Bíblia ta muda vida di algen

KUZÊ ki djuda un ómi ki ta fazeba párti di un relijion ki txoma rastafári, korta se kabélu kunpridu i para di ôdia pesoas branku? Kuzê ki djuda un jóven ki éra violéntu i ki ta trabadjaba pa trafikantis di dróga muda se stilu di vida? Odja kuzê ki kes algen li ten pa fla.

“N konsigi ti dexa di faze diskriminason.” — HAFENI NGHAMA

IDADI: 34

PAÍS KI EL NASE: ZÁNBIA

SE VIDA NA PASADU: RASTAFÁRI

MODI KI ÉRA NHA VIDA ANTIS: N nase na un kanpu di rafujiadu na Zánbia. Nha mai fuji di Namíbia duránti ténpu di géra i el kumesa ta faze párti di Organizason di Povu di Sudésti di Áfrika (SWAPO). Kel organizason li éra kóntra kel govérnu di Áfrika di Sul ki staba na puder na Namíbia na kel ténpu.

Duránti kes primeru 15 anu di nha vida, N mora na txeu kanpu di rafujiadu. Kes jóven di kel organizason na kes kanpu, éra trenadu pa es ser kes primeru na luta pa liberdadi. N inxinadu ôdia pesoas branku.

Kantu N tinha 11 anu, N kria faze krisma na un igreja ki tinha na kel kanpu. N pâpia ku un padri, má el insentiva-m pa N ka faze kel-la. Di la pa dianti, N bira ateu. Ku 15 anu, amor ki N tinha pa múzika reggae i gana di kaba ku kes injustisa ki kes afrikanu negru ta sufreba, pô-m ta entra pa un grupu di rastafári. N dexa nha kabélu kria na stilu rastafári i N kumesa ta fuma padjinha. N para di kume karni i N kumesa ta difende liberdadi di kes algen negru. Má N kontinua ta ten konportamentu seksual mariadu i ta odja filmis violéntu. Tanbê N ta falaba maus palavra.

MODI KI BÍBLIA MUDA NHA VIDA: Na anu di 1995, kantu N tinha uns 20 anu, N kumesa ta pensa sériu na manera ki N ta lebaba nha vida. N ta studaba tudu publikason rastafári ki N ta atxaba. Alguns di es ta papiaba sobri Bíblia, má pa mi kes splikason ka ta fazeba sentidu. Pur isu N disidi lé Bíblia mi sô.

Dipôs un amigu ki éra rastafári da-m un livru ki Tistimunhas di Jeová ta uzaba pa studa Bíblia. N studa-l mi sô, djuntu ku Bíblia. Más tardi, N konxe Tistimunhas di Jeová i N kumesa ta studa Bíblia ku es.

Ku txeu sforsu N konsigi para di fuma i di bebe dimás. (2 Coríntios 7:1) N midjora nha manera di bisti i konpo, N korta nha kabélu, N dexa di odja pornografia i filmis violéntu i N para di fla maus palavra. (Efésios 5:3, 4) Ku ténpu ti N dexa di faze diskriminason. (Atos 10:34, 35) Kuzê ki djuda-m faze kes mudansa li, foi dexa di obi kes múzika ki ta papiaba sobri rasismu i para di pasa ténpu ku kes amigu ki ta tenta influensiaba mi pa N volta pa kel stilu di vida ki N tinha antis.

Dipôs di faze kes mudansa li, N bai pa un Salon di Reinu di Tistimunhas di Jeová i N pidi si N podia fazeba párti di ses relijion. Es kumesa ta studa Bíblia ku mi. Nha família ka fika kontenti kantu N disidi bira un Tistimunha di Jeová. Nha mai fla-m ma N podia skodjeba kalker otu relijion, ménus Tistimunhas di Jeová. Un di nhas tiu, ki tinha un puzison inportanti na govérnu ta staba sénpri ta kritika nha disizon di bira un Tistimunha di Jeová.

Má, prende sobri modi ki Jizus ta trataba algen i aplika kes konsedju ki el da na nha vida, djuda-m lida ku opozison na nha família. Konpara kel ki Tistimunhas di Jeová ta inxina ku kel ki Bíblia ta fla, konvense-m ma dja N atxaba relijion verdaderu. Pur izénplu, es ta obi ku kel órdi di Bíblia di prega pa otus algen. (Mateus 28:19, 20; Atos 15:14) I es ka ta mete na pulítika. — Salmo 146:3, 4; João 15:17, 18.

BENSONS KI N RESEBE: Prende vive di akordu ku kel ki Bíblia ta inxina djuda-m txeu. Pur izénplu, kantu N para di fuma padjinha, N konsigi popa txeu dinheru. Gósi N ka ta xinti más kes efeitu mariadu di dróga i N ten bon saúdi.

Nha vida gósi ten un obijetivu, ki é un kuza ki N djobe désdi ki N éra jóven. I más inportanti inda, N konsigi bira amigu di Deus. — Tiago 4:8.

