•  Komentárius pa kumesa runion 2

•  Tizorus di Palavra di Deus 3-5

  •  Diskursu 3

  •  Jóias ki sta na Bíblia 4

  •  Leitura di Bíblia 5

•  Faze bu midjór na pregason 6-14

  •  Kumesa ta pâpia ku pesoas 7

  •  Faze revizitas 8

  •  Faze disiplus 9

  •  Splika bus krénsa 10

  •  Diskursu 11

  •  Asuntu 12

  •  Senáriu 13

  •  Uza vídius i publikasons 14

•  Vive sima un kriston 15-16

  •  Studu di Bíblia na kongregason 16

•  Komentárius pa tirmina runion 17

•  Ilojiu i konsedju 18

•  Ténpu 19

•  Vizita di enkaregadu di grupu di kongregason 20

•  Simana di asenbleia ô di kongrésu 21

•  Simana di Komemorason 22

•  Enkaregadu di runion Vida i pregason 23

•  Prizidenti di runion Vida i pregason 24

•  Irmon ki ta djuda na da konsedju 25

•  Otus sala 26

•  Vídius 27

1. Kes orientason na kel dukumentu li ta ben djuda tudu kes algen ki ten diziginason na runion Nos vida i nos trabadju di pregason. Antis di es pripara ses diziginason es debe djobe kes orientason ki sta na Folhetu di ­studu pa runion Nos vida i nos trabadju di pregason i tanbê na kel dukumentu li. Tudu publikador debe konvidadu pa da nómi pa faze diziginason di studanti. Otus algen ki ta sisti runion sénpri, tanbê pode faze diziginason si es ta konkorda ku kuzas ki Bíblia ta inxina i si es ta vive sima es prende na Bíblia. Si un algen krê faze diziginason má inda el é ka publikador, Enkaregadu di runion Vida i Pregason debe pâpia ku el pa djobe si el sta kualifikadu. El ta pâpia ku el djuntu ku kel algen ki ta studa Bíblia ku el (ô djuntu ku se pai ô se mai ki é Tistimunha di Jeová). Kes kualifikason pa faze diziginason é kes mésmu ki un algen meste ten pa ser publikador. — od-TPO kap. 8 par. 8.

2. Un minutu. Tudu simana, dipôs di kántiku i orason, prizidenti di runion Vida i pregason ta poi algen ku vontadi di obi kuzê ki sta ta ba papiadu na runion. Prizidenti debe distaka kes pontu ki más ta djuda kongregason.

 3. Diskursu: 10 minutu. Folhetu di studu pa runion Vida i pregason ten téma i dôs ô três pontu prinsipal di diskursu. Un ansion ô un ajudanti di kongregason kualifikadu debe faze kel diskursu li. Óras ki prugrama di leitura di Bíblia di simana ta kumesa ku un livru novu di Bíblia, ta mostradu un vídiu ku informasons sobri el. Kel irmon ki sta faze diskursu pode mostra kuzê ki vídiu ten aver ku téma. Má, el debe pâpia di kes pontu ki sta na folhetu di studu pa runion. Tanbê, konfórmi ténpu da, el debe uza dretu kes dizenhu ô fotus ki priparadu pa djuda kubri matéria. El pode uza otus matéria ki pode djuda-l dizenvolve kel asuntu.

 4. Jóias ki sta na Bíblia: 10 minutu. Kel-li é un párti ku perguntas i respóstas sen intruduson nen konkluzon. Un ansion ô un ajudanti di kongregason kualifikadu debe faze kel párti li. Kel irmon ki sta faze kel párti li debe faze kes dôs pergunta. Tanbê el pode disidi si meste lé ô nau tudu kes versíklu ki sta na kes dôs primeru pergunta. Kes algen ki sta responde debe da komentáriu di 30 sugundu ô ménus.

 5. Leitura di Bíblia: 4 minutu. É un ómi ki debe faze kel diziginason di studanti li. El debe lé kel párti di Bíblia sen faze intruduson nen konkluzon. Prizidenti di runion debe djuda kes studanti lé sima sta skrebedu, di manera ki algen ta intende, sen tranka, distaka palavras i frazis ki ta djuda algen intende más faxi, faze mudansa di vós, uza pauza dretu i lé sima na un konbérsu normal. Dja ki alguns diziginason di leitura di Bíblia é más kunpridu i otus é más kurtu, enkaregadu di runion Vida i pregason debe pensa na kapasidadi di kada studanti óras ki el ta da diziginason.

