Manera di bisti i konpo éra nha pédra di tropesu

KONTADU PA EILEEN BRUMBAUGH

N KRIADU na relijion Irmãos Batistas Alemães da Antiga Ordem (Old Order German Baptist Brethren), ki éra sima relijions amish i menonita. Kel relijion li kumesa na Alimanha na anu 1708. El ta fazeba párti di un movimentu spritual konxedu pa pietismu. Un ensiklopédia ta fla ma kel tipu di relijion li kumesa pamodi “alguns algen staba konvensidu ma tudu pesoas mesteba obi kes ivanjélhu di Kristu.” Pamodi kel-li, es manda misionárius ki tevi bons rezultadu na txeu país.

Na anu di 1719 un grupu pikinoti, ki ses líder éra Alexander Mack, txiga na undi ki oji é konxedu pa Pensilvánia, na Mérka. Désdi kel ténpu más grupu ba ta kria i es ba ta sipara di kunpanheru. I kada un di kes grupu tinha ses própi opinion sobri kes kuza ki Alexander Mack ta inxinaba. Nos igreja tinha uns 50 algen. Es ta mostraba ma éra inportanti lé Bíblia i obi ku tudu kel ki xéfis di igreja ta flaba.

Duránti peloménus três jerason, nha família faze párti di kel relijion li i es ta sigiba ses kustumu. Kantu N tinha 13 anu N batiza i N bira ta faze párti di kel relijion li. Es inxina-m désdi pikinoti ma éra eradu ten karu, trator, tilifóni i ti rádiu ô kalker otu aparelhu ilétriku. Kes mudjer ki ta fazeba párti di igreja ta bistiba sinplis, es ka podia korta kabélu i nen dexa ses kabésa diskubértu. Kes ómi ta uzaba barba. Nu ta atxaba ma ka faze párti di mundu ta inkluiba ka uza ropas ki sta na móda, makiaji ô jóia, pamodi éra un pekadu.

Nu inxinadu ma nu ten ki ten txeu ruspetu pa Bíblia pamodi el é Palavra di Deus. Tudu dia, antis di nu toma kafé, nu ta xintaba tudu djuntu na sala i nu ta obiba nos pai ta lé i ta splika un kapítlu di Bíblia. Dipôs, nu ta fikaba di duedju i nos pai ta fazeba orason. Dipôs nos mai ta rezaba Pai-Nosso. N ta staba sénpri ku gana pa kel momentu li txiga, pamodi tudu família ta staba djuntu i nu ta staba konsentradu na kuzas di Deus.

Nu ta moraba na un lugar di plantason pértu di Delphi, na stadu di Indiana, i nu ta plantaba txeu kuza. Nu ta lebaba kes produtu pa sidadi na kabalu i na karósa, i dipôs nu ta bendeba es na rua ô na kada kaza. Nu ta atxaba ma kel trabadju duru ta fazeba párti di nos sirvisu pa Deus. Nton éra kel-li ki nu ta fazeba, ménus dumingu, pamodi nu ta atxaba ma kel dia la éra sagradu. Alvês nos família ta staba txeu konsentradu na trabadju di plantason ki éra difísil konsentra na nos amizadi ku Deus.

Kazamentu i família

Na anu di 1963, kantu N tinha 17 anu, N kaza ku James, ki éra di mésmu relijion ki mi. Se família ta fazeba párti di kel relijion la désdi ténpu di se bizavós. Nos dôs nu tinha un dizeju fórti di sirbi Deus, i nu ta kriditaba ma nu staba na kel úniku relijion verdaderu.

Na anu di 1975 dja nu tinha 6 fidju, i na anu 1983 nu tevi más dôs fidju. Nos sugundu fidju, Rebeka, éra úniku fidju-fémia. Nu ta trabadjaba duru, má nu ta gastaba poku i nu tinha un vida sinplis. Nu tenta inxina nos fidjus kes mésmu prinsípiu di Bíblia ki nu prende ku nos pai i ku nos mai i ku otus algen ki ta fazeba párti di nos relijion.

