1. Chanru chaq li xwanjik li Apostol Juan saʼ xraqik li xkutankilebʼ li Apostol?

SAʼ XRAQIK li xkutankilebʼ li Apostol, chʼaʼaj chaq li xwanjik li Apostol Juan. Chʼina cheek chik chiʼus, wank chaq saʼ tzʼalam saʼ Patmos jun li naʼaj sutsu rikʼin haʼ ut maare kaʼajwiʼ aʼan chik li Apostol li toj yoʼyo (Apoc. 1:9). Naxnaw naq li xikʼ nekeʼilok re li yaal yookebʼ xbʼalaqʼinkil ut xjachbʼal li chʼuut. Chanchan tawiʼ naq ok ok rehebʼ chi osoʼk laj paabʼanel (Jud. 4; Apoc. 2:15, 20; 3:1, 17).

2. Joʼ naxye saʼ Apocalipsis 7:9-14, kʼaru li xnimal ru moy u kiril laj Juan? (Taawil li jalam u chiru li hu).

² Naq yook chaq xnumsinkil li nimla chʼaʼajkilal aʼin, laj Juan kiril jun li xnimal ru moy u. Saʼ li moy u aʼin, kiril wiibʼ oxibʼ li anjel li nayeemank rehebʼ naq teʼxram li riqʼul li sachok re li nimla rahilal toj reetal teʼxkʼul reetalil jun chʼuut li xmoos li Yos (Apoc. 7:1-3). Li nekeʼokenk saʼ li chʼuut aʼin, aʼanebʼ li 144.000 chi aj paabʼanel li teʼawabʼejinq rochbʼen li Jesus saʼ choxa (Luc. 12:32; Apoc. 7:4). Chirix chik aʼan, laj Juan kiʼaatinak chirix jun chik li chʼuut, li qʼaxal nim joʼkan naq kixye «kinʼilok, ut kinkʼe reetal». Naq kixye li aatin aʼin nakʼutunk naq maare inkʼaʼ naroybʼeni li yook chi rilbʼal. Kʼaru yook chi rilbʼal? Naq «kʼajoʼ xkʼihalebʼ li tenamit! Maaʼani naruhank chi rajlankilebʼ: chalenaqebʼ chaq saʼ chixjunilebʼ xteepal li xtenamit saʼ ruuchichʼochʼ, yalaq chanru nekeʼilok ut nekeʼaatinak, xaqxookebʼ chiru li nimajwal kʼojaribʼaal ut chiru li Karneer» (taayaabʼasi Apocalipsis 7:9-14). Chʼolchʼo naq qʼaxal kisahoʼk saʼ xchʼool naq kixkʼe reetal naq saʼebʼ li kutan chalk re chi mil li poyanam teʼxloqʼoni ru li Jehobʼa.

3. a) Kʼaʼut tento tixkawresi li qapaabʼal li moy u li kiril laj Juan? b) Kʼaru tqatzol saʼ li tzolom aʼin?

 ³ Relik chi yaal naq li moy u aʼin kixkawresi li xpaabʼal laj Juan. Ut qʼaxal tixkawresi ajwiʼ li qapaabʼal, xbʼaan naq li moy u yook chi tzʼaqlok ru saʼebʼ li qakutan. Yooko chi rilbʼal naq chi miyon li poyanam yookebʼ chi ok saʼ li xtenamit li Yos, ebʼ li poyanam aʼin nekeʼroybʼeni naq teʼkoleʼq chiru li nimla rahilal ut teʼwanq xyuʼam chi junelik saʼ li Ruuchichʼochʼ. Saʼ li tzolom aʼin, tqil chanru naq ak numenaq 80 chihabʼ chik anaqwan naq li Jehobʼa kixkʼut chiru ebʼ li xmoos anihebʼ nekeʼtzʼaqonk saʼ li kʼiila tenamit. Tqil ajwiʼ wiibʼ chik li naʼlebʼ chirix li chʼuut aʼin: 1) li xkʼihalil ut 2) naq li nekeʼokenk chisaʼ chalenaqebʼ saʼ chixjunil li Ruuchichʼochʼ. Li naʼlebʼ aʼin tixkawresihebʼ xpaabʼal chixjunilebʼ li nekeʼroybʼeni okenk saʼ li chʼuut aʼin.

