Sima dja nu flaba na un notísia, na 2022 faze 25 anu ki Tistimunhas di Jeová ten un pájina ofisial na internet. Na dia 27 di agostu di 2012, nu lansa un novu verson di jw.org. Dja ten 10 anu ki kel-li kontise. Kel grupu di artigu li di três párti, ta ben mostra modi ki kel novu verson di jw.org sta ta djuda milhons di pesoas na mundu interu.

Vídius: Na kongrésu di 2012, lansadu na DVD dôs vídiu di un grupu di vídiu novu ku téma Ben ser amigu di Jeová. Má ku ténpu é poku algen ki fika ta uza DVD i tanbê fika más karu faze-l. Na 2012, kantu nu lansa kel novu verson di jw.org, fika más fásil poi kes vídiu disponível pa pesoas. Na janeru di 2013, lansadu na formatu dijital na jw.org, más un vídiu di kel grupu di vídiu Ben ser amigu di Jeová ku téma Faze orason kalker óra. Dipôs di kel-li, dja lansadu más di 40 vídiu di kel grupu di vídiu.

Vídiu Pamodi ki nu debe studa Bíblia? tanbê lansadu na formatu dijital na 2013. Kel vídiu li, sta ta da bons rezultadu na pregason, i tanbê el bira ta faze párti di nos Feraméntas prinsipal pa inxina. Désdi kel ténpu, kes vídiu ki sta ta lansadu na jw.org, sta djuda txeu na trabadju di pregason. Pur izénplu, na agostu di 2014, duránti un kanpanha pa distribui kel folhetu pa djuda pesoas konxe jw.org, pesoas diskarega ô odja uns 15 milhon di vídiu.

Un irmon ki trabadja na faze kel novu verson di jw.org fla: “Nu da kónta ma Jeová staba ta pripara-nu pa kuzas ki staba ta ben kontise na futuru. I kel-li bira nos fé más fórti. Nu ka ta imajinaba ma kel trabadju ki nu staba ta faze pa poi kes vídiu disponível pa pesoas, ta sérba txeu inportanti na futuru.” Pur izénplu, na otubru di 2014, lansadu JW Broadcasting i na kel mésmu mês diskaregadu más di 37 milhon di vídiu. Na 2020, kantu COVID-19 kumesa ta spadja, pesoas odja ô diskarega mutu más vídiu na jw.org. Na 2022, tudu mês diskaregadu más di 260 milhon di vídiu na jw.org.

Publikasons na formatu dijital: Na kes últimu anu, pesoas pasa ta gosta más txeu di lé publikasons na internet ô na aplikativus, envês di na papel. Désdi ki nu lansa kel novu verson di jw.org na 2012, pesoas ta pode lé nos revistas na internet antis di es resebe-s na papel. Tanbê, kes publikason na formatu dijital, djuda txeu kantu fazedu aplikativu JW Library na 2013. JW Library i jw.org, é bons feraménta pa djuda pesoas lé i studa nos publikasons na formatu dijital.

Antis, kes publikason ki nu ta lansaba na kongrésu ta fikaba disponível na jw.org i na JW Library sô na janeru di kel otu anu. Má, na kongrésu di 2015, tudu algen fika txeu kontenti di sabe ma es pode diskaregaba lógu na formatu dijital kes publikason ki lansadu na kongrésu. Na kel anu, lansadu livru Jizus é kaminhu verdadi i vida, bruxura Volta pa Jeová, i vídiu Kuzê ki é amor di verdadi?. Na prugrama di JW Broadcasting di maiu di 2016, irmon Anthony Morris di Grupu Enkaregadu di Óbra lansa bruxura Respóstas pa 10 pergunta ki jóvens ta faze, i el fla ma kel bruxura staba disponível kel óra pa diskaregaba na jw.org. Kel-li é primeru bês ki un publikason lansadu pa irmons na mundu interu omésmu ténpu.

Organizason di Jeová dja ten txeu ténpu ta uza tekinolojia pa prega notísias sábi, i pa djuda nos irmons ku irmans na mundu interu. Nu ta fika rei di kontenti di odja modi ki jw.org sta ta uzadu pa da “kumida na ténpu sértu.” — Mateus 24:45.

• Vídius ki diskaregadu tudu mês

• Kantu algen pur dia ki ta vizita jw.org tudu mês

• Vídiu Faze orason kalker óra lansadu na janeru di 2013

• Aplikativu JW Library lansadu na otubru di 2013

• Fazedu un kanpanha na mundu interu pa distribui kel folhetu pa djuda pesoas konxe jw.org na agostu di 2014

• JW Broadcasting lansadu na otubru di 2014

• Kes kuza ki ta lansadu na kongrésu fika ta podu na formatu dijital na maiu di 2015

• Bruxura Respóstas pa 10 pergunta ki jóvens ta faze lansadu na mundu interu na maiu di 2016