖʋʋ aɖakaɣ ɛsɩndaa.
7 Kɩyakʋ ŋgʋ ki-wiye Daviid tɩŋnɩ Azaafʋ+ nɛ e-koobiya yɔɔ nɛ etee hendu Yehowa kajalaɣ ɖeɖe se ɛsɛɛ-ɩ se ɛlabaɣ lɛ:
8 «Ɩsɛɛ Yehowa+ se ɛlabaɣ lɛ, ɩyaa ɛ-hɩɖɛ,Iyele nɛ patɩlɩ ɛ-lakasɩ samasɩ hɛkʋ taa!+
9 Itee-i hendu, itee-i samtʋ hendu,*+Ɩmaɣzɩ e-piti tʋma kpeekpe yɔɔ.*+
10 Ɩkʋndɩnɩ ɛ-hɩɖɛ kiɖeɖeye.+
Mba pañɩnɩɣ Yehowa yɔ, pɛwɛɛ laŋhʋlʋmɩyɛ taa.+
11 Ɩñɩnɩ Yehowa+ nɛ e-ɖoŋ.
Ɩñɩnɩɣ tam se ɛsɩnɩ-mɩ.*+
12 Ɩtɔzɩ piti tʋma wena ɛlaba yɔ a-yɔɔ,+Ɛ-maamaaci lakasɩ nɛ tɔm ndʋ ɛhʋwa yɔ tɩ-yɔɔ,
13 Ɛ-lɩmɖʋyʋ Izrayɛɛlɩ lʋlʋʋ taa mba* mɩ,+Mɩ Yakɔɔb pɩyalaa, mɩ mba ɛlɩzaa yɔ.+
14 Ɛnʋ yɔ ɖɛ-Ɛsɔ Yehowa.+
Ɛ-tɔm hʋʋ wɛ tɛtʋ kpeekpe yɔɔ.+
15 Ɩtɔzɩ ɛgbɛyɛ nɖɩ ɛɖʋwa yɔ ɖɩ-yɔɔ tam,Ɩtɔzɩ tamaɣ ŋga ɛlaba yɔ* kɔ-yɔɔ, nɛ piwolo pɩtalɩ kpaɖɩŋ kudoku,+
