Jeová é un Deus ki bale péna nu konxe-l

STA ta falta-u algun kuza inportanti na bu vida? Si bu sabe poku kuza sobri Deus, é pamodi nton sta falta-u. Pamodi? Pamodi milhons di algen diskubri ma konxe kel Deus ki Bíblia ta pâpia di el ta djuda-nu ten bons rezultadu na vida. Nu ta odja kes rezultadu lógu i es ta dura pa tudu ténpu.

Jeová Deus, ki é Autor di Bíblia, krê pa nu konxe-l. Salmista skrebe: ‘Pa pesoas sabe ma bo, ki txoma Jeová, Sô bo é kel Más Grandi riba Téra interu.’ El sabe ma konxe-l é bon pa nos. ‘Ami, Jeová, mi é bu Deus, Kel ki ta inxina-u kuzê ki é midjór pa bo’. Ki bons rezultadu nu ta ten di konxe Jeová Deus, kel algen Más Grandi? — Salmo 83:18; Isaías 48:17.

Un di kes rezultadu é pamodi nu ta ten orientason pa lida ku prublémas di dia-dia, un speransa sértu pa futuru i un pas déntu nos. Alén di kel-li, konxe Jeová dretu ta djuda-nu ten un atitudi diferenti sobri kes pergunta más inportanti ki pesoas na mundu interu ta faze oji. Ki perguntas é kes-li?

Bu vida ten obijetivu?

Sikrê ómis dja avansa txeu na tekinolojia na mundu, má simé inda ten pesoas ki sta faze kes pergunta inportanti li: ‘Pamodi ki N sta li? Pa undi ki N ta bai? Kal ki é obijetivu di vida?’ Óras ki pesoas ka atxa respóstas ki ta konvense-s, ses vida ka ta ten ninhun obijetivu di verdadi. Ten txeu algen ki ta xinti si? Un studu ki fazedu na Alimanha na fin di anus 90 fla ma metadi di kes algen ki entrivistadu, txeu bês ô alguns bês, ta atxaba ma vida ka tinha ninhun obijetivu. Talvês é si tanbê na undi ki nu ta mora.

Si un algen ka ten un obijetivu na vida, el ka ten un bazi pa el poi métas na se vida. Dja ki txeu algen ka ten un obijetivu na vida, es ta ranja un bon trabadju ô djunta rikéza. Má simé, es ta xinti un vaziu déntu di es ki ta inkomoda-s. Ka ten un obijetivu na vida ta inkomoda alguns di tal manera, ki es ka ta krê vive más. Jornal International Herald Tribune, ta fla ma é kel-li ki kontise ku un mudjer bunita ki kriadu na meiu di txeu rikéza i ki tinha txeu priviléjiu. Nbóra el tinha un vida di luxu, el ta xintiba el sô i el ta atxaba ma vida ka tinha obijetivu. El toma ramedi di sónu i es atxa-l mortu. Talvês bu fika ta sabe di otus algen ki staba ta xinti es sô i ki tevi un mórti tristi.

Má dja bu obi ta fladu ma siênsia pode da-nu respósta pa tudu pergunta sobri vida? Un jornal di Alimanha ki ta sai tudu simana ki txoma Die Woche fla: “Nbóra siênsia ten bazi na verdadi, na asuntus di relijion i manera di konporta, el é fraku. Ivoluson ta parse antigu i nen fízika ka ta da konsolu nen suguransa.” Kes kuza ki siênsia  dja diskubri, djuda txeu pa splika kes diferenti tipu di vida i pa splika kes kuza ki ta kontise na naturéza pa pode ten vida. Má siênsia ka ta konsigi fla pamodi ki nu sta li i kuzê ki ta kontise ku nos na futuru. Si nu spéra sô pa siênsia, nu ka ta atxa respósta pa perguntas sobri kal ki é obijetivu di vida. Rezultadu é sima jornal Süddeutsche Zeitung fla: “Ta ten txeu nisisidadi di orientason.”

Ka ten ningen midjór ki Kriador pa da-nu kel orientason li. El ki poi umanus na Téra, pur isu el sabe pamodi ki es sta li. Bíblia ta splika ma Jeová kria umanus pa es intxi Téra i pa es toma kónta di el. Na tudu kuza ki es ta faze, es debe mostraba kes kualidadi di Kriador sima justisa, sabedoria i amor. Óras ki nu sabe pamodi ki Jeová kria-nu, nu ta ntende pamodi ki nu sta li. — Génesis 1:26-28.

Kuzê ki bu pode faze?

