Bu manera di divirti ta djuda-u?

‘Sénpri nhos konfirma dretu kal ki é vontadi di Sinhor’. — Efésios 5:10

1, 2. (a) Modi ki Bíblia ta mostra ma Jeová krê pa nu ten un vida filís? (b) Si nu odja kel ténpu di divirti sima un ‘prezenti di Deus’ kel-li ta pô-nu ta faze kuzê?

 BÍBLIA ta mostra ma Jeová ka krê sô pa nu vive má el krê pa nu ten un vida filís. Pur izénplu, Salmo 104:14,15 ta fla ma Jeová ta ‘poi téra ta da kumida i vinhu ki ta poi korason di ómi ta fika kontenti, azeti ki ta poi rostu ta brilha i pon ki ta anima korason di ómi.’ Jeová ta poi plantas ta kria pa da kumida, azeti i vinhu pa nos sustentu. Vinhu tanbê ta poi ‘korason fika kontenti’. Má sikrê nu ta konsigi vive sen vinhu, Jeová da-nu el pamodi el ta poi nos korason ta fika kontenti. (Eclesiastes 9:7; 10:19) Sin, Jeová krê pa nu sta kontenti i pa nu ‘intxi nos korason di alegria’. — Atos 14:16, 17.

² Nton, nu ka meste xinti kulpadu si di vês en kuandu nu ta tra ténpu pa ‘presta atenson na kes pasu na séu’ i na ‘floris na kanpu’ ô pa nu faze otus kuza ki ta pô-nu ta fika kontenti. (Mateus 6:26, 28; Salmo 8:3, 4) Un vida sábi é ‘prezenti di Deus.’ (Eclesiastes 3:12, 13) Si nu ntende ma kel ténpu di divirti é un prezenti di Deus, nu ta uza-l di un manera ki ta agrada-l. *

Skodje diverson ku sabedoria

3. Pamodi ki é bon seta ma ten txeu kuza ki algen pode skodje pa divirti ku el?

³ Óras ki nu ta pensa di manera ikilibradu sobri diverson, é más faxi nu odja ki diverson ki é dretu i ki diverson ki é mariadu. Pamodi? Pa nu ntende, nu konpara diverson ku kumida. Na kada país pesoas gosta di diferentis tipu di kumida. Kuzê ki alguns pesoas gosta di kume na un país, pesoas pode ka gosta na otus país. Di mésmu manera, un diverson ki un sérvu di Jeová ta atxa ma é dretu na un país, na un otu país un sérvu di Jeová pode atxa ma el é ka dretu. Ti mésmu sérvus di Jeová ki ta mora na mésmu país pode gosta di faze kuzas diferenti. Alguns pode gosta di lé livrus má pa otus kel-li ka ten piada. Tanbê, alguns pode gosta di anda di bisikléta má pa otus kel-li é un kuza ki ta kansa. Má simé, nu ta ntende ma óras ki asuntu é kumida i diverson, ten txeu kuza pa skodje i kada algen ta skodje kel ki ta fika-l más sábi. — Romanos 14:2-4.

4. Pamodi ki é bon skodje dretu kes kuza ki nu ta divirti ku el? Da un izénplu.

⁴ Nbóra ten txeu tipu di diverson ki nu pode skodje, kel-li ka krê fla ma é un diskulpa pa nu faze tudu kel ki nu krê. Pa nu ntende kel-li, nu torna odja izénplu di kumida. Sikrê nu gosta di kume un monti tipu di kumida, nu ka ta kumeba un kumida ki sta stragadu, pamodi ka ta faze sentidu i el ta poba nos saúdi na prigu. Sikrê ten txeu tipu di diverson ki é bon i ki nu pode skodje, nu ka ta skodjeba un kuza pa nu divirti ki ten violénsia, konportamentu mariadu i ki ta poba nos vida na prigu. Faze kes kuza li ta baba kóntra kes prinsípiu di Bíblia i ta poba nos saúdi i nos amizadi ku Jeová na prigu. Pa nu ten sertéza ma kuzas ki nu ta divirti ku el ta agrada Deus, é bon nu djobe antis ku kuidadu si es é dretu ô nau. (Efésios 5:10) Modi ki nu pode faze kel-li?