16 Ɛgbɛyɛ nɖɩ ɛɖʋ ɛ nɛ Abraham pɛ-hɛkʋ taa yɔ,+Nɛ ɖuutu ndʋ eɖuuni Izaakɩ yɔ,+
17 Ndʋ eɖuwaa se tɩkɛnɩ paɣtʋ Yakɔɔb+Nɛ tamtam ɛgbɛyɛ Izrayɛɛlɩ yɔ,
18 Ɛyɔɔdaa se: “Mankaɣ-ŋ cɛlʋʋ Kanaŋ ɛjaɖɛ+Se ɖɩkɛnɩ ñe-ɖeɖe.”+
19 Pʋbʋ taa lɛ, ɩtaaɖɔɔ,Ɛɛɛ, ɩɩwɛ ññɩɩ yem, nɛ ɩɩkɛ agɔma ɛjaɖɛ taa.+
20 Pakʋyaɣnɩ ɛjaɖɛ naɖɩyɛ taa nɛ powoki lɛɛɖɛ taa,Pakʋyaɣnɩ kewiyaɣ nakɛyɛ taa nɛ powoki lɛɛka taa.+
21 Etiyele se nɔɔyʋ ɛnazɩ-wɛ,+Ɛlɛ pɔ-yɔɔ lɛ, ɛkalɩ awiya,+
22 Nɛ ɛyɔɔdɩ se: “Itaatukuni mɛn-tɛ patam numwaa,Nɛ ɩtaala kɩdɛkɛdɩm nabʋyʋ ma-nayaa.”+
23 Mɩ tɛtʋ kpeekpe yɔɔ mba, itee hendu Yehowa!
Isusi ɛ-ñʋʋ yabʋ tɔm paa evemiye nɖɩ!+
24 Isusi ɛ-samtʋ ajɛɛ taa,Isusi e-piti tʋma samasɩ kpeekpe taa.
25 Mbʋ pʋyɔɔ yɔ, Yehowa paɣlaa nɛ ɛnʋ mʋnɩnɩ samtʋ nɛ pɩkɩlɩ.
Ɛcaɣ sɔɔndʋ nɛ pɩkɩlɩ ɛsɔnaa lalaa tɩŋa.+
26 Ajɛɛ ɛsɔnaa kpeekpe kɛ falaa ɛsɔnaa,+Ɛlɛ Yehowa labɩnɩ ɛsɔdaa.+
27 Paɣlɩka* nɛ keɖeɣa wɛ ɖenɖe ɛwɛɛ yɔ;+Ðoŋ nɛ taa leleŋ wɛ ɛ-ɖɩjaɣyɛ taa.+
28 Mɩ ajɛɛ taa hɔŋ, ɩcɛlɩ Yehowa mbʋ pɩmʋnaa se pɛcɛlɩ-ɩ yɔ,Yehowa samtʋ nɛ e-ɖoŋ yɔɔ lɛ, ɩcɛlɩ-ɩ mbʋ pɩmʋnaa se pɛcɛlɩ-ɩ yɔ.+
29 Ɩcɛlɩ Yehowa samtʋ ndʋ tɩmʋnɩ ɛ-hɩɖɛ yɔ;+Ɩkɔnɩ haɖɛ nɛ ɩsʋʋ ɛ-ɛsɩndaa.+
Isuu wondu kɩbandʋ kiɖeɖetu nɛ iluŋ Yehowa tɛɛ.*+
30 Mɩ tɛtʋ kpeekpe yɔɔ mba, iseli ɛ-ɛsɩndaa!
Tɛtʋ* kam camɩyɛ; tɩɩpɩzɩɣ nɛ ticiɣdi.*+
31 Ɛsɔdaa ɛwɛɛ laŋhʋlʋmɩyɛ taa; tɛtʋ ɛwɛɛ taa leleŋ taa;+Isusi ajɛɛ taa se: “Yehowa pɩsɩ Wiyaʋ!”+
32 Teŋgu nɛ mbʋ payɩ pɩwɛ kɩ-taa yɔ, pɩma kubusi;Hayɩm nɛ mbʋ payɩ pɩwɛ pɩ-taa yɔ, pɩwɛɛ laŋhʋlʋmɩyɛ taa.
33 Alɩwaatʋ kʋɖʋmtʋ ndʋ tɩ-taa lɛ, laʋ tɛɛ tɩŋ ɩma kubusi nɛ taa leleŋ Yehowa ɛsɩndaa,Mbʋ pʋyɔɔ yɔ, eɖiɣni kɔm* se ɛhʋʋnɩ tɛtʋ tɔm.
34 Ɩsɛɛ Yehowa se ɛlabaɣ lɛ, mbʋ pʋyɔɔ yɔ ɛwɛ ɖeu;+Ɛ-sɔɔlɩm siɣsiɣ ñɩmbʋ wɛ tam.+
35 Nɛ ɩyɔɔdɩ se: “Hayɩ, ɖa-ñʋʋ yabʋ tɛ Ɛsɔ, ya ɖa-ñʋʋ,+Kpeɣli-ɖʋ nɛ ŋholi-ɖʋ ajɛɛ nesi tɛɛ,Nɛ ɖɩpɩzɩ nɛ ɖɩsa ña-hɩɖɛ kiɖeɖeye+Nɛ ɖɩsamɩ-ŋ nɛ amɛya.*+
36 Pasa Izrayɛɛlɩ tɛ Ɛsɔ YehowaNɛ pɩkpaɣ nɛ pɩɖɛɛ tam tam.”»*
Nɛ samaɣ kpeekpe yɔɔdɩ se: «Amɛn!»* nɛ pasa Yehowa.