I si inda bu ka atxa respósta ki ta konvense-u pa perguntas sima: ‘Pamodi ki N sta li? Pa undi ki N ta bai? Kal ki é obijetivu di vida?’ Bíblia ta fla ma bu debe konxe Jeová dretu. Na verdadi Jizus fla: ‘Vida pa tudu ténpu é kel-li: pa es konxe-u abo, úniku Deus verdaderu, i kel ki bu manda, Jizus Kristu.’ Bíblia tanbê ta insentiva-u pa bu dizenvolve kualidadis ki Deus ten, prinsipalmenti amor, i poi méta di vive dibaxu di Reinu di Deus. Asi bu ta ten un obijetivu na vida i un speransa spetakular i suguru pa futuru. Asi bu pode atxa respósta pa kes pergunta inportanti ki ti gósi sta ta inkomoda-u. — João 17:3; Eclesiastes 12:13.

Modi ki sabe respósta di kes pergunta inportanti, pode afeta-u? Hans xinti modi ki sabe respósta pode afeta un algen. * Dja ten uns anu, nbóra el sabia ma Deus izisti, se fé ka ta influensiaba se vida. Hans gostaba di dróga, móta, mudjeris ki tinha vida mariadu i el ta fazeba alguns krimi ki ka éra mutu gravi. Má sima el fla se “vida éra vaziu, sen obijetivu.” Kantu Hans tinha uns 25 anu, el disidi lé Bíblia ku atenson pa el konxe Deus. Dipôs ki el konxe Jeová dretu i el ntende kal ki é obijetivu di vida, Hans muda se manera di vive, el batiza i el bira un Tistimunha di Jeová. Dja ten 10 anu ki el sta na trabadju pa ténpu interu. El fla klaru: “Sirbi Jeová é midjór manera di vive. Ka ten nada ki ta konpara ku kel-li. Konxe Jeová da nha vida obijetivu.”

É klaru ki é ka sô obijetivu na vida ki ta preokupa txeu algen. Sima situason na mundu ta piora, ten otu pergunta ki ta inkomoda kada bês más algen.

Pamodi ki kel-li kontise?

Óras ki kontise un disgrasa, normalmenti ten un pergunta ki ta fika na kabésa di kel algen ki sufri kel disgrasa: Pamodi ki kel-li kontise? Lida dretu ku kel disgrasa ta dipende txeu di respósta sértu pa kel pergunta li. Si kel algen ka atxa un respósta ki ta konvense-l, el ta kontinua ta sufri i el pode fika marguradu. Pur izénplu, odja kuzê ki kontise ku un mudjer ki txoma Bruni.

Bruni fla: “Dja ten alguns anu ki nha fidju-fémia móre. N ta kriditaba na Deus. Pur isu, N ba djobe konsolu na padri di kel lugar ki N ta moraba. El fla ma Deus leba Susanne pa Séu i ma gósi el é un  anju. É ka sô nha vida ki kaba pamodi el móre, má N bira ta ôdia Deus pamodi el toma-m el.” Dór ku sufrimentu di Bruni kontinua pa txeu anu. “Dipôs un Tistimunha di Jeová mostra-m na Bíblia ma N ka tinha ninhun motivu pa N ôdia Deus. Jeová ka leba Susanne pa Séu i el é ka é un anju. El duense pamodi inperfeson ki el nase ku el. Susanne sta ta durmi na mórti. El sta ta spéra pa Jeová resusita-l. Tanbê N prende ma el faze umanus pa vive pa tudu ténpu na un paraízu na Téra i ma ka ta dura kel-li ta ben kontise. Kantu N kumesa ntende ki tipu di algen ki Jeová é di verdadi, N bira más se amiga i nha dór kumesa ta bira más poku.” — Salmo 37:29; Atos 24:15; Romanos 5:12.

Milhons di algen ta pasa pa txeu prubléma di un manera ô di otu sima un disgrasa na ses vida, géra, fómi ô dizastris na naturéza. Bruni xinti un alíviu kantu el odja ku bazi na Bíblia ma Jeová é ka kulpadu pa prublémas ki nu ta pasa pa el, ma nunka el ka kreba pa algen sufri i ma ka ta dura el ta ben kaba ku tudu maldadi. Maldadi ki sta ta bira kada bês más txeu é un sinal ma nu sta ta vive na ténpu di fin di kel mundu li. Kel mudansa spetakular pa midjór ki nos tudu nu sta ta spéra, ka ta dura ta ben kontise. — 2 Timóteo 3:1-5; Mateus 24:7, 8.