4. Kʼaru inkʼaʼ nekeʼxtaw ru ebʼ li paabʼal li nekeʼxye naq nekeʼxpaabʼ li Kriist, ut kʼaru nekeʼxpaabʼ chaq li Yookebʼ chi Tzolok Chirix li Santil Hu?

⁴ Rajlal ebʼ li paabʼal moko nekeʼxkʼut ta naq li Santil Hu naxye naq li kristiʼaan li nekeʼabʼink chiru li Yos teʼwanq xyuʼam chi junelik saʼ li Ruuchichʼochʼ (2 Cor. 4:3, 4). Saʼebʼ li qakutan, li xkʼihalil ebʼ li paabʼal li nekexʼye naq nekeʼxpaabʼ li Kriist nekeʼxkʼut naq chixjunilebʼ li chaabʼil xnaʼlebʼebʼ nekeʼxik saʼ choxa naq nekeʼkamk. Abʼanan, saʼ xraqik li chihabʼ 1800, li chʼina chʼuut chi aj paabʼanel li nekeʼxtzol chaq li Santil Hu ut keʼxjekʼi li hu li nawbʼil ru anaqwan joʼ Laj Kʼaakʼalehom moko joʼkan ta nekeʼxpaabʼ chaq. Keʼxtaw ru naq li Yos tixchʼinaʼusa li Ruuchichʼochʼ ut naq chi miyon ebʼ li poyanam li nekeʼabʼink chiru teʼwanq arin saʼ li Ruuchichʼochʼ, moko saʼ choxa ta. Usta joʼkan, moko saʼ junpaat ta keʼxtaw ru chiʼus anihebʼ li kristiʼaan li nekeʼabʼink chiru li Yos (Mat. 6:10).

5. Kʼaru nekeʼxpaabʼ chaq li Yookebʼ chi Tzolok Chirix li Santil Hu chirixebʼ li 144.000?

⁵ Relik chi yaal, li Yookebʼ chi Tzolok Chirix li Santil Hu xeʼxtaw ajwiʼ ru naq li Raatin li Yos naxkʼut naq wiibʼ oxibʼ «keʼkoleʼk saʼ xyanqebʼ li wankebʼ saʼ ruuchichʼochʼ» re naq teʼawabʼejinq rochbʼen li Jesus saʼ choxa (Apoc. 14:3). Saʼ li chʼuut aʼin nekeʼokenk li 144.000 chi aj paabʼanel li qʼaxal xeʼxkʼe xchʼool ut xeʼxqʼaxtesi li xyuʼam re kʼanjelak chiru li Yos naq xeʼwank saʼ li Ruuchichʼochʼ. Abʼan, anihebʼ teʼokenq saʼ xyanq li kʼiila tenamit?

6. Kʼaru nekeʼxpaabʼ chaq li Yookebʼ chi Tzolok Chirix li Santil Hu chirixebʼ li kʼiila tenamit?

⁶ Laj Juan kiril naq li chʼuut aʼin «xaqxookebʼ chiru li nimajwal kʼojaribʼaal ut chiru li Karneer» (Apoc. 7:9). Naq xeʼril li raqal aweʼ, li Yookebʼ chi Tzolok Chirix li Santil Hu keʼxtaw ru naq li kʼiila tenamit teʼwanq saʼ choxa, joʼebʼ li 144.000. Abʼanan, wi li wiibʼ chi chʼuut aʼin teʼwanq saʼ choxa, kʼaru xjalanil? Choʼq rehebʼ li Yookebʼ chi Tzolok Chirix li Santil Hu, li kʼiila tenamit aʼanebʼ laj paabʼanel li moko keʼxpaabʼ ta chixjunil li xchaqʼrabʼ li Yos naq keʼwank saʼ Ruuchichʼochʼ, usta yaal naq saq chaq bʼayaq ru li xyuʼamebʼ, maare wiibʼ oxibʼ rehebʼ inkʼaʼ keʼelk saʼ xyanq li paabʼal li nekeʼxye naq nekeʼxpaabʼ li Kriist. Joʼkan naq, li Yookebʼ chi Tzolok Chirix li Santil Hu keʼxkʼoxla naq ebʼ li kristiʼaan aʼin moko xeʼkʼanjelak ta chi kaw chiru li Yos re naq teʼruuq awabʼejink rochbʼen li Jesus. Saʼ xkʼabʼaʼ naq moko qʼaxal keʼxra ta li Yos, teʼwanq saʼ choxa chiru li kʼojaribʼaal, abʼan moko teʼkʼojlaaq ta saʼebʼ li kʼojaribʼaal.