37 Nɛ Daviid yele Azaafʋ+ nɛ e-koobiya peeɖe, Yehowa ɛgbɛyɛ ɖʋʋ aɖakaɣ ɛsɩndaa se palakɩ tʋmɩyɛ Aɖakaɣ ɛsɩndaa tam,+ ɛzɩ pɩpɔzʋʋ se palakɩ paa evemiye nɖɩ yɔ.+
38 Obɛɛdɩ-Edom nɛ e-koobiya, pɛkpɛndɩ 68, nɛ Yedutuunɩ pɩyalʋ Obɛɛdɩ-Edom nɛ Hosaa paakɛ nɔnɔɔ yɔɔ ɖaŋɩyaa;
39 nɛ cɔjɔ Sadɔɔkɩ+ nɛ ɛ-taabalaa cɔjɔnaa lalaa paawɛ Yehowa Ɛsɔ sɛtʋ kɩɖanɖʋʋ ɛsɩndaa lone kʋkʋyɩyɛ taa Gabawɔɔ+
40 se palaa kɩlaŋ kɩñaɣzɩŋ Yehowa ɖoŋ ɖoŋ, kɩlaŋ kɩñaɣzɩŋ altaaru yɔɔ, tanaŋ nɛ ɖanaɣ, nɛ pɔɖɔ tɔm ndʋ payɩ pama Yehowa Paɣtʋ taa yɔ tɩ-yɔɔ, ndʋ ɛɖʋ Izrayɛɛlɩ yɔ.+
41 Hemaanɩ nɛ Yedutuunɩ+ nɛ mba pɩkazɩ abalaa mba paalɩzaa nɛ payaa-wɛ nɛ pa-hɩla yɔ pa-taa yɔ, paawɛ pɔ-cɔlɔ se pɛsɛɛ Yehowa se ɛlabaɣ lɛ,+ mbʋ pʋyɔɔ yɔ «ɛ-sɔɔlɩm siɣsiɣ ñɩmbʋ wɛ tam»;+
42 nɛ Hemaanɩ+ nɛ Yedutuunɩ paawɛ pɔ-cɔlɔ se pahʋlɩ aganda, pama ŋgbamɛɛ, nɛ wondu ndʋ palakɩnɩ tʋmɩyɛ se pasa Ɛsɔ toovenim tʋ yɔ;* nɛ Yedutuunɩ+ pɩyalaa kaawɛ nɔnɔɔ taa.
43 Nɛ ɛyaa kpeekpe pɩsɩ pa-ɖɩsɩ taa, nɛ Daviid ɖɛɛ se ɛwazɩ ɛ-maɣmaɣ ɛ-ɖɩɣa taa ñɩma.
Pɩ-tɛɛ tɔm
^ Piye piye, «pɔtɔzʋʋ.»
^ Yaa «ɩmabɩ-ɩ minziiki.»
^ Pɩpɩzɩɣ pɩkɛ, «Ɩyɔɔdɩ e-piti tʋma kpeekpe tɔm.»
^ Yaa «Ɩñɩnɩɣ ɛ-ɛsɩndaa tam.»
^ Piye piye, «Izrayɛɛlɩ ɖomaɣ.»
^ Piye piye, «Ɩtɔzɩ tɔm ndʋ ɛɖʋ paɣtʋ nɛ ɛyɔɔdɩ yɔ.»
^ Yaa «Ñamtʋ.»
^ Yaa «nɛ ɩsɛɛ Yehowa.» Pɩpɩzɩɣ pɩkɛ, «Iluŋ Yehowa tɛɛ e-kele kele wɛtʋ keɖeɣa yɔɔ.»
^ Yaa «Tɛtʋ ndʋ tɩlʋlʋʋ yɔ.»
^ Yaa «pɩɩpɩzɩɣ nɛ pɩcɛŋɛsɩ-tʋ.»
^ Yaa «Mbʋ pʋyɔɔ yɔ ɛkɔma.»
^ Yaa «Nɛ ɖɩmɛyɩ ña-samtʋ taa.»
^ Yaa «Kpaɣnɩ tam tam nɛ piwolo tam tam.»
^ Yaa «Pɩla mbʋ!»
^ Yaa «nɛ Ɛsɔ toovenim tʋ hendu wondu.»