Konxe Deus

Hans ku Bruni ta kriditaba ma Deus izisti. Es ta kriditaba na el má es ka sabia txeu kuza sobri el. Kantu es tra ténpu pa es konxe Jeová, es tevi bon rezultadu. Es atxa respósta ki konvense-s di kes pergunta más inportanti di nos ténpu. Kel-li da-s un pas déntu di es i un speransa sértu pa futuru. Milhons di sérvu di Jeová pasa pa un spiriénsa sima kel-li.

Pa bu konxe Jeová, primeru bu debe analiza Bíblia dretu. Bíblia ta pâpia sobri Jeová i sobri kuzê ki el krê pa nu faze. É kel-li ki alguns algen faze na primeru séklu. Lúkas ki éra un skritor i médiku fla ma kes algen ki ta fazeba párti di kongregason di judeus na Berea, na Grésia “resebe palavra [di Polu ku Silas] ku tudu interesi i tudu dia es ta studaba Skrituras sagradu pa es odja si éra simé.” — Atus 17:10, 11, Bíblia Na Prugrésu di Traduson Pa Lingua Kabuverdianu, BPK.

Kristons na primeru séklu tanbê ta djuntaba na kongregasons. (Atos 2:41, 42, 46; 1 Coríntios 1:1, 2; Gálatas 1:1, 2; 2 Tessalonicenses 1:1) Mésmu kuza ta kontise oji tanbê. Kongregasons di Tistimunhas di Jeová ta faze runions prinsipalmenti pa djuda kada algen na konxe Jeová midjór i ten alegria na sirbi-l. Sta djuntu ku Tistimunhas di Jeová di bu zóna ta traze otus rezultadu. Umanus ten tendénsia di imita kel Deus ki es ta adora. Tistimunhas di Jeová ta mostra kualidadis ki Jeová ten, má di manera limitadu. Pur isu sta djuntu ku es ta djuda-nu konxe Jeová inda más midjór. — Hebreus 10:24, 25.

Bu ta atxa ma kel-li é un sforsu grandi dimás sô pa konxe un algen? É klaru ki ta iziji sforsu má tanbê kel-li ka ta aplika na txeu kuza na vida ki bu ta krê alkansa? Pensa na sforsu ki un atléta famozu ta faze pa el trena. Pur izénplu, Jean-Claude Killy na Fransa, ki ganha medalha di oru na un konpitison ki ta fazedu entri txeu país, na un disportu ki ta fazedu na jélu ki txoma ski, fla kel-li sobri kuzê ki un algen meste faze pa el ten bon rezultadu na kel tipu di konpitison li: “Bu meste kumesa ta pripara 10 anu antis, pasa txeu anu ta faze planus i pensa na kel-li tudu dia. Bu ta pripara bu menti i bu korpu 365 dia pa anu.” Es ta gasta tudu kel  ténpu li i sforsu pa partisipa na un korida ki talvês ta dura 10 minutu! Di sertéza, kes rekonpénsa ki nu ta resebe pamodi nu konxe Jeová é mutu más grandi i ta dura más ténpu.

Un amizadi kada bês más fórti

Ken ki krê perde un kuza inportanti na se vida? Ningen. Nton, si bu ta xinti ma bu vida ka ten un obijetivu di verdadi ô si bu krê ten un splikason di pamodi ki ten difikuldadis, sta disididu na konxe Jeová, kel Deus di Bíblia. Prende sobri el pode midjora bu vida pa tudu ténpu.

Algun dia nu ta para di prende sobri Jeová? Kes ki dja ten txeu anu ta sirbi-l inda ta fika dimiradu ku kel ki es ta prende sobri el i ku kes kuza novu ki es ta kontinua ta prende sobri el. Óras ki nu ta prende kes kuza li nu ta xinti más filís i es ta djuda-nu bira más amigu di Deus. Nton, nu konkorda ku kel ki apóstlu Polu skrebe: “Rikézas ku sabedoria i konhisimentu di Deus é profundu dimás! Se julgamentus ka ta da pa splika, i se kaminhus ka ta da pa piskiza! Pamodi ‘kenha ki txiga di konxe menti di Jeová, ô kenha ki bira ta da-l konsedju?’” — Romanos 11:33, 34.

[Nóta di rodapé]

[Lejenda na pájina 5]

Pesoas ta kontinua ta faze kes mésmu pergunta inportanti li: ‘Pamodi ki N sta li? Pa undi ki N ta bai? Kal ki é obijetivu di vida?’

[Lejenda na pájina 6]

“Kantu N kumesa ntende ki tipu di algen ki Jeová é di verdadi, N bira más se amiga”

[Lejenda na pájina 7]

“Sirbi Jeová é midjór manera di vive. Ka ten nada ki ta konpara ku kel-li. Konxe Jeová da nha vida obijetivu”