Kroniiki takayaɣ kajalaɣ ñɩŋga 19:1-19
19 Pʋwayɩ lɛ, Amooni mba wiyaʋ Nahaasɩ sɩ, nɛ ɛ-pɩyalʋ pɩsɩ wiyaʋ e-lone taa.+
2 Peeɖe Daviid yɔɔdaa se: «Mankaɣ wɩlʋʋ sɔɔlɩm siɣsiɣ ñɩmbʋ+ Nahaasɩ pɩyalʋ Hanuuni, mbʋ pʋyɔɔ yɔ ɛ-caa kaawɩlɩ-m sɔɔlɩm siɣsiɣ ñɩmbʋ.» Nɛ Daviid tiyi ɛyaa ɛ-cɔlɔ se pɛhɛzɩ ɛ-laŋɩyɛ ɛ-caa sɩm yɔɔ. Ɛlɛ Daviid lɩmɖʋyaa wobi Amooni mba+ ɛjaɖɛ taa se pɛhɛzɩ Hanuuni laŋɩyɛ lɛ,
3 Amooni mba awumbiya heyi Hanuuni se: «Ŋmaɣzɩɣ se ña-caa hɩɖɛ ɖʋʋ yɔɔ Daviid tiyi laŋɩyɛ hɛzɩyaa ñɔ-cɔlɔ yaa we? Ɛzɩ ɛ-lɩmɖʋyaa tɩkɔɔ ñɔ-cɔlɔ se pɩsa nɛ pañɩnɩ camɩyɛ nɛ pɔcɔŋ ɛjaɖɛ nɛ pawabɩ-ŋ yaa we?»
4 Peeɖe Hanuuni kpa Daviid lɩmɖʋyaa nɛ ɛhʋm-wɛ+ nɛ ɛsɛtɩ po-tokonaa pɔ-tɔbɩŋ yɔɔ nɛ eyebi-wɛ nɛ pɛɖɛɛ.
5 Peheyi Daviid ɛyaa mba pɔ-tɔm lɛ, ɛcaŋ etiyi lalaa se pakatɩ-wɛ, mbʋ pʋyɔɔ yɔ paaɖʋ ɛyaa mba fɛyɛ sɔsɔɖɛ; nɛ wiyaʋ heyi-wɛ se: «Ɩcaɣ Yeriikoo+ pɩkɔɔ nɛ pɩsɩɩnɩ alɩwaatʋ ndʋ mɩ-tandaŋ ɖaɣnɩ ñɔʋ yɔ; nɛ pʋwayɩ lɛ, ɩpɩsɩ nɛ ɩkɔɔ.»
6 Pʋwayɩ lɛ, Amooni mba na se papɩsɩ mbʋ pɩlɩɣ sɔŋ siŋŋ yɔ Daviid mɔɔŋ tɛɛ; peeɖe Hanuuni nɛ Amooni mba petiyini liidiye talaŋwaa* 1 000 se pɛtɛɣ kɛɛkɛɛnaa nɛ kpaŋnaŋ yɔɔ caɣyaa Mezoopotamii,* Aram-Maaka, nɛ Zobaa+ taa.
7 Mbʋ pɛtɛɣ kɛɛkɛɛnaa 32 000, nɛ Maaka wiyaʋ nɛ ɛ-samaɣ. Nɛ pɔkɔɔ nɛ pekpeɣli Medeba+ ɛsɩndaa. Amooni mba kpeɣli pɛ-tɛtʋ ndɩ ndɩ taa nɛ palɩɩ se pala you.
8 Alɩwaatʋ ndʋ Daviid nɩ tɔm ndʋ lɛ, etiyi Yowaabʋ+ nɛ sɔɔjanaa kpeekpe, pɩkpɛndɩnɩ ɛ-sɔdɩŋ weyi ɩkɩlɩ ɖoŋ yɔ.+
9 Nɛ Amooni mba lɩɩ nɛ pɔñɔɔzɩ pa-tɩ tɛtʋ nɔnɔɔ taa se poyoo, alɩwaatʋ ndʋ lɛ awiya wena aakɔma yɔ aawɛ a-ɖeke tɛtʋ nɛ wayɩ kiŋ.
