Xinyoʼlaak saʼ jun chʼina tenamit li wank saʼ xteepal Chiapas (Mexico) li naxkʼabʼaʼi San Juan Chancalaito. Linjunkabʼal ebʼ aj Maya jun chʼuut aj ral chʼochʼ li naxkʼabʼaʼi Chol. Linnaʼ linyuwaʼ xeʼwank kabʼlaju ebʼ li ralal xkʼajol, ut laaʼin li roʼ alalbʼej. Naq kachʼinin chaq rikʼinebʼ li was ut ebʼ li wiitzʼin, naqatzol chaq li Santil Hu rikʼinebʼ laj Testiiw re li Jehobʼa. Ra xyeebʼal, abʼan laaʼin inkʼaʼ xinyuʼami li naʼlebʼ li xintzol saʼ li Santil Hu.

Naq wank chaq 13 chihabʼ we, ak nawoksi li bʼan li nakanobʼresink u ut ninʼelqʼak. Oxlaju wank we naq xinʼelelik saʼ li wochoch, xinkohin saʼ jalan jalanq chi naʼajej chi inkʼaʼ chʼolchʼo chiwu bʼar tinkanaaq. Naq wank 16 chihabʼ we, xinʼok chi kʼanjelak saʼ jun li naʼaj bʼarwiʼ nekeʼraw li mariwaan. Naq jun chihabʼ tana wokik chi kʼanjelak saʼ li naʼaj aʼan, saʼ jun qʼoqyink, wiibʼ oxibʼ li winq re jun chʼuut li xikʼ nokooʼeʼril li wank naabʼal puubʼ rikʼinebʼ, xoʼexpuubʼa naq yooko xnumsinkil naabʼal li mariwaan saʼ jun li jukubʼ. Re xkolbʼal wiibʼ chiruhebʼ, xinkut wibʼ saʼ li nimaʼ ut xinumxik rubʼel haʼ toj reetal xinxkʼam xkawil roq li nimaʼ. Chirix aʼin, xinʼeelelik saʼ li tenamit Estados Unidos.

Naq ak wankin aran, inkʼaʼ xinkanabʼ xkʼayinkil li bʼan li nakanobʼresink u ut xchʼikbʼal wibʼ saʼ chʼaʼajkilal. Naq wank 19 chihabʼ we, xineʼxchap ut xineʼxchʼik saʼ tzʼalam xbʼaan elqʼak ut xbʼaan naq ximkamsi raj jun li qas qiitzʼin. Saʼ li tzʼalam xinjunaji wibʼ rikʼin jun chʼuut chi qas qiitzʼin li maaʼusebʼ xnaʼlebʼ ut inkʼaʼ ninkanabʼ xyuʼaminkil li raaxiikʼ. Xbʼaan aʼin, li nekeʼjolomink re li tzʼalam xineʼxtaqla saʼ jun chik li tzʼalam li jwal kʼaakʼalenbʼil chiʼus li wank sa li tenamit Lewisburg (Pensilvania).

Saʼ li tzʼalam re Lewisburg, kʼajoʼ naq xyibʼoʼk wiʼ chik ru linnaʼlebʼ. Xbʼaan naq ak tzʼiibʼanbʼil chiru lintibʼel reetalil jun chʼuut li maaʼusebʼ xnaʼlebʼ, inkʼaʼ xchʼaʼajkoʼk chiwu xtawbʼalebʼ li wankebʼ saʼ li tzʼalam ut wank wiʼ chik rikʼinebʼ. Kʼajoʼ wiʼ chik naq ninyuʼami li raaxiikʼ ut inkʼaʼ ninkanabʼ xchʼikbʼal wibʼ saʼebʼ li pleet. Saʼ jun kutan, xinchʼik wibʼ chi pleetik saʼ xyanqebʼ li junchʼol chi chʼuut li maaʼusebʼ xnaʼlebʼ saʼ xnubʼaal li tzʼalam, xqoksi bʼolbʼokil cheʼ ut bʼolbʼokil chʼiichʼ. Kʼajoʼ xyibʼal ru li xqabʼaanu. Ebʼ laj kʼaakʼalenel preex xoʼexpuubʼa rikʼin sibʼ li naxkʼabʼaʼi Gas Lacrimogeno re naq tqakanabʼ pleetik. Moqon chik, li nekeʼjolomink re li tzʼalam xineʼxchʼik saʼ jun chik li naʼaj latzʼ ru bʼarwiʼ nekeʼchʼikeʼk laj preex li xiwxiw ruhebʼ. Kʼajoʼ naq ninjosqʼok chaq saʼ junpaat ut yibʼ ru ninʼaatinak. Ninʼok chi pleetik chirix yalaq kʼaru. Li xyaalalil, aʼan naq nawulak chiwu li maaʼusilal. Ut inkʼaʼ narahoʼk inchʼool chi xbʼaanunkil.

