Nda ka zwaligwa ne ku kudzigwa mu dzi-suburb dze Roma, mu ndawo i no gala bashayi. Buchilo gwa ka be gwa ka sima. Nda ka be ndi si nga zibe mme, ngono nda ka be ndi si nga hwanane na tate. Nda ka kula ndi chila buchilo gu no chigwa ne bana be zwi-street.

Mu chibaka cha nda ka be nda chi be ne makole a li 10, nda ka be nda chi tangisa ku kwiba. Nda ka ti ndi na makole a li 12, a tizha mu nzi. Mu zwibaka zwinjinji, tate ba ka be be ndi tola ku dziofisi dze maphorisa be ndi yesa ku nzi. Nda ka be ndi gala ndi nganga ne bathu​—nda ka be ndi da nghwa, ndi li zhele bushongola mu nngwe ne nngwe. Nda ka ti ndi na makole a li 14, ndi ka tizha mu nzi, ndi tizhila chose. Nda ka tangisa ku shingisa dzi-drug ne ku gala mu zwi-street. Ne kuti kwa ka be ku si na kwa ndi no yezela, nda ka be ndi so khwanya koloi ndi yezela mu ili ku swikilila mangwanana. Ndi be ndi shaka pa ndi nga bona vula kuti ndi ngule.

Nda ka be mbava ya ka kona​—nda ka be ndi kwiba chingwe ne chingwe, ndi phamola dzibeke dze bathu ndi khwanya ngumba dze bathu busiku. Nda ka tangisa ku zigwa ne mikhwa i sa ka lulwama, ngono kwa ka ti ku sathu ku ka noti ngayi a be nngwe we mbunga wa ka bipa, wa ka ndi “diya” kuti ndi chi kwiba ne mu dzibanka. Ne kuti nda ka be ndi na bushongola kwazo, be mbunga wedu ba ka be ndi tolela pezhugwi. Kwa ka be ku sina pa ndi no yenda ndi sa ka bata thobolo; dumbu nda ka be ndi yezela nda ka i longa kusi kwe nsazamilo. Ku da nghwa, ku shingisa dzi-drug, ku kwiba, ndebo i sa ka lulwama, ne mazwibato a sa ka lulwama, ya ka be ya chi be igo buchilo gwangu. Nda ka be ndi gala ndi shakiwa ne maphorisa. Nda ka bakhwa kanjinji, ngono nda ka be ndi gala ndi ngina mu toronko ndi buda.

Mu chibaka chingwe nda ka ti nda buda mu toronko, ndi ka kumba manini bangu. Nda ka be ndi si nga zibe kuti manini bangu ne dzi-cousin dzangu mbili, ba ka be ba chi be Bafakazi ba Jehova. Ba ka ndi koka ku zwidiyo zwe Bafakazi. Ne ku shaka ku ziba kuti ba no dumani, nda ka yenda nabo. Ta ka ti ti li ku Holo ye Bushe a gala pa nkoba, kuti ndi bone ba no ngina ne ba no buda. Nda ka be ndi na thobolo.

Zwidiyo izwezwi zwa ka shandula buchilo gwangu. Nda ka zwihwa u nga ti ha ndi chi mu shango iyeyi. Nda ka lebesiwa ne bathu ba na buthu, kakale be seka nami. Ndi cha kumbula zila ya ka naka Bafakazi ya ba ka ndi tola na yo. Ikoko ya ka be i li zila i no leyana kwazo ne buchilo gwa nda ka be ndi chila!

Nda ka tangisa ku zwidiya Baibili ne Bafakazi. Nda ka ti ndi dwilila ndi zwidiya, ndi ka bona kuti nda ka fanila shandula buchilo gwangu ne zila ya ka pelela. Nda ka hwisisa matama a mu na Zwiani 13:20: “Iye unoyenda ne bathu bakatjenjela unotjenjelabo, koga nkwinya we zwilengwe unowongina mu mbatsha.” Nda ka bona kuti nda ka fanila thubukana ne mbunga iwoyo. Kwa ka be ku si ku lelu, ngono ne batsho ya Jehova, a khona.

Nda ka thama kuti ndi lingike zwibuyanana. Nda ka gwisa dumbu, a khona ku lasha fojo ne ku shingisa dzi-drug. Nda ka kera nsholo, a dusa manyina, ne ku misa ku shingisa ndebo i sa ka lulwama. Nda ka tangisa ku lawula buchilo gwangu, i li gwe kutanga.

Ha ndi zo be ndi li nthu u no da ku bala ne ku zwidiya, ngono kwa ka be kwa ka ndi simila ku zwidiya Baibili. Ne kwa ka jalo thambo dza nda ka tola dza ka thama kuti ndi de Jehova, ngono ku ka be ne chingwe cha ka ndi kutha moyo​—ngono chikumbuludzi chi ka tangisa ku ndi tshwenya. Ngono mu zwibaka zwingwe nda ka be ndi zwisekesa, ngono ndi zwibuzwa kuti a Jehova u nowo ndi zwibatigwa zwithu zose zwa ka bipa zwa nda ka thama. Mu chibaka ichecho nda ka nyaladziwa ne ku bala se kwa Jehova a ka zwibatigwa She Dafite, shule kwe kuti a thame dziphoso njinji.​—2 Samuele 11:1–12:13.

Chingwe cha ka be cha ka ndi simila ya ka be i li ku rerela bathu. (Matewu 28:19, 20) Nda ka be ndi tshusiwa ne kuti ndowo shangana ne nngwe wa nda ka thamila zwithu zwi sa ka lulwama mu chibaka cha ka pinda! Ngono mu ku yenda kwe chibaka ku tshuga kwangu ku ka tapudzika. Nda ka tangisa ku shathila ku batsha bathu ku zwidiya ne kwa Tate bedu ba kudzimu ba no zwibatigwa kwa ka pelela.

Ku zwidiya ne kwa Jehova kwa ka ndi chidza! Bunji gwe ba ka be ba li bakhwinya bangu ba ka fa, bangwe ba mu dzitoronko, ngono ndo chila buchilo gu no shathisa ne ku be ne thembo ye buchilo gu no zha. Nda ka zwidiya ku zwiyesa pasi ne ku be nthu u no hwa ne ku lawula mazwiwo angu e bushongola. Kwa ka pelela ne kuti ndi shathile ku chila zwibuyanana ne bathu ba nda ka bakisana nabo. Ndo shathila ku be nda ka lobola nkadzi u na buthu, Carmen. To shathila ku batsha bathu ku zwidiya Baibili.

Ngwenu, ndo shathila ku shinga nshingo wa ka lulwama​—mu chibaka chingwe ndo shingila ku dzibanka, ngono mu bumo gwe ku dzi kwibila, ndo dzi cleana koga!