10 Alɩwaatʋ ndʋ Yowaabʋ nawa se pɛwɛɛ nɛ pɔkɔŋ se palabɩ-wɛ nɛ you nɛ pɛ-ɛsɩndaa kiŋ nɛ pa-wayɩ kiŋ lɛ, ɛlɩzɩ Izrayɛɛlɩ taa sɔɔjanaa mba pasɩm you labʋ nɛ pɩkpaɖɩ yɔ nɛ ɛñɔɔzɩ-wɛ se palɩɩ nɛ pakatɩ Siirii mba.+
11 Pɩkazɩ mba yɔ, ɛɖʋzɩ-wɛ ɛ-ɖalʋ* Abisayii+ nesi tɛɛ, se ɛlɛ ɛñɔɔzɩ-wɛ nɛ palɩɩ nɛ pakatɩ Amooni mba.
12 Nɛ eheyi-i se: «Ye Siirii mba+ ɩkɔm nɛ pakɩlɩɣ-m ɖoŋ yɔ, ɖɩnɛ ɛlɛ pɩwɛɛ se ŋkɔɔ nɛ ŋya ma-ñʋʋ; ɛlɛ ye Amooni mba ɩkɔm nɛ pakɩlɩɣ-ŋ ɖoŋ yɔ, mankaɣ yabʋ ña-ñʋʋ.
13 Pɩwɛɛ se ɖɩwɛɛ ɖoŋ nɛ ɖɩwɛɛ abalɩtʋ+ ɖa-samaɣ yɔɔ nɛ ɖɛ-Ɛsɔ tɛtʋ ndɩ ndɩ yɔɔ, nɛ Yehowa kaɣ labʋ mbʋ pɩwɛ ɖeu ɛ-ɛsɩndaa yɔ.»
14 Ðɩnɛ ɛlɛ Yowaabʋ nɛ ɛ-ɛyaa pɔñɔtɩnɩ Siirii mba se poyooni-wɛ, nɛ Siirii mba se ɛ-ɛsɩndaa.+
15 Amooni mba nawa se Siirii mba sewa lɛ, mba ɖɔɖɔ pese ɛ-ɖalʋ* Abisayii ɛsɩndaa nɛ pasʋʋ tɛtʋ taa. Pʋwayɩ lɛ, Yowaabʋ wolo Yeruzalɛm.
16 Siirii mba nawa se Izrayɛɛlɩ mba wabɩ-wɛ lɛ, petiyi ɛyaa se payaa Siirii ñɩma mba pɛwɛ Pɔɔ* egeetiye taa yɔ,+ nɛ Hadadezɛɛrɩ sɔɔjanaa ñʋʋdʋ Sofaakɩ ɖiyaɣni-wɛ.+
17 Alɩwaatʋ ndʋ powoba nɛ peheyi Daviid tɔm ndʋ lɛ, ɛcaŋ nɛ ekpeɣli Izrayɛɛlɩ sɔɔjanaa kpeekpe nɛ ɛtɛzɩ Yɔɔrdaŋ nɛ ewolo pɔ-cɔlɔ nɛ ɛñɔɔzɩ ɛ-ɛyaa se poyooni-wɛ. Daviid ñɔɔzɩ ɛ-ɛyaa nɛ palɩɩ se pakatɩ Siirii mba, nɛ Siirii mba yooni-i.+
18 Ɛlɛ Siirii mba se Izrayɛɛlɩ ɛsɩndaa; nɛ Daviid kʋ Siirii mba kɛɛkɛɛnaa sayaa 7 000 nɛ sɔɔjanaa nɩŋgbanzɩ ɖɔnaa 40 000, nɛ ɛkʋ sɔɔjanaa ñʋʋdʋ Sofaakɩ.
19 Alɩwaatʋ ndʋ Hadadezɛɛrɩ lɩmɖʋyaa nawa se Izrayɛɛlɩ wabɩ-wɛ lɛ,+ pacaŋ nɛ pala laŋhɛzɩyɛ nɛ Daviid nɛ poluzi pa-tɩ ɛ-tɛɛ; nɛ Siirii tɩtasɩ sɔɔlʋʋ se kɩsɩnɩ Amooni mba.+
Pɩ-tɛɛ tɔm
^ Talaŋ kʋɖʋmʋʋ maɣnɩ ɛzɩ kilonaa 34 mbʋ yɔ (kilonaa 34,2). Cɔnɩ Tɔm kɩsɔzɩtʋ B14.
^ Piye piye, «Aram-Naarayim.»
^ Ebree taa lɛ, patɩyɔɔdɩ kpayɩ kpayɩ se ɛnʋ kɛnɩ ɖalʋ yaa neu.
^ Ebree taa lɛ, patɩyɔɔdɩ kpayɩ kpayɩ se ɛnʋ kɛnɩ ɖalʋ yaa neu.
^ Pʋ-tɔbʋʋ se Efraatɩ.
