Kroniiki takayaɣ kajalaɣ ñɩŋga 29:1-30
29 Nɛ Wiyaʋ Daviid heyi samaɣ kpeekpe se: «Man-pɩyalʋ Salomɔɔ, weyi Ɛsɔ lɩzaa yɔ,+ ɛkɛ evebu nɛ ɛfɛyɩnɩ lɔŋsɩnɖɛ,+ nɛ tʋmɩyɛ paɣlaa, mbʋ pʋyɔɔ yɔ pɩtɩkɛ ɛyʋ pamaɣ templo* ŋgʋ, ɛlɛ Yehowa Ɛsɔ pamaɣ-kʋ.+
2 Nɛ malabɩ mbʋ payɩ manpɩzɩɣ yɔ nɛ mɔñɔɔzɩ mbʋ pɩwɛɛ se pamanɩ mɛ-Ɛsɔ ɖɩɣa yɔ, nɛ mañɩnɩ sika se palabɩnɩ tʋma wena apɔzʋʋ sika yɔ, liidiye ñɩɣtʋ se palabɩnɩ tʋma wena apɔzʋʋ liidiye ñɩɣtʋ yɔ, ñɩɣyʋʋ kɩsɛɛmʋʋ se palabɩnɩ tʋma wena apɔzʋʋ ñɩɣyʋʋ kɩsɛɛmʋʋ yɔ, ñɩɣtʋ se palabɩnɩ tʋma wena apɔzʋʋ ñɩɣtʋ yɔ,+ kpoŋgbolonaa+ se palabɩnɩ tʋma wena apɔzʋʋ kpoŋgbolonaa yɔ, onikisi pɛɛ, nɛ pɛɛ wena paɖʋʋnɩ somtu yɔ, tɔlɩm ndɩ ndɩ pɛɛ cikpena wena pacanɩɣna yɔ, ñɩɣlɩm pɛɛ ndɩ ndɩ nɛ alɩbaatɩrɩ pɛɛ sakɩyɛ.
3 Pɩtasɩ lɛ, man-taa wɛ leleŋ siŋŋ nɛ mɛ-Ɛsɔ ɖɩɣa;+ pʋyɔɔ lɛ, mankpakɩɣ ɖɔɖɔ ma-maɣmaɣ ma-ñɩm+ taa sika nɛ liidiye ñɩɣtʋ nɛ maha mɛ-Ɛsɔ ɖɩɣa, pɩtasɩnɩ mbʋ payɩ mɔñɔɔzaa nɛ mansɩɩ ɖɩɣa kiɖeɖeɣa yɔ,
4 pɩkpɛndɩnɩ Ofiiri sika+ talaŋwaa* 3 000 nɛ liidiye* kele kele ñɩnɖɛ* talaŋwaa 7 000, se pɔpɔ ɖɩsɩ kolonzi yɔɔ,
5 sika se palabɩnɩ tʋma wena apɔzʋʋ sika yɔ, nɛ liidiye ñɩɣtʋ se palabɩnɩ tʋma wena apɔzʋʋ liidiye ñɩɣtʋ yɔ, nɛ tʋma wena payɩ pɩwɛɛ se nesi tɛɛ tʋmlaɖaa ɩla yɔ. Lɛɛlɛɛyɔ, atisiɣ faaa nɛ ɛkpɛndɩnɩ kʋjɔʋ e-nesi tɛɛ nɛ ɛkɔɔ sɔnɔ se ɛha Yehowa?»+
6 Nɛ caanaa ɖɩsɩ taa awumbiya, Izrayɛɛlɩ cejewe awumbiya, kudokiŋ nɛ mɩnɩŋ ñʋndɩnaa,+ nɛ wiyaʋ tʋma ñʋndɩnaa+ petisi faaa nɛ pɔkɔɔ.
7 Nɛ paha pʋnɛ se palabɩnɩ Ɛsɔ toovenim tʋ ɖɩɣa tʋmɩyɛ: sika talaŋwaa 5 000, darikwaa* 10 000, liidiye ñɩɣtʋ talaŋwaa 10 000, ñɩɣyʋʋ kɩsɛɛmʋʋ talaŋwaa 18 000 nɛ ñɩɣtʋ talaŋwaa 100 000.
