Kroniiki takayaɣ naalɛ ñɩŋga 20:1-37
20 Pʋwayɩ lɛ, Mowaabʋ mba+ nɛ Amooni mba,+ pɩkpɛndɩnɩ Amonim mba* nabɛyɛ, pɔkɔɔ se poyooni Yozafaatɩ.
2 Nɛ tɔm talɩ Yozafaatɩ se: «Samaɣ sɔsɔɔ nakɛyɛ kɔm ña-wayɩ, kalɩnɩ teŋgu* egeetiye taa, Edom+ taa, nɛ kɛwɛ Hazazɔɔnɩ-Tamaarɩ, pʋ-tɔbʋʋ se Ɛn-Gedii.»+
3 Peeɖe sɔɔndʋ kpa Yozafaatɩ, nɛ ɛɖʋ ɛ-taa* se ɛñɩnɩɣ Yehowa.+ Nɛ esusi se pɔhɔkɩ nɔɔ Yuuda kpeekpe taa.
4 Nɛ Yuuda mba kpeɣli se pɔpɔzɩ nɛ patɩlɩ Yehowa lɩmaɣza;+ palɩnɩ Yuuda tɛtʋ ndɩ ndɩ tɩŋa taa nɛ pɔkɔɔ se pɔpɔzɩ Yehowa nɛ patɩlɩ ɛ-lɩmaɣza.
5 Nɛ Yozafaatɩ kʋyɩ nɛ ɛsɩŋ Yuuda nɛ Yeruzalɛm samaɣ hɛkʋ taa, Yehowa ɖɩɣa taa, kadaɣ kɩfalaɣ ɛsɩndaa,
6 nɛ ɛyɔɔdɩ se:
«Hayɩ ɖɔ-cɔzɔnaa tɛ Ɛsɔ Yehowa, ŋtɩkɛ Ɛsɔ ɛsɔdaa yaa we?+ Pɩtɩkɛ ñɔtɔkɩnɩ kewiyitu ajɛɛ kewiyisi kpeekpe yɔɔ?+ Ñe-nesi taa ɖoŋ nɛ hoɖe pɛwɛɛ, nɛ nɔɔyʋ ɛɛpɩzɩɣ nɛ ɛkaɖɩnɩ-ŋ.+
7 Hayɩ ɖɛ-Ɛsɔ, ɛzɩ pɩtɩkɛ ñɔɖɔɔnɩnɩ ɛjaɖɛ ɖɩnɛ ɖɩ-taa mba ña-samaɣ Izrayɛɛlɩ ɛsɩndaa nɛ pʋwayɩ lɛ ŋcɛlɩ-ɖɩ ña-taabalʋ Abraham lʋlʋʋ taa mba* nɛ ɖɩkɛ pa-pʋyʋ tam?+
8 Nɛ pacaɣ ɖɩ-taa, nɛ pama-ŋ kooka kiɖeɖeɣa peeɖe se ña-hɩɖɛ ɛsɛɛ,+ nɛ pɔyɔɔdɩ se:
9 “Ye pɩlaba se asɛyʋʋ nakʋyʋ lɩ ɖɔ-yɔɔ, paa pɩtɩŋnɩ laɣɖɛ yɔɔ, tɔm hʋʋ yɔɔ, kɩzɩkʋ yɔɔ, yaa ñɔɔsɩ yɔɔ yɔ, ɖɩnɛ ɛlɛ ɖɩkaɣ sɩŋʋʋ ɖɩɣa kanɛ kɛ-ɛsɩndaa nɛ ñɛ-ɛsɩndaa (mbʋ pʋyɔɔ yɔ ña-hɩɖɛ wɛ ɖɩɣa kanɛ ka-taa)+ nɛ ɖɩya-ŋ se ŋsɩnɩ-ɖʋ ɖa-kʋñɔŋ taa; tɛtɛ ŋŋwelisaa nɛ ŋya ɖa-ñʋʋ.”+