7. a) Joʼ nekeʼxkʼoxla chaq li Yookebʼ chi Tzolok Chirix li Santil Hu, anihebʼ raj teʼwanq saʼ li Ruuchichʼochʼ chiru li Jun Mil Chihabʼ? b) Ut, kʼaru nekeʼxpaabʼ chaq chirixebʼ li winq li xeʼwank saʼ li qʼe kutan li inkʼaʼ keʼxtzʼeqtaana li Yos?

⁷ Joʼkan bʼiʼ, anihebʼ raj teʼwanq saʼ li Ruuchichʼochʼ? Li Yookebʼ chi Tzolok Chirix li Santil Hu keʼxkʼoxla naq ak wanqebʼ chik saʼ choxa li 144.000 ut li kʼiila tenamit, naq chi miyon ebʼ li kristiʼaan teʼruuq raj wank saʼ li Ruuchichʼochʼ ut teʼosobʼtesiiq naq yooq chi Awabʼejink li Kriist chiru Jun Mil Chihabʼ. Moko keʼxkʼoxla ta naq ebʼ li kristiʼaan aʼin teʼkʼanjelaq raj chiru li Jehobʼa naq toj maajiʼ natiklaak li awabʼejihom aʼin, chiru  bʼan li Jun Mil Chihabʼ teʼxtzol li xchaqʼrabʼ li Yos. Moqon, li teʼxbʼaanu li naxye li Yos teʼxkʼul li junelik yuʼam saʼ li Ruuchichʼochʼ, abʼan teʼsacheʼq ru li teʼxqʼet ribʼ. Ut chirixebʼ li teʼwanq joʼ «aj jolominel» chiru li jun mil chihabʼ saʼ li Ruuchichʼochʼ, li Yookebʼ chi Tzolok Chirix li Santil Hu keʼxtaw ru naq wiibʼ oxibʼ rehebʼ maare teʼqʼajkamuuq rikʼin li yuʼam saʼ choxa naq traqeʼq li Jun Mil Chihabʼ. Saʼ xyanqebʼ aʼin teʼwakliiq chaq chi yoʼyo li inkʼaʼ xeʼxtzʼeqtaana li Yos li xeʼwank rubʼelaj li xkʼulunik li Jesus saʼ Ruuchichʼochʼ (Sal. 45:17).

8. Bʼar wank li oxibʼ chi chʼuut li nekeʼxpaabʼ chaq li Yookebʼ chi Tzolok Chirix li Santil Hu?

⁸ Joʼkan naq li Yookebʼ chi Tzolok Chirix li Santil Hu keʼxkʼoxla naq wank oxibʼ li chʼuut: 1) li 144.000, li teʼawabʼejinq rochbʼen li Jesus saʼ choxa, 2) li kʼiila tenamit chi aj paabʼanel li moko qʼaxal keʼabʼink ta chiru li Yos li teʼwanq chiru li kʼojaribʼaal ut chiru li Karneer saʼ choxa, ut 3) ebʼ li miyon chi poyanam li teʼxtzol li xchaqʼrabʼ li Yos arin saʼ Ruuchichʼochʼ chiru li Jun Mil Chihabʼ naq yooq chi Awabʼejink li Kriist. * Abʼanan, naq xwulak xhoonalil chiru li Jehobʼa, kixkutanobʼresi li naʼlebʼ aʼin chiruhebʼ li xmoos (Prov. 4:18).

9. a) Kʼaʼut nayeemank naq li kʼiila tenamit wank «chiru li nimajwal kʼojaribʼaal ut chiru li Karneer» usta wankebʼ saʼ Ruuchichʼochʼ? b) Kʼaʼut naq wank tzʼaqal xyaalal li naxchʼolobʼ Apocalipsis 7:9?

