Kumbula tate be lebeleka ne nkololo wabo u na makole a li 7. Be ti, “Ntolo, ntolo, Ndzimu wa ka bumba shango ne chingwe ne chingwe chi mu ili, e be e bumba zhuba, mmwedzi, ne nyenyedzi.” Mbisana u no alakanila khani iyeyi e be e buzwa eti, “Tate, ndiyani wa ka bumba Ndzimu?”

“Ha kuna wa ka bumba Ndzimu,” ba ka ndabila. “Chinga kwa a ka be po.” Dabilo iyeyo ndelu i ka n’gadzikanya moyo mu chibaka ichecho. Ha e dwilila e kula, ne kwa ka jalo, buzo i ka dwilila i ndziyidza. Ko nsimila ku hwisisa kuti apa ku nga khoneka kuti nthu ku be ku sina pa a ka tangisa. Dumbu, ne lubumbo kuna pa gwa ka tangisa. ‘Ndzimu wa ka dwa ngayi?’ u no zwibuzwa.

Baibili i no tini? Se kwa ku fanila, ne zila i no fanana koga se kwa tate ba ka thama mu chibaka chedu. Mushe wa ka kwala eti: “Imwi Jehova, . . . kwa kati matombo a sathu ka be yapo kene mu sathu mu ka bumba shango kene lubumbo, ku dwa mu tjibaka tji singa pele ku no ti mu tjibaka tji singa pele, mu Ndzimu.” (Pisalema 90:1, 2) Ne zila i no fanana, mporofiti Izaya wa ka leba eti: “Apa a mu zo bona? Kene a mu zo hwa? Jehova, mbumbi we phelelo dze shango, Ndzimu ku singa pele”! (Izaya 40:28) Ne zila i no fanana, likwalo gwa Jude gu kati Ndzimu wa ka be po “ne nge ku singa pele.”​—Jude 25.

Hwalo dzo ti lakidza kuti Ndzimu “l She nge ku singa pele,” se kwa mpostolo Paulo e chenesa. (1 Timoti 1:17) Ichecho cho dwa kuti chinga Ndzimu kwa a ka be po, nenguba ti nga lingila shule ku ngapani. Kakale u nowo be po ne ku singa pele. (Zumbunulo 1:8) Ndizo, ku singa pele kukwe ili chilakidzilo che u na Masimbawose.

Ini nkumbulo iwoyu wa ka ti simila ku u hwisisa? Ne kuti buchilo gwedu gu futshwanana go ti pa nkumbulo wa ka leyana kwazo ne se kwa Jehova e linga chibaka. Ne kuti Ndzimu nde we ku singa pele, mu nli makole a li 1 000 a no nga zhuba li ngompela. (2 Pita 3:8) Ku lakidzila: apa bombo li no chila mazhuba a li 50 koga, li nga hwisisa bulefu gwe buchilo gwe nthu, gwe makole a li 70 kene 80? Ha ku zo jalo! Ngono, Baibili i no chenesa kuti to nga mapombo ha ti fanidzanyiwa ne Mbumbi wedu Nkulu. Ne ku hwisisa zwithu kwedu ko pindiwa kwazo ne kukwe. (Izaya 40:22; 55:8, 9) Ndizo ku singa chenamise kuti Jehova a be a na zwimo zwingwe zwa ti si nga ke ti ka hwisisa.

Nenguba nkumbulo we Ndzimu we ku singa pele wa ka sima ku u hwisisa, to khona bona kuti u no hwika. Ha ili kuti ku na wa ka bumba Ndzimu, ndiye u nga be a li mbumbi. Ngono, se kwa Baibili i chenesa, Jehova ndiye wa ka “bumba zwithu zose.” (Zumbunulo 4:11) Pezhugwi kwa ikoko, to ziba kuti lubumbo gwa ka tongo be gu sipo. (Genesisi 1:1, 2) Gwa ka dwa ngayi? Mbumbi wago wa ka fanila a ka be po gu sathu gu ka be po. Kakale wa ka be po ku sathu ku ka be ne zwichili zwa ka chenjela, zwi nonga nkololo uwe u yega ne baen’gele. (Jobe 38:4, 7; Bakolosa 1:15) Ku pachena, kuti, wa ka be po a li yega gwe kutanga. Ha kuna se kwa a nga be a ka bumbiwa; a kuna cha ka be chili po chi nga be cha ka mbumba.

Ku be po kwedu ne kwe lubumbo gose ko lakidza kuti kuna Ndzimu we ku singa pele. Iye wa ka thama kuti lubumbo gose gu zwiyendise, Iye wa ka thama milayo i no gu lawula, wa ka fanila ku be a ka gala a li po. Ndiye koga u nga be a ka femela buchilo mu chingwe ne chingwe.—Jobe 33:4.