Manera ki un algen ta konpoba i ta bistiba éra txeu inportanti pa nos relijion. Dja ki ningen ka ta konsigi lé korason, manera ki un algen ta konpoba i ta bistiba ta mostraba txeu ken ki el éra di pa déntu. Pur isu, si algun algen na igreja pentiaba di un manera diferenti, nu ta atxaba ma kel-li éra un sinal di orgulhu. Nos bistidu éra sinplis, má si el tinha algun kuza na el ki éra diferenti i ki ta txomaba atenson, nu ta atxaba ma éra un sinal di orgulhu tanbê. Alvês kes régra li ta parseba ma éra más inportanti di ki kel ki Bíblia ta fla.

Un spiriénsia na kadia

Na fin di anus di 1960, irmon di nha maridu ki txoma Jesse, podu na kadia pamodi el nega ba trópa. Timenti el staba prézu, el konxe Tistimunhas di Jeová, ki tanbê ta kriditaba ma bai géra éra kóntra prinsípius di Bíblia. (Isaías 2:4; Mateus 26:52) Jesse pâpia txeu ku es sobri Bíblia i el repara ma es tinha bons kualidadi. Dipôs di txeu ténpu ta studa Bíblia, el batiza i el bira un Tistimunha di Jeová, i kel-li dexa-nu txeu xatiadu.

Jesse pâpia ku nha mariadu sobri kes kuza ki el prende. Tanbê el djobe manera pa James resebe revistas Sentinéla i Nhos korda!. Lé kes revista poi James ku más interesi na Bíblia. Sikrê James ta xintiba lonji di Deus, sénpri el tinha gana di sirbi-l. Pur isu, sénpri el ta mostraba interesi na kalker kuza ki ta poba el bira amigu di Deus.

Xéfis di nos relijion ta insentivaba nos pa nu leba otus publikason di relijions amish, menonita i di otus relijion ki ta inxinaba kuzas sima di nos, sikrê nu ta atxaba ma es ta fazeba párti di mundu. Má nha pai ka gostaba nada di Tistimunhas di Jeová. El ta atxaba ma nunka nu ka devia lé revistas Sentinéla ku Nhos korda!. Pur isu, N ka fika nada kontenti kantu N odja James ta le-s. N fika ku medu ma es staba ta ngana-l.

Má, dja tinha algun ténpu ki James tinha dúvida sobri alguns kuza ki nos relijion ta inxinaba, pamodi el ta atxaba ma kes kuza éra kóntra kel ki Bíblia ta inxina. Un di es éra kel ensinu ma é pekadu faze kalker trabadju na dumingu. Pur izénplu, nos igreja ta flaba ma nu podia daba nos animal agu na dumingu pa bebe, má nu ka podia kortaba padja. Xéfis di igreja ka ta konsigi mostraba na Bíblia pamodi ki tinha kel régra li. Poku-poku mi tanbê N kumesa ta ten dúvidas sobri kes ensinu li.

Éra difísil nu larga kel relijion ki nu tinha, pamodi dja tinha txeu ténpu ki nu ta kriditaba ma el éra relijion verdaderu, i nu sabia kuzê ki ta kontiseba si nu bandonaba el. Má, nos konsénsia ka sta dexaba nos kontinua na kel igreja pamodi es ka ta inxinaba tudu kes verdadi ki Bíblia ta inxina. Pur isu, na anu di 1983 nu skrebe un karta i nu splika kes motivu ki staba ta pô-nu ta larga kel igreja i nu pidi-s pa es lé kel karta pa kongregason. Es kóre ku nos di kel igreja.

Nu kumesa ta djobe relijion verdaderu

Dipôs di kel-la, nu kumesa ta djobe manera pa nu atxa relijion verdaderu. Nu krê atxaba un relijion ki ta fazeba kes kuza ki es ta inxinaba. Primeru, nu ka kria baba ninhun di kes relijion ki ta partisipaba na géra. Nu kumesa ta djobe primeru kes relijion ‘sinplis’, pamodi nu ta atxaba ma ses manera di vive sinplis i manera ki es ta bistiba ta mostraba ma es ka ta fazeba párti di mundu. Di anu 1983 ti anu 1985, nu tra ténpu pa nu viaja nos país interu pa analiza kada relijion: menonitas, quacres i otus relijion sima kel ki nu staba.