5. Modi ki nu pode sabe si un diverson sta di akordu ku kel ki Bíblia ta fla?

⁵ Pa un diverson ser bon pa nos i pa el agrada Jeová, el meste sta di akordu ku kel ki Bíblia ta fla. (Salmo 86:11) Pa djuda-nu toma bons disizon nu pode faze kes três pergunta li: Kuzê ki N sta ba faze? Kantu ténpu ki N sta ba gasta? Ku kenha ki N sta ba divirti? Nu ben pâpia di es un di kada bês.

Kuzê ki N sta ba faze?

6. Ki tipu di diverson nu meste ivita i pamodi?

⁶ Antis di bu kumesa ta divirti ku algun kuza, kel primeru pergunta ki bu debe faze bu kabésa é: Kuzê ki N sta ba faze? ô “Kuzê ki ta pô-m ta gosta di kel tipu di diverson li?” Timenti bu ta djobe respósta, é bon bu lenbra ma ten dôs tipu di diverson. Pa kel primeru nu ta fla nau i pa kel sugundu talvês. Kal ki é kel primeru? Na kel mundu mau li, txeu diverson ta mostra klaru kes kuza ki é kóntra kes prinsípiu di Bíblia ô leis di Deus. (1 João 5:19) Kristons verdaderu ta nega divirti ku kes tipu di diverson li. Kel-li ta inklui, diversons ki ta mostra algen ta xinti sábi óras ki otus algen ta maltratadu, kuzas ki ten aver ku dimónis, konportamentu omoseksual, pornografia, violénsia ô kes diverson ki ten kalker kuza otu kuza ô konportamentu mariadu. (1 Coríntios 6:9, 10; lé Apocalipse 21:8.) Ka ta nporta undi nu sta, nu ta mostra Jeová ma nu ta ‘odia kel ki é mau’ óras ki nu ta fika lonji di tudu kes tipu di diverson li. — Romanos 12:9; 1 João 1:5, 6.

7, 8. Modi ki nu pode sabe si kuzas ki nu ta divirti ku es é bon ô nau? Da un izénplu.

⁷ Kel sugundu tipu di diverson é kes ki ka ta mostra kuzas ki Palavra di Deus ta kondena klaru. Na kel kazu li, antis di skodje kel diverson, nu debe djobe ku kuidadu kuzê ki Jeová ta pensa sobri kel ki é dretu, sima prinsípius di Bíblia ta mostra. (Provérbios 4:10, 11) Nu ten ki toma disizon ki ta djuda-nu kontinua ku un konsénsia linpu. (Gálatas 6:5; 1 Timóteo 1:19) Modi ki nu pode faze kel-li? Pensa na kel-li: Antis di nu sprimenta un kumida novu nu ta krê sabe kal ki é kes kuza prinsipal ki ten na el. Di mésmu manera, antis di nu divirti ku un kuza, nu ten ki djobe kal ki é kes kuza prinsipal ki el ten na el. — Efésios 5:17.

⁸ Pur izénplu, talvês bu gosta di disportu i é fásil ntende pamodi. Disportu pode ser divirtidu i sábi. Má, kuzê ki bu debe faze si bu gosta di alguns disportu ki é violéntu, prigozu ô ki pesoas ta komemora di manera izajeradu óras ki ekipas di ses país ta ganha? Si bu da kónta ma bu gosta di un disportu ki Jeová ka ta aprova i bu ta atxa ma ka ta sérba dretu odja kel disportu i dipôs ba prega pa otus algen sobri pas i amor, nton é midjór bu ka odja-l. (Isaías 61:1; Gálatas 5:19-21) Má, si bu ten sertéza ma Jeová ta aprova kel diverson ki bu gosta, kel-li pode ser bon pa bo. — Gálatas 5:22, 23; lé Filipenses 4:8.

Kantu ténpu ki N sta ba gasta?

9. Kuzê ki nos respósta pa kel pergunta “Kantu ténpu ki N sta ba gasta” ta mostra?

⁹ Kel sugundu pergunta ki nu debe faze nos kabésa é: “Kantu ténpu ki N sta ba gasta?” ô “Ki óra ki N sta ba divirti?”. Respósta ki nu ta da pa kel pergunta “Kuzê ki N sta ba divirti ku el”, ta mostra kal ki é nos inklinason ô kuzê ki pa nos é dretu ô mariadu. Má respósta pa pergunta “Kantu ténpu ki N sta ba gasta” ta mostra kuzê ki é más inportanti pa nos i kuzê ki ka é inportanti. Nton modi ki nu pode sabe si nu ka sta da un diverson más valor di ki kel ki el debe ten?

