Xinyoʼlaak ut xinkʼiik saʼ jun li naʼaj re Roma. Chʼaʼaj chaq linwanjik. Inkʼaʼ xinnaw ru linnaʼ ut moko usta ninkʼam wibʼ rikʼin linyuwaʼ. Xinkʼiik saʼ bʼe.

Naq wank lajeebʼ chihabʼ we xinʼok chi elqʼak. Ut naq xinket 12 chihabʼ aʼan xbʼeen sut naq xinkanabʼ li wochoch. Naabʼal sut linyuwaʼ xinrisi chaq saʼ xnaʼajebʼ li polisiiy. Ninchʼoqink rikʼinebʼ li kristiʼaan ut kʼajoʼ linjosqʼil. Naq wank 14 chihabʼ we xinkanabʼ li wochoch. Ninwank saʼ bʼe ut nawoksi li bʼan li nakanobʼresink u. Saʼ qʼoqyink ninte jun li kaar ut aran ninwark ut eqʼla ninsikʼ bʼar tinʼatinq.

Xintzol elqʼak chiʼus, nawelqʼa li xbʼools ebʼ li kristiʼaan ut saʼ qʼoqyink ninʼok chi elqʼak saʼebʼ li ochoch. Nawbʼil wu chiʼus joʼkan naq xinʼokenk saʼ xyanqebʼ li maaʼusebʼ xnaʼlebʼ ut aʼin kixbʼaanu naq tinʼoq chi elqʼak saʼebʼ li ochoch bʼarwiʼ nekeʼxkʼula li tumin. Xbʼaan naq kʼajoʼ injosqʼil ebʼ li junchʼol nikineʼroxloqʼi. Maajunwa ninkanabʼ linpuubʼ, naq ninwark ninkʼe rubʼel linsokjolom. Xinʼok xyuʼaminkil li xikʼ ilok, roksinkil li bʼan li nakanobʼresink u, elqʼak, muxuk ibʼ ut roksinkil ebʼ li yibʼru aj aatin. Ebʼ li polisiiy junelik yookebʼ insikʼbʼal. Naabʼal chihabʼ xinnumsi saʼ bʼe ut saʼ tzʼalam.

Junsut naq xinʼelk saʼ tzʼalam xinkoho rilbʼal li wikanaʼ. Inkʼaʼ peʼ ninnaw naq li wikanaʼ ut wiibʼ li xyum aʼanebʼ chik aj testiiw re li Jehobʼa. Xineʼxbʼoq re xik saʼ jun rehebʼ li xchʼutam ut xinkʼulubʼa. Naq xoowulak saʼ li Chʼutlebʼaal Kabʼl xinye rehebʼ naq tinkanaaq chire li okebʼaal re rilbʼal ani naʼok ut naʼelk. Wank chaq wikʼin linpuubʼ.

Li chʼutam aʼan kixjal linyuʼam. Xinʼok xkʼoxlankil, jalanebʼ li kristiʼaan aʼin chiru li kʼaynaqin chaq rilbʼalebʼ. Xinkʼe reetal naq seʼseʼ ruhebʼ ut inkʼaʼ nasach saʼ inchʼool li xchaabʼil naʼlebʼ ebʼ laj Testiiw. Ebʼ laj Testiiw jalanebʼ xnaʼlebʼ chiruhebʼ li nekeʼwochbʼeni chaq.

Xinʼok xtzolbʼal li Santil Hu rikʼinebʼ laj Testiiw. Rikʼin li yookin xtzolbʼal xinkʼe reetal naq tento tinjal linyuʼam. Joʼkan naq xinʼok xyuʼaminkil li naxye Proverbios 13:20, Li Santil Hu, Sociedad Bíblica de Guatemala: «Li narochbʼeenihebʼ li chaabʼilebʼ xnaʼlebʼ, tixtaw xnaʼlebʼ; abʼan li nawank rikʼinebʼ li jip, taasachq chi junwaakaj». Xinkʼe reetal naq inkʼaʼ chik tinwanq rikʼinebʼ li maaʼusebʼ xnaʼlebʼ. Usta xchʼaʼajkoʼk chiwu abʼan xinruuk xbʼaanunkil rikʼin li xtenqʼ li Jehobʼa.

Xinjal jalan jalanq li naʼlebʼ saʼ linyuʼam. Xinkanabʼ mayibʼk ut roksinkil li bʼan li nakanobʼresink u. Xinbʼes li wismal, xwisi ebʼ li kaʼxik ut xinkanabʼ xyeebʼal ebʼ li yibʼru aj aatin. Aʼin li xbʼeen sut naq xinkʼe reetal naq ninruuk chik xbʼeresinkil linyuʼam.

Inkʼaʼ nawulak chiwu ilok ru hu ut tzolok. Joʼkan naq xchʼaʼajkoʼk chiwu xkʼebʼal inchʼool xtzolbʼal li Santil Hu. Timil timil xinʼok xraabʼal li Jehobʼa. Joʼkan ajwiʼ xinkʼe reetal naq linchʼool ut linkʼaʼuxl xʼok inchʼiʼchʼiʼinkil. Wank sut moko sa ta nawekʼa wibʼ xbʼaan naq ninkʼoxla naq li Jehobʼa maajunwa tixkuy inmaak. Li naxkʼojobʼ inchʼool saʼ li hoonal aʼan, aʼan naq ninyaabʼasi chanru li Jehobʼa kixkuy xmaak laj David naq kixbʼaanu ebʼ li nimla maak (2 Samuel 11:1–12:13).

Jun chik li naʼlebʼ li kichʼaʼajkoʼk chiwu aʼan xkʼebʼal chi naweʼk li chaabʼil esil chirekabʼlal (Mateo 28:19, 20). Xbʼaan naq ninxiwak xtawbʼal junaq li kristiʼaan li xinrahobʼtesi chaq. Timil timil xinqʼax ru linxiw ut nawulak chik chiwu xtenqʼankilebʼ li junchʼol re naq teʼxtzol chirix li Jehobʼa, li nakuyuk maak.

Xtzolbʼal chirix li Jehobʼa kixkol linyuʼam. Naabʼalebʼ li nekeʼwochbʼeni chaq wankebʼ saʼ tzʼalam malaj kamenaqebʼ chik. Abʼan laaʼin sa saʼ inchʼool ut wank chik woybʼenihom. Xintzol xkubʼsinkil wibʼ, abʼink ut xkuybʼal injosqʼil. Joʼkan naq sa chik ninkʼam wibʼ rikʼinebʼ li nikineʼrochbʼeni. Anaqwan sumsukin rikʼin li xCarmen, jun li chaabʼil ixq. Ut saʼ wiibʼal nawulak chiqu xtenqʼankilebʼ li junchʼol chi tzolok chirix li Santil Hu.

Yaal ajwiʼ, anaqwan inkʼaʼ chik ninʼelqʼak. Wank sut ninkʼanjelak saʼebʼ li ochoch bʼarwiʼ nekeʼxkʼula ebʼ li tumin abʼan moko re elqʼak ta re bʼan xsaabʼesinkil.