6. 15 minutu. Kel párti di runion li priparadu pa da tudu algen xansi di trena pa pregason, i midjora ses manera di pâpia, di prega i di inxina. Si ten nisisidadi, ansions pode resebe diziginason di studanti tanbê. Kada studanti debe aplika na se diziginason kel pontu ki sta na bruxura Lé i Inxina ô na bruxura Amor ta djuda. Kel pontu ta sta déntu paréntize, djuntu ku kel diziginason, na Folhetu di studu pa runion Vida i pregason. Alvês, pode ten un párti na prugrama ku diskursu i komentárius di kes algen ki sta sisti. Un ansion ô un ajudanti di kongregason kualifikadu debe faze kel párti li. — Djobe  parágrafu 15 sobri modi ki ta fazedu kes párti ki ten diskursu i komentárius di kes algen ki sta sisti.

 7. Kumesa ta pâpia ku pesoas: Un studanti ki é ómi ô un ki é mudjer pode faze kel diziginason li. Si kel studanti é ómi, se ajudanti debe ser un ómi ô un algen di se família. Má si el é mudjer, se ajudanti debe ser un mudjer ô un algen di se família. Studanti i ajudanti pode fika xintadu ô di pé. — Pa más informason sobri asuntu i senáriu di kel tipu di diziginason li, djobe  parágrafus 12 i  13.

 8. Faze revizitas: Un studanti ki é ómi ô ki é mudjer pode faze kel diziginason li. Si kel studanti é ómi, se ajudanti debe ser un ómi. Má si el é mudjer, se ajudanti debe ser un mudjer. (km-T 5/97 p. 3) Studanti i ajudanti pode fika xintadu ô di pé. ­Studanti debe mostra kuzê ki ta fladu óras ki ta fazedu un revizita. — Pa más informason sobri asuntu i senáriu di kel tipu di diziginason li, djobe  parágrafus 12 i  13.

 9. Faze disiplus: Un studanti ki é ómi ô ki é mudjer pode faze kel diziginason li. Si kel studanti é ómi, se ajudanti debe ser un ómi. Má si el é mudjer, se ajudanti debe ser un mudjer. (km-T 5/97 p. 3) Studanti i ajudanti pode fika xintadu ô di pé. Kel diziginason li debe mostra un párti di un studu di Bíblia ki sta fazedu manenti. El ka meste ten intruduson nen konkluzon, sô si studanti sta trabadja un di kes pontu li. Enbóra pode ledu tudu matéria diziginadu ku vós altu, é ka obrigadu faze kel-la.

 10. Splika bus krénsa: Óras ki kel diziginason li é un diskursu, un studanti ki é ómi ki debe faze-l. I óras ki é un dimonstrason, un studanti ki é ómi ô ki é mudjer pode faze-l. Si kel studanti é ómi, se ajudanti debe ser un ómi ô un algen di se família. Má si el é mudjer, se ajudanti debe ser un mudjer ô un algen di se família. Ku bazi na kel matéria di se diziginason, kel studanti debe responde kel pergunta ki sta na téma di manera klaru, má ku jetu. Kel studanti ta disidi si el ta fla ô nau na ki publikason ki kel matéria sta.

 11. Diskursu: Un studanti ki é ómi debe faze kel diziginason li. El debe faze un diskursu pa kongregason. Óras ki diskursu ten bazi na Apéndisi 1 di bruxura Amor ta djuda, el debe mostra modi ki kes testu di Bíblia pode uzadu na pregason. Pur izénplu, el pode splika na ki situason ki nu pode uza kel testu, kuzê ki kel testu krê fla i modi ki nu pode rasusina ku un algen ku bazi na kel testu. Óras ki diskursu ten bazi na un pontu di un di kes lison di bruxura Amor ta djuda, kel studanti debe mostra modi ki el pode aplika kel pontu na pregason. El pode distaka kel izénplu ki sta na pontu 1 di kel lison ô distaka kalker un di kes otu versíklu ki sta na lison, si el atxa ma es ta djuda.

   12. Asuntu: Kes informason ki sta na kel parágrafu li i na kes otu ki ta ben dipôs di el, ta aplika na kes diziginason “Kumesa ta pâpia ku pesoas” i “Faze revizitas”. Si ka dadu otu orientason, kel studanti debe sforsa pa mostra kel algen ki el sta pâpia ku el un verdadi sinplis di Bíblia ki ta interesa-l. Tanbê el debe dexa un asuntu pa es pâpia di el na revizita. Kel studanti debe pâpia di un asuntu ki ta interesa pesoas na lugar ki el ta mora. El pode skodje oferese un publikason ô mostra un di kes vídiu ki sta na nos Feraméntas Prinsipal pa Inxina. Envês di dikora un aprizentason, studanti debe trena pa el konsigi pâpia di manera natural i mostra interesi na kel algen.