⁹ Saʼ li chihabʼ 1935, ebʼ laj Testiiw re li Jehobʼa xeʼxtaw ru chiʼus anihebʼ nekeʼokenk saʼ li kʼiila tenamit li kiril laj Juan saʼ li moy u. Keʼxkʼe ajwiʼ reetal naq moko aajel ta naq li chʼuut aʼin twanq saʼ choxa re naq teʼruuq wank «chiru li nimajwal kʼojaribʼaal ut chiru li Karneer», ut naq li aatin aʼin yal jun eetalil. Usta li nekeʼokenk saʼ xyanq li kʼiila tenamit wanqebʼ saʼ li Ruuchichʼochʼ, wankebʼ«chiru li nimajwal kʼojaribʼaal» wi nekeʼxkʼulubʼa li xwankilal li Jehobʼa joʼ li naʼawabʼejink re li choxachʼochʼ ut nekeʼxkʼe ribʼ rubʼel roq rubʼel ruqʼ (Is. 66:1). Ut wankebʼ «chiru li Karneer» wi wankebʼ xpaabʼal chirix li xkamik li Jesus. Naqataw jun li naʼlebʼ joʼ aʼin saʼ Mateo 25:31, 32. Aran naxye naq «chixjunilebʼ li tenamit» saʼ xyanqebʼ wankebʼ ajwiʼ li maaʼusebʼ xnaʼlebʼ,«talajeʼchʼutubʼaaq chiru» li Jesus ut chiru li xloqʼlaj kʼojaribʼaal. Peʼyaal naq kutan saqenk naq chixjunilebʼ li tenamit aʼin wankebʼ saʼ Ruuchichʼochʼ ut maawaʼ saʼ choxa? Jwal wank xyaalal li keʼxchʼolobʼ ru saʼ 1935. Xbʼaan naq natawmank ru kʼaʼut naq li Santil Hu moko naxye ta naq li kʼiila tenamit nakʼameʼk saʼ choxa. Kaʼajwiʼ naxyeechiʼi li junelik yuʼam saʼ choxa re jun chʼuut: li 144.000 li «teʼawabʼejinq saʼ xbʼeen li ruuchichʼochʼ» rochbʼen li Jesus (Apoc. 5:10).

10. Kʼaʼut tento teʼxnaw li Xchaqʼrabʼ li Jehobʼa li nekeʼokenk saʼ xyanq li kʼiila tenamit naq toj maajiʼ naʼok chi Awabʼejink li Kriist?

¹⁰ Chalen li chihabʼ 1935, ebʼ laj Testiiw re li Jehobʼa naqataw ru naq li kʼiila tenamit li kiril laj Juan saʼ li moy u aʼanebʼ laj paabʼanel li inkʼaʼ nekeʼxtzʼeqtaana li Jehobʼa ut nekeʼroybʼeni li junelik yuʼam saʼ li Ruuchichʼochʼ. Re naq teʼxnumsi li nimla rahilal ut teʼxkol ribʼebʼ «chiru chixjunil li talajkʼulmanq», ebʼ laj paabʼanel aʼin tento naq teʼxnaw li xchaqʼrabʼ li Jehobʼa ut teʼxkʼutbʼesi naq jwal kawebʼ li xpaabʼal naq toj maajiʼ yooq chi Awabʼejink li Kriist chiru li Jun Mil Chihabʼ (Luc. 21:34-36).

11. Kʼaʼut naq wiibʼ oxibʼ rehebʼ li Yookebʼ chi Tzolok Chirix li Santil Hu nekeʼxpaabʼ chaq naq wanqebʼ li winq li inkʼaʼ keʼxtzʼeqtaana li Yos teʼxik tana saʼ choxa naq ak xraqeʼk li Jun Mil Chihabʼ?

