CHANRU XKANABʼANKIL LI XIKʼ ILOK
3 | Michʼ saʼ laakʼaʼuxl li xikʼ ilok
Li Santil Hu naxye:
«Cheʼakʼobʼresi leenaʼlebʼ re naq teenaw xkʼeebʼal reetal kʼaru naraj li Yos: aʼ li bʼarwan us, nawulak chiru ut tzʼaqal re ru» (ROMANOS 12:2).
Kʼaru naraj xyeebʼal?
Wank xwankil chiru li Yos li naqakʼoxla (Jeremías 17:10). Moko tzʼaqal ta naq weent tqabʼaanu rikʼin li naqaye ut li naqabʼaanu. Saʼ xkʼabʼaʼ naq li xikʼ ilok natiklaak saʼ li qakʼaʼuxl ut li qachʼool, aajel ru xmichʼbʼal yalaq kʼaru li naʼlebʼ li tooxkʼam chi xyuʼaminkil aʼin. Kaʼajwiʼ chi joʼkan tooruuq xʼakʼobʼresinkil li qakʼaʼuxl ut xkanabʼankil li xikʼ ilok.
Li tatruuq xbʼaanunkil:
Tzʼil rix kʼaru nakaawekʼa ut nakaakʼoxla chirixebʼ li junchʼol, xbʼeen xbʼeen li jalanebʼ xtenamit ut xwanjik abʼan maabʼalaqʼi aawibʼ. Kʼoxla aʼin: «Chanru nawilebʼ? Ma ninnawebʼ ru chiʼus malaj yal ninpaabʼ li nekeʼxye chirixebʼ malaj li xikʼ ilok nataqlank saʼ inbʼeen?». Tzʼeqtaana chixjunil li naʼlebʼ li naʼilmank saʼ internet li naru naxbʼaanu naq t-oq li xikʼ ilok ut li raaxiikʼ saʼ laachʼool.
Li Raatin li Yos naru nokooxtenqʼa re naq tqisi saʼ li qachʼool ut li qakʼaʼuxl li xikʼ ilok
Maare tchʼaʼajkoʼq chiqu xnawbʼal kʼaru naqakʼoxla ut naqekʼa. Abʼan li Raatin li Yos naru nokooxtenqʼa xbʼaan naq «narajla joʼchʼinal joʼnimal li nareekʼa ut naxkʼoxla li chʼoolej» (Hebreos 4:12). Tzol li naxye li Santil Hu ut juntaqʼeeta li naxye rikʼin li nakaakʼoxla. Tojaʼ naq yal aaqʼe chi xkʼambʼal aawe rikʼin li naxye. Li Santil Hu naru nokooxtenqʼa chi «xjukʼbʼal chixjunil li xkʼanjel li maaʼus» saʼ li qakʼaʼuxl ut li qachʼool, joʼ li xikʼ ilok (2 Corintios 10:4, 5).
