Kroniiki takayaɣ kajalaɣ ñɩŋga 20:1-8
20 Pɩnaɣ ɖɩbazɩyɛ,* alɩwaatʋ ndʋ tɩ-taa awiya woki yoŋ yɔ tɩ-taa lɛ, Yowaabʋ+ ɖiyi sɔɔjanaa nɛ ewolo nɛ ɛɖɩzɩ Amooni mba ɛjaɖɛ; ewoba nɛ ɛñɛyɩ Raba.+ Alɩwaatʋ ndʋ lɛ, Daviid caɣ Yeruzalɛm.+ Yowaabʋ yooni Raba nɛ ɛyɔkɩ-kʋ.+
2 Nɛ Daviid kuli Malɩkam awiya hulaɣ ɛlɛ ñʋʋ taa, nɛ ɛna se ko-yuŋ kɛ sika talaŋ kʋɖʋmʋʋ,* nɛ pacanɩ-kɛ nɛ ñɩɣlɩm pɛɛ; nɛ papam-kɛ Daviid ñʋʋ taa. Ɛkpaɣ ɖɔɖɔ wondu sakɩyɛ tɛtʋ ndʋ tɩ-taa.+
3 Nɛ ɛlɩzɩ ɛyaa mba paawɛ tɩ-taa yɔ nɛ ɛpɩsɩ-wɛ pɛɛ saɣyaa nɛ mba palakɩnɩ tʋmɩyɛ+ ñɩɣyʋʋ wondu ndʋ tɩwɛ lɔŋ yɔ nɛ laɖa yɔ. Mbʋ Daviid labɩ Amooni mba tɛtʋ tɩŋa. Pʋwayɩ lɛ, Daviid nɛ ɛ-sɔɔjanaa kpeekpe papɩsɩ Yeruzalɛm.
4 Pʋbʋ wayɩ lɛ, you tasɩ lɩʋ pa nɛ Filistii mba pɛ-hɛkʋ taa Gezɛɛrɩ. Alɩwaatʋ ndʋ lɛ, Husa tʋ Sibekaayɩ+ kʋ Sipaayɩ, Refayim+ lʋlʋʋ taa tʋ nɔɔyʋ, nɛ poluzi Filistii mba pɛ-tɛɛ.
5 Nɛ you tasɩ lɩʋ pa nɛ Filistii mba pɛ-hɛkʋ taa, nɛ Yayiirɩ pɩyalʋ Elanaanɩ kʋ Laamii weyi ɛkɛ Gaatɩ tʋ Gooliyaatɩ+ neu yɔ, weyi ɛ-kɩgbɛzɛŋ kaawɛnɩ ɖaʋ ŋgʋ kɩwɛ ɛzɩ pɩsaŋ lʋyaa ɖaʋ yɔ.+
6 You tasɩ lɩʋ ɖɔɖɔ Gaatɩ.+ Abalʋ nɔɔyʋ kaawɛ peeɖe, ɛ-paɣlɩka kaawɛ ŋgee kpem;+ ɛɛwɛnɩ niwee 6 paa nesi nzɩ lɛ sɩ-yɔɔ nɛ nimbe 6 paa nɩŋgbaŋaɣ ŋga lɛ kɔ-yɔɔ, nɛ pɩkpɛndɩ 24; nɛ ɛlɛ ɖɔɖɔ kaakɛ Refayim lʋlʋʋ taa tʋ nɔɔyʋ.+
7 Ɛɛwɛɛ nɛ ɛcaɣ Izrayɛɛlɩ tɔm.+ Nɛ Yonataanɩ, weyi ɛkɛ Daviid ɖalʋ Simeya+ pɩyalʋ yɔ ɛkʋ-ɩ.
8 Paakɛ Refayim lʋlʋʋ taa mba,+ Gaatɩ+ taa; nɛ Daviid nɛ ɛ-lɩmɖʋyaa pakʋ-wɛ.
Pɩ-tɛɛ tɔm
^ Pʋ-tɔbʋʋ se kpiziɣɖe alɩwaatʋ taa.
^ Pɩmakɩnɩ ɛzɩ kilonaa 34 mbʋ yɔ (kilonaa 34,2). Cɔnɩ Tɔm kɩsɔzɩtʋ B14.