10 Lɛɛlɛɛyɔ, Amooni mba, Mowaabʋ mba nɛ Seyiri pʋŋ egeetiye taa mba,+ mba ŋtɩha Izrayɛɛlɩ mba nʋmɔʋ se pakʋyɩ pɔ-yɔɔ alɩwaatʋ ndʋ palɩnɩ Ejipiti ɛjaɖɛ taa yɔ, mba yɔ. Izrayɛɛlɩ mba kaayebi-wɛ nɛ patɩɖɩzɩ-wɛ.+
11 Lɛɛlɛɛyɔ, pɛwɛɛ nɛ pɛhɛyɩɣ-ɖʋ kɩdɛkɛdɩm kɩbam lone taa nɛ pɔkɔŋ se pɔɖɔɔnɩ-ɖʋ ñɛ-ɛjaɖɛ nɖɩ ŋha-ɖʋ se ɖɩkɛ ɖa-ñɩm yɔ ɖɩ-taa.+
12 Hayɩ, ɖɛ-Ɛsɔ, ŋŋkaɣ-wɛ tɔm hʋnʋʋ yaa we?+ Mbʋ pʋyɔɔ yɔ ɖɩfɛyɩ ɖoŋ samaɣ sɔsɔɔ kanɛ kɛ-ɛsɩndaa, ŋga kɔkɔŋ se koyooni-ɖʋ yɔ; nɛ ɖɩɩsɩŋ mbʋ pɩwɛɛ se ɖɩla yɔ,+ ɛlɛ ña ɖɩkpazɩnɩ ɛsa.»+
13 Alɩwaatʋ ndʋ lɛ, Yuuda mba kpeekpe kaasɩŋ Yehowa ɛsɩndaa, pa nɛ pe-piya cikpesi, pa-halaa nɛ pe-piya.*
14 Nɛ Yehowa fezuu tii Yahaziyɛɛlɩ yɔɔ samaɣ hɛkʋ taa, ɛɛkɛ Zakarii pɩyalʋ, Benayaa pɩyalʋ, Yeyiyɛɛlɩ pɩyalʋ, Leevi tʋ Mataaniya weyi ɛlɩnɩ Azaafʋ lʋlʋʋ* taa yɔ ɛ-pɩyalʋ.
15 Ɛyɔɔdaa se: «Iwelisi camɩyɛ, Yuuda kpeekpe nɛ mɩ Yeruzalɛm taa mba nɛ Wiyaʋ Yozafaatɩ! Tɔm tʋnɛ Yehowa heyiɣ-mɩ: “Sɔɔndʋ ɛtaakpa-mɩ nɛ itaaseli samaɣ sɔsɔɔ kanɛ kɔ-yɔɔ, mbʋ pʋyɔɔ yɔ, pɩtɩkɛ mɩlakɩnɩ you ɛlɛ Ɛsɔ lakɩnɩ you.+
16 Cee itii pa-wayɩ. Pakaɣ tɩŋnʋʋ Ziizi nʋmɔʋ nɛ pakpa, ɩkaɣ-wɛ naʋ fɛɛʋ* tɩnaɣ yɔɔ, Yeruwɛɛlɩ kañɩmbusuu ɛsɩndaa.
17 Pɩtɩkɛ mɩkaɣnɩ you kʋnɛ labʋ. Ɩsɩŋ mi-lona taa, ɩsɩŋ ɖiɣ ɖiɣ,+ nɛ ɩna ɛzɩma Yehowa kaɣ yabʋ mɩ-ñʋʋ yɔ.*+ Oo Yuuda nɛ Yeruzalɛm, sɔɔndʋ ɛtaakpa-mɩ nɛ itaaseli.+ Cee iwolo pa-wayɩ, nɛ Yehowa kaɣ wɛʋ mɩ-cɔlɔ.”»+
18 Kpaagbaa mbʋ lɛ, Yozafaatɩ luŋ nɛ ɛpa ɛ-ɛsa nɛ tɛtʋ, nɛ Yuuda kpeekpe nɛ Yeruzalɛm mba poluŋ Yehowa ɛsɩndaa se pɛsɛɛ Yehowa.