Duránti kel ténpu li, Tistimunhas di Jeová ba vizita-nu na nos lugar di plantason pértu di sidadi di Camden na Indiana. Nu obi-s, má nu fla-s si es podia uzaba kel Bíblia ki nu staba kustumadu na uza, ki éra verson Rei Jaime. N ta ruspetaba kuzê ki Tistimunhas di Jeová ta flaba sobri géra. Má éra difísil seta kuzê ki es staba ta inxina pamodi N ta atxaba ma ses manera di bisti ta mostra ma es ta fazeba párti di mundu. Pur isu, N ta pensaba ma es ka éra relijion verdaderu. N ta atxaba ma éra orgulhu ki ta poba pesoas ta bisti diferenti di nos. Pa mi, si un algen uzaba ropa modérnu i otus kuza modérnu, el staba ta mostra ma el éra un algen orgulhozu.

James kumesa ta bai Salon di Reinu di Tistimunhas di Jeová, i el leba alguns di nos fidju. N fika txeu xatiadu ku kel-li. Nha maridu ta flaba mi pa N bai ku el, má sénpri N ta flaba nau. Nton un dia el fla-m: “Sikrê bu ka ta konkorda ku kel ki es ta inxina, bai sô pa bu ba odja modi ki es ta trata kunpanheru.” Pamodi kel-la dexa-l dimiradu.

Ti ki enfin N disidi bai, má N staba txeu diskunfiadu. N bai Salon di Reinu bistidu ku nha ropa sinplis, sima N ta kustumaba bisti. Alguns di nos fidju matxu staba pé na txon i bistidu sinplis. Má simé, Tistimunhas di Jeová ben kunprimenta-nu i es trata-nu ku amor. N fika ta pensa: ‘Anos é diferenti, má es trata-nu dretu simé.’

N fika dimiradu ku kel amor ki es mostra-nu, má N staba disididu na odja sô modi ki éra. Pur isu, N ka labanta nen N ka kanta ses kántiku. Dipôs di runion, N faze-s txeu pergunta sobri kuzas ki N ta atxaba ma es ka staba ta faze dretu, i sobri kuzê ki alguns testus di Bíblia krê flaba. Sikrê N ka pâpia ku es ku jetu, kada un di kes algen ki N faze pergunta mostra txeu interesi pa mi. Tanbê N fika dimiradu pamodi N faze kes mésmu pergunta pa txeu algen i es da-m kel mésmu respósta. Alvês es ta skrebeba respósta di kes pergunta ki N tinha, i kel-li ta djudaba mi txeu pamodi dipôs N podia studaba es.

Na veron di anu 1985, mi ku nha família, nu ba sisti kongrésu di Tistimunhas di Jeová na Memphis na stadu di Tennessee, sô pa nu bai odja modi ki éra. James inda tinha barba i inda N staba ta uza kes mésmu tipu di ropa. Duránti kes intervalu, sénpri ta tinha algen ta papiaba ku nos. Ses amor, atenson i manera ki es resebe-nu txoma-nu atenson. Tanbê nu fika dimiradu ku ses union, i ka ta nporta na undi ki nu ba sistiba runion, es ta inxinaba kes mésmu kuza.

Pamodi kel interesi ki Tistimunhas di Jeová mostra pa el, James seta un studu di Bíblia. El ta analizaba ku kuidadu tudu kuza pa ten sertéza di kel ki el staba ta prende. (Atos 17:11; 1 Tessalonicenses 5:21) Ku ténpu James xinti ma dja el atxaba verdadi. Má nha korason staba divididu. N kria fazeba kel ki é dretu, má N ka kreba ser un algen “modérnu” i nen pa pesoas pensaba ma N ta fazeba “párti di mundu”. Kantu N seta sisti studu di Bíblia pa primeru bês, N tinha verson Rei Jaime riba di un pérna i riba di kel otu pérna N tinha Tradução do Novo Mundo, ki é un verson más modérnu di Bíblia. N fika ta djobe tudu testu na kes dôs Bíblia pa N tinha sertéza ma es ka staba ta ngana-m.

