Xinyoʼlaak Santo Domingo li wank República Dominicana, laaʼin li xka rehebʼ li alalbʼej. Linnaʼ linyuwaʼ tzolbʼilebʼ chi chaabʼil ut nekeʼraj naq laaʼo ajwiʼ tzolbʼilaqo chi chaabʼil. Kaahibʼ chihabʼ naq toj maajiʼ ninyoʼlaak keʼxnaw ru wiibʼ oxibʼ rehebʼ laj mormón, keʼsach xchʼool chi rilbʼal naq chaabʼil nekeʼaatinak ut saq ru li xtʼikrebʼ. Moqon, li qajunkabʼal aʼan jun rehebʼ li xbʼeen li kiʼok chi tzʼaqonk saʼ xyanqebʼ laj mormón aran República Dominicana.

Junelik nintzʼaqonk saʼ li kʼanjel li nabʼaanumank saʼ li iklees abʼan li qʼaxal nawulak chiwu aʼan naq nakʼemank xwankil li junkabʼal ut naq chaabʼilaq qanaʼlebʼ. Sa nawekʼa wibʼ wank joʼ aj mormón, joʼkan naq xinye naq tinkʼe chixjunil linhoonal re tzʼaqonk saʼ li xkʼanjelebʼ.

Naq wank 18 chihabʼ we, li qajunkabʼal kiqʼaxonk Estados Unidos re naq tinʼoq saʼ jun li nimla tzolebʼaal. Jun chihabʼ chirix aʼin, ebʼ li wikan aj testiiw re li Jehobʼa, xooʼeʼrulaʼani aran Florida ut xeʼxye qe naq tqochbʼenihebʼ saʼ jun li nimla chʼutam. Jwal xsach inchʼool rilbʼal naq chixjunilebʼ li wankebʼ aran yookebʼ xsikʼbʼal li xraqal li Santil Hu ut nekeʼxtzʼiibʼa li nekeʼrabʼi, joʼkan naq laaʼin xinpatzʼ jun li hu ut xinʼok chi xtzʼiibʼankil li nawabʼi.

Naq xraqeʼk li nimla chʼutam, ebʼ li wikan keʼxye we naq saʼ xkʼabʼaʼ naq nawaj xkʼebʼal chixjunil linhoonal re kʼanjelak chiru li Yos nekeʼraj intenqʼankil re xtzolbʼal chiʼus li Santil Hu. Xwulak chiwu li keʼxye we xbʼaan naq naabʼal ninnaw chirix li Xhuhebʼ laj Mormón abʼan bʼabʼay ajwiʼ ninnaw chirix li Santil Hu.

Naq xeʼsutqʼiik saʼ rochochebʼ moko xqakanabʼ ta aatinak chirix li Santil Hu saʼ selular. Junelik nikineʼxkawresi re naq tinjuntaqʼeeta linpaabʼal rikʼin li naxye li Santil Hu. Moko xeʼxmin ta chiwu xpaabʼankil li yaal.

Wank naabʼal li naʼlebʼ chirix linpaabʼal li ninpaabʼ abʼan relik chi yaal naq moko chʼolchʼo ta chiwu ma naxchap ribʼ rikʼin li naxye li Santil Hu. Li wikanaʼ kixtaqla we li hu Ajsi aawu! 8 re noviembre 1995, kʼubʼanbʼil xbʼaanebʼ laj testiiw re li Jehobʼa, chisaʼ wank wiibʼ li naʼlebʼ li naʼaatinak chirixebʼ laj mormón. Xsach inchʼool rilbʼal naq wank naabʼal li naʼlebʼ li inkʼaʼ ninnaw chirix linpaabʼal. Joʼkan naq, re xjuntaqʼeetankil xinsikʼ li xnaʼajebʼ laj mormón saʼ internet re rilbʼal ma yaal ut xinkʼe reetal naq yaal chixjunil. Joʼkan ajwiʼ, xwulaʼani wiibʼ oxibʼ li naʼaj rehebʼ laj mormón li wank Utah, Estados Unidos.

Junelik xinkʼoxla naq li naxye li Santil Hu ut li Xhuhebʼ laj Mormón juntaqʼeet. Abʼanan naq xinʼok xtzolbʼal li Santil Hu xinkʼe reetal naq moko joʼkan ta. Xbʼaan naq saʼ li Xhuhebʼ laj Mormón saʼ Alma 42:9 naxye naq wank kʼaru nakanaak chi yoʼyo naq nokookamk.