10, 11. Modi ki kes palavra di Jizus ki sta na Mateus 6:33 ta djuda-nu disidi kantu ténpu ki nu ta gasta ta divirti?

¹⁰ Jizus Kristu fla se sigidoris: ‘Nhos ama Jeová, nhos Deus, di tudu nhos korason, di tudu nos alma, di tudu nhos menti i di tudu nhos forsa.’ (Marcos 12:30) Nton, nos amor pa Jeová debe ser kuza más inportanti na nos vida. Nu ta mostra kel-li, óras ki nu ta obi ku kes palavra li di Jizus: ‘Nhos kontinua ta buska Reinu i justisa di Deus primeru, i tudu kes otu kuza nhos ta dadu.’ (Mateus 6:33) Modi ki kes palavra li, pode djuda-nu ntende na ki lugar nu ta poi diverson i kantu ténpu ki nu debe gasta ku el?

¹¹ Pensa na kel-li: Jizus fla pa nu ‘kontinua ta buska reinu primeru’. El ka fla ma nu debe ‘kontinua ta buska sô reinu’. É klaru ki Jizus sabia ma alén di Reinu nu tinha ki buska txeu otus kuza na vida. Nu meste di kaza, kumida, ropa, skóla, trabadju i di divirti. Má nos sirvisu pa Jeová debe ser más inportanti di ki kes kuza li. (1 Coríntios 7:29-31) Nu debe uza nos ténpu na kes kuza li di manera ki el ta dexa-nu faze kel ki é más inportanti, ki é sirbi Jeová. Si nu faze si diverson ta ser bon pa nos.

12. Modi ki kel prinsípiu ki sta na Lucas 14:28 ta aplika na diverson?

¹² Antis di nu skodje algun tipu di diverson nu meste faze kónta di kantu ténpu ki nu ta ba gasta na el. (Lucas 14:28) Nu ten ki djobe kantu ténpu ki un diverson ta toma-nu, dipôs nu ten ki disidi si bale péna gasta kel ténpu ku el. Si ténpu ki nu ta uza na algun diverson ta pô-nu ta dexa di faze kuzas inportanti, sima studu pesoal, adorason na família, sisti runion ô sai na pregason, kel présu ka ta konpensa. (Marcos 8:36) Má, si diverson ki nu ta skodje ta djuda-nu kontinua ta sirbi Jeová ku alegria, nton kel-li é un bon manera di uza nos ténpu.

Ku kenha ki N sta ba divirti?

13. Pamodi ki nu debe skodje ku kuidadu ki tipu di algen ki nu ta divirti ku el?

¹³ Kel tirseru pergunta ki nu debe faze nos kabésa é: Ku kenha ki N sta ba divirti? ô “Kenha ki N ta skodje pa N pasa ténpu djuntu ku el óras ki N sta ta divirti?” É inportanti nu pensa na kel-li tanbê. Pamodi? Pamodi kenha ki nu ta skodje pa divirti ku el ta influensia-nu pa kuzas dretu ô mariadu. Sima kume un kumida é más sábi óras ki nu sta djuntu ku bons amigu, tanbê, txeu bês diverson é más sábi óras ki nu sta djuntu ku bons amigu. Pur isu, ta da pa ntende pamodi ki txeu di nos, prinsipalmenti jóvens, gosta di divirti djuntu ku otus algen. Pa bu ten sertéza ma un diverson ta ser bon pa bo, primeru bu debe skodje ku kuidadu ku kenha ki bu sta bai divirti. — 2 Crónicas 19:2; lé Provérbios 13:20; Tiago 4:4.

14, 15. (a) Ki izénplu Jizus dexa na skodje amigus? (b) Ki perguntas nu debe faze nos kabésa óras ki nu ta skodje nos amigus?

