Bíblia ta muda vida di algen

MODI ki un jóven ki tinha un vida difísil kantu el éra pikinoti atxa un obijetivu na vida? Modi ki un jóven rebéldi bira ta prega notísias sábi? Odja respósta na kes stória ki sta dibaxu.

“N mesteba txeu di amor i karinhu.” — INNA LEZHNINA

ANU KI EL NASE: 1981

PAÍS KI EL NASE: RÚSIA

SE VIDA NA PASADU: VIDA DIFÍSIL KANTU EL ÉRA MININU

MODI KI ÉRA NHA VIDA ANTIS: Nha mai ku nha pai é surdu i N nase surda tanbê. Kes primeru 6 anu di nha vida éra sábi. Má dipôs nha mai ku nha pai divôrsia. N fika txeu tristi pamodi sikrê mi éra pikinoti, dja N ta ntendeba kuzê ki éra divórsiu. Nha pai ku nha irmon más grandi kontinua ta mora na Troitsk. Nha mai bai mora na Chelya­binsk i el leba-m djuntu ku el. Dipôs di un ténpu el torna kaza. Nha padrastu ta bebeba txeu dimás, i el ta sotaba mi ku nha mai.

Na anu 1993, nha irmon más grandi ki N krê txeu móre fogadu. Kel kuza li kaba ku nha família. Nha mai kumesa ta bebe txeu. Nton, N kumesa ta djobe un vida midjór. N mesteba txeu di amor i karinhu. N fika ta bai pa igrejas diferenti pa N djobe konsolu má N ka atxa.

MODI KI BÍBLIA MUDA NHA VIDA: Kantu N tinha 13 anu, un koléga di skóla, ki staba ta studa Bíblia ku Tistimunhas di Jeová, konta-m alguns stória di Bíblia. N fika kontenti di prende sobri alguns algen ki Bíblia ta pâpia di el, sima Nué i Jó, ki sirbi Deus sikrê ku difikuldadis. N kumesa ta studa Bíblia ku Tistimunhas di Jeová i ta sisti ses runion.

Kantu N kumesa ta studa Bíblia, nhas odju abri ku kes verdadi sábi. N fika txeu kontenti kantu N prende ma Deus ten un nómi. (Salmo 83:18) N fika dimiradu kantu N odja ma Bíblia ta pâpia di manera izatu sobri kuzas ki ta kontise na ‘ténpu di fin’. (2 Timóteo 3:1-5) I N xinti sábi dimás kantu N prende sobri speransa di resureison. Imajina, N ta torna ben odja nha irmon! — João 5:28, 29.

Irmons ku irmans na kongregason nkoraja-m txeu i N sabia ma kel-li tinha ki ser relijion verdaderu. Na anu 1996, N batizadu i N bira Tistimunha di Jeová.

Nha família ta fazeba mi opozison i ka foi fásil lida ku kel-la. Otu kuza ki mexe txeu ku mi, é pamodi na anu 2003, nha irmon más novu, ki ta baba ku mi pa runion, móre fogadu tanbê. Má irmons ku irmans djuda-m txeu.

BENSONS KI N RESEBE: Dja ten 6 anu ki N sta kazadu ku un bon irmon, ki txoma Dmitry. Nu ta sirbi na filial di Tistimunhas di Jeová na São Petersburgo. Gósi nha mai ku nha padrastu ta ruspeta nhas krénsa más txeu.

N ta xinti kontenti di konxe Jeová! Gósi N ten un obijetivu na vida pamodi N ta sirbi-l.

“N tinha txeu pergunta ki ta preokupaba mi.” — RAUDEL RODRÍGUEZ RODRÍGUEZ

ANU KI EL NASE: 1959

PAÍS KI EL NASE: KUBA

SE VIDA NA PASADU: RABELA KÓNTRA PULÍTIKA DI SE PAÍS

MODI KI ÉRA NHA VIDA ANTIS: N nase na Kuba na sidadi di Havana, i N kriadu na un zóna póbri ki tinha txeu briga na rua. Sima N ba ta kria, N kumesa ta gosta di judô i di otus disportu di luta.

