Kroniiki takayaɣ kajalaɣ ñɩŋga 23:1-32
23 Daviid kpadɩyaa nɛ ɛwɩzɩ sɩbʋ lɛ,* ɛsɩɩ ɛ-pɩyalʋ Salomɔɔ wiyaʋ Izrayɛɛlɩ yɔɔ.+
2 Nɛ ekpeɣli Izrayɛɛlɩ awumbiya kpeekpe, cɔjɔnaa,+ nɛ Leevi mba.+
3 Pakalɩ Leevi ñɩma mba pɛwɛnɩ kpaɣnɩ pɩnzɩ 30 nɛ pɩcɛzɩ yɔ pa-ñʋʋ;+ pakalɩ abalaa ñʋʋ kʋɖʋm kʋɖʋm lɛ, pɛkpɛndɩ 38 000.
4 Pa-taa lɛ, ɛyaa 24 000 kaakɛ Yehowa ɖɩɣa tʋmɩyɛ yɔɔ cɔnɩyaa, nɛ ɛyaa 6 000 kaakɛ ñʋndɩnaa nɛ tɔm hʋyaa,+
5 nɛ ɛyaa 4 000 kaakɛ nɔnɔsɩ yɔɔ ɖaŋɩyaa,+ nɛ ɛyaa 4 000 kpakaɣ hendu teu wondu ndʋ Daviid kaayɔɔdɩ tɩ-tɔm se «malabɩ-tʋ se pasaŋnɩ Ɛsɔ» yɔ nɛ pasaŋnɩ+ Yehowa.
6 Nɛ Daviid tayɩ-wɛ tindima ndɩ ndɩ taa+ ɛzɩ Leevi pɩyalaa wɛʋ yɔ: Gɛrɩsɔɔnɩ, Kehaatɩ nɛ Merarii.+
7 Gɛrɩsɔɔnɩ mba taa lɛ, Ladaanɩ nɛ Simeyii.
8 Ladaanɩ pɩyalaa yɔ: Ñʋʋdʋ Yehiyɛɛlɩ, Zeetam nɛ Yowɛɛlɩ,+ pɛkpɛndɩ naadozo.
9 Simeyii pɩyalaa yɔ: Selomɔɔtɩ, Haziyɛɛlɩ nɛ Haraanɩ, pɛkpɛndɩ 3. Paakɛ Ladaanɩ caanaa ɖɩsɩ ñʋndɩnaa.
10 Nɛ Simeyii pɩyalaa yɔ: Yahaatɩ, Zina, Yewuusi nɛ Beriya. Pa-naanza paakɛ Simeyii pɩyalaa.
11 Yahaatɩ kaakɛ ñʋʋdʋ nɛ Zizaa kɛ 2 tʋ. Ɛlɛ Yewuusi nɛ Beriya pataawɛɛnɩ pɩyalaa sakɩyɛ; pʋyɔɔ lɛ, pakalɩ-wɛ se pɛkɛ caanaa ɖɩɣa kʋɖʋmaɣ nɛ pɔcɔŋnɩ tʋmɩyɛ kʋɖʋmɖɩyɛ yɔɔ.
12 Kehaatɩ pɩyalaa yɔ: Amɩram, Izihaarɩ,+ Ebrɔŋ nɛ Uziyɛɛlɩ,+ pɛkpɛndɩ naanza.
13 Amɩram pɩyalaa yɔ: Aarɔɔnɩ+ nɛ Moyizi.+ Ɛlɛ pasɩɩ Aarɔɔnɩ nɛ hɔɔlʋʋ tam+ se ɛla lɩm ɖʋʋ tʋmɩyɛ Lone Kiɖeɖeye nɖɩ ɖɩkpaɖaa yɔ ɖɩ-taa, ɛ nɛ ɛ-pɩyalaa, se palaa kɩlaŋ Yehowa ɛsɩndaa, se palabɩ-ɩ lɩm ɖʋʋ tʋmɩyɛ, nɛ pawazɩɣ ɛyaa ɛ-hɩɖɛ taa tam.+
14 Piyele nɛ Ɛsɔ toovenim tʋ tɛ ɛyʋ Moyizi lɛ, pakalɩ ɛ-pɩyalaa Leevi mba cejewiye taa.
15 Moyizi pɩyalaa yɔ: Gɛrɩsɔɔm+ nɛ Eliyeezɛɛrɩ.+
16 Gɛrɩsɔɔm pɩyalaa taa lɛ, Sebuwɛɛlɩ+ kaakɛnɩ ñʋʋdʋ.
17 Eliyeezɛɛrɩ lʋlʋʋ taa mba* taa lɛ, Rehabiya+ kaakɛnɩ ñʋʋdʋ; Eliyeezɛɛrɩ taawɛɛnɩ pɩyalaa lalaa, ɛlɛ Rehabiya pɩyalaa kaaɖɔ siŋŋ.
18 Izihaarɩ+ pɩyalaa taa lɛ, Selomitɩ+ kaakɛnɩ ñʋʋdʋ.
19 Ebrɔŋ pɩyalaa yɔ: Yeriya lɛ ñʋʋdʋ, Amariya lɛ 2 tʋ, Yahaziyɛɛlɩ lɛ 3 tʋ nɛ Yekameyam+ lɛ 4 tʋ.
20 Uziyɛɛlɩ pɩyalaa yɔ:+ Mikee lɛ ñʋʋdʋ nɛ Isihiya lɛ 2 tʋ.
21 Merarii pɩyalaa yɔ: Maalii nɛ Muusi.+ Maalii pɩyalaa yɔ: Eleyaazaarɩ nɛ Kiisi.
22 Eleyaazaarɩ sɩ, ɛlɛ ɛtaawɛɛnɩ pɩyalaa, pɛlaa ɖeke ɛɛwɛna. Pʋyɔɔ Kiisi pɩyalaa, pʋ-tɔbʋʋ se pɔ-hɔʋ taa mba,* kpaɣ-wɛ nɛ papɩsɩ pa-halaa.