   13. Senáriu: Kel studanti debe uza kel senáriu ki el dadu di manera ki ta konbina ku un situason na lugar ki el ta mora. Pur izénplu:

1.  (1) Kaza en kaza: Kel senáriu li ta inklui pregason di kaza en kaza, ki pode ser pâpia ku un algen ki bu sta djuntu ku el, pâpia pa tilifóni ô pa karta. Tanbê pode ser un revizita ku un algen ki bu pâpia ku el na pregason di kaza en kaza.

2.  (2) Tistimunhu informal: Kel senáriu li ta mostra un algen ta pruveta un konbérsu normal pa da tistimunhu. El pode inklui mostra un testu di Bíblia pa un algen na trabadju, na skóla, un vizinhu, na transpórti públiku ô na kalker otu lugar ki un algen ta faze kes atividadi di dia-dia.

3.  (3) Tistimunhu na públiku: Kel senáriu li ta inklui tistimunhu ku karinhu, pâpia ku pesoas na ses lugar di nogósiu, na rua, na prasas, na lugar di para karu ô na kalker otu lugar ki pesoas ta sta.

 14. Uza vídius i publikasons: Konfórmi situason, un studanti pode disidi uza un vídiu ô un publikason. Si diziginason di kel studanti ta inklui un vídiu ô si el disidi uza un vídiu, el debe pâpia di kel vídiu, má el ka debe mostra-l.

15. Dipôs di kántiku, ten un párti di 15 minutu, ki ten un ô dôs párti ki ta djuda ken ki sta ta sisti aplika Palavra di Deus na ses vida. Si ka dadu otu instruson, ansions ô ajudantis di kongregason kualifikadu debe faze kes párti li. Sô ansions ki debe faze párti asuntus pa djuda kongregason. Óras ki un párti é un diskursu i komentárius di ken ki sta sisti, kel irmon ki sta faze kel párti pode faze otus perguntas duránti kel párti, di fóra kes ki sta na folhetu. El debe faze un intruduson pikinoti, asi pa el pode ten ténpu di kubri tudu kes pontu inportanti di kel párti i tanbê pa kes algen ki sta sisti pode partisipa. Si kel párti ten entrivista, si ta da, é midjór pa kel algen ki ten entrivista bai pa palku envês di el responde di se lugar.

  16. Studu di Bíblia na kongregason: 30 minutu. Un ansion kualifkadu debe faze kel párti li. (Na undi ki ten poku ansions, si mestedu pode uzadu ajudantis di kongregason ki sta kualifikadu.) Grupu di ansions debe disidi kenha ki sta kualifikadu pa faze Studu di Bíblia na kongregason. Kes ki skodjedu debe aprizenta matéria di manera klaru, kontrola ténpu dretu, distaka testus prinsipal i djuda tudu algen intende modi ki kel informason ta djuda-s na ses vida. Kes irmon ki aprovadu pode djobe kes orientason sobri modi ki ta fazedu kes párti ki ten perguntas i respóstas, asi pa es pode kuida midjór di ses diziginason. (w23.04 p. 24, kuadru) Si dja papiadu dretu di matéria pa kel simana, ka meste ranja más informason ô perguntas pa pode dura más ténpu. Si ta da, na kada simana debe uzadu un irmon diferenti pa faze Studu di Bíblia na kongregason i otu pa lé. Si prizidenti di runion Vida i pregason da orientason pa studu fika más kurtu, ken ki sta faze studu ta disidi modi ki el ta faze-l. El pode disidi ka lé alguns parágrafu.

17. 3 minutu. Prizidenti di runion Vida i pregason ta faze un rezumu di pontus di runion ki pode djuda txeu. Tanbê el debe pâpia di runion di otu simana. Si ténpu da, el pode fla nómi di kes studanti ki ten diziginason na otu simana. Si ka dadu otu instruson, prizidenti debe faze kalker avizu i lé kalker karta ki meste na komentárius pa tirmina runion. Otus informason sima prugrama normal pa pregason i pa linpéza, ka debe avizadu di tribuna, má debe podu na kuadru di avizus. Kes três minutu di komentáriu pa tirmina runion pode ka txiga pa da tudu avizu ki mestedu ô lé tudu karta. Si kel-la kontise, prizidenti pode pidi kes irmon ki ten párti na Vive sima un kriston pa faze ses párti na ménus ténpu. (Djobe  parágrafus 16 i  19.) Runion ta tirmina ku kántiku i orason.