8 Mba payɩ paawɛnɩ ñɩɣlɩm pɛɛ yɔ paha-yɛ se paɖʋ-yɛ Yehowa ɖɩɣa ñɩm ɖɩzɩyɛ taa, nɛ Gɛrɩsɔɔnɩ tʋ+ Yehiyɛɛlɩ+ cɔŋnaɣnɩ ɖɩ-yɔɔ.
9 Samaɣ taa la leleŋ nɛ sɔɔlɩm haɖɛ nɖɩ kalaba yɔ, mbʋ pʋyɔɔ yɔ kalabɩ sɔɔlɩm haɖɛ Yehowa nɛ laŋɩyɛ pilim,+ nɛ Wiyaʋ Daviid taa la leleŋ ɖɔɖɔ pɩdɩɩfɛyɩ.
10 Nɛ Daviid sa Yehowa samaɣ kpeekpe ɛsɩndaa. Daviid yɔɔdaa se: «Oo ɖa-caa Izrayɛɛlɩ tɛ Ɛsɔ Yehowa, pasamɩ-ŋ nɛ pɩkpaɣ nɛ pɩɖɛɛ tam tam.*
11 Oo Yehowa, ñatɩnɩ sɔsɔtʋ+ nɛ ɖoŋ+ nɛ kajʋka nɛ keɖeɣa nɛ paɣlɩka,*+ mbʋ pʋyɔɔ yɔ ñatɩnɩ mbʋ payɩ pɩwɛ ɛsɔdaa nɛ tataa yɔ.+ Oo Yehowa, ñatɩnɩ kewiyaɣ.+ Ñɛkɛnɩ Weyi ɛkʋsɩ ɛ-tɩ nɛ ɛkɛ ñʋʋdʋ pɩtɩŋa payɩ pɩ-yɔɔ yɔ.
12 Ñɔ-cɔlɔ ñɩm nɛ samtʋ palɩɣna,+ nɛ ŋtɔkɩ kewiyitu pɩtɩŋa payɩ pɩ-yɔɔ,+ nɛ ñe-nesi tɛɛ ɖoŋ+ nɛ hoɖe+ pɛwɛɛ, nɛ ñe-nesi pɩzɩɣ nɛ sɩla nɛ ɛyʋ pɩsɩ sɔsɔ+ nɛ sɩha ɛyaa kpeekpe ɖoŋ.+
13 Nɛ lɛɛlɛɛyɔ lɛ, Oo ɖɛ-Ɛsɔ, ɖɩsɛɣ-ŋ se ŋlabaɣ lɛ nɛ ɖɩsaŋ ña-hɩɖɛ nɖɩ ɖiɖe pɩdɩɩfɛyɩ yɔ.
14 «Paa mbʋ yɔ, anɩ mɛnkɛnaa nɛ man-samaɣ lɛ ŋga nɛ ɖɩpɩzɩ ɖɩla sɔɔlɩm haɖɛ ɖɩnɛ? Mbʋ pʋyɔɔ yɔ ñɔ-cɔlɔ pɩtɩŋa payɩ pɩlɩnaa, nɛ ɖɩha-ŋ mbʋ pɩlɩɣnɩ ña-maɣmaɣ ñe-nesi tɛɛ yɔ.
15 Mbʋ pʋyɔɔ yɔ ɖɩkɛ agɔma ñɛ-ɛsɩndaa nɛ caɣyaa, ɛzɩ ɖɔ-cɔzɔnaa tɩŋa yɔ.+ Mbʋ pʋyɔɔ yɔ ɖa-avema tɛtʋ yɔɔ wɛ ɛzɩ kuzotuu yɔ+—lidaʋ nakʋyʋ fɛyɩ.
16 Oo ɖɛ-Ɛsɔ Yehowa, ñɩm pʋnɛ pɩtɩŋa, mbʋ ɖɩñɔɔzaa se ɖɩmanɩ-ŋ ɖɩɣa ŋga keyeki nɛ ña-hɩɖɛ kiɖeɖeye sɛɛ yɔ, pɩlɩnɩ ña-maɣmaɣ ñe-nesi tɛɛ, nɛ pɩtɩŋa payɩ mbʋ yɔ ñatɩnɩ-pʋ.