Kuzê ki konvense-m

Sima nu ba ta studa ku Tistimunhas di Jeová, nu prende ma nos Pai na Séu é un Deus, é ka três na un, i ma nos é un alma, ma nu ka ten un alma ki ka ta móre. (Génesis 2:7; Deuteronómio 6:4; Ezequiel 18:4; 1 Coríntios 8:5, 6) Tanbê nu prende ma inférnu é sipultura, é ka un lugar undi algen ta kema. (Jó 14:13; Salmo 16:10; Eclesiastes 9:5, 10; Atos 2:31) Un kuza ki da-nu sertéza ma dja nu atxaba verdadi é prende kuzê ki Bíblia ta fla sobri inférnu, pamodi ningen na kel relijion ki nu ta staba antis ka ta konsigiba splika kel-li.

Má inda N ta perguntaba modi ki Tistimunhas di Jeová podia ser kel relijion verdaderu, si inda N ta atxaba ma es ta fazeba párti di mundu. Es ka ta lebaba un vida “sinplis” ki N ta atxaba ma éra inportanti. Má omésmu ténpu N repara ma es ta obi ku órdi di Jizus di prega notísias sábi di Reinu pa tudu algen. I kel-li dexa-m txeu konfuzu! — Mateus 24:14; 28:19, 20.

Duránti kel ténpu difísil li, amor ki Tistimunhas di Jeová mostra-m djuda-m kontinua ta buska verdadi. Tudu algen na kongregason staba interesadu na nha família. Alguns irmon di kongregason ta binha vizitaba nos, i txeu bês es ta daba diskulpa ma éra sô pa kunpra leti ku ovu. Nu kumesa ta odja ma es éra algen dretu. Es ka para di bai nos kaza sô pamodi otus Tistimunha di Jeová staba ta studa ku nos. Envês di kel-la, sénpri ki algun irmon staba pértu di nos kaza, es ta binha vizitaba nos. Nu mesteba di kel oportunidadi li pa nu konxeba Tistimunhas di Jeová midjór. Pamodi kel-li nu pasa ta dimira kel amor i interesi di verdadi ki es mostra-nu.

É ka sô kes Tistimunhas di Jeová di kel kongregason más pértu di nos ki ta mostraba interesi pa nos. Timenti N staba ta sforsa pa ntende kal ki é manera dretu di bisti i di konpo, un Tistimunha di Jeová di un kongregason pértu, ki txoma Kay Briggs, ben vizita-m. El ta bistiba sinplis i el ka ta uzaba makiaji. N xinti avontádi na pâpia ku el. Dipôs Lewis Flora, ki kriadu na un relijion sima kel ki N staba na el antis, ben vizita-m. El konsigi odja na nha rostu ma N staba txeu preokupadu i el manda-m un karta di 10 pájina pa djuda-m fika kalmu. Bondadi ki el mostra-m pô-m ta txora, i N lé se karta un monti bês.

N pidi irmon O’Dell, ki éra Enkaregadu di grupu di kongregason, pa splika-m Isaías 3:18-23 i 1 Pedro 3:3, 4. N pergunta-l: “Kes testu li ka ta mostra, ma pa nu agrada Deus nu ten ki bisti di manera sinplis?” El responde-m: “É eradu kubri kabésa? É eradu transa kabélu?” Na kel igreja ki N ta staba, nu ta transaba minininhas kabélu i mudjeris ta uzaba un kuza pa kubriba kabésa, nton N da kónta ma kel ki nu staba ta faze ka staba di akordu ku splikason di kes testu li. Tanbê N fika spantadu ku paxénxa i bondadi ki kel Enkaregadu di grupu di kongregason mostra-m.

Poku-poku N ba ta konvense nha kabésa, má inda tinha un asuntu ki staba ta mexe txeu ku mi, ki éra si mudjeris debe korta kabélu. Ansions splika-m ma kabélu di alguns mudjer ta kria más txeu di ki kes otu. Kel-li krê fla ma sô pamodi kabélu di un mudjer ta kria más txeu di ki kel otu, se kabélu é más midjór? Tanbê es djuda-m ntende pamodi ki é inportanti uza konsénsia óras ki nu ta disidi modi ki nu ta bisti i konpo, i es da-m alguns informason pa N ba lé na kaza.