N tinha bons nóta na skóla i nha mai ku nha pai insentiva-m pa N bai universidadi. Kantu N staba la, N kumesa ta atxa ma pulítika di nha país mesteba muda i N kaba pa rabela. Mi ku un koléga di skóla da un pulísia pankada pa nu furta-l se arma. Pamodi kel-li, kel pulísia fika ku pankada gravi na kabésa. Nu podu prézu i nu dadu péna di mórti. I éra un grupu di trópa ki ta ba fazeba kel-la ku nos. N tinha sô 20 anu i dja N staba kuazi ta móre!

Kantu N staba mi sô la na kel séla, N ba ta trena modi ki N ta ajiba dianti di kes trópa. N ka kria mostraba ma N staba ku medu. Má tanbê N tinha txeu pergunta ki ta preokupaba mi. N fika ta pensa: ‘Pamodi ki ten txeu injustisa na mundu? Vida é sô kel-li?’

MODI KI BÍBLIA MUDA NHA VIDA: Dipôs, kel péna di mórti mudadu pa 30 anu di kadia. É na kel ténpu la ki N konxe alguns Tistimunha di Jeová, ki staba na kadia tanbê pamodi ses krénsa. N fika dimiradu ku manera ki es ta konportaba. Es éra korajozu, má simé sénpri es ta ajiba na pas. Es podu na kadia di manera injustu, má es ka bira rebéldi i nen es ka fika marguradu.

Tistimunhas di Jeová inxina-m ma Deus ten un futuru sábi pa nos. Es mostra-m na Bíblia ma Deus ta ben poi Téra ta bira un paraízu i ka ta ben ten más krimi nen injustisa. Es inxina-m ma Téra ta ben sta xeiu di algen dretu, ki ta ben ten oportunidadi di vive pa tudu ténpu di manera perfetu. — Salmo 37:29.

N gostaba txeu di kes kuza ki N staba ta prende ku Tistimunhas di Jeová, má N ta atxaba ma nunka N ka ta podia ser sima es. N ta atxaba ma nunka N ka ta podia para di mete na pulítika nen ser un algen mansu, pur isu N disidi lé Bíblia mi sô. Kantu N tirmina, N da kónta ma Tistimunhas di Jeová é úniku povu ki ta konporta sima kes primeru sigidor di Jizus.

Na nha studu di Bíblia, N odja ma N mesteba faze mudansas grandi. Pur izénplu, N ta kustumaba ta fla maus palavra, pur isu N mesteba muda nha manera di pâpia. Tanbê N tinha ki para di fuma i di mete na pulítika. Ka foi fásil faze kes mudansa li. Má ku ajuda di Jeová, N konsigi poku-poku.

Un di kes kuza más difísil pa mi foi prende kontrola nha manera di ser. Ti inda N ta ora pa Jeová djuda-m kontrola nha kabésa. Alguns testu di Bíblia ta djuda-m txeu, sima Provérbios 16:32, ki ta fla: ‘Ken ki ka ta xatia faxi é midjór di ki un ómi balenti, i ken ki ta kontrola se kabésa é midjór di ki un algen ki toma un sidadi.’

Na anu 1991, N batizadu i N bira Tistimunha di Jeová. N batizadu na un tanki di agu na kadia. Na kel otu anu mi ku más alguns prézu nu libertadu di kadia i nu mandadu pa Spanha pamodi nu tinha alguns família la. Kantu N txiga la, N kumesa ta sisti runion di Tistimunhas di Jeová lógu. Es resebe-m ku txeu amor ki ta parseba ma dja tinha txeu anu ki nu konxeba kunpanheru. Es djuda-m kumesa un vida novu.

BENSONS KI N RESEBE: Gósi N ta xinti filís pamodi N ta sirbi Deus djuntu ku nha mudjer i nos dôs fidju-fémia. N ten priviléjiu di uza kuazi tudu nha ténpu pa djuda otus prende sobri Bíblia. Alvês N ta pensa na kel jóven ki mi éra i ki staba kuazi ta móre. I N ta xinti gratidon pa kel ki N ten oji. Alén di N sta bibu, N ten un speransa. N tene gana di odja kel promésa di Paraízu ta kunpri i di odja justisa na Téra undi ki ‘ka ta ten más mórti’. — Apocalipse 21:3, 4.

[Lejenda]

“N fika txeu kontenti kantu N prende ma Deus ten un nómi”

[Fotu]

Mi ku nha maridu nu gosta di pâpia ku surdus sobri asuntus di Bíblia na língua di sinal