18. Dipôs di kada diziginason di studanti, prizidenti di runion Vida i pregason ten más ô ménus un minutu pa da ilojiu i konsedju ku bazi na kel pontu ki el diziginadu. Prizidenti ka debe fla kel pontu ki studanti sta trabadja antis di diziginason. Má el pode pâpia di el dipôs di diziginason di studanti i dipôs ki el da-l alguns ilojiu. El debe fla pamodi ki studanti faze kel pontu dretu ô splika ku bondadi pamodi ki studanti debe torna trabadja na kel pontu i modi ki el pode faze kel-la. Tanbê prizidenti pode pâpia di otus kuza ki kontise na diziginason si el ta atxa ma kel-la ta djuda studanti ô ken ki sta sisti. El pode da studanti más konsedju sobri kel pontu ki el sta trabadja na el ô sobri otu pontu, ku bazi na bruxura Amor ta djuda, na bruxura Lé i inxina ô na livru Escola do Ministério. Má el debe faze-l apárti, ­dipôs di runion ô na otu óra. — Pa más informason sobri kuzê ki prizidenti di runion Vida i pregason i irmon ki ta djuda na da konsedju debe faze, djobe ­ parágrafus 19,  24 i  25.

19. Ninhun párti ka debe pasa ténpu, nen komentárius di prizidenti di runion Vida i pregason. Enbóra Folhetu di studu pa runion Vida i pregason ta fla kantu ténpu ki kada párti debe dura, si un algen konsigi splika kel matéria dretu na ménus ténpu, el ka meste tenta stika se diziginason sô pa el kubri kel ténpu ki sta na folhetu. Si un párti di runion pasa di ténpu, prizidenti di runion Vida i pregason ô kel irmon ki ta djuda na da konsedju debe pâpia ku kel algen apárti. (Djobe  parágrafus 24 i  25.) Runion interu, ku kántiku i orason debe dura 1 óra i 45 minutu.

20. Óras ki kongregason ten vizita di enkaregadu di grupu, runion debe fazedu sima sta na ­Folhetu di studu pa runion Vida i pregason, ménus kes kuza li: Studu di Bíblia na kongregason, na párti Vive sima un kriston, ta trokadu pa un diskursu di sirvisu di 30 minutu ki enkaregadu di ­grupu ta faze. Antis di kel diskursu, prizidenti di runion Vida i pregason ta faze un rezumu di runion, el ta fla alguns asuntu di runion di otu simana, el ta faze kalker avizu, el ta lé kalker karta ki meste, dipôs el ta fla téma di diskursu i konvida enkaregadu di grupu pa bai tribuna. Dipôs di diskursu, enkaregadu di grupu ta tirmina runion ku un kántiku ki el skodje. El pode konvida otu irmon pa faze orason. Ka debe fazedu ninhun párti di studanti na língua di kongregason na kes otu sala na simana di vizita. Un grupu pode ten se runion, mésmu ki enkaregadu di grupu sta ta vizita kel kongregason ki ta kuida di kel grupu. Má grupu debe sisti diskursu di enkaregadu di grupu djuntu ku kongregason ki ta kuida di el.

21. Ka ten runion na simana di asenbleia ô di kongrésu. Kongregason debe lenbradu ma tudu algen debe studa kel matéria di runion di kel simana, el sô ô na família.

22. Óras ki Komemorason ta kai na dia di simana ka ta ten runion Vida i pregason.