19 Nɛ Leevi ñɩma mba paakɛ Kehaatɩ+ nɛ Kora pa-lʋlʋʋ taa mba yɔ, pakʋyɩ se pasa Izrayɛɛlɩ tɛ Ɛsɔ Yehowa nɛ nɔɔ kɩkʋyaɣ siŋŋ.+
20 Pakʋyɩ tɛʋ kifemuu tanaŋ tɛɛ cu nɛ powolo Tekowa+ kañɩmbusuu taa. Palɩɣaɣ lɛ, Yozafaatɩ kʋyɩ ɛsɩŋ nɛ ɛyɔɔdɩ se: «Oo Yuuda nɛ mɩ Yeruzalɛm mba, iwelisini-m! Ɩwɛɛnɩ tisuu mɩ-Ɛsɔ Yehowa yɔɔ nɛ piyele nɛ ɩpɩzɩ ɩɖɔkɩ kpam. Ɩwɛɛnɩ tisuu ɛ-nayaa yɔɔ,+ nɛ pɩkaɣ-mɩ ɖenuu.»
21 Ɛ nɛ samaɣ pacaɣaa nɛ pala lɩmaɣza nɛ pɩtɛ lɛ, ɛlɩzɩ abalaa nabɛyɛ se peteɣ hendu+ nɛ pasaŋ Yehowa. Pakaɣ suu wondu kiɖeɖetu nɛ palɩɩ nɛ pɛwɛɛ sɔɔjanaa ɛsɩndaa nɛ peteɣ hendu se: «Ɩsɛɛ Yehowa se ɛlabaɣ lɛ, mbʋ pʋyɔɔ yɔ ɛ-sɔɔlɩm siɣsiɣ ñɩmbʋ wɛ tam.»+
22 Papaɣzɩ teu samtʋ hendu nɛ taa leleŋ lɛ, Yehowa ñɩ kpaca Amooni mba, Mowaabʋ mba nɛ Seyiri pʋŋ egeetiye taa ñɩma mba paakɔm Yuuda wayɩ yɔ, nɛ pakʋ ɖama.+
23 Nɛ Amooni mba nɛ Mowaabʋ mba papɩsɩnɩ Seyiri pʋŋ egeetiye+ taa ñɩma yɔɔ se paɖɩzɩ-wɛ nɛ pɔtɔyɩtɩ-wɛ; nɛ pɛtɛm Seyiri mba kʋʋ lɛ, pasʋʋ ɖama kʋʋ yɔɔ.+
24 Ɛlɛ Yuuda mba talɩ feŋuu tilimiye nɖɩ ɖɩwɛ kañɩmbusuu+ taa yɔ ɖɩ-taa nɛ pɔcɔnɩnɩ samaɣ yɔɔ kiŋ lɛ, pana peeɖe po-tomnasɩ, sɩpɛɛtɩ tataa;+ pɩtɩkazɩ nɔɔyʋ nɛ ɛ-ɛsa.
25 Peeɖe Yozafaatɩ nɛ ɛ-ɛyaa powoba nɛ palazɩ po-wondu. Nɛ pana pɔ-cɔlɔ wondu sakɩyɛ, wondu kususutu, nɛ wondu ndʋ tɩmʋ ñɩm yɔ. Pakpaɣ-tʋ se tɩpɩsɩ pa-ñɩndʋ nɛ pɩkɔɔ pɩsɩɩnɩ alɩwaatʋ ndʋ paapɩzɩɣ se patasɩ nabʋyʋ kpaɣʋ yɔ.+ Wondu ndʋ tɩ-kpaɣʋ kpaɣ-wɛ kɩyakɩŋ 3, mbʋ pʋyɔɔ yɔ tɩɩɖɔ sakɩyɛ.
26 Kɩyakʋ 4 ñɩŋgʋ wiye lɛ, pekpeɣli Beraka Fɛɛʋ* taa, mbʋ pʋyɔɔ yɔ peeɖe pasam* Yehowa. Pʋyɔɔ paya lone nɖɩ se Beraka* Fɛɛʋ+ halɩ nɛ sɔnɔ.