¹⁴ Imita izénplu di Jizus pode djuda-nu óras ki nu ta skodje nos amigus. Désdi ki Jeová kria algen na Téra, Jizus ta xinti txeu amor pa es. (Provérbios 8:31) Kantu el staba na Téra, el mostra ma el ta amaba tudu tipu di algen. (Mateus 15:29-37) Má, Jizus mostra diferénsa entri trata un algen dretu i ser amigu di un algen. Nbóra el ta trataba tudu algen dretu, el skodje ku kuidadu kes ki ta sérba se amigus. Timenti el staba ta pâpia ku ses 11 apóstlu ki éra fiel, Jizus fla: ‘Anhos é nhas amigu si nhos faze kel ki N ta manda nhos.’ (João 15:14; odja tanbê João 13:27, 30.) Kes úniku algen ki Jizus skodje pa ser se amigus éra kes ki ta sigiba el i ki ta sirbiba Jeová.

¹⁵ Nton, óras ki bu sta skodje kenha ki debe ser bu amigu, é bon bu lenbra di kuzê ki jizus fla. Pergunta bu kabésa: “Kel algen ta mostra na kuzas ki el ta pâpia i na kuzas ki el ta faze ma el ta obi ku Jeová i ku Jizus? El ta sigi kel ki Bíblia ta inxina sobri kuzê ki é dretu i kuzê ki é mariadu sima mi? El ta djuda-m kontinua lial pa Jeová i da-l nha midjór?” Si bu respósta pa kes pergunta li é sin, nton bu atxa un bon amigu pa bu divirti djuntu ku el. — Lé Salmo 119:63; 2 Coríntios 6:14; 2 Timóteo 2:22.

Kes kuza ki bu ta divirti ku el é bon pa bo?

16. Kuzê ki nu meste disidi antis di skodje un diverson?

¹⁶ Nu pâpia di três kuza ki ten aver ku diverson: kualidadi, kuantidadi i algen ki nu ta divirti ku el. Pa nos diverson ser dretu, el ten ki sta di akordu ku kel ki Bíblia ta fla sobri kada un di kes kuza li. Pur isu, antis di nu skodje un diverson nu debe djobe si el é bon ô nau pa nos. Óras ki asuntu é kualidadi, é bon nu pergunta: “Kes kuza ki el ten na el é bon ô é mau?” (Provérbios 4:20-27) Óras ki é kuantidadi, é bon nu pergunta: “Kantu ténpu ki N sta ba gasta na el? Kel ténpu é dimás ô nau?” (1 Timóteo 4:8) I óras ki asuntu é kolégas, nu debe pergunta: “Ku kenha ki N sta ba divirti? Es é bon ô mau koléga?” — Eclesiastes 9:18; 1 Coríntios 15:33.

17, 18. (a) Modi ki nu pode djobe si kes kuza ki nu ta divirti ku es sta di akordu ku kes prinsípiu di Bíblia? (b) Kuzê ki bu debe sta disidi na faze óras ki bu ta skodje diverson?

¹⁷ Si un diverson ka sta di akordu ku kes prinsípiu di Bíblia na kalker un di kes três kuza li, nton el é ka bon pa nos. Má si nu ten sertéza, ma kuzas ki nu ta divirti ku el sta di akordu ku kes prinsípiu di Bíblia na kes três kuza li, nton nos diverson ta da ónra pa Jeová i el ta ser bon pa nos. — Salmo 119:33-35.

¹⁸ Nton, óras ki asuntu é diverson, nu debe sforsa pa faze kel ki é dretu, na ténpu sértu i ku kes algen sértu. Nos tudu, nu debe sta disididu na sigi di korason kel konsedju di Bíblia li: ‘Ô nhos kume, ô nhos bebe, ô nhos faze kalker otu kuza, nhos faze tudu kuzas pa glória di Deus.’ — 1 Coríntios 10:31.

[Nota de rodapé]

Modi ki bu ta respondeba?

Óras ki asuntu é diverson, modi ki bu ta aplika kes prinsípiu ki sta na . . 

• Filipenses 4:8?

• Mateus 6:33?

• Provérbios 13:20?

[Perguntas di studu]

[Tabéla]

✔Kuzê ki N sta ba faze

[Tabéla]

✔Kantu ténpu ki N sta ba gasta

[Tabéla]

✔Ku kenha ki N sta ba divirti

[Dizenhu]

Modi ki nu pode sigi izénplu di Jizus óras ki nu ta skodje nos amigus i kuzas ki nu ta divirti ku es?