Joʼkan ajwiʼ moko nachʼolaak ta chiwu li nekeʼxpaabʼ xbʼaan naq nekeʼxnimobʼresi xwankil li xtenamit. Jun rehebʼ, aʼan naq nekeʼxye naq li naʼajej Edén wank anaqwan aran Jackson (Misuri, Estados Unidos). Joʼkan ajwiʼ, ebʼ li nekeʼkʼamok bʼe saʼ li paabʼal nekeʼxkʼut naq saʼebʼ li kutan chalk re li Yos troksi li awabʼejilal re Estados Unidos re xjolominkil chixjunil li ruuchichʼochʼ.

Kiʼok inkʼaʼuxl chi xkʼoxlankil kʼaru tkʼulmanq rikʼin lintenamit ut ebʼ li junchʼol chik chi tenamit. Saʼ jun li ewu xinxbʼoq chaq jun li yook xkawresinkil ribʼ chi xkʼebʼal chixjunil li xhoonal re kʼanjelak rikʼinebʼ laj mormón ut xinʼok chi aatinak chirix aʼin. Xinpatzʼ re: «Wi laatenamit tpleetiq raj rikʼin jalan chik tenamit, ma tatpleetiq raj rikʼinebʼ laj mormón li wankebʼ saʼ li tenamit aʼan?». Kisach inchʼool rabʼinkil naq kixye we naq tpleetiq raj. Joʼkan ajwiʼ, xintzʼil rix wiibʼ oxibʼ li naʼlebʼ li nekeʼxkʼut saʼ linpaabʼal ut xinbʼaanu naabʼal li patzʼom rehebʼ li nekeʼkʼamok bʼe saʼ linpaabʼal, kisach inchʼool rabʼinkil naq keʼxye we naq li xsumenkil aʼan muqmukil naʼlebʼ li moqon tnawmanq.

Kʼajoʼ kichʼinaak inchʼool rikʼin li xeʼxye we. Joʼkan naq xinʼok xkʼoxlankil kʼaʼut naq nawaj xkʼebʼal chixjunil linhoonal re kʼanjelak rikʼinebʼ laj mormón, xinkʼe reetal naq chanchan tawiʼ tzʼaqonk saʼ jun li naʼlebʼ re xtenqʼankilebʼ li kristiʼaan joʼkan ajwiʼ nawulak chiwu xbʼaan li wankilal li nakʼemank rehebʼ li nekeʼxbʼaanu li kʼanjel aʼin. Abʼan moko naabʼal ta peʼ ninnaw chirix li Yos. Usta naabʼal sut xinyaabʼasi li Santil Hu moko xwoxloqʼi ta joʼ xkʼulubʼ. Joʼkan ajwiʼ, xinkʼe reetal naq moko ninnaw ta kʼaru naraj li Yos choʼq re li Ruuchichʼochʼ ut ebʼ li poyanam.

Naq xinʼok xtzolbʼal li Santil Hu rikʼinebʼ laj testiiw re li Jehobʼa naabʼal li naʼlebʼ xintzol joʼ: ani xkʼabʼaʼ li Yos, kʼaru naqakʼul naq nokookamk, kʼaru li xkʼanjel li Jesús saʼ li rajom li Yos... Toj aran xinʼok xnawbʼal kʼaru naxkʼut li Santil Hu. Kʼajoʼ nawulak chiwu xwotzbʼal rikʼinebʼ li junchʼol li yookin xtzolbʼal saʼ li Santil Hu! Ak ninnaw naq wank li Yos, abʼan anaqwan naq nintijok chiru li Yos chanchan tawiʼ naq yookin chi aatinak rikʼin jun li chaabʼil amiiw. Saʼ li 12 re julio 2004 kikʼubʼeek inhaʼ joʼ aj testiiw re li Jehobʼa, waqibʼ po chirix aʼin xinʼok xkʼebʼal chixjunil linhoonal saʼ xkʼanjel li Yos.

Chiru oobʼ chihabʼ xinkʼanjelak saʼ li nimla molam rehebʼ laj testiiw re li Jehobʼa aran Brooklyn (Nueva York). Kʼajoʼ xsahoʼk saʼ inchʼool tzʼaqonk re xyiibʼankil li Santil Hu ut jalan chik li tasal hu li naxtenqʼahebʼ li kristiʼaan saʼ chixjunil li ruuchichʼochʼ. Kʼajoʼ xsahil inchʼool xbʼaan naq chiruhebʼ li chihabʼ aʼin xwoksi linyuʼam re xtenqʼankilebʼ li poyanam re xnawbʼal ru li Yos!