17 Oo mɛ-Ɛsɔ, mansɩm camɩyɛ se ŋtazɩɣ laŋɩyɛ taa,+ nɛ ña-taa lakɩ leleŋ nɛ cɩŋgɩlɩm wɛtʋ.*+ Ma-laŋɩyɛ nɖɩ ɖɩtʋʋzaa yɔ* mankpaɣnɩ pʋnɛ pɩtɩŋa payɩ nɛ malabɩ-ŋ haɖɛ faaa, nɛ man-taa wɛ leleŋ siŋŋ se mana ña-samaɣ ŋga kɛwɛ cɩnɛ yɔ kɛwɛɛ nɛ kalakɩ-ŋ sɔɔlɩm haɖɛ.
18 Hayɩ Yehowa, ɖɔ-cɔzɔnaa Abraham, Izaakɩ, nɛ Izrayɛɛlɩ tɛ Ɛsɔ, yele nɛ sɔɔlɩm nɛ maɣzɩm pʋnɛ pɩwɛɛ ña-samaɣ laŋɩyɛ taa tam, nɛ ŋɖiyi ka-laŋɩyɛ nɛ ŋwoni ñɔ-yɔɔ.+
19 Nɛ ŋha man-pɩyalʋ Salomɔɔ laŋɩyɛ nɖɩ ɖɩwɛ pilim yɔ,*+ se pɩsa nɛ ɛɖɔ ña-paɣtʋ yɔɔ,+ ñɔ-tɔm kɩtɔzɩtʋ yɔɔ, nɛ ña-kpalɩtʋ yɔɔ nɛ ɛla pʋnɛ pɩtɩŋa payɩ nɛ ɛma templo* ŋgʋ mɔñɔɔzɩ ki-wondu nɛ mansɩɩ yɔ.»+
20 Nɛ Daviid heyi samaɣ kpeekpe se: «Lɛɛlɛɛyɔ lɛ, ɩsa mɩ-Ɛsɔ Yehowa.» Nɛ samaɣ taa ɛyaa kpeekpe sa pɔ-cɔzɔnaa tɛ Ɛsɔ Yehowa nɛ poluŋ nɛ papa pɛ-ɛsa nɛ tɛtʋ Yehowa nɛ wiyaʋ pɛ-ɛsɩndaa.
21 Nɛ powolo pɩ-yɔɔ nɛ palaa kɩlaŋ Yehowa nɛ palaa kɩlaŋ kɩñaɣzɩŋ+ Yehowa tɛʋ kifemuu, naŋ* abalɩñɩŋ 1 000, ɛyaŋ 1 000, heɣsi abalɩñɩnzɩ 1 000 nɛ kilizasɩ;+ pala kɩlaŋ sakɩyɛ Izrayɛɛlɩ kpeekpe yɔɔ.+
22 Powobi pɩ-yɔɔ nɛ pɔtɔkɩ nɛ pɔñɔʋ Yehowa ɛsɩndaa kɩyakʋ ŋgʋ ki-wiye nɛ amɛya siŋŋ,+ nɛ patasɩ sɩʋ Daviid pɩyalʋ Salomɔɔ wiyaʋ nabʋlɛ ɖeɖe nɛ pataa-ɩ num Yehowa ɛsɩndaa nɛ ɛkɛ ɖiyiyu,+ nɛ pataa Sadɔɔkɩ num ɖɔɖɔ nɛ ɛkɛ cɔjɔ.+
23 Nɛ Salomɔɔ caɣ Yehowa kewiyaɣ kpelaɣ yɔɔ+ nɛ ɛpɩsɩ wiyaʋ ɛ-caa Daviid lone taa, nɛ pɩtɩŋa piɖeɣaɣni-i, nɛ Izrayɛɛlɩ mba tɩŋa ñaŋaɣ-ɩ.