¹¹ Joʼ xqil saʼ li raqal 7, wiibʼ oxibʼ rehebʼ li Yookebʼ chi Tzolok Chirix li Santil Hu nekeʼxpaabʼ chaq naq wanqebʼ li winq li inkʼaʼ keʼxtzʼeqtaana li Yos, teʼxik saʼ choxa naq ak xraqeʼk li Jun Mil Chihabʼ. Kʼaʼut naq joʼkan nekeʼxkʼoxla chaq? Aʼin kiyeemank saʼ li hu 15 re Febrero 1913 li nawbʼil ru anaqwan joʼ Laj Kʼaakʼalehom. Joʼkaʼin  xeʼxkʼoxla: wi ebʼ laj paabʼanel li moko keʼxpaabʼ ta chixjunil li xchaqʼrabʼ li Yos teʼxik saʼ choxa, chan put ru naq ebʼ li winq li keʼwank saʼ li qʼe kutan li inkʼaʼ keʼxtzʼeqtaana li Yos kaʼajwiʼ teʼqʼajkamuuq rikʼin li junelik yuʼam arin saʼ Ruuchichʼochʼ? Relik chi yaal, li nekeʼxkʼoxla chalenaq saʼ wiibʼ chi naʼlebʼ bʼarwiʼ xeʼpaltoʼk chaq: 1) li kʼiila tenamit teʼwanq saʼ choxa ut 2) saʼ li kʼiila tenamit teʼokenq laj paabʼanel li moko keʼxpaabʼ ta chixjunil li xchaqʼrabʼ li Yos.

12, 13. Kʼaru nekeʼxtaw ru li yulbʼilebʼ ru joʼ ajwiʼ li kʼiila tenamit chirix li maatan li teʼxkʼul?

¹² Abʼanan, joʼ ak xqil, chalen li chihabʼ 1935 joʼ aj Testiiw re li Jehobʼa naqataw ru chiʼus naq li teʼkoleʼq chiru li Armagedon aʼanebʼ li kʼiila tenamit li kiril laj Juan saʼ li moy u. Teʼelq saʼ li «xnimal rahilal» arin ajwiʼ saʼ Ruuchichʼochʼ ut kaw xyaabʼebʼ xkux chi xyeebʼal: «Li kolbʼa ibʼ nachalk kaʼajwiʼ rikʼin li qaYos kʼojkʼo saʼ li xnimajwal kʼojaribʼaal, ut rikʼin li Karneer» (Apoc. 7:10, 14). Joʼkan ajwiʼ, li Santil Hu naxkʼut naq ebʼ li poyanam li teʼwakliiq chi yoʼyo saʼ choxa «qʼaxal chaabʼil» wiʼ chik li teʼxkʼul chiru ebʼ li winq li xeʼwank saʼ li qʼe kutan (Heb. 11:40). Li akʼ naʼlebʼ aʼin kiʼekʼasink rehebʼ li hermaan re naq chi sahebʼ saʼ xchʼool teʼoq chi xbʼoqbʼalebʼ li kristiʼaan re naq teʼkʼanjelaq chiru li Jehobʼa ut teʼroybʼeni li junelik yuʼam arin saʼ li Ruuchichʼochʼ.

¹³ Li nekeʼroybʼeni li kʼiila tenamit naxkʼe xsahilebʼ xchʼool. Chʼolchʼo chiruhebʼ naq li Jehobʼa nayehok re wi ebʼ laj kʼanjel chiru li inkʼaʼ nekeʼxtzʼeqtaana teʼwanq saʼ choxa malaj saʼ Ruuchichʼochʼ. Ebʼ li yulbʼilebʼ ru joʼ ajwiʼ li kʼiila tenamit nekeʼxtaw ru naq kaʼajwiʼ saʼ xkʼabʼaʼ li xnimal rusilal li Jehobʼa nekeʼxkʼul li xmaatan xbʼaan naq kixkʼe li Jesukriist re xkolbʼalebʼ (Rom. 3:24).

14. Chirix li chihabʼ 1935, kʼaʼut naq naabʼal yookebʼ xkʼoxlankil chanru ttzʼaqloq ru li propesiiy chirix li kʼiila tenamit?