Saʼ li naʼaj bʼarwiʼ xineʼxchʼik, tzʼaptzʼo ninumsi chixjunil li kutan. Joʼkan naq xinʼok rilbʼal xsaʼ li Santil Hu yal re xnumsinkil li hoonal. Chirix chik aʼin, jun li ixq aj kʼaakʼalenel preex kixkʼe we li tasal hu Usted puede vivir para siempre en el paraíso en la Tierra. a Naq xinʼok rilbʼal xsaʼ li tasal hu aʼin li naʼaatinak chirix li Santil Hu, timil timil xinʼok xjultikankil chixjunil li xintzol chaq saʼ linkachʼinal rikʼinebʼ laj Testiiw. Xinkʼoxla naq saʼ xkʼabʼaʼ linnaʼlebʼ xinbʼaanu naabʼal li maaʼusilal. Xinkʼoxlahebʼ ajwiʼ linjunkabʼal. Xbʼaan naq wiibʼ rehebʼ li wanabʼ xeʼok joʼ aj Testiiw, xinye: «Aʼanebʼ teʼwanq xyuʼam chi junelik». Joʼkan naq xinkʼoxla: «Kʼaʼut naq laaʼin inkʼaʼ?». Saʼ li hoonal aʼan xinkʼoxla chiʼus naq tinjal linyuʼam.

Abʼanan, re xjalbʼal linyuʼam ninnaw naq tento tineʼxtenqʼa. Joʼkan naq, xbʼeenwa xintijok chiru li Jehobʼa ut xintzʼama re naq tinxtenqʼa. Chirix aʼin, xintaqla jun li esil hu saʼ xmolam laj Testiiw re li Jehobʼa re Estados Unidos re xpatzʼbʼal naq teʼxkʼe intzolbʼal chirix li Santil Hu. Li molam kixpatzʼ re jun li chʼuut li wank nachʼ bʼarwiʼ wankin naq tineʼrulaʼani. Saʼebʼ li kutan aʼan, kaʼajwiʼ linjunkabʼal naru nekeʼchalk chi wulaʼaninkil. Joʼkan naq jun aj Testiiw re li chʼuut aʼin kiʼok xtaqlankil li esil hu re xwaklesinkil inchʼool ut ebʼ li tasal hu li nekeʼaatinak chirix li Santil Hu re naq tinkawresi wibʼ re xjalbʼal linyuʼam.

Xintaw ru naq tento tinkanabʼ li chʼuut li maaʼusebʼ xnaʼlebʼ bʼarwiʼ xinwank chiru naabʼal chihabʼ. Li najolomink re li chʼuut wank ajwiʼ saʼ li naʼaj bʼarwiʼ wankin, joʼkan naq xinjilok chixkʼatq naq yooko chi hilank ut xinye re naq tinʼoq joʼ aj Testiiw re li Jehobʼa. Xsachk inchʼool naq kixye we: «Wi tzʼaqal yaal li nakaaye, bʼaanu. Inkʼaʼ tinram chaawu kʼanjelak chiru li Yos. Abʼan wi yookat xkʼoxlankil xkanabʼankil li chʼuut, ak nakaanaw kʼaru taakʼul».