23. Grupu di ansions debe skodje un ansion pa ser enkaregadu di runion Vida i pregason. El é responsável pa garanti ma es runion sta ben organizadu i ma ta sigidu kes instruson li. Tanbê el debe mante un bon kumunikason ku irmon ki ta djuda na da konsedju. Lógu ki Folhetu di runion Vida i pregason di kel mês sai, enkaregadu di runion Vida i pregason debe faze tudu kes diziginason di runion na meiu di simana pa dôs mês. Kel-li ta inklui kes diziginason di studantis, kes ki é ka pa studantis i tanbê diziginason di kenha ki ta ser prizidenti na kada runion na meiu di simana. Grupu di ansions ta aprova kes irmon ki pode ser prizidenti na runion na meiu di simana. (Djobe  parágrafus 3-16 i  24.) Óras ki el ta skodje kes algen pa faze diziginason di studanti, el debe djobe kantu anu ki es ten, kal ki é ses spiriénsia i si es ta sta avontádi pa pâpia sobri kel asuntu di diziginason. El debe pensa na kes mésmu kuza li óras ki el ta dizigina algen pa kes otu párti di runion. Kada diziginason debe dadu ­peloménus três simana antis di data di diziginason. Kel formuláriu Diziginason pa runion nos Vida i nos trabadju di pregason (S-⁠89) debe uzadu pa kes diziginason di studantis. Enkaregadu di runion Vida i pregason ten responsabilidadi di garanti pa podu na kuadru di avizu un kópia di prugrama di diziginasons di tudu runion. Grupu di ansion pode skodje un otu ansion ô un ajudanti di kongregason pa djuda-l. Má, é sô ansions ki pode djuda-l na faze diziginason di kes párti ki é ka pa studanti.

24. Kada simana un ansion ta ser prizidenti na runion Vida i pregason. (Na kongregasons ki ten poku ansions, si mestedu pode uzadu ajudantis di kongregason ki sta kualifikadu.) Prizidenti debe pripara komentárius pa kumesa i pa tirmina runion. Tanbê el debe fla téma di tudu párti i kenha ki sta ba faze-l. Si ten poku ansions, el pode faze otus párti na runion, prinsipalmenti kes párti ki ta fla pa mostra vídiu má ki ka ten komentárius di ken ki sta sisti. Kes komentáriu na meiu di kes párti debe ser kurtu. Grupu di ­ansions ta skodje ansions ki sta kualifikadu pa ser prizidenti. Kada simana ta skodjedu un di kes ansion ki sta kualifikadu pa ser prizidenti. Má, di akordu ku nisisidadi di kongregason enkaregadu di runion Vida i pregason pode skodjedu pa ser prizidenti más txeu bês ki kes otu ansion kualifikadu. Si un ansion sta kualifikadu pa faze Studu di Bíblia na kongregason, nton el debe sta kualifikadu pa ser prizidenti di runion. Favor, lenbra ma kel ansion ki é prizidenti debe da ilojius, i si meste, el debe da konsedju ku amor pa djuda kes ki ten diziginason di studanti. Prizidenti é responsável pa garanti ma runion ta tirmina na óra. (Djobe  parágrafus 17 i  19.) Si prizidenti krê i si ten spasu, el pode uza un mikrofóni na tripé na palku. Asi óras ki el fla téma di kada párti i kenha ki sta ba faze-l, kel irmon pode bai pa tribuna i pripara pa kumesa. Prizidenti pode fika xintadu na un méza na palku duránti diziginason di leitura di Bíblia i párti Faze bu midjór na pregason. Kel-li pode popa ténpu.

25. Sénpri ki ta da, debe skodjedu un ansion ki ten spiriénsia na faze diskursu pa djuda na da konsedju. El debe da konsedju apárti, pa ansions i ajudantis di kongregason óras ki mestedu, pa kalker diziginason ki es faze, sima pártis na runion Vida i pregason, diskursu pa públiku, lé ô faze studu di Sentinéla ô studu di Bíblia na kongregason. (Djobe  parágrafu 19.) Si ten txeu ansion ki ten spiriénsia na faze diskursu i na inxina, nton kada anu, un di kes ansion kualifikadu ta djuda na da konsedju. El ka meste da konsedju tudu bês ki un irmon faze diziginason.

26. Di akordu ku nunbru di studanti, kongregason pode ten otus sala pa diziginasons di studanti. Kada un di kes sala debe ten un irmon ku spiriénsia pa da konsedju ki, si ta da, debe ser un ansion. Na undi ki ten nisisidadi, pode skodjedu un ajudanti di kongregason kualifikadu pa da konsedju. Grupu di ansions debe disidi ken ki ta skodjedu i si kada simana é un algen diferenti ki ta faze-l. Kel irmon ki skodjedu debe sigi kes instruson di  parágrafu 18. Studantis debe konvidadu pa bai otu sala dipôs di párti Jóias ki sta na Bíblia, na Tizorus di Palavra di Deus. Es debe volta pa sala prinsipal dipôs di kel últimu diziginason di studanti.

27. Ta mostradu vídius na runion. Kes vídiu pa runion na meiu di simana ta sta na aplikativu JW Library^® i es pode uzadu na txeu aparelhu.

© 2023 Watch Tower Bible and Tract Society of Pennsylvania

S-38-KBV 11/23