¹⁴ Chirix li chihabʼ 1935 naq ak xchʼolobʼamank li naʼlebʼ chirix li kʼiila tenamit, naabʼal xeʼok xkʼoxlankil chanru teʼkʼihanq laj paabʼanel li nekeʼroybʼeni wank saʼ li Ruuchichʼochʼ. Jun eetalil, laj Ronald Parkin, kabʼlaju chihabʼ wank chaq re, naq kichʼolobʼamank anihebʼ li kʼiila tenamit, kixjultika: «Saʼebʼ li kutan aʼan saʼ chixjunil li Ruuchichʼochʼ wank tana 56.000 aj puktesinel ut li xkʼihalil maare yulbʼilebʼ ru. Joʼkan naq,chanchan tawiʼ naq li kʼiila tenamit moko jwal nim ta».

15. Chʼolobʼ chanru yook chi tamk li kʼiila tenamit?

¹⁵ Abʼan, chiru naabʼal chihabʼ keʼtaqlaak aj puktesinel saʼ jalan jalanq chi naʼajej, ut rajlal yookebʼ chi kʼihank ebʼ laj Testiiw. Saʼ li chihabʼ 1968 kitiklaak jun li kʼanjel re xtzolbʼal li Santil Hu rikʼin li tasal hu li naxkʼabʼaʼi  La verdad que lleva a vida eterna, maakʼaʼ saʼ Qʼeqchiʼ. Saʼ xkʼabʼaʼ naq saʼ li hu aʼin moko chʼaʼaj ta xtawbʼal ru li yaal li wank saʼ li Santil Hu, naabʼalebʼ li poyanam li chaabʼilebʼ xchʼool xwulak chiruhebʼ xtzolbʼal. Naq ak xnumeʼk kaahibʼ chihabʼ, kixqʼax xyijachil jun miyon li keʼkʼubʼeek xhaʼ. Ut chi miyon keʼkubʼeek xhaʼ saʼ xkʼabʼaʼ naq kijebʼk xwankil li Iglees katoolk saʼ America Latina ut saʼ jalan chik ebʼ li tenamit, ut naq inkʼaʼ chik keʼxram li qakʼanjel saʼ Europa oriental ut saʼ wiibʼ oxibʼ li tenamit re Africa (Is. 60:22). Saʼebʼ li chihabʼ li tojeʼ xeʼnumeʼk, li xmolam li Jehobʼa kixyiibʼ jalan jalanq li kʼanjelobʼaal re xtenqʼankilebʼ li poyanam chi xtawbʼal ru li naxye li Santil Hu. Relik chi yaal, yook chi chʼutubʼaak jun nimla tenamit, anaqwan naxqʼax ru waqxaqibʼ miyon.

16. Bʼar chalenaq li kʼiila tenamit?

¹⁶ Saʼ li moy u, laj Juan kiril naq li kʼiila tenamit chalenaq «saʼ chixjunilebʼ xteepal li xtenamit saʼ ruuchichʼochʼ, yalaq chanru nekeʼilok ut nekeʼaatinak». Li propeet Zacarias kiʼaatinak ajwiʼ chirix jun li propesiiy ut chanchan ajwiʼ aʼin. Kixtzʼiibʼa: «Chiruhebʼ li kutan aʼan lajeebʼ chi winq li jalan jalanq raatinobʼaal ut xtenamitebʼ, teʼxchap chi raqʼ junaq aj Judá ut teʼxye re: «Naqaj xik cherix, xbʼaan naq xqabʼi resil naq li Yos wank eerikʼin», chaʼqebʼ» (Zac. 8:23).

17. Kʼaru yook chi bʼaanumank re xtenqʼankilebʼ li poyanam li chalenaqebʼ saʼ jalan jalanq chi tenamit ut aatinobʼaal?

 ¹⁷ Joʼ aj Testiiw re li Jehobʼa naqanaw naq re xchʼutubʼankilebʼ li poyanam re jalan jalanq chi tenamit, tento naq tpuktesimanq li chaabʼil esil saʼ naabʼal chi aatinobʼaal. Joʼkan naq, numenaq 130 chihabʼ qokik chi xjalbʼal ru li tasal hu chirix li Santil Hu saʼ jalan jalanq chi aatinobʼaal. Ut saʼebʼ li qakutan naqabʼaanu jun li nimla kʼanjel li maajunwa ilbʼil, xbʼaan naq chi siʼeent li aatinobʼaal naqajal wiʼ li tasal hu. Kutan saqenk naq li Jehobʼa yook xbʼaanunkil jun li sachbʼachʼoolej: xchʼutubʼankil li kʼiila tenamit re chixjunil li Ruuchichʼochʼ. Saʼ xkʼabʼaʼ naq rajlal natawmank ebʼ li tasal hu saʼ naabʼal chi aatinobʼaal, li chʼuut aʼin li chalenaq saʼ chixjunil li Ruuchichʼochʼ nakʼanjelak chiru li Jehobʼa saʼ junajil. Ut nawbʼilebʼ ru laj Testiiw xbʼaan naq nekeʼpuktesink chi sa saʼ xchʼoolebʼ ut nekeʼxra ribʼ chiribʼilebʼ ribʼ. Peʼyaal naq chixjunil aʼin naxkawresi li qapaabʼal? (Mat. 24:14; Juan 13:35).