Naq kinumeʼk wiibʼ chihabʼ, li nekeʼkʼanjelak saʼ li tzʼalam keʼxkʼe reetal naq xinʼok xjalbʼal linnaʼlebʼ. Joʼkan naq, chaabʼilebʼ chik wikʼin. Jun eetalil, naq nikineʼxkʼam saʼ li tzʼeqlebʼaal inkʼaʼ chik nekeʼxbʼakʼ li wuqʼ. Joʼkan ajwiʼ jun rehebʼ aj kʼaakʼalenel preex kijilok chaq wikʼin ut kixwaklesi inchʼool re naq tinkʼe inqʼe re xjalbʼal innaʼlebʼ. Joʼkan ajwiʼ, li nekeʼjolomink re li tzʼalam xineʼxnumsi saʼ jun chik li naʼaj li moko kʼaakʼalenbʼil ta chik chiʼus, ut aran jun chihabʼ chik xinwank re xtojbʼal inmaak. Saʼ li chihabʼ 2004, naq ak laajebʼ chihabʼ wokik saʼ tzʼalam, xinʼelk ut xineʼxtaqla wiʼ chik saʼ li tenamit Mexico saʼ jun li bʼelebʼaal chʼiichʼ re li tzʼalam.

Naq ak wankin Mexico, xintaw jun li Chʼutlebʼaal Kabʼl rehebʼ laj Testiiw re li Jehobʼa. Naq xinwulak xbʼeen sut saʼ li chʼutam, tiqtookin rikʼin li tʼikr li nakʼemank chirixebʼ laj preex xbʼaan naq kaʼajwiʼ aʼan chaabʼil bʼayaq ru. Usta jalan li wilobʼaal, ebʼ laj Testiiw xineʼxkʼul chi anchal xchʼool. Naq xinexkʼul chi sa saʼ xchʼoolebʼ, xwekʼa naq wankin saʼ xyanq ebʼ li tzʼaqal aj paabʼanel (Juan 13:35). Saʼ ajwiʼ li kutan aʼin, ebʼ li cheekel winq re li chʼuut xeʼxkʼubʼ naq jun aj Testiiw tixkʼe intzolbʼal chirix li Santil Hu. Naq kinumeʼk jun chihabʼ, saʼ 3 re li po Septiembre 2005, xkubʼeek inhaʼ ut xinʼok joʼ aj Testiiw re li Jehobʼa.

Saʼ Enero 2007, xinʼok chi kʼanjelak joʼ aj kʼamolbʼe saʼ li puktesink, malaj, xkʼebʼal 70 hoonal rajlal po chi xkʼutbʼal li yaal chirix li Santil Hu chiruhebʼ li poyanam. Saʼ li chihabʼ 2011 xinwulak saʼ li tzolebʼaal Escuela Biblica para Varones Solteros (li nanawmank anaqwan joʼ Li tzolok choʼq rehebʼ li nekeʼkʼamok bʼe chi xpuktesinkil li Xʼawabʼejilal li Yos). Li tzolebʼaal aʼin jwal xinxtenqʼa re naq tinbʼaanu chiʼus linkʼanjel saʼ li chʼuut.

Saʼ li chihabʼ 2013 xinsumlaak rikʼin li xPilar, li wixaqil li raaro inbʼaan. Naq ninseeraqʼi re linyuʼam, chi seʼseʼ ru naxye we naq inkʼaʼ naxpaabʼ naq joʼkan chaq linnaʼlebʼ. Maajunwa chik ninbʼaanu li ninbʼaanu chaq junxil. Li wixaqil ut laaʼin naqakʼe reetal naq linyuʼam anaqwan, aʼan reetalil naq li Santil Hu wank xwankil re jalok yuʼam (Romanos 12:2).

Nawekʼa naq choʼq we li aatin li kixye li Jesus saʼ Lucas 19:10. Aran kixye naq kichalk «chi xsikʼbʼal ut chi xkolbʼal li bʼarwan sachenaq». Anaqwan nawekʼa naq wank chik xyaalal linyuʼam. Xinkanabʼ xyuʼaminkil li raaxiikʼ. Saʼ xkʼabʼaʼ li xintzol saʼ li Santil Hu, anaqwan nawoksi linyuʼam re xbʼaanunkil li us. Ninkʼam wibʼ saʼ usilal rikʼinebʼ chixjunil, ut li jwal xloqʼ chiwu, aʼan naq wankin choʼq ramiiw li Jehobʼa, laj Yobʼtesihom we.