27 Pʋwayɩ lɛ, Yuuda nɛ Yeruzalɛm mba kpeekpe nɛ Yozafaatɩ weyi eɖiyaɣ-wɛ yɔ papɩsɩ Yeruzalɛm nɛ amɛya. Yehowa kaayeba nɛ pɛwɛɛ laŋhʋlʋmɩyɛ taa, mbʋ pʋyɔɔ yɔ eeyeba nɛ pawa po-koyindinaa.+
28 Nɛ pasʋʋ Yeruzalɛm taa nɛ cɩmʋʋ wondu ndʋ tɩ-yɔɔ wɛ nimasɩ yɔ, cɩmɩŋ,+ nɛ aganda+ nɛ powolo Yehowa ɖɩɣa taa.+
29 Nɛ Ɛsɔ yele nɛ sɔɔndʋ sɔsɔtʋ kpa ajɛɛ kewiyisi tɩŋa alɩwaatʋ ndʋ sɩnɩwa se Yehowa yoni Izrayɛɛlɩ koyindinaa yɔ.+
30 Nɛ nabʋyʋ taacɛyɩɣ Yozafaatɩ kewiyaɣ, nɛ ɛ-Ɛsɔ wɛɛ nɛ ɛhaɣ-ɩ hɛzɩyɛ hɔɔlɩŋ kpeekpe yɔɔ.+
31 Nɛ Yozafaatɩ wɛɛ nɛ ɛtɔkɩ kewiyitu Yuuda yɔɔ. Ɛɛwɛnɩ pɩnzɩ 35 alɩwaatʋ ndʋ ɛpɩsɩ wiyaʋ yɔ, nɛ ɛtɔɔ kewiyitu pɩnzɩ 25 Yeruzalɛm. Payaɣaɣ e-ɖoo se Azuba, Silii pɛlɛ.+
32 Ewobi pɩ-yɔɔ nɛ ɛɖɔŋ ɛ-caa Aazaa nʋmɔʋ taa.+ Etiyebi-kʋ nɛ ɛkɛɛnɩ hɔɔlʋʋ, nɛ ɛlabɩ mbʋ pɩtʋʋzɩ Yehowa ɛsɩndaa yɔ.+
33 Paa mbʋ yɔ, patɩyɔkɩ lona kʋkʋya,+ nɛ samaɣ taañɔɔzɩtɩ ka-laŋɩyɛ se kañɩnɩ kɔ-cɔzɔnaa tɛ Ɛsɔ.+
34 Piyele nɛ Yozafaatɩ yɔɔ tɔm ndʋ pɩkazaa yɔ, kpaɣnɩ kiɖe tɛɛ nɛ piwolo tɩnaɣ yɔɔ, pama-tʋ tɔm ndʋ Ananii+ pɩyalʋ Yehu+ mawa, nɛ tɩwɛɛ Izrayɛɛlɩ Awiya Takayaɣ taa yɔ tɩ-taa.
35 Pʋwayɩ lɛ, Yuuda wiyaʋ Yozafaatɩ ɖʋ ɛgbɛyɛ nɛ Izrayɛɛlɩ wiyaʋ Okoziyaasɩ, weyi ɛlakaɣ kañatʋ lakasɩ yɔ.+
36 Nɛ ɛ nɛ ɩ paɖʋ taabalɩyɛ se pala mɛlɛnaa nɛ powolo Tarɩsiisi,+ nɛ pala mɛlɛnaa Eziyɔnɩ-Gebɛɛrɩ.+
37 Ɛlɛ, Maresa tʋ Dodavawu pɩyalʋ Eliyeezɛɛrɩ yɔɔdɩ natʋ tɔm Yozafaatɩ yɔɔ nɛ ɛtɔ se: «Ŋɖʋ ɛgbɛyɛ nɛ Okoziyaasɩ; pʋyɔɔ lɛ, Yehowa kaɣ wɛɛkʋʋ ña-tʋma.»+ Piyeba nɛ mɛlɛnaa yɔkɩ,+ nɛ patɩpɩzɩ nɛ powolo Tarɩsiisi.
Pɩ-tɛɛ tɔm
^ Pɩpɩzɩɣ pɩkɛ, «Mewuni mba.»
^ Pɩtʋʋ fɛyɩ se Teŋgu Kɩsɩbʋʋ.
^ Piye piye, «nɛ ɛpa ɛ-ɛsa.»
^ Piye piye, «ɖomaɣ.»
^ Piye piye, «pa-pɩyalaa.»
^ Piye piye, «pɩyalaa.»
^ Yaa «lemeɣa.»
^ Yaa «nɛ ɩna Yehowa ñʋʋ yabʋ mɩ-hɔɔlʋʋ taa.»
^ Yaa «Kɛdɛɛŋa.»
^ Piye piye, «pawazɩ.»
^ Pʋ-tɔbʋʋ se «Wazaɣ.»