18. a) Joʼ naxye saʼ Isaias 46:10, 11, kʼaʼut inkʼaʼ nasach qachʼool chi rilbʼal naq li Jehobʼa kixkʼe chi tzʼaqlok ru li propesiiy chirix li kʼiila tenamit? b) Kʼaʼut naq moko nekeʼrekʼa ta naq tzʼeqtaananbʼilebʼ li teʼwanq chi junelik saʼ li Ruuchichʼochʼ?

¹⁸ Wank naabʼal xyaalal chiqu re naq sahaq saʼ qachʼool saʼ xkʼabʼaʼ li propesiiy aʼin. Moko nasach ta qachʼool chi rilbʼal naq li Jehobʼa kiroksi jun li nimla naʼlebʼ re xkʼebʼal chi tzʼaqlok ru (taayaabʼasi Isaias 46:10, 11). Li nekeʼokenk saʼ li kʼiila tenamit nekeʼxbʼanyoxi chiru li Yos li roybʼenihomebʼ. Moko nekeʼrekʼa ta naq tzʼeqtaananbʼilebʼ, xbʼaan naq inkʼaʼ keʼyuleʼk ru re kʼanjelak rochbʼen li Jesus saʼ choxa. Li Santil Hu naʼaatinak chirixebʼ li winq ut ixq li inkʼaʼ keʼxtzʼeqtaana li Jehobʼa li keʼbʼeresiik xbʼaan li santil musiqʼej, abʼan moko keʼokenk ta saʼ xyanq li 144.000, joʼ laj Juan laj Kubʼsihomhaʼ ut laj David (Mat. 11:11; Hech. 2:34). Ebʼ aʼan ut naabʼalebʼ chik teʼwakliiq chi yoʼyo saʼ li Chʼinaʼusil Naʼajej saʼ li Ruuchichʼochʼ. Ut rochbʼen li kʼiila tenamit ebʼ aʼan ajwiʼ teʼwanq xhoonal re xkʼutbʼesinkil naq chi anchal xchʼool nekeʼxpaabʼ li Jehobʼa ut nekeʼxkʼe ribʼ rubʼel roq rubʼel ruqʼ.

19. Wi naqataw ru li moy u chirix li kʼiila tenamit, kʼaru tqabʼaanu?

¹⁹ Maajunwa ilbʼil saʼ li Ruuchichʼochʼ naq li Jehobʼa tixchʼutubʼ chi miyon ebʼ li poyanam re chixjunil li tenamit re naq teʼxloqʼoni ru. Maakʼaʼ naxye wi naqoybʼeni wank saʼ choxa malaj saʼ Ruuchichʼochʼ, tento tqatenqʼahebʼ chixjunil li poyanam li tixkʼe ribʼ chiqu re naq teʼokenq saʼ xyanq li kʼiila tenamit, li junchʼol chi karneer (Juan 10:16). Chi seebʼ, li Jehobʼa tixkʼam chaq li nimla rahilal li tixsach ru chi junajwa li xʼawabʼejilal li winq ut li bʼalaqʼil paabʼal, xbʼaan naq jwal ra nekeʼxbʼaanu rehebʼ li poyanam. Chixjunilebʼ li nekeʼokenk saʼ xyanq li kʼiila tenamit teʼxkʼul jun chaqʼal ru maatan: kʼanjelak chiru li Jehobʼa junqʼe junqʼe kutan saʼ li Ruuchichʼochʼ (Apoc. 7:14).