“N prende kontrola nha raiba.” — MARTINO PEDRETTI

IDADI: 43

PAÍS KI EL NASE: AUSTRÁLIA

SE VIDA NA PASADU: TRAFIKANTI DI DRÓGA

MODI KI ÉRA NHA VIDA ANTIS: Kantu mi éra pikinoti, nha família ta mudaba txeu. N mora na alguns sidadi pikinoti, na un sidadi grandi, i duránti algun ténpu N mora na un párti izoladu di Austrália djuntu ku povu aboríjini. N ten bons lenbransa di kel ténpu ki N pasa djuntu ku nhas primu i nhas tiu ta piska, ta kasa, ta faze feraméntas pa kasa i otus kuza di madera.

Nha pai éra bokseru i el kumesa ta inxina-m luta désdi pikinoti. Violénsia bira ta faze párti di nha vida. Kantu mi éra jóven, N ta pasaba txeu ténpu ta bebe na bar. Mi ku nhas amigu, nu gostaba di ranja géra. Nu ta uzaba faka i taku di baseball pa nu atakaba grupus di ti 20 algen ô más.

N ta ganhaba dinheru ta bende dróga i kuzas robadu pa kes algen ki ta trabadjaba na kais. Tanbê N ta kobraba kes algen ki ta debeba trafikantis dinheru i N ta uzaba pistóla ku spingarda pa poba es medu. Nha obijetivu éra bira un asasinu. Sénpri N ta flaba nha kabésa: mata antis ki es mata-u.

MODI KI BÍBLIA MUDA NHA VIDA: Kantu mi éra pikinoti, N ta obiba ta fladu di Tistimunhas di Jeová. N ta lenbra ma ku uns 20 anu, N pergunta nha mai si el sabia na undi ki N pode atxaba es. Dôs dia dipôs un Tistimunha di Jeová ki txoma Dixon konku na nha pórta. Dipôs ki nu pâpia, el konvida-m pa N ba sisti un di ses runion. Dja ten más di 20 anu ki N bai kel runion i désdi kel ténpu nunka más N ka para di sisti runion. Tudu pergunta ki N ta fazeba, Tistimunhas di Jeová ta respondeba mi ku Bíblia.

N fika txeu kontenti di prende ma Jeová ta preokupa ku pesoas, ti ku kes algen mau. (2 Pedro 3:9) N diskubri ma el é un Pai amorozu ki ta kuidaba di mi, sikrê otus algen ka faze-l. Tanbê N fika kontenti di sabe ma si N mudaba di vida, el ta purduaba nhas pekadu. Kel ki sta skrebedu na Efésios 4:22-24 mexe txeu ku mi. Kel testu li insentiva-m pa N ‘bandona kel manera di ser antigu’ i pa N ‘bisti di kel manera di ser novu, ki kriadu sima Deus ta krê’.

Ka foi fásil muda nha vida. Duránti simana N ka ta uzaba dróga. Má óras ki N ta staba djuntu ku nhas amigu na fin di simana, N ta kababa pa uza dróga. N da kónta ma si N kria mudaba nha vida, N tinha ki afastaba di nhas amigu. Pur isu N disidi muda pa un otu párti di Austrália. Alguns di nhas amigu pidi pa bai ku mi i N fla ma si. Timenti nu staba ta viaja, es kumesa ta fuma padjinha i es oferese-m. N fla-s ma N ka sta uzaba dróga más i N kontinua ta viaji mi sô. Más tardi, N diskubri ma lógu dipôs nhas amigu ba furta na un banku i es staba ta uza un pistóla.

BENSONS KI N RESEBE: Dipôs ki N kaba ku kes amizadi, fika más fásil faze kes mudansa ki N sta mesteba. Na anu 1989 N batiza i N bira Tistimunha di Jeová. Dipôs ki N batiza, nha irman, nha mai i nha pai tanbê bira Tistimunha di Jeová.

Dja ten 17 anu ki mi é kazadu i N ten três fidju ki ta da-m txeu alegria. N prende kontrola nha raiba, sikrê óras ki otus algen ta provoka-m. I N prende ama pesoas di ‘tudu tribu, povu i língua’. (Apocalipse 7:9) N ta xinti ma kes palavra di Jizus li é verdadi. El fla: ‘Si nhos kontinua na nhas palavra, nhos é nhas disiplu di verdadi, i nhos ta konxe verdadi i verdadi ta liberta nhos.’ — João 8:31, 32.

[Lejenda na pájina 19]

Kuzê ki djuda-m faze kes mudansa li, foi dexa di obi kes múzika ki ta papiaba sobri rasismu

[Lejenda na pájina 20]

Mi ku nhas amigu, nu gostaba di ranja géra. Nu ta uzaba faka i taku di baseball pa nu atakaba grupus di ti 20 algen ô más