Nu faze sima nu prende

Nu staba ta djobe pa bons frutu i nu atxa-l. Jizus fla: ‘Através di kel-li tudu algen ta fika ta sabe ma nhos é nha disiplus: si nhos ten amor pa kunpanheru.’ (João 13:35) Nu staba konvensidu ma Tistimunhas di Jeová é kel úniku povu ki ta mostra amor di verdadi. Má simé, kel-li foi un ténpu difísil pa nos dôs fidju más grandi, Nathan i Rebeka, pamodi es ta kriditaba na kel relijion ki nu staba na el, i es batiza na el. Ku ténpu kes verdadi di Bíblia ki nu mostra-s, i kel amor ki Tistimunhas di Jeová ta mostra toka ses korason.

Pur izénplu, nos fidju Rebeka sénpri kria ten un amizadi fórti ku Deus. Kantu el prende ma é ka Deus ki ta kontrola kuzas ki nu ta faze i kuzê ki ta ben kontise ku nos na futuru, fika más fásil el konsigi faze orason. Tanbê el bira más amigu di Deus kantu el ntende ma Deus ka ta faze párti di Trindadi, má el é un algen ki ta izisti mê i ki el pode imita. (Efésios 5:1) Tanbê el fika uma kontenti kantu el prende ma el ka meste uzaba kes palavra antigu ki staba na se Bíblia óras ki el ta papiaba ku Deus. Sima el ba ta prende modi ki Deus krê pa faze orason pa el, i tanbê sobri kel promésa di Deus ma pesoas ta ben vive pa tudu ténpu na paraízu li na Téra, kel-li pô-l ta bira mutu más amigu di se Kriador. — Salmo 37:29; Apocalipse 21:3, 4.

Bensons ki nu resebe

Mi ku James i nos sinku fidju más bédju, Nathan, Rebeka, George, Daniel i John, nu batiza na veron di anu 1987 i nu bira Tistimunhas di Jeová. Harley batiza na anu 1989, i Simon batiza na anu 1994. Nos família interu sta kontinua ta faze kel trabadju ki Jizus manda se sigidoris pa faze, ki é prega notísias sábi di Reinu di Deus.

Nos sinku fidju matxu más bédju, ki é Nathan, George, Daniel, John i Harley, i nos fidju-fémia Rebeka, dja kustuma sirbi na Betel di Tistimunhas di Jeová na Mérka. George dja ten 14 anu ta sirbi la, i Simon, ki tirmina skóla na 2001, ka dura li kumesa ta sirbi la tanbê. Tudu nos fidju é ansion ô ajudantis di kongregason di Tistimunhas di Jeová. Nha maridu ta sirbi di ansion na kongregason Thayer, na Missouri, i mi, N sta kontinua okupadu na pregason.

Gósi nu ten três nétu, ki é Jessica, Latisha i Caleb, i nu sta kontenti di odja ses mai ku ses pai ta inxina-s ama Jeová désdi pikinoti. Nos tudu nu sta kontenti pamodi Jeová atrai-nu pa el i el djuda-nu identifika se povu através di manera ki es ta mostra amor.

N ta konsigi poi na lugar di kes algen ki krê agrada Deus, má ki inda ta pensa ma kes régra di relijion é más inportanti di ki kel ki Bíblia ta fla. Nu ten speransa ma un dia es pode xinti kel alegria ki nu sta ta xinti di bai di kaza-en-kaza, ka pa bende verduras, má pa prega sobri Reinu di Deus i kes kuza rei di sábi ki kel Reinu li sta pa ben faze. N ta fika ku lágua na odju óras ki N ta pensa na tudu paxénxa i amor ki povu di Jeová mostra pa nos!

[Nóta di rodapé]

The Encyclopedia of Religion

[Fotus]

Kantu N tinha 7 anu, i dipôs kantu N staba más grandi.

[Fotu]

James, George, Harley i Simon bistidu ku kes ropa ki nu ta uzaba antis.

[Fotu]

Kel fotu li ki N sta parse ta leba kuzas pa ba bende na merkadu sai na un jornal di nos zóna.

[Dónu di fotus:]

Journal and Courier, Lafayette, Indiana

[Fotu]

Nos família gósi.