23 Muusi pɩyalaa yɔ: Maalii, Edɛɛrɩ nɛ Yeremɔɔtɩ, pɛkpɛndɩ 3.
24 Leevi pɩyalaa lɛ, ɛzɩ pɛwɛʋ pa-caanaa ɖɩsɩ taa yɔ, pa-caanaa ɖɩsɩ ñʋndɩnaa, mba pakalɩ-wɛ nɛ pama pa-hɩla takayɩsɩ taa yɔ, nɛ mba lakaɣnɩ tʋmɩyɛ Yehowa ɖɩɣa taa, paawɛnɩ kpaɣnɩ pɩnzɩ 20 nɛ pɩcɛzɩ.
25 Mbʋ pʋyɔɔ yɔ Daviid kaayɔɔdaa se: «Izrayɛɛlɩ tɛ Ɛsɔ Yehowa ha ɛ-samaɣ hɛzɩyɛ,+ nɛ ɛkaɣ wɛʋ Yeruzalɛm tam.+
26 Pɩtasɩ lɛ, pɩɩkaɣ pɔzʋʋ se Leevi mba ɩkpaɣ Ɛsɔ sɛtʋ kɩɖanɖʋʋ yaa ki-wondu ndʋ palakɩnɩ tʋmɩyɛ yɔ tɩ-taa natʋyʋ.»+
27 Mbʋ pʋyɔɔ yɔ, ɛzɩ kɛdɛzaɣ paɣtʋ ndʋ Daviid ɖʋwa yɔ tɩpɔzʋʋ yɔ, pakalɩ Leevi ñɩma mba paawɛnɩ kpaɣnɩ pɩnzɩ 20 nɛ pɩcɛzɩ yɔ.
28 Pa-tʋmɩyɛ lɛ se pasɩnɩ Aarɔɔnɩ pɩyalaa+ nɛ pala Yehowa ɖɩɣa taa tʋma, se pɔcɔnɩ kadasɩ yɔɔ,+ ɖamɩŋ weyi ɩ-tɛɛ pɔtɔkɩ tɔɔnaɣ yɔ ɩ-yɔɔ, papɩsɩ paa wonuu kiɖeɖeu ŋgʋ lɛ kele kele, nɛ pɔcɔnɩ tʋma lɛɛna wena payɩ pɩpɔzʋʋ se pala Ɛsɔ toovenim tʋ ɖɩɣa taa yɔ a-yɔɔ.
29 Pasɩɣaɣna nɛ pɔcɔŋnɩ kpɔnɔnaa mba patɩnɩɣ-wɛ ɖama yɔɔ yɔ,*+ mʋlʋm mbʋ pɩkpɩzɩ camɩyɛ se palabɩnɩ tɔɔnaɣ pee kɩlaʋ yɔ, kpɔnɔnaa tatayaa tatayaawaa mba patɩɖʋ pa-taa lɔlɔm yɔ,+ kakayɩsɩ nzɩ palabɩ-sɩ tɛlɛm ŋgʋ kɩ-yɔɔ poɖoŋuu yɔ, mʋlʋm mbʋ ponuutaa nɛ pɩpɩsɩ mʋtʋ nɛ pesidini num yɔ,+ pɩ-yɔɔ; nɛ pɔcɔŋnɩ wondu ɖɔʋ nɛ wondu paɣlɩka maɣzʋʋ tʋma tɩŋa yɔɔ.
30 Pɩɩwɛɛ se pasɩŋ paa tanaŋ ŋgʋ lɛ kɩ-tɛɛ+ nɛ pɛsɛɛ Yehowa se ɛlabaɣ lɛ nɛ pasamɩ-ɩ, nɛ mbʋ ɖɔɖɔ pɩɩwɛɛ se pala ɖanaɣ yɔɔ.+
31 Pasɩɣaɣnɩ alɩwaatʋ ndʋ payɩ palaɣaɣ kɩlaŋ kɩñaɣzɩŋ Yehowa, Sabaatɩwaa wiye,+ fenasɩ kɩfasɩ yɔɔ+ nɛ kazandʋ alɩwaatʋ taa+ yɔ, ɛzɩ tam ɛzɩma paɣtʋ pɔzaɣ se pala yɔ; palakaɣ mbʋ ɖoŋ ɖoŋ Yehowa ɛsɩndaa.
32 Pɔcɔŋnaɣ ɖɔɖɔ tʋma wena pɩɩwɛɛ se pala kediɣzaɣ kizinziku hɔɔlʋʋ taa nɛ lone kiɖeɖeye hɔɔlʋʋ taa yɔ a-ɖeɖe, nɛ pasɩɣnɩ po-koobiya Aarɔɔnɩ pɩyalaa se pala tʋma wena pɩɩwɛɛ se pala Yehowa ɖɩɣa taa yɔ.
Pɩ-tɛɛ tɔm
^ Piye piye, «kpadɩyaa nɛ ɛ-kɩyakɩŋ ɖɔɔ lɛ.»
^ Piye piye, «Eliyeezɛɛrɩ pɩyalaa.»
^ Piye piye, «po-koobiya.»
^ Pʋ-tɔbʋʋ se Ɛsɔ ɛsɩndaa kpɔnɔnaa.