24 Awumbiya kpeekpe,+ sɔdɩŋ ɖoŋ tɩnaa,+ nɛ pɩkpɛndɩnɩ Wiyaʋ Daviid pɩyalaa kpeekpe+ poluzi pa-tɩ Wiyaʋ Salomɔɔ tɛɛ.
25 Nɛ Yehowa la nɛ Salomɔɔ pɩsɩ ɛyʋ sɔsɔ pɩdɩɩfɛyɩ Izrayɛɛlɩ kpeekpe ɛsɩndaa nɛ ɛha-ɩ kewiyitu paɣlɩka ŋga Izrayɛɛlɩ wiyaʋ nɔɔyʋ taawɛɛnɩ wiɖiyi pʋcɔ nɛ pɩtalɩɣnɩ-ɩ yɔ.+
26 Mbʋ Yesee pɩyalʋ Daviid tɔɔ kewiyitu Izrayɛɛlɩ kpeekpe yɔɔ,
27 nɛ pɩnzɩ* nzɩ ɛtɔɔ kewiyitu Izrayɛɛlɩ yɔɔ yɔ sɩkpɛndɩ 40. Ebrɔŋ taa lɛ, ɛtɔɔ kewiyitu pɩnzɩ 7,+ nɛ Yeruzalɛm taa lɛ, ɛtɔɔ kewiyitu pɩnzɩ 33.+
28 Nɛ ɛsɩ akpadɩyɩtʋ kɩbandʋ taa,+ ɛñɩɣzɩ wezuu kɩɖaɣlʋʋ,* ñɩm nɛ samtʋ; nɛ ɛ-pɩyalʋ Salomɔɔ pɩsɩ wiyaʋ e-lone taa.+
29 Piyele nɛ Wiyaʋ Daviid yɔɔ tɔm, kpaɣnɩ kiɖe tɛɛ nɛ piwolo tɩnaɣ yɔɔ lɛ, pama-tʋ tɔm ndʋ Samɩyɛɛlɩ weyi ɛnɩɣ natʋ taa yɔ, nayʋ Naataanɩ+ nɛ Gaadɩ+ weyi ɛnaɣ natʋ yɔ pamawa yɔ tɩ-taa,
30 pɩkpɛndɩnɩ e-kewiyitu kpeekpe tɔm, e-ɖoŋ tɔm, nɛ mbʋ mbʋ pɩɩlabɩ alɩwaatʋ ndʋ tɩ-taa nɛ pitukuuni ɛ nɛ Izrayɛɛlɩ nɛ kewiyisi nzɩ payɩ sɩɩwɛ pɩ-cɔlɔ kpɛɛɛ yɔ pɩ-tɔm.
Pɩ-tɛɛ tɔm
^ Yaa «lone ɖoŋ ñɩnɖɛ; awiya ɖɩɣa.»
^ Talaŋ kʋɖʋmʋʋ maɣnɩ ɛzɩ kilonaa 34 mbʋ yɔ (kilonaa 34,2). Cɔnɩ Tɔm kɩsɔzɩtʋ B14.
^ Yaa «liidiye ñɩɣtʋ.»
^ Ebree tɔm piye nɖɩ palabɩnɩ tʋmɩyɛ yɔ, ye pɛɖɛzɩ-ɖɩ piye piye yɔ, ɖɩwɩlɩɣ ɛzɩma paɖʋʋ ñɩɣyʋʋ miŋ taa se kiyoli nɛ palɩzɩ kɩ-azuluma nɛ kɩwɛɛ cɩɖɩ cɩɖɩ yɔ.
^ Darik kaakɛ Pɛrɩsɩ mba sika pɔɔyaɣ nakɛyɛ. Cɔnɩ Tɔm kɩsɔzɩtʋ B14.
^ Yaa «kpaɣnɩ tam tam nɛ piwolo tam tam.»
^ Yaa «ñamtʋ.»
^ Yaa «siɣsiɣ wɛtʋ.»
^ Yaa «toovenim ñɩnɖɛ.»
^ Yaa «laŋɩyɛ nɖɩ ɖɩñɔnɩ-ŋ kiya yɔ.»
^ Yaa «lone ɖoŋ ñɩnɖɛ; awiya ɖɩɣa.»
^ Naŋ weyi ɩ nɛ i-ɖoŋ nɛ ɩtɩkpadɩyɩ yɔ ɩ-tɔm pɔyɔɔdʋʋ.
^ Piye piye, «kɩyakɩŋ.»
^ Piye piye, «ɛñɩɣzɩ kɩyakɩŋ.»
